Wase 31
Na veika sa vakatakilai vei Josefa Simici na Parofita, me tukuni vei Tomasi B. Masi ena Sepiteba, 1830. Oqo ni se qai oti sara toka ga e dua na koniferedi ni Lotu (raica na ikau ni wase 30). A se qai papitaiso ga ena dua na gauna ena itekivu ni vula ko Tomasi B. Masi ka sa tabaki oti me dua na italatala qase ni Lotu ni bera ni vakatakilai mai na veika oqo.
1–6, Sa kacivi ko Tomasi B. Masi me vunautaka na kosipeli ka sa vakadeitaki vua na nodratou tiko vinaka na nona matavuvale; 7–13, Sa vakasalataki me dau vosota, dau masu tiko ga, ka muria na Dauveivakacegui.
1 I Tomasi na luvequ, ko sa kalougata ena vuku ni nomu vakabauta ena noqu cakacaka.
2 Raica, ko sa kune rarawa vakavuqa ena vukudratou na nomu matavuvale; ia au na vakalougatataki iko kei na nomu matavuvale, io, ko ira na luvemu; ka na qai yaco mai na siga era na vakabauta kina ka kila na ka dina, ka duavata kei iko ena noqu lotu.
3 Laveta cake na yalomu ka reki, ni sa yaco mai na gauna mo vakayacora kina na nomu ilesilesi; ka na sereki na wa ni yamemu, ia mo vunautaka yani na itukutuku rekitaki me ra marau vakalevu kina na itabatamata oqo.
4 Ia mo vunautaka yani na veika sa vakatakilai vei Josefa Simici Lailai na noqu italai. Mo tekivu vunau sara ga ena gauna oqo ka lako yani, io mo ia na tatamusuki ena were sa matua tu, ni bera ni vakamai.
5 O koya mo curumaka kina na nomu isele takelo ena yalomu taucoko, ia ena vosoti ka bokoci na nomu ivalavala ca, ia ko na colata e vuqa na ivau sila e dakumu, io sa kilikili me soli vua na tamata daucakacaka na kena isau. O koya, ena bula kina na nomu matavuvale.
6 Raica au sa kaya vakaidina vei iko, mo biuti iratou vakalekaleka mada ka la’ki vunautaka na noqu vosa, ia au na vakarautaka e dua na tikina me nodratou.
7 Raica au na vakauqeta na lomadra na tamata me ra vakabauti iko. Kau na tauyavutaka e dua na lotu mai na ligamu;
8 Ia mo na vaqaqacotaki ira ka vakarautaki ira ki na gauna me ra na vakasoqoni kina.
9 Mo vosota sara na veika rarawa, io mo kakua ni vosa vakacacataki ira era sa vosa vakacacani iko. Mo tudei sara ka veiliutaki ena yalomalua ena nomu vale.
10 Raica ko na vaka na vuniwai vei ira na isoqosoqo lewe ni lotu, ia ko sa sega ni yaga vei ira na kai vuravura, ni ra sa sega ni vakabauti iko.
11 Mo lako yani ki na vanua ka’u sa talai iko kina, ia ena vakatakila vei iko na Dauveivakacegui na vanua mo lako kina kei na veika mo la’ki kitaka.
12 Mo daumasu tiko ga mo kakua ni rawai ena veitemaki, ka vakayalia na kemu isau.
13 Mo yalodina tiko ga me yacova na ivakataotioti, raica au sa tiko vata kei iko. Na vosa oqo e sega ni nona yalayala e dua na tamata, se nodra yalayala na tamata, raica oqo na ka au sa yalataka koi au ko Jisu Karisito na nomu Dauveivueti, me vaka na lewa i Tamaqu. Emeni.