E dua na veivosaki ena vakarokoroko vata kei na Kalou ena gauna vata oqori ena vakavinavinaka kina e dua na tamata ka kerea na veivakalougatataki. E dau vagolei na masu vua na Tamada Vakalomalagi ena yacai Jisu Karisito. Na masu e rawa ni cavuti me rogolevu se me cavuti lo ga. Na nona vakanananu talega e dua na tamata e rawa ni sa nona masu kevaka e vagolei vua na Kalou. Na nodra sere na yalododonu e rawa talega ni nodra masu vua na Kalou, (V&V 25:12).
E sega ni inaki ni masu me veisautaka na lomana na Kalou, ia me vakadeitaka ga vei keda kei ira na tani na veivakalougatataki sa vakarautaka tu na Kalou me baleti keda, ia me da kerea me rawa ni qai yaco mai vei keda.
Eda masu vei Tamada ena yacai Karisito (Joni 14:13–14; 16:23–24). Ena rawa vakaidina ni da masu ena yacai Karisito kevaka e tautauvata kei Karisito na noda gagadre (Joni 15:7; V&V 46:30). Eda qai kerea na veika e dodonu ka na rawa vua na Kalou me solia vei keda (3 Nif. 18:20). Eso na masu ena sega ga ni saumi baleta ni ra sega ni vaka na gagadre i Karisito ia era basika mai ena lomakocokoco vakatamata (Jeme. 4:3; V&V 46:9). E dina sara kevaka eda kerea vua na Kalou na veika e sega ni dodonu, ena vuki me da cudruvi kina (V&V 88:65).