Tasal 33
K’utb’esinb’il na’leb’ k’eeb’il rik’in xtz’uumal re laj Jose Smith li Profeet, re laj Ezra Thayre ut laj Northrop Sweet, sa’ Fayette, Nueva York, Octubre 1830. Sa’ xtikib’ankil li k’utb’esinb’il na’leb’ a’in, lix tz’iib’anb’il esil laj Jose Smith naxye xyaalal naq “li Qaawa’ … junelik wan xch’ool chixtzolb’al li ani nasik’ok chi yalb’il xq’e rik’in paab’aal.”
1–4, Eb’ laj k’anjelanel b’oqb’ileb’ chixch’olob’ankil li evangelio sa’ li xjunlaju hoonal; 5–6, Li Iglees ak xaqab’anb’il, ut eb’ li sik’b’ileb’ ru tento te’ch’utub’aaq; 7–10, Jalomaq eek’a’uxl, xb’aan naq xnach’ok chaq li awa’b’ejihom re choxa; 11–15, Li Iglees kab’lanb’il sa’ xb’een li saqoonaq re li evangelio; 16–18, Kawresihomaq eerib’ choq’ re lix k’ulunik li B’eelomej.
1 K’ehomaq reetal, ninye eere, ex inmoos Ezra ut Northrop, tehomaq lee xik ut chex’ab’inq chiru lix yaab’ xkux li Qaawa’ lee Dios, li yo’yo ut nim xwankil li raatin, q’es wi’chik ru chiru jun yok’leb’ ch’iich’ ka’pak’al xq’esnal, li najache’ wi’ ru xb’asalil li b’aqelej ut li sulutz, li aamej ut li musiq’ej, ut naxtz’il rix lix k’oxlahom ut li rajom li ch’oolej.
2 Xb’aan naq chi yaal, chi yaal, ninye eere naq b’oqb’ilex chixtaqsinkil xyaab’ eekux jo’ rik’in xyaab’ jun trompeet, ut chixch’olob’ankil lin evangelio chiru jun tasal tenamit yokotzinb’il ut po’jenaq xch’ool.
3 Xb’aan naq k’ehomaq reetal, ak q’an ru li awimq choq’ re q’ole’k; ut ak xtaw li xjunlaju hoonal, ut li roso’jikil sut tinb’oqeb’ wi’ aj k’anjenel sa’ lin awimq.
4 Ut ak xpo’e’ ru lin awimq, li junjunq raqal; ut maajun wan li nab’aanunk re li us, ka’ajwi’ junjunq ajwi’; ut eb’ a’an neke’sach xna’leb’ naab’al sut xb’aan li tijok chi tojb’il, ut po’jenaqeb’ xk’a’uxl chixjunileb’.
5 Ut chi yaal, chi yaal, ninye eere, naq li iglees a’in kinxaqab’ ut kinb’oq chaq sa’ li yamyookil ch’och’.
6 Ut jo’ka’in ajwi’ teb’inch’utub’ li sik’b’ileb’ ru inb’aan chalen chaq sa’ xkaajachalil li ruchich’och’, jo’ k’ihaleb’ ajwi’ li te’paab’anq we, ut te’ab’inq chiru xyaab’ inkux.
7 Relik chi yaal, ninye chi tz’aqal yaal eere, naq ak q’an ru li awimq choq’ re q’ole’k; jo’kan ut, ch’ikomaq lee setleb’ ch’iich’, ut q’olonqex chi anchal eemetz’ew, eek’a’uxl, ut eekawilal.
8 Tehomaq xtz’uumal eere ut taanujaq, ut tex’ok chanchan ajwi’ laj Nefi najter, li ki’el chaq Jerusalen chiru li yamyookil ch’och’.
9 Relik chi yaal, tehomaq xtz’uumal eere ut meekotz eemetz’ew, ut taatub’laaq li q’olom cherix, xb’aan naq ilomaq, laa’in wankin eerik’in.
10 Relik chi yaal, tehomaq xtz’uumal eere ut taanujaq, ut cheye: Chejal eek’a’uxl, chejal eek’a’uxl, ut chekawresi lix b’e li Qaawa’, ut chetiikob’resi ru li ruq’ xb’e, xb’aan naq taanach’oq chaq li awa’b’ejihom re choxa;
11 Relik chi yaal, chejal eek’a’uxl ut chikub’eeq eeha’, chejunjunqalex, choq’ re jun risinkil lee maak; relik chi yaal, chikub’eeq eeha’ rik’in ajwi’ li ha’, toja’ ut naq nachal li kub’iha’ re xam ut re li Santil Musiq’ej.
12 K’ehomaq reetal, chi yaal, chi yaal, ninye eere, a’in lin evangelio; ut chijultiko’q eere naq te’wanq xpaab’aal chiwix, malaj ut maamin te’ruuq chi kole’k;
13 Ut sa’ xb’een li saqoonaq a’in tinkab’la lin iglees; relik chi yaal, sa’ xb’een li saqoonaq a’in kab’lanb’ilex laa’ex, ut wi texkanaaq, li rokeb’aal xb’alb’a ink’a’ taanumtaaq sa’ eeb’een.
14 Ut taajultiko’q eere li jar raqal ut sumwank re li iglees, re xpaab’ankileb’.
15 Ut yalaq ani wan xpaab’aal teek’ojob’ sa’ lin iglees, rik’in xk’eeb’al li uq’ej, ut laa’in tink’e li maatan re li Santil Musiq’ej sa’ xb’eeneb’.
16 Ut lix Hu laj Mormon ut eb’ li santil tz’iib’anb’il hu k’eeb’ileb’ inb’aan choq’ eetzolb’al; ut lix wankil lin Musiq’ naxk’e xyu’am chixjunil li k’a’aq re ru.
17 Jo’kan ut, tiikaqex chi paab’ank, junelik chextijoq, chi wanq eexam chi k’uub’anb’il ut chi lochlo, ut chi wan xya’al eerik’in, re naq kawalaqex sa’ xk’ulunik li B’eelomej—
18 Xb’aan naq k’ehomaq reetal, chi yaal, chi yaal, ninye eere, naq tink’ulunq chi seeb’. Chi jo’kan. Amen.