Benneg 4
Paltiing a naited babaen ni Joseph Smith a Propeta iti amana, ni Joseph Smith, Sr., iti Harmony, Pennsylvania, idi Pebrero 1829 (History of the Church, 1:28).
1–4, Natured a panagserbi ti nangisalakan kadagiti ministro ti Apo; 5–6, Nadiosan nga aw-awid ti namagbalin kadakuada a maikari iti panagserbi; 7, Nasken a dagiti bambanag ti Dios ti sapsapulento.
1 Ita adtoy, dandanin dumteng ti nakaskasdaaw nga aramid kadagiti annak ti tattao.
2 Ngarud, O dakayo a sumrek nga agserbi iti Dios, penken nga agserbikayo kenkuana iti amin a puso, kabaelan, panunot ken pigsayo, tapno agtakderkayo nga awan pakababalawanna iti sango ti Dios iti maudi nga aldaw.
3 Ngarud, no adda tarigagayyo nga agserbi iti Dios maawagankayo nga agtrabaho;
4 Ta adtoy purawen ti kataltalonan a pagapitan; ket imutektekam, isu a mangipakan iti kumpayna iti amin a kabaelanna, isunto met laeng ti makaidulin tapno saanto a mapukaw, ngem mangidateng iti pannakaisalakan ti kararuana;
5 Ket pammati, namnama, kaasi ken ayat, a naitalimudok ti imatangna iti gloria ti Dios, ti mangikari kenkuana iti aramid.
6 Laglagipen ti pammati, saguday, pannakaammo, panagteppel, kinaanus, nainkabsatan a kinaimbag, kinadiosan, kinamanangngaasi, kinapakumbaba, kinapasnek.
7 Dumawatka, ket umawatkanto; agtuktokka, ket mailukatto kenka. Amen.