Benneg 56
Paltiing a naited babaen ni Joseph Smith a Propeta, iti Kirtland, Ohio, idi Hunio 1831 (History of the Church, 1:186–188). Saan a marugian ni Ezra Thayre, ti natudingan nga agdaliasat nga agturong iti Missouri a kadua ni Thomas B. Marsh (kitaen ti benneg 52:22), ti misionna idi sisasaganan ti naud-udi. Saan a sisasagana ni Elder Thayre nga agtuloy iti panagdaliasatna gapu iti pannakairamanna kadagiti parikut iti Thompson, Ohio (kitaen ti paulo ti benneg 54). Sinungbatan ti Apo ti saludsod ti Propeta maipanggep iti dayta a banag babaen ti pannangtedna iti daytoy a paltiing.
1–2, Nasken a bagkaten dagiti Santo ti krusda ket surotenda ti Apo tapno magun-odda ti pannakaisalakan; 3–13, Agbilin ken mangwaswas iti bilin ti Apo, ket mapapanaw dagiti nasukir; 14–17, Ay-ayto dagiti baknang a di tumulong kadagiti nakurapay, ken ay-ayto dagiti nakurapay a di nasneban ti puspusoda; 18–20, Nagasat dagiti nakurapay a natarnaw ti panagpuspusoda, ta tawidendanto ti daga.
1 Imdenganyo, O tattao a mamatpati iti naganko, kuna ti Apo a Diosyo; ta adtoy, maaronan ti pungtotko kadagiti nasukir, ket maammuandanto ti imak ken ti pungtotko, iti aldaw ti isasarungkar ken ti pungtot kadagiti pagilian.
2 Ket isu a di mangbagkat iti krusna ken sumurot kaniak, ken mangtungpal kadagiti bilinko, saanto a maisalakan.
3 Adtoy, siak, ti Apo, agbilin; ket isu a di agtungpal maisinanto iti naituding a panawenko, kalpasan ti panagbilinko ket saan a natungpal ti bilinko.
4 Gapuna siak, ti Apo, agbilin ken mangwaswas, a kas iti namnamaek a nasayaat; ket amin dagitoy sungbatanto iti ulo dagiti nasukir, kuna ti Apo.
5 Gapuna, waswasek ti bilin a naited kadagiti katulongak a da Thomas B. Marsh ken Ezra Thayre, ket ikkak iti baro a bilin ni katulongak a Thomas, nga agdaliasat a dagus nga agturong iti daga ti Missouri, ket sumurot met kenkuana ni katulongak a Selah J. Griffin.
6 Ta adtoy, winaswasko ti bilin nga intedko kadagiti katulongak a da Selah J. Griffin ken Newel Knight, a bunga ti kinasukir dagiti taok nga adda iti Thompson, ken dagiti yaalsada.
7 Gapuna, pagbatienyo ni katulongak a Newel Knight kadakuada; ket mapan ti kas iti kaadu ti mapan, a napnuan kaniak, ket idauluanna ida iti daga nga intudingko.
8 Ket manen, pudno kunak kadakayo, a nasken nga agbabawi ni katulongak nga Ezra Thayre iti kinapannakkelna, ken iti kinapaidamna, ket surotenna ti immuna a bilin nga intedko kenkuana maipanggep iti lugar a pagnaedanna.
9 Ket no aramidenna daytoy, iti kaawan ti naaramid a panagbibingay iti daga, matudinganto pay laeng a mapan iti daga ti Missouri;
10 No saan awatennanto ti kuarta nga imbayadna, ket panawannanto ti lugar, ken maisinanto iti simbaan, kuna ti Apo a Dios dagiti pangen;
11 Ket nupay mapukaw ti langit ken ti daga, saanto a mapukaw dagiti balikasko, ngem matungpaldanto.
12 Ket no nasken a bayadan ni katulongak a Joseph Smith, Jun., ti kuarta, adtoy, siak, ti Apo, ti mangbayad manen kenkuana iti daga ti Missouri, tapno magunggonaanto manen dagiti awatenna a maibatay iti aramidda;
13 Ta umawatdanto iti maibatay iti aramidenda, a kas kadagiti daga a tawidenda.
14 Adtoy, kastoy ti kuna ti Apo kadagiti taok—adu a banag ti aramiden ken ibabawiyo; ta adtoy, dimmanon kaniak dagiti basolyo, ket saanda a mapakawan, gapu ta pabagbagaankayo iti bukodyo a wagas.
15 Ket saan a mapnek ti puspusoyo. Ket diyo tungpalen ti kinapudno, ngem maayatankayo iti kinikillo nga aramid.
16 Ay-aykayo pay a baknang a tattao, a dinto mangted iti kinabaknangyo kadagiti nakurapay, ta rukerento ti kinabaknangyo dagiti kararuayo; ket daytoyto ti pagleddaanganyo iti aldaw ti isasarungkar, ken ti panangukom, ken ti pungtot: Limmabasen ti panagani, naggibusen ti kalgaw, ket saan a naisalakan ti kararuak!
17 Ay-aykayo pay a nakurapay a tattao, a saan a nasneban ti puspusoda, ken saan a napnuan babawi dagiti espirituda, ken saan a mapnek dagiti buksitda, ken saan a mangikayakay iti im-imada kadagiti sanikua dagiti sabali a tao, nga addaan iti mata a napno iti kinaagum, ken saan nga agtrabaho iti bukodyo nga ima!
18 Ngem nagasat dagiti nakurapay a natarnaw ti pusoda, a nasneban ti puspusoda, ken napnuan babawi dagiti espirituda, ta makitadanto ti pagarian ti Dios a dumteng iti bileg ken naindaklan a dayag a pakaisalakananda; ta kukuadanto ti taba ti daga.
19 Ta adtoy, umayto ti Apo, ket itugotnanto ti pangsupapakna, ket gunggonaannanto ti tunggal tao, ket agrag-onto dagiti nakurapay;
20 Ket tawidento dagiti kaputotanda ti daga kadagiti agsasaruno a kaputotan, iti agnanayon nga awan inggana. Ket ita igibusko ti panagsao kadakayo. Pudno a kasta. Amen.