Vaega 6
Faaaliga na tuuina mai ia Iosefa Samita le Perofeta ma Oliva Kaotui, i Haramoni, Penisilevania, Aperila 1829. Ua amata e Oliva Kaotui lana galuega o le tusiupu, i le faaliliuga o le Tusi a Mamona, i le aso 7 o Aperila, 1829. Ua uma ona ia maua o se faaaliga paia i le moni o le molimau a le Perofeta e uiga i papatusi ua togitogia ai i luga le talafaamaumau o le Tusi a Mamona. Na ole atu le Perofeta i le Alii e ala i le Urima ma le Tumema ma ia maua mai ai le tali lenei.
1–6, E maua e e e galulue i le fanua o le Alii le olataga; 7–13, E leai se meaalofa e sili atu nai lo le meaalofa o le olataga; 14–27, O se molimau o le upumoni e maua e ala mai i le mana o le Agaga; 28–37, Ia tepa taulai ia Keriso, ma fai mea lelei e le aunoa.
1 Ua Lē pine ona oo mai o se galuega tele ma le ofoofogia i le fanauga a tagata.
2 Faauta, o A’u o le Atua; ia uai mai i la’u upu, lea ua vave ma mamana, ua sili atu le maai nai lo se pelu mata-lua, e vavae ai sooga o ivi ma le su; o lea ia uai mai ai i a’u upu.
3 Faauta, ua sinasina le fanua ua saunia e selesele; o lea, ai se e fia selesele, ia tuu ia te ia e sasau atu lana selesaito ma lona malosi, ma selesele mai manū o ao, ina ia mafai ona ia teu mo lona agaga le olataga tumau e faavavau i le malo o le Atua.
4 Ioe, ai se tasi e sasau atu lana selesaito ma selesele mai, o ia lava lea ua valaaulia e le Atua.
5 O lea, afai tou te ole mai ia te a’u o le a outou mauaina; afai tou te tuitui mai o le a tatala atu ia te outou.
6 O lenei, ona ua oulua ole mai, faauta, Ou te fai atu ia te oulua, tausi i a’u poloaiga, ma saili e aumai i luma ma faatu le faamoemoe o Siona.
7 Aua le saili mo ’oa ae mo le poto, ma faauta, o le a fofola atu ia te oe mealilo a le Atua, ona faamauoaina ai lea o oe. Faauta, o ia o lē ua ia maua le ola e faavavau, ua mauoa o ia.
8 E moni, e moni, Ou te fai atu ia te oe, e pei ona e manao mai ai ia te a’u, o le a faapea lava ona tuu atu ia te oe; ma afai e te manao i ai, o le a avea oe ma ala o le faia o mea lelei e tele i le tupulaga lenei.
9 Ia leai se mea e te fai atu i lenei tupulaga tau lava o le salamo; tausi i a’u poloaiga, ma fesoasoani e aumai i luma la’u galuega, e tusa ma a’u poloaiga, ma o le a faamanuiaina oe.
10 Faauta, ua ia te oe se meaalofa, ma amuia oe ona o lau meaalofa. Ia manatua ua paia ma ua sau mai lugā—
11 Ma afai e te ole atu, o le a e iloa mealilo ua silisili ma ofoofogia; o lea ia e faaaoga ai lau meaalofa, ina ia mafai ona e iloa o mealilo, ina ia mafai ona e aumai o le toatele i le malamalama o le upumoni, ioe, e faatalitonu ai i latou i le sese o o latou ala.
12 Aua le faailoa atu lau meaalofa i se tasi vagana ai i latou o e o lou faatuatuaga. Aua le faatauvaaina mea paia.
13 Afai e te faia mea lelei, ioe, ma tumau faamaoni e oo i le iuga, o le a faaolaina oe i le malo o le Atua, o le meaalofa aupito silisili lea o meaalofa uma a le Atua; ona ua leai se meaalofa e sili atu nai lo le meaalofa o le olataga.
14 E moni, e moni, Ou te fai atu ia te oe, amuia oe ona o mea ua e faia; aua sa e ole mai ia te a’u, ma faauta, o le tele o taimi na e ole mai ai na e maua ai faatonuga mai lo’u Agaga. A na fai e lē faapea, po ua e lē oo mai i le mea ua e i ai i le taimi nei.
15 Faauta, ua e iloa na e ole mai ia te a’u ma sa Ou faapupulaina lou mafaufau; ma o lenei ua Ou tau atu ia te oe nei mea ina ia mafai ona e iloa ai sa faapupulaina oe e le Agaga o le upumoni;
16 Ioe, ua Ou tau atu ia te oe, ina ia mafai ona e iloa e leai lava se tasi ae ua nao le Atua ua ia silafia ou mafaufauga ma faamoemoega o lou loto.
17 Ua Ou tau atu ia te oe nei mea o se molimau ia te oe—o upu po o le galuega na e tusia ua moni.
18 O lea ia e filiga; tulai i tafatafa o la’u auauna, o Iosefa, ma le faamaoni, i soo se tulaga faigata atonu e i ai o ia, ona o le afioga.
19 Timai atu ia te ia i ona sese, ma ia e talia foi timaiga mai ia te ia. Ia onosai; ia faamamalu; ia faautauta; ia ia te oe le faapalepale, faatuatua, faamoemoe ma le alofa mama.
20 Faauta, o oe o Oliva, ma ua Ou tautala atu ia te oe ona o ou manao; o lea ia teu nei upu i lou loto. Ia e faamaoni ma filiga i le tausiga o poloaiga a le Atua, ma o le a Ou siomia ai oe i lima o lo’u alofa.
21 Faauta, o A’u o Iesu Keriso, o le Atalii o le Atua. O A’u lava lea na sau i lo’u lava nuu, ae sa lē talia a’u e lo’u lava nuu. O A’u o le malamalama ua susulu i le pouliuli, ae ua lē malamalama i ai le pouliuli.
22 E moni, e moni, Ou te fai atu ia te oe, afai e te manao i se isi molimau, liliu ane lou mafaufau i le po na e tagi mai ai ia te a’u i lou loto, ina ia mafai ona e iloa e uiga i le moni o nei mea.
23 Ou te lei tautala atu ea le filemu i lou mafaufau e uiga i le mataupu? O le a se molimau sili atu e mafai ona e maua mai lo lena mai le Atua?
24 Ma o lenei, faauta, ua e maua se molimau; aua afai ua Ou tau atu ia te oe mea e leai se tagata na te iloaina, ua e lē mauaina ea se molimau?
25 Ma, faauta, Ou te tuu atu ia te oe se meaalofa, pe afai e te manao i ai mai ia te a’u, e faaliliu, e pei lava o la’u auauna o Iosefa.
26 E moni, e moni, Ou te fai atu ia te oe, o loo i ai ni talafaamaumau ua i ai i totonu le tele o la’u talalelei, sa taofia ona o le amioleaga o tagata;
27 Ma o lenei Ou te poloai atu ia te oe, afai ua ia te oe manaoga lelei—se manao lea ia teu mo oe lava ni ’oa i le lagi—ona mafai lea ona e fesoasoani e aumai i le malamalama, ma lau meaalofa, o vaega na o a’u tusitusiga paia lea sa natia ona o le amioletonu.
28 Ma o lenei, faauta, Ou te tuu atu ia te oe, ma la’u auauna foi o Iosefa, ki o lenei meaalofa, o le a aumai ai i le malamalama lenei auaunaga; ma o fofoga o molimau e toalua pe toatolu e faamautu ai upu uma.
29 E moni, e moni, Ou te fai atu ia te oulua, afai latou te teena a’u upu, ma le vaega lenei o la’u talalelei ma la’u auaunaga, amuia oulua, ona e lē mafai ona sili atu se mea latou te faia ia te oulua nai lo ia te a’u.
30 Ma e tusa pe latou te faia ia te oulua e pei lava ona sa latou faia ia te a’u, amuia oulua, ona o le a oulua mau faatasi ma a’u i le mamalu.
31 Ae afai latou te lē teena a’u upu, ia o le a faamautuina i le molimau o le a tuu atu, amuia i latou, ma ona oulua maua ai lea o le olioli i le fua o a oulua galuega.
32 E moni, e moni, Ou te fai atu ia te oulua, e pei ona ou fai atu i o’u soo, o le mea e potopoto faatasi ai le toalua po o le toatolu i lo’u igoa, e faatatau i se mea e tasi, faauta, o iina o le a Ou i ai i le lotolotoi o i latou—e faapei lava ona Ou i ai ia te oulua.
33 Aua le fefefe e fai mea lelei, o’u atalii e, auā o soo se mea e te lua lulu, o lena foi o le a oulua selesele; o lea, afai lua te luluina le lelei o le a oulua seleseleina foi le lelei mo lo oulua taui.
34 O lea, aua le matatau, le lafu itiiti e; fai mea lelei; ia tuu le lalolagi ma seoli e aufaatasi faasaga mai ia te oulua, auā afai ua lua atia’e i luga o la’u papa, e lē mafai ona latou manumalo.
35 Faauta, ou te lē tausalaina oulua; o i o oulua ala ma ia lē toe agasala; fai ma le mamalu le galuega ua Ou poloaiina ai oulua.
36 Vaai mai ia te a’u i mafaufauga uma; aua le masalosalo, aua le fefefe.
37 Faauta i manu’a ua tuia ai lo’u itu, ma tulaga fao foi i o’u lima ma o’u vae; ia faamaoni, tausi i a’u poloaiga, ma o le a oulua mautofi ai i le malo o le lagi. Amene.