Benneg 77
Paltiing a naited ken ni Joseph Smith a Propeta, iti Hiram, Ohio, idi Marso 1832 (History of the Church, 1:253–255). Insurat ti Propeta, “Mainaig iti pannakaipatarus dagiti Nasantuan a Kasuratan, a naawatko ti sumaganad a palawag iti Apocalipsis ni San Juan” (History of the Church, 1:253).
1–4, Adda espiritu dagiti ayup ket agtaengdanto iti agnanayon a ragsak iti saan a matay a daga; 5–7, Agpaut daytoy a daga iti 7,000 a tawen; 8–10, Nadumaduma nga anghel ti mangisubli iti ebanghelio ken agserbi iti daga; 11, Ti pannakapatalged dagiti 144,000; 12–14, Umay ni Cristo iti rugi ti maikapito ribu a tawen; 15, Duanto a propeta ti tumanor iti pagilian dagiti Hudio.
1 Saludsod —Ania ti sarming a baybay a naagapad ni Juan, iti maikapat a kapitulo, ken maikanem a bersikulo ti Apocalipsis?Sungbat—Isu ti daga, iti naitan-ok, saan a matay, ken agnanayon a kasasaadna.
2 Saludsod—Ania ti panagawattayo iti uppat nga ayup a naagapad iti isu met la a bersikulo?Sungbat—Pangngarig dagitoy a pagsasao, nga inaramat ti Mammaltiing, ni Juan, iti panangiladawanna iti langit, ti paraiso ti Dios, ti ragsak ti tao, ken dagiti ayup, ken dagiti banag nga agkarayam, ken dagiti tumatayab iti tangatang; dayta naespirituan a kalanglanga dayta naindagaan; ken dayta naindagaan a kalanglanga dayta naespirituan; ti espiritu ti tao a kalanglanga ti katataona, a kas met iti espiritu ti ayup, ken amin a parsua a pinarsua ti Dios.
3 Saludsod—Agpatingga kadi laeng kadagiti agduduma nga ayup dagiti uppat nga ayup, wenno ibagianda kadi dagiti kita wenno klase?Sungbat—Agpatinggada iti uppat nga agduduma nga ayup, a naipakita ken ni Juan, a mangibagi iti dayag dagiti kita dagiti banag iti naikari nga urnosda wenno agpang ti pannakaparsuada, iti pakaragsakanda iti agnanayon a ragsak.
4 Saludsod—Ania ti panagawattayo kadagiti mata ken payak nga adda kadagiti ayup?Sungbat—Ibagian dagiti matada ti silaw ken pannakaammo, a, napnoda iti pannakaammo; ket ibagian dagiti payakda ti bileg, nga aggunay, nga agtignay, kdpy.
5 Saludsod—Ania ti panagawattayo kadagiti uppat ken duapulo nga elder, a naagapad ni Juan?Sungbat—Maawatantayo a dagitoy elder a nakita ni Juan, elderda a napudno iti aramid iti panagserbi ken natayda; a kameng dagiti pito a simbaan, ken adda idi iti paraiso ti Dios.
6 Saludod—Ania ti panagawattayo iti libro a nakita ni Juan, a naserraan iti likud iti pito a timbre?Sungbat—Maawatantayo a linaonna ti naipalgak a pagayatan, dagiti kinadatdatlag, ken dagiti aramid ti Dios; dagiti naitalimeng a banag iti panangimatonna maipanggep iti daytoy a daga bayat ti pito ribu a tawen a kaaddana, wenno naindagaan a kaaddana.
7 Saludsod—Ania ti panagawattayo kadagiti pito a timbre a nakarikpanna?Sungbat—Maawatantayo a linaon ti umuna a timbre dagiti banag iti umuna a sangaribu a tawen, ken kasta met a ti maikadua iti maikadua a ribu a tawen, ken kasta met dagiti sumaganad agingga iti maikapito.
8 Saludsod—Ania ti panagawattayo kadagiti uppat nga anghel, a naagapad iti maikapito a kapitulo ken umuna a bersikulo ti Apocalipsis?Sungbat—Maawatantayo nga uppatda nga anghel nga imbaon ti Dios, a nakaitedan ti bileg iti uppat a paset ti daga, tapno mangisalakan iti biag ken tapno mangdadael; dagitoy dagiti addaan iti agnanayon nga ikumitda nga ipakaammoda iti tunggal pagilian, kakabsat, pagsasao, ken tattao; addaan iti bileg a mangrikep kadagiti langit, a mangpatalged iti biag, wenno mangigarangugong kadagiti lugar ti kasipngetan.
9 Saludsod—Ania ti panagawattayo iti anghel nga agpangato manipud iti daya, iti maikapito a kapitulo ken maikadua a bersikulo ti Apocalipsis?Sungbat—Maawatantayo a ti anghel nga agpangato manipud iti daya ti pakaitedan iti pammatalged ti sibibiag a Dios kadagiti sangapulo-ket-dua a tribu ti Israel; gapuna, yararawna kadagiti uppat nga anghel nga addaan iti agnanayon nga ebanghelio, a kunana: Diyo dangran ti daga, uray pay ti baybay, wenno dagiti kayo, agingga a mapatalgedantayo dagiti katulongan ti Diostayo iti mugingda. Ket, no awatenyo, isu daytoy ni Elias nga umay mangummong a sangsangkamaysa kadagiti tribu ti Israel ken mangisubli kadagiti amin a banag.
10 Saludsod—Anianto nga oras ti pannakatungpal dagiti banag a naagapad iti daytoy a kapitulo?Sungbat—Matungpaldanto iti maikanem a ribu a tawen, wenno iti pannakalukat ti maikanem a timbre.
11 Saludsod—Ania ti panagawattayo iti pannakatimbre dagiti sangagasut ken uppat-a-pulo a ribu, manipud kadagiti amin a tribu ti Israel—sangapulo-ket-dua a ribu manipud iti tunggal tribu?Sungbat—Maawatantayo a nangato a saserdote dagiti natimbrean, a naordenan iti nasantuan nga urnos ti Dios, a mangiwanwan iti agnanayon nga ebanghelio; ta isuda dagiti naordenan manipud iti tunggal pagilian, kakabsat, pagsasao, ken tattao, babaen dagiti anghel a nakaitedan ti bileg kadagiti pagilian iti daga, a mangyeg iti kas iti kaadu ti umay iti simbaan ti Inauna.
12 Saludsod—Ania ti pagawatantayo iti panaguni dagiti trumpeta, a naagapad iti maikawalo a kapitulo ti Apocalipsis?Sungbat—Maawatantayo nga iti panangaramid ti Dios iti lubong iti innem nga aldaw, ket iti maikapito nga aldaw inleppasna ti aramidna, ken pinasantona daytoy, ken kasta met a nangbukel iti tao manipud iti tapok ti daga, kasta met, nga iti rugi ti maikapito a ribu a tawen pasantuento ti Apo a Dios ti daga, ken ileppasna ti pannakaisalakan ti tao, ket ukomenna dagiti amin a banag, ken subbotennanto amin a banag, malaksid dayta awan iti babaen ti bilegna, inton matimbreannan amin a banag, iti paggibusan ti amin a banag; ken ti panaguni dagiti trumpeta dagiti pito nga anghel ti pannakaisagana ken pannakaileppas ti aramidna, iti panangrugi ti maikapito a ribu a tawen—ti pannakaisagana ti dana sakbay ti kanito a yaayna.
13 Saludsod—Kaanonto ti pannakaiwakas dagiti banag, a naisurat iti maikasiam a kapitulo ti Apocalipsis?Sungbat—Maipatungpaldanto kalpasan ti pannakalukat ti maikapito a timbre, sakbay ti yaay ni Cristo.
14 Saludsod—Ania ti pagawatantayo iti bassit a libro a kinnan ni Juan, a kas naagapad iti maikasangapulo a kapitulo ti Apocalipsis?Sungbat—Maawatantayo a mision, ken ordinansa, kenkuana a mangummong kadagiti tribu ti Israel; adtoy, isu daytoy ni Elias, a, kas naisurat, nasken nga umay ken mangisubli kadagiti amin a banag.
15 Saludsod—Ania ti maawatan iti dua a saksi, iti maikasangapulo-ket-maysa a kapitulo ti Apocalipsis?Sungbat—Duada a propeta a mapatanorto iti pagilian dagiti Hudio kadagiti maudi nga aldaw, iti panawen ti panangisubli, ken mangipadto kadagiti Hudio kalpasan ti pannakaummongda ken pannakabangon ti siudad ti Jerusalem iti daga dagiti ammada.