17. Ipapanaw nga Agpalaud

Naplano ti rugi ti ipapanaw iti Nauvoo, Illinois para iti Marso–Abril, ngem gapu kadagiti pammutbuteng dagiti mangriribuk imbilin ni President BrighamYoung a mairugi ti ipapanaw dagiti Santo a mangballasiw iti Karayan Mississippi idi maika-4 ti Pebrero 1846. Nagbati ni President Young tapno mangannong iti talugading kadagiti Santo ket saan a pimmanaw iti Nauvoo agingga iti tengnga ti Pebrero.

Dagiti Napapateg a Pasamak: Sakbay ti ipapatayna, impadto ni Propeta Joseph Smith, “Sumagmamano kadakayo ti agbiagto tapno mapan ken tumulong iti panagaramid kadagiti pagindegan ken mangbangon kadagiti siudad ken mangimatang kadagiti Santo nga agbalin a nabileg a tattao iti tengnga ti Rocky Mountains.” Dumani 12,000 a Santo ti pimmanaw iti Nauvoo manipud iti Pebrero agingga iti Septiembre 1846. Kalpasan a pinanawan dagiti Santo ti Winter Quarters ken dagiti naud-udi a lugar, nabukelda kadagiti bunggoy ti pinullo, limapulo, ken ginasut, iti babaen ti kapitan ti bunggoy (DkK 136:3). Idi Septiembre 1846 maysa a bunggoy dagiti mangriribuk a mapattapatta a 800 a lallaki a naarmasan iti innem a kanyon a nangdarup iti Nauvoo. Kalpasan ti sumagmamano nga aldaw a pannakiranget, napilitan a simmuko dagiti nabati a Santo tapno maispal ti biagda ken maikkanda iti gundaway a mangballasiw iti karayan. Lima agingga iti innem a gasut a lallaki, babbai, ken ubbing ti nangballasiw iti karayan ket nagkampo iti igid ti karayan. Nangibaon ni President BrighamYoung kadagiti bunggoy nga immarayat nga addaan kadagiti abasto tapno ipanawda dagitoy “nakurapay a Santo.”