5. Suba sa Susquehanna

Kini nga hulagway nagpakita sa Suba sa Susquehanna didto sa Lungsod sa Harmony, Pennsylvania.

Mahinungdanon nga mga Hitabo: Si Joseph Smith Jr. unang miabut sa Harmony niadtong 1825 aron pagpangita og trabaho. Siya ug ang iyang amahan miabang duol dinhi sa pinuy-anan ni Isaac Hale, diin si Joseph unang nakahimamat ni Emma Hale, ang iyang umaabut nga asawa (JS—K 1:56–57). Sila si Joseph ug Emma naminyo niadtong 18 sa Enero 1827. Ang Propeta nakadawat og bulawan nga mga palid niadtong 22 sa Septyembre 1827 didto sa Manchester, New York, ug sa wala madugay human niana mibalhin uban ni Emma ngadto sa Harmony, diin siya misugod sa paghubad sa mga palid didto sa ilang gamay nga panimalay duol sa suba. Sa panahon sa paghubad sa Basahon ni Mormon, sila si Joseph ug Oliver Cowdery buot nga masayud og dugang mahitungod sa bunyag ug milakaw ngadto sa suba aron mag-ampo ngadto sa Ginoo kalabut niini. Agi og tubag sa mao nga pag-ampo, si Juan Bautista mipakita sa ika 15 sa Mayo 1829 (JS—K 1:66–74; D&P 13). Siya mitugyan sa Aaronic nga Pagkapari ngadto nila ni Joseph ug Oliver. Dayon sila miadto niini nga suba ug mibunyag sa usag usa alang sa kapasayloan sa mga sala. Sila si Joseph ug Oliver gimandoan dayon ni Juan Bautista sa pag-orden sa usag usa ngadto sa Aaronic nga Pagkapari. Wala madugay human niana, sila si Pedro, Santiago, ug Juan mipakita diha sa daplin niini nga suba ug mitugyan ngadto nila ni Joseph ug Oliver sa Melchizedek nga Pagkapari (D&P 27:12–13; 128:20).