15. Nauvoo Tembora
Te moan Nauvoo Tembora e kateaki man te bwa te raim ae kurei ni mainaina ae reke n te tabo arei. Anaun te kateitei bon 39 te mita anauna ao 27 te mita rababana. Taubukin te taua e tei 48 te mita rietana mai i aontano. E korakora aia anganano kaain te Ekaretia ni katean te tembora ae tikiraoi aei, ao a moana te mwakuri n 1841. Tabeman a mwakuri i nanon namwakaina aika bati i aon te kateitei; tabeman a kareani aia mwane. E ngae ngke e aki tia raoi, te tembora e bon onrake raoi irouia kaain te Ekaretia ake a roko ibukin otenanti i nanon namwakaina i mwain birinakoia nako Maeao. E ngae ngke a mwaiti Aomata aika Itiaki ake a kitana Nauvoo ni moan tain bwebweraken aroka n te 1846 ibukin kakamakun mwakuri ni iowawa irouia taan iowawa, a tiku i mwia taan mwakuri aika onoti ibukin katiaan te tembora. N Eberi 30, 1846, Unimwaane Orson Hyde ao Wilford Woodruff man te Koram n te Tengaun ma Uoman ao e kaania 20 riki aomata ae a katabua umwan te Uea aei. Te tembora e kitanaki n Tebetembwa ngke a kakionakoaki mai Nauvoo kaain te Ekaretia ake a tiku; ngkanne aia taanga taan iowawa a kabuakaka ao a kammairaa te kateitei ae tabu. E uruaki nanona n te ai n Okitobwa 1848. Te tembora are e manga kateaki (oti tamneina ikai), bon katotongan raoi are te moan, e katabuaki iroun Beretitenti Gordon B. Hinckley n Tuun 27–30, 2002.
Bwaai aika Riki aika Kakawaki: Te Maungatabu ni Kabuta e teweaki n te ru ni botaki n te tembora n Okitobwa 5, 1845. Mwakuri ibukin entaumente a moanaki karaoakia n Ritembwa 10. 1845, ao e reitinako ni karokoa Beberuare 7, 1846. E riaon 5,500 Aomata aika Itiaki ni Boong aika Kaitira ae a karekea aia entaumente, ao a mwaiti bwabetito ibukiia maate ao kabaebae ae a karaoaki.