17. Diwōjļo̧k eo n̄an Rilik
Jino in em̧m̧akūt eo jān Nauvoo, Illinois, kar karōke n̄an M̧aaj–Eprōļ, a kōnke kōlōļn̄o̧n̄ an jarin ire ko President Brigham Young eaar tōl diwōjļo̧k eo an Ro Rekwōjarjar im kijoone Reba Mississippi jino ilo Pāpode 4, 1846. President Young eaar pād wōt n̄an jerbale mennin letok ekwōjarjar ko n̄an Ro Rekwōjarjar im ekar jab likūt Nauvoo m̧ae lukwolpānļo̧k Pāpode eo.
Men Ko Reļļap: M̧okta jān an kar mej Rikanaan Josep Smith eaar kanaan, “Jet iaami kom̧ naaj mour im etal im jipan̄ ilo kōm̧m̧ani jikin pād ko im kalōk jikin kwelo̧k ko im lo an Ro Rekwōjarjar erom juon armej ekajoor ilo ilubwiljin toļ ko rej ba Rocky Mountains.” Enan̄in 12,000 Ro Rekwōjarjar rekar etal jān Nauvoo jān Pāpode n̄an Jeptōm̧ba 1846. Ālikin an kar Ro Rekwōjarjar likūt Winter Quarters im tok ālik jikin ko jet, rekar karōk er ilo jet jar ko in jon̄oul ko, lemn̄oul ko, im jibukwi ko, ium̧win tōl an juon kapen an jar eo (K&B 136:3). Ilo Jeptōm̧ba 1846 eo juon jarin ko̧kkure enan̄in 800 em̧m̧aan epojak kōn jiljino pakke rekar bōke Nauvoo. Ālikin jet raan ko in tariņae, Ro Rekwōjarjar remour rekar kipel er n̄an leļo̧k er make bwe ren maron̄ dāpij mour ko aer im maron̄ bōk bar juon wāween n̄an kijoone reba eo. Limabukwi ļo̧k n̄an jiljinobukwi em̧m̧aan ro, kōrā ro, im ajri ro rekar kijoone reba eo im kamp ioon kappe ko an reba eo. President Brigham Young eaar jilkinļo̧k kumi in lo̧mo̧o̧r ro kōn mennin aikuj ko n̄an kōm̧akūti “Ro Rekwōjarjar rejeram̧ōl.”