JST, Eksodas 4:21. Komperem Eksodas 4:21; 7:3, 13; 9:12; 10:1, 20, 27; 11:10; 14:4, 8, 17; Dutronome 2:30
Lod i no responsibol long fasin we Fero i mekem hat blong hem i kam strong. Luk tu long JST, Eksodas 7:3, 13; 9:12; 10:1, 20, 27; 11:10; 14:4, 8, 17; wanwan pat blong skripja ia, taem oli transletem i stret, i soemaot se Fero i no bin mekem hat blong hem i kam strong.
21 Mo Lod i bin talem long Moses: “Taem yu yu gobak long Ijip, yu mas lukluk gud se yu mas mekem evri sapraes samting ia long fored blong Fero, we mi bin putum long han blong yu, mo bae mi mekem yu kam antap; be Fero bae i mekem hat blong hem i kam strong, mo bae i no letem ol pipol oli go.”
JST, Eksodas 4:24–27. Komperem Eksodas 4:24–27
Taem Lod i talem toktok ia se bae hem i kilim Moses i ded from hem i no mekem sakomsaes long boe blong hem, Sipora i sevem laef blong hem, taem hemwan i wokem odinens ia. Moses i konfesem sin blong hem.
24 Mo i bin hapen se, Lod i kamtru long Moses taem hem i stap long rod, long saed blong ples blong slip. Lod i kros long Moses, mo i stap rere blong mekem han blong hem i foldaon long Moses, blong kilim hem i ded; from se hem i no bin mekem sakomsaes long boe blong hem.
25 Nao Sipora i tekem wan sap ston mo i mekem sakomsaes blong boe blong hem, mo i sakem ston ia long leg blong Moses, mo talem: “Naoia i olsem we yu yu sakomsaes finis, yu save kam hasban blong mi.”
26 Mo Lod i no kilimded Moses mo i letem hem i go from se Sipora, waef blong hem, i bin mekem sakomsaes long boe blong tufala. Mo Sipora i talem: “Naoia i olsem we yu yu sakomsaes finis, yu save kam hasban blong mi.” Mo Moses i bin sem, mo i haedem fes blong hem blong Lod i no luk, mo talem: “Mi mi mekem sin long fes blong Lod.”
27 Mo Lod i talem long Eron: “Go long waelples blong yu mitim Moses.” Mo Eron i go mo i mitim Moses antap long hil blong God; long hil ia we God i kamaot long hem, mo Eron i kisim hem.