VJS, Lako Yani 4:21. Veidutaitaka Lako Yani 4:21; 7:3, 13; 9:12; 10:1, 20, 27; 11:10; 14:4, 8, 17; Na iVakarua 2:30
E sega ni vakavuna na Turaga na kaukauwa ni lomai Fero. Raica talega VJS, Lako Yani 7:3, 13; 9:12; 10:1, 20, 27; 11:10; 14:4, 8, 17; na idusidusi yadua oqori ni vakadewataki vakadodonu, e vakaraitaka ni a vakaukauwataka ga ko Fero na yalona.
21 Ka sa kaya vei Mosese na Turaga, ni ko sa lako mo lesu tale ki Ijipita, raica mo vakayacora taucoko na ka veivakurabuitaki oqo kau sa biuta e ligamu, ena matai Fero, kau na qai vakasautaki iko; ia ena vakaukauwataka na lomana ko Fero, ka na sega ni laivi ira na tamata me ra lako.
VJS, Lako Yani 4:24–27. Veidutaitaka na Lako Yani 4:24–27
Ni sa tukuna na Turaga me vakamatei Mosese ena nona sega ni ciliva na luvena tagane, a qai vakabulai koya o Saipora ena nona vakayacora na cakacaka vakalotu oya. Sa vakatusa o Mosese na nona ivalavala ca.
24 Ka sa yaco, ni sa rairai vua na Turaga ni tu ena sala, ena yasa ni burenivulagi. Sa cudruvi Mosese na Turaga, ka sa voleka ni tau vua na ligana, me vakamatea; baleta ni sega ni ciliva na luvena tagane.
25 Qai taura mai o Saipora e dua na vatu gagata ka ciliva kina na luvena tagane, ka viritaka na vatu e yavana, ka kaya, sa dina ga o iko e dua na tagane vakawati ca vei au.
26 Sa qai vakabulai Mosese na Turaga ka laiva me lako, baleta ni sa ciliva na gone o Saipora na watina. Ka qai kaya, O iko e dua na tagane vakawati ca. Ka sa madua kina o Mosese, ka vunia na matana mai vua na Turaga, ka kaya, au sa ivalavala ca ena mata ni Turaga.
27 Sa qai kaya na Turaga vei Eroni, Lako ki na lekutu mo sotavi Mosese, ka sa lako yani ko koya ka sotava, ena ulunivanua ni Kalou; ena ulunivanua sa rairai kina vua na Kalou; ka sa reguci koya o Eroni.