1 !Sore tumas long Eriel, sore long Eriel, taon ia we Deved i bin stap long hem! yia afta yia, blong oli kilimded ol sakrifaes long hem.

2 Bambae mi kam spolem Eriel, mo ol man oli krae mo harem nogud; from olsem ia nao Lod i bin talem long mi, mo bae i hapen olsem nao long Eriel:

3 Se bae mi Lod, bae mi kam raonem hem blong faet agensem hem, mo enemi bae oli kam hivap raon long taon ia mo hivimap graon i goraon long hem, mo oli wokem ol sef haos oli stanap agensem hem.

4 Mo bae taon ia i brokdaon long graon; mo bae i stap long graon i toktok i kam, mo toktok blong hem i olsem devel we i stap long graon i toktok i kam; mo voes blong hem i narafala, from graon i blokem hem, mo toktok blong hem bae i olsem voes we i kamaot long das.

5 Antap long hemia, bigfala namba blong ol strenja blong hem bae oli olsem smolsmol das, mo bigfala namba blong ol prapa nogud man bae oli olsem makas doti blong skin blong wit we win i tekem i go; yes bae i hapen wantaem nomo mo kwiktaem.

6 From Lod we i Lod blong ol pipol bae i visitim olgeta wetem tanda, mo wetem graon i seksek, mo wetem bigfala noes, wetem hariken mo strong win, mo flem blong faea we i kakae evri samting.

7 Mo bigfala namba blong ol man blong evri nesen we oli faet agensem Eriel, mo iven evriwan we i stap faet agensem hem mo ol samting we i stap blokem hem, mo samting we i stap mekem hem i harem nogud, bae oli lus olsem wan drim we i olsem wan visen long tudak.

8 Yes, bae i olsem long olgeta semmak olsem we wan man we i hanggri we i stap drim se i stap kakae, mo luk, hem i wekap we sol blong hem i stap hanggri yet; o i olsem wan man we i tosta we i drim se hem i stap dring, be hem i wekap, mo luk, ae blong hem bae i tudak mo sol blong hem i tosta yet. Yes, bae i olsem long bigfala namba blong evri nesen we i stap faet agensem Hil Saeon.