9 Ia ko koya sa cakitaki au e matadra na tamata, ena cakitaki e matadra na agilosi ni Kalou.

10 Ia eratou sa kila na nona agilosi ni a tukuna na veika oqo ko koya, baleta ni ratou a vosa vakacacani koya e matadra na tamata; ni ratou a rere ni vakatusai koya e matadra na tamata.

11 Eratou sa veitalanoataka vakataki iratou, ka kaya, E kila ko Koya na lomadatou, ka tukuna na veika me datou cudruvi kina, ka datou na sega ni vosoti. Ia sa sauma ko koya, ka kaya vei iratou,

12 Ia ko koya ena vosataka e dua na vosa me saqati kina na Luve ni tamata, ka veivutuni, ena vosoti ko koya; ia ko koya sa vosa vakacacataka na Yalo Tabu, ena sega sara ni vosoti ko koya.

41 Ia, raica sa lako mai ko koya ena imatai ni iwasewase ni bogi, ka na lako talega mai ko koya ena ikarua ni iwasewase ni bogi, ka na lako talega mai ena ikatolu ni iwasewase ni bogi.

42 Kau sa kaya vakaidina vei kemudou, sa lako oti mai ko Koya, me vaka na ka sa volai me baleti koya; ia ni sa lako tale mai ena ikarua ni iwasewase ni bogi, se ena nona lako mai ena ikatolu ni wasewase ni bogi, sa kalougata ko ira na italai era na kunei ni ra sa wawa tu ni sa lako mai ko koya;

43 Ni na vauci koya vakavinaka na nodra Turaga na italai oqo, ka vakadaberi ira me ra kana, ena lako mai ka qaravi ira.

44 Ia oqo, au sa kaya vakaidina vei kemudou na veika oqo, mo dou kila na ka oqo, ni nona lako mai na Turaga ena vaka na daubutako ena bogi.

45 Ia sa vaka na itaukei ni dua na vale, kevaka sa sega ni vakatawa na nona iyau, ena lako mai na daubutako ena dua na auwa sa sega ni kila ko koya, ka kauta na nona iyau, ka wasea vei ira na nona ilawalawa.

46 Ka ra sa kaya vakataki ira, Kevaka a kila na itaukei ni vale vinaka oqo na auwa ena lako mai kina na daubutako, ke a vakatawa tiko, ka na sega kina ni ravabasuki na nona vale ka butakoci na nona iyau.

47 Ka sa kaya kina vei ira, Au sa kaya vakaidina vei kemudou, o koya mo dou qai vakarau tu; ni na lako mai na Luve ni tamata ena dua na auwa dou sa sega ni nanuma kina.

48 Sa qai kaya vua ko Pita, Turaga, ko ni sa tukuna beka vei keitou na vosa vakaibalebale oqo, se ki na tamata kecega?

49 Ka sa kaya kina na Turaga, au sa vosa vei ira ena vakayacora na Turaga me ra iliuliu ena nona vale, me ra solia vei ira na luvena na kedra ivotavota ni kakana ena kena gauna.

50 Ka ra sa kaya kina, Ko cei sara na italai yalodina ka vuku oya?

51 Ka sa qai kaya vei ira na Turaga, sai koya na italai sa vakatawa, me wasea na kena ivotavota ni kakana ena kena gauna.

52 Sa kalougata ko koya na italai ko ya sa kunei koya na nona Turaga, ena gauna sa lako mai kina, ni sa kitaka me vakakina.

53 E dua na ka dina au sa tukuna vei kemudou, ni na buli koya me lewa na ka kecega sa taukena.

54 Ia na italai ca sai koya e sega ni kunei ni vakatawa tiko. Ia kevaka e sega ni kunei na italai oqori ni vakatawa tiko, ena kaya ki yalona, sa vakaberaberataka na nona lako mai na noqu Turaga; ka sa na tekivu me vakanakuitataki ira na italai tagane; kei ira na italai yalewa, ka kana, ka gunu, ka mateni.

55 Na nona Turaga na italai ko ya ena lako mai ena dua na siga sa sega ni vakararai kina ko koya, kei na dua na auwa sa sega ni kila, ka na tamusuki koya sobu, ka lesia vua na nona ivotavota vata kei ira na tawavakabauta.

56 Ia na italai ko ya sa kila na lomana na nona Turaga, ka sega ni vakavakarau ena nona lako mai na nona Turaga, ka sega talega ni cakava na lomana, ena vakanakuitataki ka na vuqa na we ni kena ikuita.

57 Ia ko koya sa sega ni kila na lomana na nona Turaga, ka vakayacora na veika e ganita na ikuita, ena kanakuita vakalailai. Ia ko koya sa soli vua e levu na ka, ena gadrevi mai vua e levu na ka; ia ko koya sa nuitaka vua na Turaga e levu na ka, era na taroga vua na tamata e levu na ka.