JS—Ukok, Matu 21:33. Keidi Matu 21:32–33
Armej reaikuj ukeļo̧k m̧okta jān aer maron̄ tōmak ilo Kraist.
33 Bwe eo eaar jab tōmak Jon kake Eō, eban maron̄ tōmak Eō, ijello̧kun n̄e ej m̧okta ukeļo̧k.
JS—Ukok, Matu 21:47–56. Keidi Matu 21:45–46
Jisōs ej kwaļo̧k bwe E ej dekā in jabōn em̧ eo. Gospel eo kar ajeļo̧k n̄an riJu ro innām n̄an ro riAelōn̄ ko. Ro renana E naaj ko̧kkure er n̄e Jisōs ej ro̧o̧ltok.
47 Im ke pris eļap ro im Parisi ro rekar ron̄ būrabōļ ko An, rekar kile bwe Eaar ekkōnono kake er.
48 Im rekar ba ilubwiljier make, Ļein enaaj ļōmņak bwe e make emaron̄ ko̧kkure aelōn̄ in kiin̄ in eļap ke? Im rekar illu Ippān.
49 A ke rekar kappukot n̄an likūt peier Ioon, rekar mijake jarlepju eo, kōnke rekar jeļā bwe jarlepju eo ekar watōk E juon rikanaan.
50 Im kiiō ro rikaļooran rekar itok n̄an Ippān, im Jisōs eaar ba n̄an er, Kom̧ij bwilōn̄ kōn naan ko in būrabōļ ko Iaar kōnono n̄an er ke?
51 Em̧ool, Ij ba n̄an kom̧, N̄a ejm̧aan eo, im raņ renana rej jab bōk Eō.
52 N̄aij bōran jabōn em̧. riJu rein renaaj wōtlo̧k Ioō, im renaaj tipdikdik.
53 Im Aelōn̄ in Anij naaj bōkļo̧k jān er, in naaj leļo̧k e n̄an juon laļ eo ej kōjebar leen ko an; (meļeļein ro riAelōn̄ ko.)
54 Kōn menin, ioon jabdewōt eo dekā in enaaj wōtlo̧k, enaaj irļo̧k e n̄an būn̄al.
55 Im n̄e Irooj eo an jikin kallib eo ej itok, enaaj ko̧kkure armej rein rekabūrom̧ōjm̧ōj, im nana, im naaj bar kōtļo̧k jikin kallib eo an n̄an bar jet rikarejeran, em̧ool ilo raan ko āliktata, ro renaaj bōktok n̄an e leen ko ilo tōre ko aer.
56 Innām rekar meļeļe būrabōļ eo me Eaar kōnono n̄an er, bwe ro riAelōn̄ ko naaj bar ko̧kkure barāinwōt, n̄e Irooj enaaj wanlaļtak jān lan̄ n̄an irooj ilo jikin kallib eo An, eo ej laļ in im ro rej pād ie.