Vahe 2
1 Oku ne fakaha ke nau tuu mau i he mooni kuo nau ma’u, 3 oku ne tala e ai ae he lahi mei he lotu mooni, 9 bea e ha ae fili o Kalaisi i he heeki ai hoko mai ae aho oe Eiki. 15 Bea ne toe fai ene tomua eginaki, mo ne hufia akinautolu.
¶ 1 BEA koeni, oku mau kole kiate kimoutolu, e kaiga, koe mea i he haele mai a ho tau Eiki ko Jisu Kalaisi, bea moe tau katoa fakataha kiate ia,
2 Ke oua naa ue’i gofua ho mou loto, be bubutuu, i ha laumalie, be i ha lea, be i ha tohi o hage oku meiate kimautolu, o behe kuo ofi ae aho o Kalaisi.
3 Oua naa kākā’i akimoutolu e ha toko taha i ha mea e taha: koeuhi e ikai hoko ae aho koia, o kabau e ikai tomua hoko ae liliu kovi, bea fakaha ae tagata oe agahala, koe foha oe malaia;
4 Aia oku agatuu bea fakahikihiki ia ke maoluga i he mea kotoabe oku ui koe Otua, be oku fai ki ai ae hu; bea oku nofo ia o hage koe Otua i he fale oe Otua, o fakaha ia koe Otua.
5 Ikai oku mou manatu, i he eku kei iate kimoutolu, neu fakaha kiate kimoutolu ae gaahi mea ni?
6 Bea oku mou ilo eni aia oku ne taofia, kae oua ke fakaha ia i hono kuoga.
7 He oku gaue ni ae mea fakalilolilo oe agahala: ka oku ai ha taha oku taofi, kae oua ke too atu ia.
8 Bea e toki fakaha ae taha Agakovi, aia e fakaojioji e he Eiki aki ae manava o hono fofoga, o fakaauha i he malama o ene haele mai.
9 Ko ia ia oku ha’u o tatau moe gaue a Setani i he malohi lahi, moe gaahi fakailoga, moe gaahi mea fakaofo loi,
10 Bea moe kākā kotoabe oe taemaonioni iate kinautolu oku auha; koe mea i he ikai te nau ma’u ae ofa ki he mooni, koeuhi ke nau moui ai.
11 Bea koe mea koia e fakatukutuku’i ai akinautolu e he Otua ki he malohi oe kākā, ke nau tui ki he loi:
12 Bea ke fakamalaia akinautolu kotoabe oku ikai tui ki he mooni, ka nau fiemalie i he taemaonioni.
13 Ka oku totonu e mau fakafetai mau ai be ki he Otua koeuhi ko kimoutolu, e kaiga ofeina i he Eiki, koeuhi kuo fili akimoutolu e he Otua talu mei he kamataaga ki he fakamoui i he fakamaonioni’i e he Laumalie, moe tui ki he mooni:
14 Aia naa ne uiui’i akimoutolu ki ai i ho mau ogoogolelei, ke mou lava’i ae nāunāu o ho tau Eiki ko Jisu Kalaisi.
15 Koia, e kaiga, mou tuu mau, o kuku mau ae gaahi akonaki aia nae akonekina ai akimoutolu, be ko ha mea i he malaga, be i he e mau tohi.
16 Bea koeni, ko ho tau Eiki ko Jisu Kalaisi be, moe Otua, koe tau Tamai, aia naa ne ofeina akitautolu, o ne foaki mai ae fiemalie taegata moe amanaki lelei i he aloofa,
17 Ke ne fakafiemalie ki ho mou loto, bea fakatuu mau akimoutolu i he gaahi lea moe gaue lelei kotoabe.