Vahe 5
Koe fakatonuhia akitautolu i he tui, oku tau ma‘u ai ae melino moe Otua, 2 moe fiefia i he e tau amanaki lelei, 8 koeuhi i ke fakalelei akitautolu i hono taataa, i he e tau nofo fakafili. 10 e ajili ai e tau moui hili hono fakalelei akitautolu. 12 He nae hoko ae agahala moe mate ia Atama, 17 ka koe maonioni moe moui lahi hake aubito ia Jisu Kalaisi. 20 Koe tubulekina lahi hake aubito ae ofa i he lahiaga oe agahala.
¶ 1 KOIA i he fakatonuhia‘i akitautolu e he tui, oku tau melino ai moe Otua i ho tau Eiki ko Jisu Kalaisi:
2 Aia oku tau ma‘u ai foki ae huaga i he tui ki he monuia ni oku tau tuu ai, bea fiefia i he amanaki lelei ki he hakeaki‘i mei he Otua.
3 Bea oku ikai ke gata ai, ka oku tau vikiviki i he gaahi mamahi foki: i he e tau ilo oku tubu mei he mamahi ae faa kataki;
4 Bea mei he faa kataki, ae ilo; bea mei he ilo, ae amanaki lelei:
5 Bea oku ikai fakama e he amanaki lelei; he koeuhi kuo liligi ae ofa ae Otua ki ho tau loto i he Laumalie Maonioni, aia kuo foaki kiate kitautolu.
6 He nae lolotoga e tau vaivai aubito, bea bekia a Kalaisi i he kuoga tuutuu-malie koeuhi koe taelotu.
7 E meimei ikai aubito fie mate ha taha koeuhi koe tagata agatonu be: ka e faa fai abe ke mate ha toko taha koeuhi koe tagata agalelei.
8 Ka oku fakaha e he Otua ene ofa kiate kitautolu i he mea ni, lolotoga koe kau agahala akitautolu, ne bekia a Kalaisi maa tautolu.
9 Bea ka koia, bea e ajili ae fakamoui o kitautolu mei he houhau iate ia, he kuo fakatonuhia‘i akitautolu i hono taataa.
10 He kabau ne fakalelei akitautolu ki he Otua i he bekia a hono Alo, ka koe gaahi fili akitautolu, bea ta e ajili ho tau fakamoui i he ene moui, he kuo tau fakalelei.
11 Bea oku ikai gata ai, ka oku tau fiefia foki i he Otua i ho tau Eiki ko Jisu Kalaisi, aia kuo tau ma‘u ai ae fakalelei.
12 Bea koia, o hage nae hoko mai ae agahala ki mamani, moe mate mei he agahala, i he tagata be taha; bea nae behe ae hoko oe mate ki he kakai kotoabe, he kuo agahala kotoabe:
13 (He nae i he mamani ae agahala o a‘u ki he fono: ka oku ikai lau ae agahala i he ikai ha fono.
14 Ka nae bule ae mate mei a Atama o a‘u kia Mosese, kiate kinautolu foki nae ikai agahala o fakatatau ki he fai hala a Atama, aia koe fakatātā o ia e ha‘u amui.
15 Ka oku ikai ke fai tatau ae fai hala moe foaki ofa. He kabau kuo mate ae toko lahi i he fai hala ae toko taha, behe, kuo a‘u o lahi hake aubito ki he toko lahi ae ofa ae Otua, moe foaki i he ofa, i he tagata be taha, ko Jisu Kalaisi.
16 Bea oku ikai ke fai tatau ae fai agahala oe toko taha be, moe foaki ofa; he koe mea i he agahala be taha nae fakamāu ai ke malaia, ka koe foaki ofa koe fakatonuhia ia mei he gaahi agahala lahi.
17 He kabau oku bule ae mate mei he toko taha, koe mea i he fai agahala ae toko taha; behe, e ajili ai ae bule i he moui ekinautolu oku ma‘u hono lahi aubito oe ofa moe foaki oe fakatonuhia i he toko taha, ko Jisu Kalaisi.)
18 Bea koeni, o hage kuo hoko i he agahala ae toko taha ae fakamalaia ki he kakai kotoabe: bea behe foki, koe mea i he maonioni ae toko taha kuo hoko ae fakatonuhia oe moui ki he kakai kotoabe.
19 Koeuhi o hage nae fakahalaia ae toko lahi i he talagataa ae tagata e toko taha, behe, koe mea i he talagofua ae toko taha e fakatonuhia‘i ae toko lahi.
20 Ka nae fakahu mai ae fono, bea tubulekina be ae agahala. Ka koia nae tubulekina ai ae agahala, kuo lahi aubito ai hono tubulekina oe ofa:
21 Koeuhi ke hage koe bule ae agahala o a‘u ki he mate, ke behe ae bule oe ofa i he fakatonuhia o a‘u ki he moui taegata i ho tau Eiki ko Jisu Kalaisi.