¶ 1 BEA koeni, nae mamata e Joabe, koe tama o Seluia, kuo gau‘e ae loto oe tu‘i kia Abisalomi.

2 Bea nae alu ae fekau a Joabe ki Tikoa, o ne omi mei ai ae fefine boto, bea ne ne behe kiate ia, Oku ou kole kiate koe, ke ke fai ekoe o hage ko ha fefine tagi, bea ke ai eni ae kofu fakatauagaa, bea oua naa ke tākai aki koe ha lolo, ka ke hage ko ha fefine kuo mamahi fuoloa koeuhi koe bekia:

3 Bea ke ha‘u ki he tu‘i, bea ke lea behe ni kiate ia. Bea koia, nae ai e Joabe ae gaahi lea ki hono gutu.

¶ 4 Bea i he ene hoko o lea ae fefine mei Tikoa ki he tu‘i, naa ne to hifo ki hono mata ki he kelekele, o ne fai fakaabaaba, mo ne behe eia, E tu‘i, ke ke tokoni mai.

5 Bea nae behe kiate ia e he tu‘i, Koeha hoo mamahi? Bea naa ne beheage, Koe fefine baea mooni au, he kuo bekia a hoku unoho.

6 Bea nae ma‘u e hoo kaunaga ae tama e toko ua, bea naa na fekeikei i he goue, bea nae ikai i ai ha toko taha ke fakamavae akinaua, bea nae ta‘i ae toko taha o hono tokoua, o ne tamate‘i ia.

7 Bea vakai, kuo hiki ita mai ae kaiga kotoabe ki hoo kaunaga, bea kuo nau behe, Tuku mai ia aia nae teia a hono tokoua, koeuhi ke mau tamate‘i ia, koeuhi koe moui a hono tokoua aia naa ne tamate‘i; bea ne ogo koe tama hoko ia, te mau tamate‘i ia: bea ka behe, ta e tamate‘i ae malala‘i afi oku kei toe kiate au, bea e ikai tuku ki hoku unoho ha higoa be ha toega  hako i he fuga o mamani.

8 Bea nae behe e he tu‘i ki he fefine, Alu koe ki ho fale, bea teu tokaga o fai ha fekau ki hoo mea.

9 Bea nae beheage e he fefine Tikoa ki he tu‘i, E Tu‘i, ko hoku eiki, ka kuo halaia, bea tuku ia kiāte au, bea ki he fale o eku tamai: bea ke taehalaia ai ae tu‘i, bea mo hono nofoaga fakatu‘i.

10 Bea nae behe e he tu‘i, Kabau e lea ha toko taha kiate koe, omi ia kiate au, bea e ikai te ne toe ala kiate koe.

11 Bea nae toki beheage eia, Oku ou kole kiate koe, ke manatu‘i e he tu‘i kia Jihova ko ho Otua, ke oua naa ke tuku ae kau totogi toto ke toe fai ha maumau, telia naa nau tamate‘i a hoku tama. Bea naa ne behe eia, O hage oku moui a Jihova, e ikai ha tuoni louulu o ho tama eto ki he kelekele.

12 Bea nae toki behe ai e he fefine, Oku ou kole kiate koe, tuku ki hoo kaunaga ke ne fai ha lea ki hoku eiki koe tu‘i. Bea naa ne behe eia, Ke ke lea be.

13 Bea nae behe e he fefine. Bea koeha ai kuo ke fakakaukau ki ha mea behe ki he kakai ae Otua? oku lea aki eni e he tu‘i o hage ko ha taha oku halaia, koe mea i he ikai toe omi ki abi aia kuo ne fakahe‘i.

14 He kuo bau be ke tau mate, bea tau hage koe vai kuo liligi ki he kelekele, aia oku ikai faa tanaki hake; bea oku ikai filifilimanako ae Otua ki ha toko taha: ka ne ogo ia oku ne fakakaukau‘i ae mea ke oua naa kabuji meiate ia aia kuo fakahe‘i.

15 Bea koeni foki, kuou ha‘u au ke lea i he mea ni ki he tu‘i ko hoku eiki, koeuhi kuo fakamanavahe‘i au e he kakai: bea nae behe e hoo kaunaga, Koeni teu lea ki he tu‘i; hei ilo e fai e he tu‘i ki he kole a ene kaunaga.

16 Koeuhi e fanogo e he tu‘i, ke ne fakamoui ai a ene kaunaga mei he nima oe tagata oku fie fakaauha fakataha au mo hoku tama mei he tofia oe Otua.

17 Bea nae toki behe e hoo kaunaga, Koe lea a hoku eiki koe tu‘i e hoko ni koe fakafiemalie: he ko hoku eiki koe tu‘i, oku hage ia ko ha agelo ae Otua i he ene ilo‘i ae lelei moe kovi: koia e iate koe a Jihova ko ho Otua.

18 Bea nae toki beheage e he tu‘i ki he fefine, Oku ou kole kiate koe, ke oua naa ke fufu meiate au ae mea aia teu fehui ai ni kiate koe. Bea nae behe e he fefine, Ke lea be eni a hoku eiki koe tu‘i.

19 Bea nae behe e he tu‘i, Ikai oku kau mo koe ae nima o Joabe i he mea ni kotoabe? Bea nae lea o beheage e he fefine, O hage oku moui ho laumalie, e hoku eiki koe tu‘i, oku ikai faa mioi e ha toko taha ki he toomatau be ki he toohema i ha momoi mea kuo lea aki e hoku eiki koe tu‘i: he ko hoo tamaioeiki ko Joabe, koia ne ne fekau‘i au, mo ne ai ae gaahi lea ni kotoabe ki he gutu o hoo kaunaga:

20 Kuo fai ae mea ni e hoo tamaioeiki ko Joabe koeuhi ke tubu ai ae lea behe ni: bea oku boto a hoku eiki, o tatau moe boto o ha agelo ae Otua, ke ilo aia kotoabe oku i mamani.

¶ 21 Bea nae behe e he tu‘i kia Joabe, Vakai mai, kuou fai ae mea ni: koia ke ke alu o toe omi ae tagata talavou ko Abisalomi.

22 Bea nae to hifo a Joabe ki hono mata ki he kelekele, bea naa ne bunou, o ne fakafetai ki he tu‘i: bea nae behe e Joabe, Kuo ilo e hoo tamaioeiki he aho ni kuou ma‘u ae ofa i ho ao, akoe ko hoku eiki, e tu‘i, koe mea i he fai e he tu‘i ki he kole a hoo tamaioeiki.

23 Koia nae tuu hake ai a Joabe o ne alu ki Kesuli, bea ne omi a Abisalomi ki Jelusalema.

24 Bea nae behe e he tu‘i, Tuku ke ne alu ki hono fale oona, bea oua jii naa ne jio mai ki hoku fofoga. Koia nae tafoki ai a Abisalomi ki hono fale oona, bea nae ikai jio ia ki he fofoga oe tu‘i.

¶ 25 Ka nae ikai ha toko taha i Isileli kotoabe nae ogoogolelei ene toulekeleka ke hage ko Abisalomi: mei hono aofi va‘e o a‘u ki he tumuaki o hono ulu nae ikai jii ha mele iate ia.

26 Bea i he ene koji hono louulu, (he naa ne koji ia i he kuoga niihi: he nae mamafa ia kiate ia, bea koia naa ne koji ai ia:) naa ne fakamamafa ae louulu o hono ulu koe sikeli e uageau o fakatatau moe fakamamafa ae tu‘i.

27 Bea nae fanau‘i kia Abisalomi ae foha e toko tolu, moe ofefine e toko taha, aia nae higoa ko Tamaa: koe fefine ia nae mata hoihoifua.

¶ 28 Koia nae nofo ai a Abisalomi i Jelusalema i he ta‘u katoa e ua, ka nae ikai ke ne jio ki he fofoga oe tu‘i.

29 Bea nae fekau ai e Abisalomi kia Joabe ke ne ha‘u o alu ki he tu‘i; ka nae ikai fie ha‘u ia kiate ia: bea i he ene fekau o liuga ua, nae ikai te ne ha‘u.

30 Koia naa ne behe ai ki he ene kau tamaioeiki, Vakai, oku ofi mai ae goue a Joabe ki hoku botu ooku, bea oku i ai ene baale; alu o tutu ia. Bea nae tutu ae goue e he kau tamaioeiki a Abisalomi.

31 Bea nae tuu hake ai a Joabe, o ne ha‘u ki he fale o Abisalomi, o ne behe kiate ia, Koeha kuo tutu ai e hoo kau tamaioeiki a eku goue?

32 Bea nae behe e Abisalomi kia Joabe, Vakai, naaku fekau atu kiate koe, o behe, Ha‘u kiate au, koeuhi keu fekau atu koe ki he tu‘i, ke behe, Koeha kuou ha‘u ai mei Kesuli? e lelei be o ka neu kei i ai ni: kae tuku eni keu mamata ki he fofoga oe tu‘i; bea kabau oku iate au ba mea hala, tuku ke ne tamate‘i au.

33 Koia nae ha‘u ai a Joabe ki he tu‘i, o ne fakaha ki ai: bea hili a ene ui kia Abisalomi naa ne ha‘u ki he tu‘i, bea naa ne bunou hifo ia mo hono mata ki he kelekele i he ao oe tu‘i: bea nae uma e he tu‘i kia Abisalomi.