Ang Libro ni Abraham

1 Sa duta sang mga Caldeanhon, sa puluy-an sang akon mga amay, ako, si Abraham, nakakita nga kinahanglan ko mag-angkon sang lain nga lugar nga pagapuy-an;

2 Kag, bangod nakita ko nga may mas dako nga kalipay kag paghidaet kag kapahuwayan para sa akon, ginpangayo ko ang pagpakamaayo sang mga amay, kag ang kinamatarong nga ordinan ako sa pagdumala sang amo man; bangod ako mismo sumulunod sang pagkamatarong, nga maluyag man nga mangin isa nga may dako nga paghangop, kag mangin mas matutum nga sumulunod sang pagkamatarong, kag mag-angkon sing mas dako nga paghangop, kag mangin amay sang madamo nga nasyon, isa ka prinsipe sang paghidaet, kag bangod maluyag nga magbaton kag magtuman sang mga kasugoan sang Dios, nangin nagakaigo ako nga manunubli, Mataas nga Pari, nga nagakapot sang kinamatarong nga iya sang mga amay.

3 Ginhatag ini sa akon halin sa mga amay; ginsubli ini halin sa mga amay, bisan pa sa ginsuguran sang panahon, huo, bisan pa halin sa ginsuguran, ukon antes pa sa pagtuga sang duta tubtob sa sini nga tion, nga amo ang kinamatarong sang panganay, ukon sang una nga tawo nga si Adan, ukon una nga amay, paagi sa mga amay pakadto sa akon.

4 Gintinguhaan ko ang pagpili sa akon sa Pagkapari suno sa pagpili sang Dios sa mga amay tuhoy sa mga kaliwatan.

5 Ang akon mga amay, nga nagtalikod sa ila pagkamatarong, kag sa balaan nga mga kasugoan nga ginhatag sa ila sang Ginuong Dios, para magsimba sa mga dios-dios sang mga pagano, lubos nga wala nagpamati sa akon tingug;

6 Kay ang ila mga tagipusuon natuon sa paghimo sing malain, kag lubos nga naliso sa dios-dios ni Elkena, kag sa dios-dios ni Libna, kag sa dios-dios ni Mamacra, kag sa dios-dios ni Koras, kag sa dios-dios sang Faraon, hari sang Egipto;

7 Gani ginliso nila ang ila mga tagipusuon sa sakripisyo sang mga pagano sa paghalad sang ila mga anak sa sining apa nga mga dios-dios, kag wala nagpamati sa akon tingug, kundi nagtinguha sa pagpatay sa akon sa kamot sang pari ni Elkena. Ang pari ni Elkena pari man sang Faraon.

8 Karon, sa sini nga tion naandan na sang pari sang Faraon, ang hari sang Egipto, nga magsakripisyo sa altar nga natukod sa duta sang Caldea, para sa paghalad sa sining iban nga mga dios-dios, sang mga lalaki, mga babayi kag kabataan.

9 Kag natabo ini nga ang pari naghalad sa dios-dios sang Faraon, kag amo man sa dios-dios ni Shagreel, bisan pa suno sa paagi sang mga Egiptohanon. Karon ang dios-dios ni Shagreel amo ang adlaw.

10 Sa pagkamatuod ang halad-sa-pagpasalamat nga isa ka bata ang ginhalad sang pari sang Faraon sa altar nga nagatindog sa bungyod nga ginatawag Bungyod ni Potifar, sa ginsugdan sang patag sang Olisem.

11 Karon, ining pari naghalad sa sining altar sa isa ka tion sing tatlo ka birhen nga anak ni Onitas, isa ka harianon nga kaliwatan nga rekta halin sa balikawang ni Ham. Ining mga birhen ginhalad bangod sang ila pagkamatarong; indi sila magluhod sa pagsimba sang mga dios-dios nga kahoy ukon bato, gani ginpatay sila sa sining altar, kag ginhimo ini sa pamaagi sang mga Egiptohanon.

12 Kag natabo ini nga ginpuwersa ako nga dakpon sang mga pari agud patyon man nila ako, pareho sadtong mga birhen sa sining altar; kag agud nga makahibalo kamo parte sa sining altar, itudlo ko kamo sa larawan sa panugod sining sinulatan.

13 Himo ini sa korte sang hiligdaan, pareho sang iya sang mga Caldeanhon, kag nahamtang ini sa atubang sang mga dios-dios ni Elkena, Libna, Mamacra, Koras, kag amo man sang dios-dios nga pareho sa Faraon, hari sang Egipto.

14 Agud nga makahibalo kamo parte sining mga dios-dios, ginhatagan ko kamo sang dagway sang mga ini paagi sa mga larawan sa panugod, nga ang amo nga mga larawan ginatawag sang mga Caldeanhon nga Ralinos, nga nagakahulugan, mga hiroglifiko.

15 Kag sang gin-alsa nila ang ila mga kamot sa pagkapot sa akon agud ihalad ako kag patyon, tan-awa, ginbayaw ko ang akon tingug sa Ginuo nga akon Dios, kag ang Ginuo nakabati kag nagpamati, kag ginpuno niya ako sang panan-awon sang Makagagahum, kag ang anghel sang iya presensya nagtindog sa tupad nakon, kag gilayon nga naghukas sang akon mga gapos;

16 Kag ang iya tingug naglab-ot sa akon: Abraham, Abraham, tan-awa, ang akon ngalan si Jehova, kag nabatian ko ikaw, kag nagpanaog sa pagluwas sa imo, kag sa pagdala sa imo palayo sa puluy-an sang imo amay, kag sa tanan mo nga paryente, pakadto sa iban nga duta nga wala mo mahibal-an;

17 Kag ini bangod ginliso nila ang ila mga tagipusuon halin sa akon, sa pagsimba sa dios-dios ni Elkena, kag sa dios-dios ni Libna, kag sa dios-dios ni Mamacra, kag sa dios-dios ni Koras, kag sa dios-dios sang Faraon, hari sang Egipto, gani nagpanaog ako sa pagbisita sa ila, kag agud patyon sia nga nag-alsa sang iya kamot batok sa imo, Abraham, anak ko, sa pagpatay sa imo.

18 Tan-awa, giyahan ko ikaw sang akon kamot, kag dal-on ko ikaw, agud ibutang sa imo ang akon ngalan, nga amo ang Pagkapari sang imo amay, kag ang akon gahum mangin yara sa imo.

19 Pareho kay Noe, mangin amo man sa imo; apang paagi sa imo pag-alagad ang akon ngalan makilala sa duta sa wala’y katapusan, kay ako ang imo Dios.

20 Tan-awa, ang Bungyod ni Potifar yara sa duta sang Ur, sa Caldea. Kag ang Ginuo nagrumpag sang altar ni Elkena, kag sang mga dios-dios sang duta, kag lubos nga ginguba ang mga ini, kag ginsakit ang pari nga napatay sia; kag may dako nga kalisud sa Caldea, kag amo man sa palasyo sang Faraon; nga ang Faraon nagakahulugan nga hari paagi sa harianon nga dugo.

21 Karon ining hari sang Egipto kaliwatan nga halin sa balikawang ni Ham, kag linahe sang dugo sang mga Canaanhon tungod sa pagkatawo.

22 Sa sining kaliwatan naghalin ang tanan nga Egiptohanon, kag gani ang dugo sang mga katawhan sang Canaan naamligan sa duta.

23 Ang duta sang Egipto una nga nadiskubre sang isa ka babayi, nga anak nga babayi ni Ham, kag anak nga babayi ni Egiptus, nga sa hinambalan sang mga Caldeanhon nagakahulugan Egipto, nga buot silingon inang ginadilian;

24 Sang nadiskubre sining babayi ang duta natabonan ini sang tubig, nga pagkatapos ginpapuy-an niya sa iya mga anak nga lalaki; kag gani, halin kay Ham, naghalin inang rasa nga nagpadayon sang sumpa sa duta.

25 Karon ang una nga gobyerno sang Egipto ginpahamtang sang Faraon, nga kamagulangan nga anak nga lalaki ni Egiptus, nga anak nga babayi ni Ham, kag suno ini sa sahi sang panggobyerno ni Ham, nga pamaagi sang patriarka.

26 Ang Faraon, bangod matarong nga tawo, nagpahamtang sang iya ginharian kag naghukom sang iya katawhan sing maalam kag makatarongan sa tanan niya nga adlaw, nga hugot nga nagpaninguha sa pagsunod sinang pamaagi nga ginpahamtang sang mga amay sa una nga mga henerasyon, sa mga adlaw sang una nga paggahum sang patriarka, nga amo ang paggahum ni Adan, kag amo man ni Noe, nga iya amay, nga nagpakamaayo sa iya sang mga pagpakamaayo sang duta, kag sang mga pagpakamaayo sang kaalam, apang nagsumpa sa iya parte sa Pagkapari.

27 Karon, bangod ang Faraon halin sa linahe nga indi sia makaangkon sang kinamatarong sa Pagkapari, bisan pa nga ang mga Faraon gusto gid nga mag-angkon sini halin kay Noe, paagi kay Ham, gani ang akon amay ginpatalang palayo sang ila pagsimba sa mga dios-dios;

28 Apang tinguhaan ko, pagkatapos sini, nga ipaathag ang pasunod sang mga hitabo halin sa akon pabalik sa ginsuguran sang pagtuga, kay ang mga sinulatan nagtupa sa akon mga kamot, nga yari pa sa akon tubtob sini nga tion.

29 Karon, pagkatapos nga ang pari ni Elkena ginsakit nga napatay sia, nag-abot ang katumanan sang mga butang nga ginhambal sa akon parte sa duta sang Caldea, nga may magaabot nga tiggulutom sa duta.

30 Gani isa ka tiggulutom ang naglapnag sa bilog nga duta sang Caldea, kag ang akon amay tuman gid nga nag-antos bangod sang tiggulutom, kag naghinulsol sia sang kalainan nga iya tuyo himuon sa akon, nga patyon ako.

31 Apang ang sinulatan sang mga amay nga mga patriarka, parte sa kinamatarong sang Pagkapari, gin-amligan sang Ginuong Dios sa akon kaugalingon nga mga kamot; gani ang ihibalo parte sa ginsuguran sang pagtuga, kag amo man sang mga planeta, kag sang mga bituon, sa paagi nga ginpahibalo ang mga ini sa mga amay, gin-amligan ko tubtob sini nga adlaw, kag tinguhaan ko nga magsulat sing pila sining mga butang sa sining sinulatan, para sa kaayohan sang akon kaliwatan nga matawo pagkatapos nakon.