1 Afei Ewuradze Nyankopɔn maa ɔkɔm no ano yɛɛ dzen wɔ Ur asaase do araa ma Haran, mo nuabanyin wui; mbom Terah, m’egya, daa ho tsenaa Chaldeefo hɔn Ur asaase no do.

2 Na ɔbaa dɛ emi, Abraham, waar Sarai, na Nahor, mo nuabanyin, waar Milcah, nyia ɔyɛ Haran ne babaa no.

3 Afei Ewuradze see me dɛ: Abraham, fi wo man mu, na fi w’ebusua mu, na fi w’egya fie, kɔ asaase a mebɛkyerɛ wo no do.

4 Dɛm ntsi mifii Ur asaase no a ɔyɛ Chaldeefo dze no do, dɛ morokɔ Canaan asaase do; na mefaa Lot, mo nuabanyin ne babanyin, nye ne yer, nye me yer Sarai; na m’egya so dzii m’ekyir, kɔr asaase no a yɛtoo ne dzin Haran no do.

5 Na ɔkɔm no n’ano bɔɔ adze kakra; na m’egya kaa Haran na ɔtsenaa hɔ, osiandɛ nyɛmbowa pii wɔ Haran; na m’egya daan noho bio kɔr n’abosonsom mu, dɛm ntsi ɔkɔr do tsenaa Haran.

6 Mbom emi, Abraham, nye Lot, mo nuabanyin ne babanyin no, bɔɔ mpaa maa Ewuradze, na Ewuradze yii noho kyerɛɛ me, na ɔsee me dɛ: Soɛr na fa Lot kã wo ho; na mowɔ siantsir a miriyi wo efi Haran, na mebɛyɛ wo sɔfo ma asoa me dzin dze aakɔ ananabea a medze bɛma w’asefo a wobedzi w’ekyir no, dɛ daapem enyadze, sɛ wɔyɛ aso ma me ndze a.

7 Na Emi nye Ewuradze wo Nyankopɔn; Metse sor; na asaase yɛ m’ananadzegua; Metsen me nsa wɔ po do a, otsie me ndze, mema mframa na ogya bɛyɛ me tseaseanam; Mese mbepɔw dɛ—Tutu fi ha—na hwɛ, ekyinehyia-mframa whim hɔn kɔ, ntsɛmara, awerɛfir mu.

8 Me dzin dze Jehovah, na minyim ewiei fi ahyɛse; dɛm ntsi me nsa bɛkata wo do.

9 Na mebɛyɛ wo ɔman kɛse, na mibehyira wo mbordo, na mama wo dzin ayɛ kɛse wɔ aman nyinara mu, na ebɛyɛ nhyira dze ama w’asefo a wobedzi w’ekyir no, ama hɔn nsamu no woesuo ɔsomdwuma yi nye Asɔfodzi no mu dze akɔ aman nyinara;

10 Na mobodua wo dzin do ehyira hɔn; na dodow biara a wɔbɛgye Asɛmpa yi no wɔdze wo dzin bɛfrɛ hɔn, na wɔbɛyɛ hɔn w’asefo, na wɔbɔsoɛr egyina na woehyira wo, dɛ hɔn egya.

11 Na mibehyira hɔn a wohyira wo, na medze ndom akã hɔn a wɔdom wo no; na wo mu (ɔno nye dɛ, wɔ w’Asɔfodzi mu) na w’asefo mu (ɔno nye dɛ, w’Asɔfodzi), na mobɔ wo anohoba dɛ dɛm ndzinoa yi bɔkɔ do wɔ wo mu, nye w’asefo a wobedzi w’ekyir (ɔno nye dɛ, w’asefo ankasa, anaadɛ wo nyimpadua mu asefo) mu na asaase do ebusua ebusua nyinara wobehyira hɔn, wɔdze Asɛmpa no ne nhyira mpo, dza ɔyɛ nkwagye ne nhyira no, onnyiewiei nkwa mpo.

12 Afei, ekyir no Ewuradze gyaa dɛ ɔrekasa kyerɛ me no, na oyii n’enyi fii mo do, mekãa wɔ m’akoma mu dɛ: W’akowaa maper ahwehwɛ wo enyiber do; afei mehu wo;

13 Ɔwo esomaa wo bɔfoe dɛ ɔmbɛgye me mfi Elkenah enyame nsamu, obeye ama me dɛ mebɛyɛ aso ama wo ndze, dɛm ntsi ma w’akowaa nsoɛr nkɔ asomdwee mu.

14 Dɛm ntsi emi, Abraham, mokɔree dɛ mbrɛ Ewuradze ase me no, na Lot kã moho; na emi, Abraham, nna meedzi mfe eduosia na ebien ber a mifii Haran no.

15 Na mefaa Sarai, nyia mowaar no wɔ ber a nna mowɔ Ur a ɔwɔ Chaldea no, nye Lot, mo nuabanyin ne babanyin, nye hɛn ahodze nyinara a yɛaboa ano, nye akra a yenyaa wɔ Haran, na yesii mu dɛ yɛrokɔ Canaan asaase do, na yɛtsenaa asese mu wɔ hɛn akwantu mu;

16 Dɛm ntsi, mbersantsen yɛɛ hɛn akatado, na hɛn botan na hɛn nkwagye, ber a yetuu kwan fii Haran faa Jershon kwan do dɛ yɛrokɔ Canaan asaase do no.

17 Afei emi, Abraham, sii afɔrmbukyia wɔ Jershon asaase do, na mobɔɔ afɔr maa Ewuradze, na mobɔɔ mpaa ama ɔkɔm no adan efi m’egya fie, amma wɔannhera.

18 Na nkyii yetwaa mu wɔ Jershon asaase no do kɔr Sechem bea do; ɔwɔ Moreh asaase petee no do, nna yedu Canaanfo asaase no n’ahe do dada, na mobɔɔ afɔr wɔ Moreh asaase petee no do hɔ, na medze m’ahom nyinara frɛɛ Ewuradze, osiandɛ nna yɛaba abosonsom man yi do dada.

19 Na Ewuradze yii noho kyerɛɛ me wɔ me mpaabɔ ho mbuae ntsi, na ɔsee me dɛ: W’asefo na medze asaase yi bɛma hɔn.

20 Na emi, Abraham, mosoɛree fii afɔrmbukyia no a mesi ama Ewuradze no ho, na mifii hɔ kɔr bepɔw bi a ɔwɔ Bethel no boka, na mobɔɔ m’asese wɔ hɔ, Bethel wɔ anee, na Hai wɔ boka; na hɔ na misii afɔrmbukyia kor so maa Ewuradze, na mobɔɔ Ewuradze ne dzin bio frɛɛ no.

21 Na emi, Abraham, tuu kwan, sɔɔw do kɔr anaafo; nna ɔkɔm da ho wɔ asaase no do; na emi, Abraham, sii m’adwen pi dɛ mobɔkɔ Egpt, dɛ mobɔkɔ akɛtsena hɔ ahɔhotsena, osiandɛ nna ɔkɔm no ano ayɛ dzen dodow.

22 Na ɔbaa dɛ ber a aka kakra ma mahɛn Egypt no, Ewuradze see me dɛ: Hwɛ, Sarai, wo yer, yɛ ɔbaa a noho yɛ fɛw;

23 Dɛm ntsi ɔbɛba dɛ, sɛ Egyptfo no hu no a, wɔbɛse dɛ—ɔyɛ ne yer; na woboku wo, mbom wɔbɛgye ɔno nkwa; dɛm ntsi hom nhwɛ nyɛ iyi:

24 Ma ɔnkã nkyerɛ Egyptfo no dɛ, ɔyɛ w’akyerɛbaa, na wo kra bɛtsena ase.

25 Na ɔbaa dɛ emi, Abraham, kãa kyerɛɛ Sarai, me yer no, dza Ewuradze akã akyerɛ me no nyinara—Dɛm ntsi kã kyerɛ hɔn, meserɛ wo, dɛ m’akyerɛbaa nye wo, ama eesi me yie wɔ ɔwo ntsi, na me kra bɛtsena ase osian ɔwo ntsi.