Afɔrbɔ

Akyɛdze a wɔdze ma Ewuradze. Mber pii na Ahyɛmu Dadaw no dze kasafua no kyerɛɛ afɔrbɔ anaa ɔhyew-afɔr. Ndɛ mber yi Asɔr no kã akɔnkye afɔr na afɔrbɔ binom so a yɛnam hɛn pɛ mu dze ma (bi nye mber, talent, na ahodze) dɛ yɛdze roboa ehiafo nye akwan nkaa a no ho hia no bi.

Tsetseberdo no, afɔrbɔ n’ase kyerɛ dɛ ebɛyɛ biribi anaa obi krɔnkrɔn. Afei sesei n’asekyerɛ abɛyɛ dɛ irigyaa biribi mu anaadɛ ereyew wiadze mu ndzɛmba dze ama Ewuradze na N’ahenman. Ewuradze N’Asɔrmba wɔ dɛ wonya pɛ dze ndzɛmba nyina bɔ afɔr ma Ewuradze. Joseph Smith kyerɛkyerɛɛ dɛ “nyamesom a ɔnnhwehwɛ dɛ wɔdze ndzɛmba nyina bɔbɔ afɔr no nnkenya tum a odzi mu a obotum ama gyedzi a ohia dze akɔ nkwa na nkwagye mu dabiarada.” Onnyiewiei nhwɛmu kwan do no, nhyira a wɔnam afɔrbɔ do nya no sõ koraa kyɛn adze biara a woegyaa mu ama no.

Adam na Eve wɔpaam hɔn fii Eden Ture no mu ekyir no, Ewuradze maa hɔn afɔrbɔ mbra. Hɔn nyɛmbowa mu mbakan kã afɔrbɔ mbra yi ho. Afɔrbɔ yi gyinaa hɔ dze maa Nyankopɔn ne Ba a Wɔwoo no Kortoo no no n’afɔrbɔ a ɔrobɔbɔ no (Moses 5:4–8). Ndzeyɛɛ yi kɔr do kesii Jesus Christ no wu, dza ɔdze mbowa afɔrbɔ a ɔyɛ asɛmpa ayɛdze no baa ewiei (Alma 34:13–14). Ndɛ Asɔr no mu mba dzi sacrament a ɔyɛ paanoo na nsu dze kaa Jesus Christ n’afɔrbɔ no. Ndɛ wɔkã kyerɛ Christ n’Asɔrmba so dɛ wɔmfa akoma a abobɔ na sunsum a abotow mbɔ afɔr (3 Ne. 9:19–22). Iyi kyerɛ dɛ wɔabrɛ hɔnho adze, woenu hɔnho, na wonya dɛ wobedzi Nyankopɔn ne mbrasɛm do.