1 Kag ako, si Abraham, may yara sang Urim kag Tumim, nga ginhatag sang Ginuo nga akon Dios sa akon, sa duta sang Ur sang mga Caldeanhon;

2 Kag nakita ko ang mga bituon, nga tuman sila kasanag, kag ang isa sa ila pinakamalapit sa trono sang Dios; kag may madamo nga masanag nga mga bituon nga malapit diri;

3 Kag ang Ginuo nagsiling sa akon: Ini ang nagapanguna nga mga bituon; kag ang ngalan sang pinakamasanag amo ang Kolob, bangod malapit ini sa akon, kay ako ang Ginuo nga imo Dios: Ginpahamtang ko ini agud magpanguna sa tanan nga kabahin sang pareho nga sahi sa sinang imo ginatindogan.

4 Kag ang Ginuo nagsiling sa akon paagi sa Urim kag Tumim, nga ang Kolob nagasanto sa paagi sang Ginuo, suno sa mga tinion kag mga panahon sini sa iya pagtiyog; nga ang isa ka pagtiyog isa ka adlaw sa Ginuo, suno sa iya paagi sa pag-isip, nga ini isa ka libo ka tuig suno sa tinion nga gintalana sa sinang imo ginatindogan. Ini ang pag-isip sang tinion sang Ginuo suno sa pag-isip sang Kolob.

5 Kag ang Ginuo nagsiling sa akon: Ang planeta nga mas diutay nga kasanag, nga mas magamay sangsa sinang nagagahum sang kaadlawon, bisan pa sang kagab-ihon, mas labaw ukon mas sobra sangsa sinang sa imo ginatindogan parte sa pag-isip kay nagatiyog ini sing mas mahinay; nagakaigo ini bangod nahamtang ini nga mas mataas sangsa duta nga imo ginatindogan, gani ang pag-isip sang iya tinion indi tuman kadamo suno sa kadamuon sang inadlaw, kag sang binulan, kag sang tinuig.

6 Kag ang Ginuo nagsiling sa akon: Karon, Abraham, may yara sang duha ka kamatuoran, tan-awa makita ini sang imo mga mata; ginahatag ini sa imo nga mahibaloan ang mga tinion sang pag-isip, kag ang gintalana nga tinion, huo, ang gintalana nga tinion sang duta nga imo ginatindogan, kag ang gintalana nga tinion sing mas dako nga kasanag nga ginpahamtang sa paggahum sang kaadlawon, kag ang gintalana nga tinion sing mas diutay nga kasanag nga ginpahamtang sa paggahum sang kagab-ihon.

7 Karon ang gintalana nga tinion sing mas diutay nga kasanag mas malawig nga tinion sang pag-isip sangsa pag-isip sang tinion sa duta nga imo ginatindogan.

8 Kag kon sa diin yari ining duha ka kamatuoran, may isa pa gid ka kamatuoran nga mas labaw sangsa mga ini, nga, may yara pa gid sang isa ka planeta nga ang pag-isip sang tinion mas malawig pa gid;

9 Kag gani may pag-isip sang tinion sa isa ka planeta nga labaw sangsa isa tubtob nga malapit na sa Kolob, nga inang Kolob suno sa pag-isip sang tinion sang Ginuo; nga inang Kolob nahamtang malapit sa trono sang Dios, nga magagahum sa tanan sinang mga planeta nga kabahin sang pareho nga sahi sa imo ginatindogan.

10 Kag ginahatag sa imo nga makahibalo sang gintalana nga tinion sang tanan nga mga bituon nga ginpahamtang sa paghatag sang kasanag, tubtob nga malapit na sa trono sang Dios.

11 Gani ako, si Abraham, nakighambal sa Ginuo, sing atubangay, pareho nga ang isa ka tawo nagapakighambal sa isa; kag ginsugiran niya ako sang mga binuhatan nga ginhimo sang iya mga kamot;

12 Kag nagsiling sia sa akon: Anak ko, anak ko (kag ang iya kamot nauntay), tan-awa ipakita ko sa imo ini tanan. Kag ginbutang niya ang iya kamot sa akon mga mata, kag nakita ko inang mga ginhimo sang iya mga kamot, nga madamo, kag nagdamo nga nagdamo sa atubang sang akon mga mata, kag indi ko makita ang katapusan sang mga ini.

13 Kag nagsiling sia sa akon: Ini ang Sineas, nga amo ang adlaw. Kag nagsiling sia sa akon: Kokob, nga amo ang bituon. Kag nagsiling sia sa akon: Olea nga amo ang bulan. Kag nagsiling sia sa akon: Kokaubim, nga nagakahulugan mga bituon, ukon tanan nga dako nga kasanag nga yara sa kahawaan sang langit.

14 Kag kagab-ihon sadto sang ang Ginuo naghambal sining mga pulong sa akon: Padamuon ko ikaw, kag ang imo kaliwatan pagkatapos nimo, pareho sang mga ini; kag kon maisip mo ang kadamuon sang balas, amo man sina ang kadamuon sang imo kaliwatan.

15 Kag ang Ginuo nagsiling sa akon: Abraham, ginapakita ko ining mga butang sa imo antes kamo magkadto sa Egipto, agud mapahayag ninyo ang tanan sining mga pulong.

16 Kon may yara sang duha ka butang, kag may isa nga labaw sangsa isa, may mas sobra pa gid nga mga butang sangsa ila; gani ang Kolob amo ang pinakamasanag sa tanan nga Kokaubim nga imo nakita, bangod pinakamalapit ini sa akon.

17 Karon, kon may duha ka butang, nga ang isa mas mataas sangsa isa, kag ang bulan mas mataas sangsa duta, gani mahimo nga isa ka planeta ukon bituon ang sarang napahamtang nga mas mataas sangsa ini; kag wala sing bisan ano nga ginaplano nga himuon ang Ginuo nga imo Dios kundi nga himuon gid niya ini.

18 Bisan pa nga ginhimo niya ang mas dako nga bituon, sa amo man kon may duha ka espiritu, kag ang isa mas maalam sangsa isa, apang ining duha ka espiritu, bisan pa nga ang isa mas maalam sangsa isa, wala sing ginsuguran; yara na sila antes pa sa pagtuga, kag wala sing katapusan, magakabuhi sila pagkatapos, kay gnolaum sila, ukon wala’y katapusan.

19 Kag ang Ginuo nagsiling sa akon: May yara sang duha ka kamatuoran, nga kon may duha ka espiritu nga ang isa nga mas maalam sangsa isa; may isa pa gid nga mangin mas maalam sangsa ila; Ako ang Ginuo nga imo Dios, mas maalam ako sangsa ila tanan.

20 Ang Ginuo nga imo Dios nagpadala sang iya angel agud luwason ka sa mga kamot sang pari ni Elkena.

21 Nagapuyo ako sa tunga nila tanan; Gani, ako karon nagpanaog sa imo agud ipahayag sa imo ang mga binuhatan nga ginhimo sang akon mga kamot, sa diin ang akon kaalam naglabaw sa ila tanan, kay nagagahum ako sa mga langit sa ibabaw, kag sa duta sa idalom, sa lubos nga kaalam kag pagkamatarong, sa tanan nga intelihensya nga nakita sang imo mga mata halin sa ginsuguran; nagpanaog ako sang ginsuguran sa tunga sang tanan nga intelihensya nga imo nakita.

22 Karon ginpakita sang Ginuo sa akon, nga si Abraham, ang mga intelihensya nga nahamtang antes ginhimo ang kalibutan; kag madamo sa ila ang mga dungganon kag mga halangdon;

23 Kag nakita sang Dios ining mga kalag nga maayo sila, kag nagtindog sia sa tunga nila, kag nagsiling: Ang mga ini himuon ko nga akon mga tagdumala; kay nagtindog sia sa tunga sadtong mga espiritu, kag nakita niya nga maayo sila; kag nagsiling sia sa akon: Abraham, isa ka sa ila; pinili ka antes ka natawo.

24 Kag may nagtindog nga isa sa tunga nila nga pareho sa Dios, kag nagsiling sa sadtong mga kaupod niya: Manaog kita, kay may lugar didto, kag gamiton naton ining mga butang, kag mahimo kita sang duta nga sa diin ang mga ini makapuyo;

25 Kag tilawan naton sila sa sini, agud mahibaloan kon himuon nila ang tanan nga butang nga isugo sa ila sang Ginuo nga ila Dios;

26 Kag sila nga magatipig sang ila una nga kahimtangan pagadugangan; kag sila nga indi magtipig sang ila una nga kahimtangan indi makaangkon sang himaya sa amo man nga ginharian upod sinang magatipig sang ila una nga kahimtangan; kag sila nga magatipig sang ila ika-duha nga kahimtangan pagadugangan sang himaya sa ila mga ulo tubtob sa wala’y katapusan.

27 Kag ang Ginuo nagsiling: Sin-o ang akon ipadala? Kag may isa nga nagsabat nga pareho sa Anak sang Tawo: Yari ako, ipadala ako. Kag ang isa pa gid nagsabat kag nagsiling: Yari ako, ipadala ako. Kag ang Ginuo nagsiling: Ipadala ko ang una.

28 Kag ang ika-duha naakig, kag wala nagtipig sang iya una nga kahimtangan; kag, sina nga adlaw, madamo ang nagsunod sa iya.