1 Mo olsem ia nao bae yumi finisim wok blong mekem ol heven mo wol, mo evri samting we i stap insaed long olgeta.

2 Mo ol God oli bin stap taltalem long medel blong olgeta: “Long ^anambaseven taem, bae yumi stopem wok blong yumi we yumi bin tokbaot; mo bambae yumi spel long nambaseven taem; bae yumi spel long evri wok blong yumi we yumi bin tokbaot.”

3 Mo ol God oli bin finisim wok blong olgeta long nambaseven taem, from se long nambaseven taem, bae oli ^aspel long evriwan long ol wok blong olgeta we olgeta (ol God) oli bin tokbaot bitwin olgeta blong mekem; mo oli bin mekem taem ia i ^btabu. Mo tingting blong olgeta i bin olsem ia nao long taem ia we oli bin toktok tugeta blong mekem ol heven mo wol.

4 Mo ol God oli bin kam daon mo oli bin mekem olgeta ia, ol jeneresen blong ol heven mo blong wol, taem oli bin mekem olgeta long dei ia we God i bin mekem wol mo ol heven,

5 Folem evri samting we oli bin tokbaot long saed blong evri samting blong garen ^abifo i bin stap long wol, mo evri grin lif blong garen bifo hem i gro; from se ol God oli no bin mekem ren i foldaon long wol taem oli bin tokbaot blong mekem olgeta samting ia, mo oli no bin mekem man yet blong i wok long graon.

6 Be i bin gat wan klaod blong smolsmol wota i kamaot long graon, mo i wasem ful fes blong graon.

7 Mo ol ^aGod oli bin mekem man wetem ^bdas blong graon, mo i tekem ^dspirit blong hem (hemia spirit blong man), mo i putum i go insaed long hem; mo i bin blo long nus blong hem mo givim win blong laef, mo man i kam wan sol we i stap ^elaef.

8 Mo ol God oli bin planem wan garen, long Is saed long ^aIden, mo long ples ia nao oli bin putum man ia, we oli putum spirit blong hem long bodi blong hem we oli bin mekem.

9 Mo aot long graon nao, ol God oli bin mekem evri tri oli gro long hem; evri tri we i gud blong luk mo i gud blong kakae; mo tu, ^atri blong laef long medel blong garen, mo tri blong save gud mo nogud.

10 I gat wan reva we i kamaot long Iden, blong wasem garen, mo aot long ples ia, hem i pastru i go seraot, i gat fo fok blong hem.

11 Mo ol God oli bin tekem man ia mo oli bin putum hem insaed long Garen blong Iden, blong hem i wok long graon mo blong hem i lukaot gud long hem.

12 Mo ol God oli bin givim oda long man, oli talem: “Evri tri blong garen ia, yu save kakae frut blong olgeta olsem we yu wantem,

13 Be long saed blong tri blong save gud mo nogud, bambae yu no kakae frut blong hem; from se long taem we bae yu kakae frut blong hem, i tru, bae yu ded.” Nao, mi, Ebraham, mi bin luk se hemia i long ^ataem long Lod, we i folem taem blong ^bKokob; from se ol God oli no bin talemaot yet long Adam fasin blong kaontem taem blong hem.

14 Mo ol God oli talem: “Bae yumi mekem wan fren blong givhan blong man ia, from se i nogud blong man ia i stap hemwan, from hemia, bae yumi mekem wan fren blong givhan blong hem.”

15 Mo ol God oli bin mekem ^aAdam i slip we i slip ded olgeta; mo hem i slip; mo oli bin tekem wan rib blong hem, mo oli bin mekem bodi blong hem long ples we oli bin openem, i kam gud bakegen;

16 Mo rib ia, we ol God oli bin tekem long man ia, oli bin mekem wan ^awoman wetem, mo oli bin tekem hem i go long man ia.

17 Mo Adam i talem: “Hem ia, i bun we i kamaot long bun blong mi, mo mit we i kamaot long mit blong mi; bae mi singaotem hem Woman, from se hem i kamaot long man;

18 From hemia, man i mas aot long papa mo mama blong hem, mo ^atingting mo bodi blong hem i mas blong waef blong hem nomo; mo bae tufala i kam ^bwan bodi nomo.”

19 Mo tufala tugeta i bin neked, man ia wetem waef blong hem, mo tufala i no bin gat sem.

20 Mo wetem graon, ol God oli bin mekem evri animol blong plantesen, mo evri pijin blong skae; mo mi bin komandem se bae oli stap kam long Adam, blong luk se bae hem i putum nem blong olgeta olsem wanem; mo wanem nem we Adam i singaot ol animol ia we oli laef, bae hemia nao nem blong olgeta.

21 Mo Adam i bin givim nem blong evri animol we oli bigwan o smolsmol, mo long ol pijin long skae, mo long evri animol long plantesen; be long saed blong Adam, i gat wan fren blong givhan i stap, blong hem.