Josep Smith—Matu

1 Bwe Ij ba n̄an kom̧, bwe kom̧ jamin naaj lo Eō jān iien in m̧aanļo̧k im jeļā bwe N̄aij E eo im kar jeje kake jān rikanaan ro, m̧ae kom̧ naaj ba: Em̧ōņōņō E eo ej itok ilo etan Irooj, ilo kōdo̧ ko ilan̄, im aolep enjeļ ekwōjarjar ro ippān. Innām ekar meļeļe ro rikaļooran bwe E enaaj bar itok ioon laļ, ālikin An kar aiboojoj im kūrawūn ianbwijmaron̄ in pein Anij.

2 Im Jisōs eaar diwōjļo̧k, im ilo̧k jān tampeļ eo; im ro rikaļooran rekar itok n̄an Ippān, n̄an ron̄jake E, im ba: Karo, kwaļo̧k n̄an kōm kake m̧ōko an tampeļ eo, āinwōt Kwaar ba—Renaaj jeepepļo̧k, im likūti n̄an kom̧ jikin elo̧urō.

3 Im Jisōs eba n̄an er: Kom̧ij jab lo aolep men kein, im kom̧ ij jab meļeļe kaki ke? Em̧ool Ij ba n̄an kom̧, enaaj ban wōr juon ijin, ioon tampeļ in, juon ejm̧aan ioon bar juon eo eban ebjak.

4 Im Jisōs eaar likūt er, im eaar ilo̧k ioon Toļ Olivet. Im ke Eaar jijet ioon Toļ Olivet, rikaļoor ro rekar itok n̄an Ippān make, im ba: Ba n̄an kōm n̄āāt men kein me Kwaar ba kake ko̧kkure eo an tampeļ eo renaaj waļo̧k, im riJu ro; im ta kakōļļe eo kōn itok eo Am, im kōn jem̧ļo̧k in laļ in, ak ko̧kkure eo an ro renana, eo ej jem̧ļo̧k in laļ?

5 Im Jisōs eaar uwaak, im ba n̄an er: Kom̧in kōjparok bwe en ejjeļo̧k armej ej m̧oņe kom̧;

6 Bwe elōn̄ renaaj itok ilo Eta, im ba—N̄a ij RiKraist—im naaj m̧oņe elōn̄;

7 Innām renaaj leļo̧k kom̧ n̄an kaen̄tanaan ko, im naaj m̧ane kom̧, im kom̧ aolep laļ ko renaaj dike kom̧, kōn Eta;

8 Innām elōn̄ renaaj ļōkatip, im naaj kaarmejjete doon, im naaj dike doon;

9 Im elōn̄ rikanaan waan renaaj jerkaktok, im naaj m̧oņe elōn̄;

10 Im kōnke nana enaaj ļap, iakwe an elōn̄ enaaj kanooj m̧ōļoļo̧k;

11 A eo ej kijenmej wōt im rej jab anjo̧ ioon, ejja in wōt enaaj mour.

12 N̄e kom̧, kōn menin, naaj lo kajjōjō in lo̧urō eo, kar kōnono kake jān Daniel rikanaan eo, kake ko̧kkure an Jerusalem, innām kom̧ naaj jutak ilo jikin eo ekwōjarjar; jabdewōt eo ej kōnono jān bok e en meļeļe.

13 Innām ro rej pād ilo Judia ren ko ļo̧k n̄an ilo toļ ko;

14 E eo ej pād ioon bōrwaj en ko, im jab bar ro̧o̧l n̄an bōk jabdewōt jān m̧weo im̧ōn;

15 Im jab kōtļo̧k eo ej pād ilo meļaaj eo bwe en bar ro̧o̧l n̄an bōk nuknuk ko an;

16 Im jerata n̄an ro rej bōro̧ro, im n̄an ro rej kaninnin ilo raan ko;

17 Kōn menin, kom̧in jar n̄an Irooj bwe ami ko en jab ilo an̄ōnean̄, im jab ilo raan in Jabōt;

18 Innām bwe, ilo raan ko, enaaj ļap en̄taan ioon riJu ro, im ioon ro rej jokwe ilo Jerusalem, jon̄an eo ejjan̄in kar jilkinļo̧k m̧okta ioon Israel, jān Anij, jān jinoin aelōn̄ in kiin̄ eo aer m̧ae iien in; jaab, im jamin naaj bar jilkinļo̧k ioon Israel.

19 Aolep men ko me renaaj waļo̧k n̄an er rej jinoin wōt būrom̧ōj ko me renaaj itok ioer.

20 Im ijello̧kun wōt n̄e raan ko rej kaduļo̧k, enaaj ejjeļo̧k juon iaer kanniōkin enaaj mour; a kōn em̧m̧an eo an ro kāālet er, ekkar n̄an bujen eo, naaj kōkadukiļo̧k raan ko.

21 Lo, men kein Iaar kōnono kake n̄an kom̧ kōn riJu ro; im bar juon alen, ālikin lim̧otak eo ilo raan ko me renaaj itok ioon Jerusalem, eļan̄n̄e jabdewōt enaaj ba n̄an kom̧, Lo, RiKraist en̄e, ak en̄uweo, jab tōmak e;

22 Bwe ilo raan ko enaaj wōr barāinwōt RiKraist waan ro, im rikanaan waan ro, im renaaj kwaļo̧ki kakōļļe ko im kabwilōn̄lōn̄ ko, jon̄an, bwe, eļan̄n̄e remaron̄, renaaj m̧oņe ro kāālet er, ro rej kar kāālet er ekkar n̄an bujen eo.

23 Lo, Ij kōnono men kein n̄an kom̧ kōn em̧m̧an eo an ro kar kāālet er; im kom̧ naaj barāinwōt ron̄ kōn tariņae ko, im unoj kōn tariņae ko; lale bwe kom̧in jab ļōkatip, bwe aolep Iaar ba n̄an kom̧ eaikuj kūrm̧ool; a jem̧ļo̧kin ejjan̄in kijōr in itok.

24 Lo, em̧ōj Aō kar ba n̄an kom̧ m̧oktaļo̧k;

25 Kōn menin, eļan̄n̄e renaaj ba n̄an kom̧: Lo, E ej pād ilo āne jem̧aden; kom̧in jab etal: Lo, E ej pād ilo jikin ko rettino; jab tōmak e;

26 Bwe āinwōt meram eo ilo jibbon̄ ej itok jān rear, im kōmeramļo̧k em̧ool rilik, im kalibobo aolepān laļ, āindein enaaj barāinwōt jekjek in itok eo an eo Nejin Armej.

27 Im kiiō Ij kwaļo̧k n̄an kom̧ juon būrabōļ. Lo, jabdewōt ijo ub ej pād ie, ijo igōl ko renaaj kukļo̧k ippān doon; āindein barāinwōt naaj ro kar kāālet er Aō naaj aintok er jān m̧ōttan ko emān an laļ.

28 Im renaaj ron̄ kōn tariņae ko, im unoj kōn tariņae ko.

29 Lo Ij kōnono kōn em̧m̧an eo an ro kar kāālet er Aō; bwe laļ enaaj jutak ņae laļ, im aelōn̄ in kiin̄ ņae aelōn̄ in kiin̄; enaaj wōr n̄ūta ko, im nan̄inmej ko, im m̧akūtkūt ko in laļ, ilo elōn̄ jikin ko.

30 Im bar juon alen, kōnke nana enaaj kanooj ļap, iakwe an armej raņ enaaj kanooj m̧ōļoļo̧k; a e eo jamin naaj anjo̧ ioon, ejja in wōt enaaj mour.

31 Im bar juon alen, Gospel in an Aelōn̄ in Kiin̄ eo naaj kwaļo̧k e ilo aolepān laļ, n̄an juon kam̧ool n̄an aolep laļ ko, innām enaaj itok jem̧ļo̧k eo, ak ko̧kkure eo an ro renana;

32 Im bar juon alen naaj kajjōjō in lo̧urō eo, kōnono kake jān Daniel rikanaan eo, enaaj kūrm̧ool.

33 Im em̧ōkaj ālikin wōt iien en̄taan eo ilo raan ko, aļ enaaj marok, im allōn̄ enaaj ban leļo̧k meram eo an, im iju ko renaaj wōtlo̧k jān lan̄, im kajoor ko an lan̄ renaaj wūdiddid.

34 Em̧ool, Ij ba n̄an kom̧, epepen in, eo me ilo e men kein renaaj waļo̧k, eban jako m̧ae aolep Iaar ba n̄an kom̧ renaaj kūrm̧ool.

35 Ijoke, raan ko renaaj itok, bwe lan̄ im laļ renaaj jako; a naan ko Aō rej jamin jako, a aolep renaaj kūrm̧ool.

36 Im, āinwōt Iaar ba m̧oktaļo̧k, ālikin iien en̄taan eo ilo raan ko, im kajoor ko an lan̄ renaaj wūdiddid, innām enaaj waļo̧k kakōļļeen eo Nejin Armej ilo lan̄, innām aolep bwij ko an laļ renaaj būrom̧ōj; im renaaj lo Nejin Armej ej itok ilo kōdo̧ ko in lan̄, kōn kajoor im aiboojoj eļap;

37 Im jabdewōt eo ej kaorōk naan ko Aō, naaj jamin m̧oņe, bwe eo Nejin Armej enaaj itok, im E naaj jilkinļo̧k enjeļ ro An im̧aanļo̧k E kōn juon jilel eļap ainikien, im renaaj aintok ippān doon bwe in ro rikāālet An jān emān kōto ko, jān juon jem̧ļo̧kin lan̄ n̄an eo bar juon.

38 Kiiō jeļā būrabōļ eo kōn wōjke fig eo—N̄e ra ko raan rej ub wōt, im ej jino jebar bōlōk ko bwilōkōn, kom̧ ij jeļā bwe rak ej epaaktok;

39 Ejja āindein wōt, ro rikāālet Aō, n̄e renaaj lo aolep men kein, renaaj jeļā bwe E ej epaak, em̧ool iturin kōjām ko;

40 A kōn raan eo, im awa, ejjeļo̧k juon ejeļā; jaab, jab enjeļ raņ an Anij ilo lan̄, a Jema wōt.

41 A āinwōt ekar ilo raan ko an Noa, āindein enaaj bar āinwōt ilo itok eo an eo Nejin Armej;

42 Bwe enaaj jekjek eo in ippāer, āinwōt e kar ilo raan ko me kar m̧okta jān ibwijleplep eo; bwe m̧ae raan eo Noa eaar deļo̧n̄ļo̧k ilo wa eo rekar m̧ōn̄ā im idaak, m̧are im leļo̧k ilo m̧are;

43 Im kar jab jeļā m̧ae ibwijleplep eo eaar itok, im kinōōrļo̧k er aolep; āindein enaaj barāinwōt ilo itok eo an eo Nejin Armej.

44 Innām enaaj kūrm̧ool men eo me em̧ōj jeje, bwe ilo raan ko āliktata, ruo renaaj pād ilo meļaaj eo, juon naaj bōk e, im eo juon likūt wōt;

45 Ruo renaaj irir ilo jikin irir, juon naaj bōke, im eo juon likūt wōt;

46 Im ta Ij ba n̄an juon, Ij ba n̄an aolep armej; ekkōl, kōn menin, bwe kom̧ ij jab jeļā awa ta ami Irooj ej itok.

47 A jeļā men in, eļan̄n̄e armej em̧m̧an eo im̧weo en kar jeļā ilo awa ta riko̧o̧t ej itok, e enaaj kar ekkōl, im naaj kar jab kōtļo̧k bwe m̧weo im̧ōn en kar ruprupe, a enaaj kar pojak.

48 Kōn menin kom̧in barāinwōt pojak, bwe ilo awa eo im kom̧ ij jab ļōmņak e, Nejin Armej ej itok.

49 Innām, wōn, ej karejeran etiljek im mālōtlōt, eo im irooj eo an ar kōm̧m̧an bwe en ripepe ioon m̧weo im̧ōn, n̄an leļo̧k n̄an er kanniōk ilo tōre eo ekkar?

50 Em̧ōņōņō eo rikarejeran im irooj eo an, n̄e ej itok, enaaj lo ej kōm̧m̧an āinwōt; im em̧ool Ij ba n̄an kom̧, e enaaj kōm̧m̧an bwe en ripepe ioon aolep men ko m̧weiien.

51 A eļan̄n̄e rikarejeran eo enana enaaj ba ilo būruōn: Aō irooj ej karum̧wijļo̧k an itok,

52 Im naaj jino den̄ļo̧ke ro rikarejeran m̧ōttan, im n̄an m̧ōn̄ā im idaak ippān ro rikadek,

53 Irooj eo an in rikarejeran eo enaaj itok ilo juon raan n̄e ej jab pukpukote e, im ilo awa eo ej jab jeļā kake,

54 Im naaj m̧wijm̧wijiti e ijeņ im ijeņ, im naaj jitōn̄e kōj eo an n̄an ro rietao; enaaj wōr jan̄ im n̄i ļaļļaļ.

55 Im āindein ej itok jem̧ļo̧k in ro renana, ekkar n̄an kanaan eo an Moses, ej ba: Er naaj bukweļo̧k er jān ilubwiljin armej ro; a jem̧ļo̧k in laļ ej jan̄in kijer, a ej itok ālikin.