Anij, Doulul in Anij
Ewōr jilu anij ro reoktak jān doon ilo Doulul in Anij: Anij, Jemān Indeeo; eo Nejin, Jisōs Kraist; im Jetōb Kwōjarjar. Kōmij tōmak ilo kajjojo Iaer (Tōmak 1:1). Jān revelesōn ko raan kein jejeļā bwe Jemān im Nejin ewōr ānbwinnier kanemarmej kanniōk im di im bwe Jetōb Kwōjarjar ej juon jetōb, ejjeļo̧k kanniōkin im diin (K&B 130:22–23). Anij rein jilu rej juon wōt ilo bōrokuk eweeppān im juon wōt ilo kōttōpar im katak (Jon 17:21–23; 2 Ni. 31:21; 3 Ni. 11:27, 36).
Anij Jemān
Ekkā wōt ān̄inn̄in Jemān, ak Elohim, eo ekkā ān̄inn̄in E kōn taitōl in Anij. E jej kūri Jemān kōnke Ej jemān jetōb ko ad (Bōn. 16:22; 27:16; Mal. 2:10; Matu 6:9; Epe. 4:6; Hib. 12:9). Anij Jemān ej ripepe eutiejtata an universe. E ekajoor bōtata (Jen. 18:14; Alma 26:35; K&B 19:1–3), jeļāļo̧kjeņ tata (Matu 6:8; 2 Ni. 2:24), im E ej pād ijoko jabdewōt kōn Jetōb eo An (Sam Ko 139:7–12; K&B 88:7–13, 41). Armej otemjeļo̧k ewōr juon aer kadkad n̄an Anij eo ej kōjenolo̧k armej jān aolep mennin kōm̧anm̧an ko jet em̧ōj kōm̧anm̧ani: em̧m̧aan im kōrā rej jetōb ro nejin Anij (Sam Ko 82:6; 1 Jon 3:1–3; K&B 20:17–18).
Ewōr wōt jet iien ko kar ļo̧o̧ki im Anij Jemān ej waļo̧kļo̧k n̄an ak ekkōnono n̄an armej. Jeje ko rekwōjarjar rej ba bwe Eaar ekkōnono n̄an Adam im Iv (Moses 4:14–31) im kwaļo̧k kadkadin Jisōs Kraist ilo jet iien (Matu 3:17; 17:5; Jon 12:28–29; 3 Ni. 11:3–7). Eaar waļo̧kļo̧k n̄an Stipen (Jerb. 7:55–56) im Josep Smith (JS—B 1:17). Tok ālik Eaar waļo̧kļo̧k n̄an Josep Smith im Sidney Rigdon jim̧or (K&B 76:20, 23). N̄an ro rej iakwe Anij im karreoik er im̧aan Mejān, Anij jet iien Ej kōtļo̧k utiej eo n̄an loe im jeļā n̄an er make bwe E ej Anij (Matu 5:8; 3 Ni. 12:8; K&B 76:116–118; 93:1).
Anij Nejin
Anij jej jeļā kake ke Jeova ej Nejin, Jisōs Kraist (Ais. 12:2; 43:11; 49:26; 1 Kor. 10:1–4; 1 Tim. 1:1; Rev. 1:8; 2 Ni. 22:2). Jisōs ej jerbal ium̧win tōl eo an Jemān im ej ilo juon wōt bōro Ippān. Armej otemjej rej m̧aan im kōrā ro jatin, bwe E ej eo erūttotata ian jetōb ro nejin Elohim. Jet eoon ko ilo jeje ko rekwōjarjar rej ān̄inn̄in E jān naan in Anij. N̄an waanjon̄ok, jeje ko rekwōjarjar rej ba bwe “Anij ar kōm̧anm̧an lan̄ in laļ” (Jen. 1:1), a ilo lukkuun jejjet in ekar Jisōs eo ekar Rikōm̧anm̧an eo ium̧win tōl an Anij Jemān (Jon 1:1–3, 10, 14; Hib. 1:1–2).
Anij Jetōb Kwōjarjar
Jetōb Kwōjarjar ej barāinwōt juon Anij im etan ej Jetōb Kwōjarjar, Jetōb eo, im Jetōb eo an Anij, ilubwiljin jet ian āt ko im taitōl ko an. Kōn jipan̄ ko an Jetōb Kwōjarjar, armej emaron̄ jeļā ankilaan Anij Jemān im jeļā bwe Jisōs ej RiKraist eo (1 Kor. 12:3).