1 Mo i bin hapen se Lod i bin toktok long Moses, i talem se: “Luk, mi ^atalemaot long yu ol samting long saed blong ^bheven ia, mo ^dwol ia; raetemdaon ol toktok we mi talem. Mi mi Stat mo mi En, ^eGod ia we I Gat Olgeta Paoa; tru long ^fWan Stret Pikinini Ia Nomo blong mi, mi bin ^gkrietem olgeta samting ia; yes, long stat, mi bin krietem heven, mo wol we yu yu stanap long hem.

2 Mo ^awol ia, oli no putum tugeta yet, mo i emti; mo mi mekem se tudak i kam long fes blong dip wota; mo Spirit blong mi i bin muv antap long fes blong wota; from we mi mi God.

3 Mo mi, God, mi bin talem: ‘I mas gat ^alaet;’ mo i bin gat laet.

4 Mo mi, God, mi bin luk laet; mo laet ia i bin ^agud. Mo mi, God, mi bin mekem laet i seraot long tudak.

5 Mo mi, God, mi singaotem laet se i Dei; mo tudak, mi bin singaotem Naet; mo hemia, mi bin mekem tru long ^atoktok blong paoa blong mi, mo hem i bin mekem olsem we mi bin stap ^btalem; mo naet ia, mo moning ia, i bin fas ^ddei.

6 Mo bakegen, mi, God, mi bin talem: ‘I mas gat wan ^askae long medel blong wota,’ mo i bin hapen, olsem we mi bin stap talem; mo mi bin talem: ‘I mas seraotem ol wota antap mo ol wota daon’ mo i bin hapen;

7 Mo mi, God, mi bin mekem skae mo mi bin mekem ol ^awota oli bin seraot, yes, ol bigfala wota andanit long skae oli seraot long ol wota we oli stap antap long skae, mo i bin hapen olsem we mi bin stap talem.

8 Mo mi, God, mi bin singaotem skae se i ^aHeven; mo i bin gat wan naet mo wan moning, nao i bin nambatu dei.

9 Mo mi, God, mi talem se: ‘Ol wota andanit long heven oli mas kam tugeta long ^awan ples,’ mo i bin hapen olsem; mo mi, God, mi talem se: ‘I mas gat wan drae graon;’ mo i bin hapen olsem.

10 Mo mi, God, mi bin singaotem drae graon ia se i ^aWol; mo ples we ol wota oli kam tugeta, mi bin singaotem se i Solwota; mo mi, God, mi bin luk se evri samting ia we mi bin mekem, oli gud.

11 Mo mi, God, mi talem se: ‘Bae ^agras i mas gro aot long graon, mo lif i mas givim sid, mo frut tri i mas givim frut, folem ol defdefren kaen, mo tri i mas karem frut, we sid blong hem i stap insaed long graon,’ mo i bin hapen olsem we mi bin stap talem.

12 Mo gras i bin gro aot long graon, evri grin lif i bin givim sid folem ol defdefren kaen blong hem, mo tri i bin givim frut, we sid blong hem i stap insaed long graon, folem ol defdefren kaen; mo mi, God, mi bin luk se evri samting ia we mi bin mekem, oli gud;

13 Mo i bin gat wan naet mo wan moning, nao i bin nambatri dei.

14 Mo mi, God, mi talem se: ‘I mas gat ol laet long skae blong heven, blong seraotem deitaem long naet taem, mo oli givimaot ol saen, mo ol taem blong yia, mo ol dei, mo ol yia;

15 Mo oli mas stap olsem ol laet blong skae blong heven blong givim laet long wol;’ mo i bin hapen olsem.

16 Mo mi, God, mi bin mekem tufala bigfala ^alaet; bigfala laet blong i rul long deitaem, mo smol laet blong i rul long naet taem; mo bigfala laet ia, hem i san; mo smol laet ia, hem i mun; mo ol sta tu oli bin mekem olgeta folem toktok blong mi.

17 Mo mi, God, mi bin putum olgeta long skae blong heven blong givim laet long wol,

18 Mo san blong i rul ova long deitaem, mo blong mun i rul ova long naet taem, mo blong seraotem laet long tudak; mo mi, God, mi bin luk se evri samting ia we mi bin mekem, oli gud;

19 Mo i bin gat wan naet mo wan moning, nao i bin nambafo dei.

20 Mo mi, God, mi talem se: ‘Bae ol wota oli givim fulap animol we oli laef, mo ol pijin bae oli flae antap long graon, antap long open skae blong heven.’

21 Mo mi, God, mi bin krietem ol bigfala ^awelfis, mo evri animol we oli stap laef we oli stap muvmuv, we ol wota oli givim oli fulap, folem ol defdefren kaen blong olgeta, mo evri pijin we oli gat wing, folem ol defdefren kaen blong olgeta; mo mi, God, mi bin luk se evri samting ia we mi bin mekem, oli gud.

22 Mo mi, God, mi bin blesem olgeta, mi talem se: ‘Yufala i karem fulap pikinini, mo yufala i ^akam plante, mo fulumap ol wota blong solwota; mo ol pijin oli mas kam plante antap long graon;’

23 Mo i bin gat wan naet mo wan moning, nao i bin nambafaef dei.

24 Mo mi, God, mi talem se: ‘Graon i mas givim ol animol we oli laef, folem ol defdefren kaen blong olgeta, ol bigfala mo ol smol animol, mo ol animol we oli stap wokbaot long graon, mo ol narafala animol blong wol, folem ol defdefren kaen blong olgeta,’ mo i bin hapen olsem;

25 Mo mi, God, mi bin mekem ol animol blong wol ia folem ol defdefren kaen blong olgeta, mo ol bigfala mo smol animol folem ol defdefren kaen blong olgeta, mo evri samting we i wokbaot long wol folem ol defdefren kaen blong olgeta; mo mi, God, mi bin luk se evri samting ia, oli gud.

26 Mo mi, God, mi bin talem long ^aWan Stret Pikinini Ia Nomo blong mi, we i bin stap wetem mi stat long stat: ‘Bae yumitu ^bmekem man i folem ^dpikja blong yumitu, i semmak long yumitu bakegen;’ mo i bin hapen olsem. Mo mi, God, mi talem se: ‘Bae yumi mekem olgeta oli ^erul ova long ol fis long solwota, mo ova long ol pijin long skae, mo ova long ol bigfala mo smol animol, mo ova long ful wol, mo ova long evri animol we i stap wokbaot long graon.’

27 Mo mi, ^aGod, mi bin mekem man i folem pikja blong miwan, mo folem pikja blong Wan Stret Pikinini Ia Nomo blong mi, mi bin mekem hem; man mo woman, mi bin mekem tufala.

28 Mo mi, God, mi bin blesem tufala, mo mi talem long tufala: ‘Yutufala i gat fulap pikinini, mo yutufala ^ai kam plante, mo fulumap wol, mo gat paoa ova long hem, mo rul ova long fis long solwota, mo ova long ol pijin long skae, mo ova long evri samting we i laef mo i stap muvmuv long wol.’

29 Mo mi, God, mi talem long man se: ‘Luk, mi bin givim yu evri grin lif we i karem sid, we i stap long fes blong ful wol ia, mo evri tri we i bae i gat frut we insaed long hem i gat sid; long yu, bae i olsem ^akaekae blong yu.

30 Mo long evri animol long wol, mo long evri pijin long skae, mo long evri samting we i stap wokbaot long graon, we mi givim laef, bae i gat evri klin gras blong olgeta blong oli kakae;’ mo i bin hapen olsem we mi bin stap talem.

31 Mo mi, God, mi bin luk evri samting we mi bin mekem, mo luk, evri samting we mi bin mekem, oli ^agud tumas; mo i bin gat wan naet mo wan moning, nao i bin ^bnambasikis dei.