Talitali lelei ki he YA Fakauiké

Ko ʻemau taumuʻá ke tokoni atu ke maʻu ʻa e tali ki homou ngaahi faingataʻaʻiá pea mo e mālohi ke mou lava ʻo fehangahangai mo kinautolú. Te tau fai ‘eni ʻaki ʻetau fekumi fakataha ʻi he ongoongolelei ʻa Sīsū Kalaisí pea vakaiʻi ʻa e founga ʻoku moʻui ʻaki ʻe he kakai lalahi kei talavou pea mei he funga ʻo e māmaní.

Fakamuʻomuʻa ʻa e meʻa ʻoku fakamuʻomuʻá: ko e konga kotoa ko ʻení ko ha ueʻi fakalaumālie ia meiate kimoutolu. ʻOku tau fehangahangai mo ha ngaahi fili, ngaahi pole foʻou mo ha ngaahi feliliuaki ʻi heʻetau moʻuí he vahaʻataimi ko ʻení. Pea ʻoku mau fie tataki ʻa kimoutolu ʻi he meʻa kotoa. ʻOku mau fie maʻu foki ke mou ʻiloʻi ʻoku mau vakai atu kiate kimoutolu kae ʻikai ko homou tuʻunga malí, ʻa ia ko e ʻuhinga ʻoku ʻikai ui ai ʻa e konga ko ʻení ko e YSA Fakauiké. ʻOku fokotuʻu ʻa e konga ko ʻení maʻá e kakai lalahi kotoa pē, teʻeki mali pe ʻosi mali, pe niʻihi ʻoku ʻikai toe mali, koeʻuhí ko hoʻomou ngaahi mālohinga ʻi he Siasí—pea mo e māmaní—pea ʻikai lava ʻo fakatataua, ʻo tatau ai pē pe ko e hā hoʻomou tuʻunga lolotonga ʻi he kakai lalahi kei talavoú.

ʻOku mau toe ʻilo foki ko e ngaahi tefito ʻoku mau fakakaukau ki aí ʻe fakamānako ia ki he kakai lalahi kei talavoú, ʻo aʻu ai pē ki he niʻihi ʻoku taʻu 30 pe motuʻa angé. ʻOku mau ʻiloʻi pē mahalo ʻe ʻikai liliu ʻe he ngaahi meʻa te mau talanoa atu ʻakí ʻa hoʻomou mahuʻingaʻia ʻi he ngaahi tefito mo e ngaahi faingataʻaʻiá koeʻuhí pē ko ha ʻaho fāʻeleʻi ʻe taha. Ko e ngaahi palopalema ʻoku tau fehangahangai mo ia ʻi he ʻaho ní ʻoku felāveʻi ia mo kitautolu kotoa pea ʻoku lahi feʻunga ia ke tau fengāueʻaki fakataha, ʻo tatau ai pē pe ko e hā ʻetau taʻu motuʻá.

ʻOku mau ʻiloʻi ʻoku mou omi mei he ngaahi tapa kehekehe ʻo e moʻuí, puipuituʻa fakaakó, tuʻunga fakaʻekonōmiká, tukufakaholó pea mo e ngaahi tūkungá. Ko ia ai te mau akoʻi ha ngaahi tefito kehekehe, pea ko e lahi taha ʻetau ngaahi talanoá ʻe lava ʻo maʻu ia ʻi ha ngaahi lea fakafonua kehekehe ʻe 20 ʻi he Gospel Library—ʻoku mau fie tokoniʻi ʻa kimoutolu kotoa pē pea ʻe ʻaonga ki he taha kotoa pē. ʻOku ʻomi ʻe he kakai lalahi kei talavou kotoa pē mei he funga ʻo e māmaní ʻenau ngaahi tuí mo e talēnití ki he Siasí. ‘I he ngaahi feituʻu lahi, ʻoku ʻikai ko ʻapongipongi pē ʻoku tau hoko ai ko e kau takí, ʻoku tau tataki ʻa e Siasí ʻi he ʻahó ni, kau ai ʻa e ngaahi ʻēlia kuo fuoloa taʻu e fokotuʻu ai e Siasí. Pea ʻe toe mafao mo mahulu atu ʻetau ngaahi ngāué ʻo ʻikai ngata pē ʻi he ʻahó ni, koeʻuhí ko kitautolu ʻa e ngaahi mātuʻa ʻo e toʻu tangata hokó.

ʻOku lahi mo ha ngaahi meʻa te tau lava ʻo lea ʻaki fekauʻaki mo e tuʻunga mo e malava ʻe maʻu ʻe he kakai lalahi kei talavoú, pea kapau te tau lava ʻo hoko atu, ʻe hangē ia ʻoku tau polepolé (koeʻuhí ʻoku lelei ʻaupito hotau toʻu tangatá). ʻOku feʻunga pē ke pehē, ʻoku fie maʻu kitautolu ʻe he ʻOtuá, ʻoku tau fie maʻu ʻa e ʻOtuá mo Hono Siasí, pea ʻoku tau toe fie maʻu ke tau fetokoniʻaki. Hangē ko e lea ʻa Palesiteni Russell M. Nelson ki he kakai lalahi kei talavoú, ʻi heʻetau ngāue fakatahá, “[te tau] lava ʻo fakakakato ha ngaahi meʻa fakahisitōlia. Pea te Ne lava ʻo tokoni ke malava ʻa e ngaahi meʻa ʻoku taʻe-malavá. …

“… Ko ha ʻkakai kuo fili kimoutolu’ (1 Pita 2:9), ne tomuʻa-fakanofo ʻe he ʻOtuá ke fai ha ngāue fakaofo—ke tokoni ke teuteuʻi ʻa e kakai ʻo e māmani ko ʻení ki he Hāʻele ʻAngaua Mai ʻa e ʻEikí!”¹

Neongo e ngaahi liliu lolotongá mo e ngaahi vivili taʻepau ʻo e kahaʻú, ka ʻe lava ke hoko ʻa e taimi ʻo e kakai lalahi kei talavoú ko ha taimi fakaʻofoʻofa ʻo e fekumi kiate kitá pea mo e tupulakí, kumi ʻetau taumuʻa ʻi heni ʻi he māmaní, pea mo e ako ki he founga ke hoko ʻa e ongoongoleleí ko e uho ʻo ʻetau moʻuí. ʻOku mau fiefia ke tau kau fakataha ʻi he fononga ko ʻení pea ʻoku mau ʻamanaki te ke toutou ʻaʻahi mai maʻu pē.

ʻOku maʻu ʻa e YA Fakauiké ʻi he Gospel Library ʻi he ʻŪ Makasiní pe Kakai Lalahi > Kakai Lalahi Kei Talavoú. Te ke maʻu foki ha niʻihi ʻo ʻemau ngaahi talanoá ʻi he makasini Liahoná ʻi he peesi Facebook Liahona pea ʻi he peesi kamata ʻa e ChurchofJesusChrist.org .

• Ko e hā ha ngaahi tefito ʻoku mou fie laukonga mo fanongo ki ai?

• Ko e hā ha ngaahi talanoa ʻokú ke fie vahevahe?

• Ko e hā haʻo ngaahi fokotu’u maʻamautolu?

ʻE lava ke ke fakahū mai haʻo ngaahi talanoa, ngaahi fakakaukau mo ha fakamatala ʻi he liahona.ChurchofJesusChrist.org. ʻOku ʻikai ke mau faʻa tatali ke fanongo meiate koe!