Aoaoina mai le konafesi aoao

Saunia Oe Lava Faaleagaga

I le avea ai ma tagata o Le Ekalesia a Iesu Keriso o le Au Paia o Aso e Gata Ai, ua faamanuiaina i tatou i le i ai o se perofeta soifua i luga o le fogaeleele i aso nei. O Ana aoaoga, faapea ma aoaoga a isi taitai o le Ekalesia, o ni faamalosiauga sili ia i tagata o le Ekalesia—e aofia ai le autalavou o loo e aoaoina. Na folafola mai e le Alii: “[Ia outou] uai atu i upu uma [a perofeta] ma poloaiga o le a ia tuu atu ia te outou … ; ona o lana upu ia outou talia, e pei lava ua mai i lo’u lava gutu, i le onosai ma le faatuatua atoa. Ona o le faia o nei mea o le a le manumalo ai faitotoa o seoli ia te outou; ioe, ma o le a faamataa ese ai e le Alii le Atua mana o le pouliuli mai i o outou luma” (Mataupu Faavae ma Feagaiga 21:4–6).

Punaoa e Fesoasoani ia te Oe e Saunia

Faatasi ai ma le korama po o le au peresitene o le vasega, filifili se tasi po o le sili atu o savali mai le konafesi aoao e sili ona lata mai e te lagona o le a sili ona taua i le autalavou o loo e aoaoina.

O loo maua tusiga ma vitio mai le konafesi aoao i luga o le initoneti (tagai i le conference.lds.org) ma i le polokalama o le Gospel Library.

O Fesili e Mafaufau Loloto i Ai ae E Te Lei Aoao Atu

O a mataupu faavae poo aoaoga faavae na aoaoina i lenei savali o le konafesi? O fea o nei mea e te lagonaina o le a sili ona aoga i talavou o loo i lau korama po o vasega?

O a ni aafiaga po o ni faataitaiga na faaaoga e le failauga? O a ni mataupu faavae na aoao mai e nei aafiaga po o faataitaiga? O a ni aafiaga mai lou lava olaga e mafai ona e faasoa atu lea e fesootai i nei mataupu faavae?

O le a le mea ua valaaulia i tatou e le failauga e fai? O a faamanuiaga na ia folafola mai o le a tatou maua? O a valaaulia ma faamanuiaga na folafola mai o le a e talanoaina ma le autalavou?

Aoao Atu i le Ala a le Faaola

“Mafaufau pe faapefea e le faaaogaina o musika, tala, ata ma isi ituaiga o ata ona mafai ona valaauliaina le Agaga, faamanino mataupu faavae o le talalelei i auala e le mafaagaloina, ma fesoasoani i tagata aoao e faafesootai le talalelei i o latou olaga i aso uma. Manatua o nei punaoa e le tatau ona avea ma taulaiga o le lesona, ae ua na o ni meafaigaluega e fesoasoani ia te oe ia atili mataalia le aoaoina o aoaoga faavae o le talalelei” (Aoao Atu i le Ala a le Faaola, 22).

Otootoga o le Fonotaga

1. Fefautuaai Faatasi ma Fefaasoaai Aafiaga

Taitaiina e se uso o le au peresitene o le korama po o le vasega, pe a ma le 5–10 minute

Taitai se talanoaga e uiga i aitema e pei o mea nei:

O la tatou korama po o le vasega: O ai o misi i le asō? O a ni asiasiga e tatau ona tatou faia? O ai e tatau ona tatou valaauliaina i se gaoioiga o loo loma? O ai e manaomia la tatou fesoasoani ma tatalo?
O a tatou tiute: O a ni galuega e tatau ona tatou faia? O a ni galuega ua tatou faataunuuina? Na faapefea ona tatou valaauliaina isi e o mai ia Keriso, ma e mafai faapefea ona tatou valaauliaina isi i le taimi nei?
O o tatou olaga: Faamanatu atu i le korama po o le vasega le talanoaga mai le fonotaga ua tuanai. O a ni aafiaga sa tatou mauaina i le faaaogaina o mea sa tatou aoaoina? O a ni aafiaga sa tatou mauaina i nai vaiaso ua tuanai lea na faamalosia ai a tatou molimau i le talalelei?

Afai e mafai, ia muai talanoa i nei mea i se fonotaga a le au peresitene a le korama po o le vasega.

2. Aoao Faatasi

Taitaiina e se taitai po o se uso o le korama po o le vasega: pe a ma le 25–35 minute

Suesue le savali po o savali ua filifilia mai le konafesi aoao ma sailia le taitaiga a le Agaga (tagai “O Fesili e Mafaufau Loloto i Ai ae E Te Lei Aoao Atu”). Ona fuafua lea o se auala e fesoasoani ai i le autalavou ia iloa upumoni mai le savali. E mafai ona fesoasoani ia gaoioiga nei:

Aotele mai le savali. Valaaulia le autalavou e faitau le savali ma tusi se aotelega e tasi le fuaiupu e uiga i ai. Lu’i i latou e faalaitiiti le latou aotelega i se fuaitau puupuu e faigofie ona latou manatuaina.
Aoao e uiga i mau. Valaaulia le autalavou e faitau se mau faasino i le savali na filifilia. Fai atu ia i latou e talanoa i le auala e mafai ona fesoasoani ia aoaoga o loo i le savali latou te malamalama atili ai i le mau.
Sauni e faasoa atu. Ao lei faia le fonotaga, fai atu i nai alii talavou po o tamaitai talavou e faitau ni vaega eseese o le savali ma o mai saunia e faasoa mai o latou malamalamaaga, lagona, ma malamalama.
Sue se fasifuaitau. Filifili ni nai parakalafa mai le savali, ma fai atu i le autalavou e sailiili i ai, vaavaai mo ni fuaitau e mafai ona fesoasoani ia i latou ia malamalama ai i le aoaoga faavae o loo aoaoina. Fai atu ia i latou e faasoa mai mea sa latou mauaina ma le mafuaaga e taua ai.
Fatu se ata. Valaaulia le autalavou e saili se upusii mai le savali e taua ia i latou. Ona mafai lea ona latou faia se pepa o i ai se savali, faailogatusi, po o se ata e faavae i lenei upusii e mafai ona latou faasoa atu pe faaali i o latou aiga.
Saili ni valaaulia ma ni faamanuiaga. Tuu atu ia tofu alii talavou ma tamaitai talavou taitasi ma se kopi o le lauga ma ni maka, penitala, po o valiga’o e eseese lanu. Valaaulia i latou e faaaoga lanu eseese e faailoga ai mea e pei o mataupu faavae o le talalelei, valaaulia e faatino, faamanuiaga folafola mai, ma lapataiga. Valaaulia le autalavou e faasoa atu ni malamalamaaga e uiga i mea sa latou mauaina.
Faasoa atu upusii. Valaaulia le autalavou e faasoa atu ni upusii mai le savali lea na musuiaina i latou. O a mea ua musuia i tatou e nei upusii e fai? O a avanoa tatou te maua e faasoa atu ai nei aoaoga i isi?
Saunia se lesona. Fai atu i le autalavou e fai paga e fuafua ai se lesona o le afiafi i le aiga e faatatau i se vaega o le savali. O le a se mea e mafai ona tatou faia e fesoasoani ai i tagata o lo tatou aiga ia malamalama i nei aoaoga ma le auala latou te fesootai ai i o tatou olaga? Valaaulia nisi o paga e faasoa atu a latou fuafuaga.
Faitau ma faasoa atu. Faitau faatasi nisi o upusii mai le savali. Fai atu i le autalavou e faasoa atu ni faataitaiga mai tusitusiga paia ma mai i o latou olaga e faaalia ai le uiga o nei upusii ia i latou.

3. Fuafuaga e faatino

Taitaiina e se uso o le au peresitene o le korama po o le vasega, pe a ma le 5–10 minute

O le a faapefea ona e uunaia le autalavou e faaaoga le savali po o savali i o latou olaga? Mafaufau i tulaga nei:

Fai atu i le autalavou e talanoaina soo se lagona po o uunaiga sa latou maua i le taimi o le fonotaga. O le a se mea na taua ia i latou? E i ai se mea e mafai ona latou faia patino pe o se korama po o se vasega e faaaoga ai mea sa latou aoaoina?
Tuu atu ni nai minute i le autalavou e tusi ai mea o le a latou faia i vaiaso a sau e faatino ai a latou uunaiga. Valaaulia i latou e faasoa atu o latou manatu.
Faamanatu atu i le autalavou o le a latou maua le avanoa e faasoa atu ai o latou aafiaga i le amataga o le fonotaga e sosoo ai.