Famli i Stap long Medel blong Plan Ia blong God
“Famle: Wan Ofisol Toktok I Go Long Wol” i stap talem se “God i odenem mared bitwin man mo woman mo famli hem i stamba blong plan blong Krieta, blong ol pikinini blong Hem from wan taem we i no save finis”.(Ensign o Liahona, Nov. 2010, 129).
Ol bigfala glad blong laef i stap insaed long wan famli we i gat lav. Hemia i tru, nomata long ol plante hadtaem o jalenj blong laef. Blong bildimap ol strong famli, i nidim ol hadwok. Be ol wok olsem i save givim glad long laef ia mo long laef we i no save finis. Iven insaed long ol famli we oli gat ol rilesensip we i had, gospel ia blong Jisas Kraes i save givim hop, kamfot, mo hiling.
Insaed long plan ia blong Papa blong yumi long heven, plan blong hapines, wan hasban mo waef , tufala i save stap tugeta blong oltaem. Atoriti blong tekem i kam tugeta ol famli blong oltaem, oli singaotem paoa blong siling . Hem i semmak paoa ia we Jisas i bin givim long ol Aposol blong Hem long taem blong seves blong Hem long wol ia (Matiu 16:19). Mared we i no save finis oli singaotem se wan siling. Ol pikinini we oli bon o oli adoptem olgeta i kam insaed long ol mared we i no save finis, oli save silim olgeta i go long ol famli blong olgeta blong oltaem.
Tempol siling i mekem sua se ded i no save seraotem olgeta we oli lavlavem olgeta. I no olsem ol mared we i talem “kasem ded i seperetem yutufala.” Blong ol mared oli gogohed afta long ded, oli mas kasem siling long stret ples wetem stret atoriti. Stret ples hem i tempol mo stret atoriti hem i prishud blong God (Doktrin mo Ol Kavenan 132:7, 15–19).
Wan hasban mo waef we oli bin sil long tempol, oli mekem tabu kavenan wetem Lod mo wetem wanwan long tufala. Ol kavenan oli givim hop long tufala se bae rilesensip blong tufala bae i gohed afta long laef ia, sapos tufala i stap tru long ol komitmen blong tufala. Tufala save se i no gat wan samting, iven ded, we i save seraotem tufala. Olgeta we oli mared oli mas tingting se blong joen tugeta ia, i olsem nambawan rilesensip long wol ia we oli mas lukaotem gud. Afta long evri samting, wan hasban o waef i nara man o woman ia nomo long Lod we wan oli givim komanmen long yumi blong lavem olgeta wetem ful hat blong yumi (Doktrin mo Ol Kavenan 42:22).
Mared We I No Save Finis I Wan Mas
Presiden Spencer W. Kimball (1895–1985) i bin tijim se: “Mared hem i wan long ol impoten desisen aot long evri desisen mo i gat ol gudfala risal we bae i kamaot long hem, from hapines we i kam long hem i no blong naoia nomo be i kam tu wetem ol glad blong wan taem we i no save finis Hem i no bitwin tu pipol nomo, be famli blong olgeta tu, speseli ol pikinini blong tufala mo ol pikinini blong pikinini blong tufala kasem jeneresen ia we i stap naoia” (“The Importance of Celestial Marriage,” Ensign, Oct. 1979, 3).
Blong kam olsem wan god i nidim tu kavenan blong mared we i no save finis. Fasin blong kam olsem wan god i laef ia we i no save finis—kaen laef we God i gat. Hem i stret gud evriwan. Hem i stap laef long bigfala glori. Hem i gat evri save, evri paoa, mo evri waes tingting. Hem i gat fulap lav, stap kaen, mo gat bigfala sore. Hem i Papa long heven we i Papa blong evri man long wol ia. Sam dei yumi save kam olsem Hem. Hemia nao i fasin blong kam olsem wan god
Fasin blong kam olsem wan god hem i bigfala presen ia we God i save givim long ol pikinini blong Hem (Doktrin no Ol Kavenan14:7). Hem i riwod blong evriwan we oli pruvum se oli stap fetful long Lod. Olgeta we oli mekem olsem bae oli kasem hae digri blong selestial kingdom.
Lod i talemaot tru long Josef Smit:
“Insaed long selestial glori, i gat tri heven o level; mo blong kasem hem ia we i moa hae olgeta, wan i mas kam insaed long oda ia blong prishud [we i kavenan blong mared we i niu mo i no gat en]; mo sapos hem i no mekem bae hem i no save kasem level ia” (Doktrin mo Ol Kavenan 131:1–3).
Taem yumi stap respektem ol kavenan blong yumi, bae yumi save stret se bae yumi stap wetem olgeta we yumi lavem blong oltaem. Lod i promesem se:
“Sapos wan man i maredem wan waef tru long toktok blong mi, we i loa blong mi, mo tru long kavenan we i niu mo i no gat en, mo Tabu Spirit blong promes i silim long tufala, tru long hem we mi anoentem, we mi givim long hem paoa ia mo ol ki blong prishud ia; … mo sapos tufala i obei long kavenan blong mi, …bae mi mekem long tufala evri samting we wokman blong mi i bin silim long tufala, long taem naoia, mo long ful taem we i no save finis; mo bae i laef fulwan long taem we tufala i livim wol ia;” (Doktrin mo Ol Kavenan 132:19).
Lod i save se bae i no evri pikinini blong Hem we bae oli gat janis ia blong mared long laef ia. Hem i promesem se olgeta we oli akseptem gospel mo traehad blong kipim ol kavenan blong olgeta, bae oli gat janis blong mared mo gat ol pikinini, nomata long laef ia o long nekis laef.
Evri Jeneresen Oli Stap Konek
Ofisol toktok blong famli i talem se “plan ia blong God blong stap hapi, i mekem se fasin blong holem taet famli tugeta i save gohed afta long ded. Ol tabu odinens mo ol kavenan we oli stap insaed long ol tabu tempol oli mekem rod i klia long wanwan man o woman i save gobak long ples blong God mo ol famli oli save joen tugeta kasem taem we i no save finis.”
Paoa blong siling i go fulwan long ol Papa mo mama kasem ol pikinini, kasem evri jeneresen stat taem oli krietem wol ia Presiden Joseph Fielding Smith (1876–1972) i tijim se ol pikinini we oli bon insaed long kavenan—mo olgeta we oli sil i go long ol papa mo mama blong olgeta long tempol—“oli gat raet long ol blesing blong gospel i bitim olgeta we oli no bon yet, bae oli kasem. Olgeta oli save kasem moa gaed, moa proteksen, kasem moa insperesen we i kam long spirit blong Lod; mo i no gat wan paoa we i save tekemaot olgeta long papa mo mama blong olgeta” (Doctrines of Salvation, comp. Bruce R. McConkie [1955], 2:90).
Ol pikinini we oli bon long papa mo mama we tufala i bin sil finis insaed long tempol, oli bin insaed long kavenan. From hemia, olgeta oli pat long wan famli we i no save finis, folem fasin blong olgeta blong stap fetful. Ol pikinini we oli no bon insaed long kavenan, oli save kam pat blong wan famli we i no save finis long taem oli sil i go long stret papa mo mama o long papa mo mama we tufala i adoptem olgeta. Odinens blong silim ol pikinini i go long ol papa mo mama oli mekem insaed long tempol. Blong givim ol blesing ia i moa long evri pipol, yumi save mekem siling tu long bihaf blong olgeta we oli ded finis. Long wei ia, evri famli i save stap tugeta blong oltaem.
Promes ia se bae ol famli i save stap tugeta afta long ded i givim moa mining long laef. I stap leftemap tingting blong yumi blong yumi blong stap fetful mo gat tru hat. I mekem ol famli rilesensip i kam antap mo i kam moa gud. Hemia i helpem yumi faenem glad mo gat hop taem yumi stap fesem ol jalenj blong laef. Mo blong save se yumi save stap tugeta bakegen, i givim kamfot mo pis taem yumi stap fesem ol harem nogud o from olgeta we yumi lavem we oli ded.
Odinens blong mekem siling hem i bigfala presen blong God we i givim long ol pikinini blong Hem. Hemia i mekem i posibol blong yumi save gobak stap wetem Hem mo olgeta we yumi lavem olgeta, blong oltaem. Hem i givim ol naesfala blesing blong laef ia mo blong nekis laef. Hemia i stap oltaem blong rimaenem yumi se famli i stap long medel blong plan ia blong God mo i blong mekem yumi hapi long laef ia mo blong taem we i no save finis. Hem i givim pis, hop, mo glad long olgeta we oli stap fetful blong kasem.
