Upumoni ma le Fuafuaga

A tatou saili i upumoni e uiga i tapuaiga, e tatau ona tatou faaaogaina metotia faaleagaga talafeagai mo lena sailiga: tatalo, o le molimau a le Agaga Paia, ma le suesueina o tusitusiga paia ma upu a perofeta o aso nei. Ou te faanoanoa lava i taimi uma pe a ou faalogo i se tasi ua lafoaia lona faatuatua faaletapuaiga ona o aoaoga faalelalolagi. O i latou o e na maua muamua se vaaiga faaleagaga e mafai ona mafatia mai le faaoo ia te ia lava o le tauaso faaleagaga. E pei ona ta’ua e Peresitene Henry B. Eyring, “O le latou faafitauli e le o taoto i mea latou te manatu o latou vaai i ai; ae o loo taoto i mea e le o mafai ona latou vaai i ai.“¹

O metotia faasaienisi e taitai atu ai tatou i mea ua tatou ta’ua o upumoni faasaienitisi. Ae o le “upumoni faasaienitisi” e le o le olaga atoa lea. O i latou e le aoao “e ala i le suesue ma le faatuatua foi” (Mataupu Faavae ma Feagaiga 88:118) e tapulaa lo latou malamalamaaga e uiga i upumoni i mea e mafai ona latou faamaonia i auala faasaienitisi. E tuu e lena mea ni tapulaa sese i le sailiga o le upumoni.

Sa saunoa Peresitene James E. Faust: “O i latou ua [papatisoina] latou te tuuina o latou agaga e faavavau i le lamatia e ala i le saili ma le le faaeteete na o punavai faalelalolagi o le aoaoina. Tatou te talitonu o Le Ekalesia a Iesu Keriso o le Au Paia o Aso e Gata Ai ua i ai le atoaga o le talalelei a Keriso, o le talalelei lava lea o le ute o le upumoni ma le malamalama e faavavau.”²

Ua tatou maua le olioli moni ma le tumau e ala i le iloaina ma le faatinoina o upumoni e uiga ia i tatou lava, o le uiga o le olaga faaletino, ma le mea tatou te o i ai pe a tatou feoti. O na upumoni e le mafai ona aoaoina e ala i metotia faasaienitisi pe faalelalolagi.

O le a ou talanoa atu nei e uiga i upumoni o le talalelei toefuataiina ia e taua i le aoaoga faavae o Le Ekalesia a Iesu Keriso o le Au Paia o Aso e Gata Ai. Faamolemole ia iloiloina nei upumoni ma le faaeteete. O loo faamalamalama atu ai le tele o la tatou aoaoga faavae ma faiga masani, masalo e aofia ai nisi o mea e lei malamalama lava i ai.

O loo i ai se Atua, o le Tama alofa o agaga o tagata uma o e ua soifua pe o le a soifua.

O le itupa e faavavau. Ae tatou te lei fananau mai i lenei lalolagi, sa tatou ola uma o ni agaga tane po o fafine i le afioaga o le Atua.

O lea faato’a mae’a ona tatou faalogologo atu i le Aufaipese a le Tapeneko i le Lotoa o le Malumalu na usuina le pese “O Le a Ou Mulimuli i le Fuafuaga a le Atua.”³ O le fuafuaga lena sa faatuina e le Atua ia mafai ai e Ana fanau agaga uma ona alualu i luma e faavavau. O lena fuafuaga e taua tele ia i tatou taitoatasi.

I lalo o lena fuafuaga, na foafoa ai e le Atua lenei lalolagi e avea o se nofoaga lea e mafai ai e Ana fanau agaga faapelepele ona fananau mai i le olaga nei ina ia mauaina se tino faitino ma maua se avanoa mo le alualu i luma faaleagaga e ala i le faia o ni filifiliga amiotonu.

Ina ia anoa, o filfiliga faaletino e ao ona faia i le va o malosiaga faatautava o le lelei ma le leaga. Sa tatau ona i ai le faafeagai ma, o le mea lea, sa faatagaina ai le fili, o le sa tuliese i fafo ona o le fouvale, ina ia faaosooso fanau a le Atua e tetee i le fuafuaga a le Atua.

O le faamoemoega o le fuafuaga a le Atua o le tuu atu lea o le avanoa i Lana fanau e filifili ai le ola e faavavau. E na o le pau le mea e ausia ai lenei mea o aafiaga ia faaletino ma, pe a mavae le oti, e ala i le tuputupu ae i le lalolagi o agaga.

I le malaga o le olaga faaletino, o le a tatou eleelea uma i le agasala ao tatou gauai atu i faaosoosoga leaga a le fili, ma o le a iu ina tatou feoti. Na tatou taliaina na faigata i le faalagolago atu i luga o le faamautinoaga o le fuafuaga lea o le a saunia ai e le Atua lo tatou Tama se Faaola, Lona Alo e Toatasi na Fanaua, o le a laveaiina i tatou e ala i se toetu mo tagata uma i se soifuaga mamalu i le mavae o le oti. O le a saunia foi e le Faaola se togiola e totogi ai le tau mo tagata uma ina ia faamamaina mai agasala e tusa ma tuutuuga Na te faia. O na tuutuuga e aofia ai le faatuatua ia Keriso, salamo, papatisoga, meaalofa o le Agaga Paia, ma isi sauniga e faatinoina e le pule o le perisitua.

O le fuafuaga sili o le fiafia a le Atua e maua ai se paleni atoatoa i le va o le faamasino tonu e faavavau ma le alofa mutimutivale e mafai ona tatou maua e ala i le Togiola a Iesu Keriso. E mafai ai foi e i tatou ona suia i ni tagata fou ia Keriso.

E aapa mai se Atua alofa ia i tatou taitoatasi. Ua tatou iloa e ala i Lona alofa ma ona o le Togiola a Lona Alo e Toatasi na Fanaua, “e mafai ai ona faaolaina tagata uma e ala i le usiusitai i tulafono ma sauniga o [Lana] Talalelei” (Mataupu Faavae o le Faatuatuaga 1:3; faaopoopo le faamamafa).

O Le Ekalesia a Iesu Keriso o le Au Paia o Aso e Gata Ai o le Ekalesia ua lauiloa lelei o se Ekalesia e totonugalemu i aiga. Ae o le mea e le o malamalama lelei, o lo tatou totonugalemu i aiga o loo taulai sili atu i mafutaga faaletino. O sootaga e faavavau e taua tele foi i lo tatou faatuatuaga. “O le aiga ua faauuina e le Atua.”⁴ I lalo o le fuafuaga sili a lo tatou Foafoa alofa, o le misiona a Lana Ekalesia toefuataiina o le fesoasoani lea i fanau a le Atua ia ausia le faaeaga i le malo selesitila, lea na o le faaipoipoga e faavavau i le va o se alii ma se tamaitai e mafai ona ausia ai (tagai Mataupu Faavae ma Feagaiga 131:1–3). Matou te faamautu atu o aoaoga a le Alii e faapea “o le itupa o se uiga taua lea o le faasinomaga patino o le muai olaga, olaga faaletino ma le faavavau ma le faamoemoega” ma o le “faaipoipoga i le va o le alii ma le tamaitai e taua i Lana fuafuaga e faavavau.”⁵

Ma le mea mulimuli, o le alofa o le Atua e matua silisili lava lea na Ia saunia ai se taunuuga o le mamalu mo Ana fanau uma, vagana ai nisi toalaiti na loto lava e avea ma atlii o le malaia. “O Ana fanau uma” e aofia ai ma i latou uma o e ua maliliu. Tatou te faia sauniga mo i latou e ala i le fai ma sui i totonu o a tatou malumalu. O le faamoemoega o le Ekalesia a Iesu Keriso o le faaagavaaina lea o Ana fanau mo le tikeri sili ona maualuga o le mamalu, o le faaeaga po o le ola e faavavau lea. Mo i latou e le mananao i ai pe le agavaa foi mo lena mea, ua saunia e le Atua isi malo o mamalu, e ui e maualalalo ifo.

Soo se tasi e malamalama i nei upumoni e faavavau e mafai ona malamalama pe aisea o i tatou o tagata o Le Ekalesia a Iesu Keriso o le Au Paia o Aso e Gata Ai ona mafaufau e pei ona tatou mafaufau ai ma fai e pei ona tatou faia.

O le a ou ta’ua nei nisi o faatatauga o nei upumoni e faavavau, ia e na o le fuafuaga a le Atua e mafai ona malamalama i ai.

Muamua, tatou te faamamaluina le faitalia o le tagata. E toatele ua silafiaina taumafaiga maoae a le Ekalesia e siitia ai le saolotoga faaletapuaiga i le Iunaite Setete ma le lalolagi atoa. O nei taumafaiga e le siitia ai na o mea tatou te fiafia i ai, ae e tusa ma Lana fuafuaga, e saili e fesoasoani atu i fanau uma a le Atua ia olioli i le saolotoga e filifili ai.

Lua, o i tatou o se nuu o faifeautalai. O nisi taimi e fesiligia ai i tatou pe aisea tatou te auina atu ai faifeautalai i le tele o malo, e oo lava i nuu o Tagata Kerisiano. Tatou te maua foi lea lava fesili e tasi e uiga i le mafuaaga tatou te foai atu ai le tele o miliona talā o fesoasoaniga alofa i tagata e le o ni tagata o la tatou Ekalesia ma le mafuaaga tatou te le faafesootaia ai lenei fesoasoaniga i a tatou taumafaiga faafaifeautalai. Tatou te faia lenei mea ona tatou te mafaufau o tagata uma o fanau a le Atua—o o tatou uso ma tuafafine—ma e tatou te mananao e faasoa atu o tatou faamanuiaga faaleagaga ma faaletino i tagata uma.

Tolu, e paia le olaga faaletino ia i tatou. O lo tatou tuuto atu i le fuafuaga a le Atua e manaomia ai ona tatou tetee atu i le faapa’u pepe ma le faamuta o le soifua o se gasegase ua leai se togafitiga.

Fa, o nisi ua faaatuatuvaleina e nisi o a tatou tulaga faale-Ekalesia i faiapoipoga ma fanau. O lo tatou malamalama e uiga i le fuafuaga faaalia o le faaolataga a le Atua ua manaomia ai lo tatou tetee i tulaga faaagafesootai ma uunaiga faaletulafono o i ai nei e o ese ai mai faaipoipoga masani ma faia ni suiga ia e fenumiai ai pe suia ai le itupa pe tafiesea ai le eseesega i le va o le tane ma le fafine. Ua tatou iloa o sootaga, faasinomaga, ma matafaioi o alii ma tamaitai e taua i le faataunuuina o le fuafuaga sili a le Atua.

Lima, e i ai foi se tatou malamalama tulagaese e uiga i fanau. Tatou te vaai atu i le fanauina ma le tausiaina o fanau o se vaega o le fuafuaga a le Atua ma o se tiute fiafia ma le paia a i latou o e ua tuuina atu i ai le mana e faaaoga ai. I la tatou vaaiga, o oa silisili o le lalolagi ma le lagi o a tatou fanau ma ē tutupu mai ia i tatou i le lumanai. O le mea lea, e tatau ona tatou aoao atu ma puipuia mataupu faavae ma faiga masani ia e maua ai tulaga silisili mo le atinaega ma le fiafia o fanau—fanau uma.

Ma le mulimuli, o i tatou o se fanau faapelepele a se Tama Faalelagi, na aoaoina i tatou o le tulaga tane ma le tulaga fafine, faaipoipoga i le va o se alii ma se tamaitai, ma le fanauina ma le faafaileleina o fanau e taua uma i Lana fuafuaga sili o le fiafia. O o tatou tulaga i nei mea faavae ua tele ina tupu mai ai feteenaiga i le Ekalesia. Tatou te manatu i ai o ni mea e le maalofia. O le faafeagai o se vaega o le fuafuaga, ma o fouvalega aupito sili ona malolosi a Satani ua faasaga tonu lea i soo se mea e silisili ona taua i le fuafuaga a le Atua. Ua ia saili e faaumatia le galuega a le Atua. O ana metotia autu o le faaleagaina lea o le Faaola ma Lana pule paia, e tafiesea aafiaga o le Togiola a Iesu Keriso, ia faavaivaia le salamo, ia faaseseina faaaliga, ma ia feteenai ma le tali atu o le tagata lava ia mo ia lava. O loo ia saili foi e faafenumiai ia itupa, ia faaleaga le faaipoipoga, ma ia faavaivaia le fanauina o fanau—aemaise lava e matua o le a tausi ae fanau i le upumoni.

O loo agai pea i luma le galuega a le Alii e ui i fouvalega ua faatulagaina ma faifai pea o loo tatou fetaiai ai a o tatou tauivi e faataitai ia aoaoga a Le Ekalesia a Iesu Keriso o le Au Paia o Aso e Gata Ai. Mo i latou ua faavaivaia i fouvalega, ou te ofo atua ni fautuaga nei.

Ia manatua le mataupu faavae o le salamo ua mafai ona maua e ala i le mana o le Togiola a Iesu Keriso. E pei ona ta’ua ai e Elder Neal A. Maxwell, aua ne’i faatasi ma i latou “o e taumafai e sui le Ekalesia nai lo le suia o i latou lava ia.”⁶

E pei ona uunaia mai e Elder Jeffrey R. Holland:

“Pipiimau i mea ua uma ona outou iloa ma tutu malosi seia oo ina oo mai le malamalama sili atu. …

“… I lenei Ekalesia, o le mea ua tatou iloa o le a sili atu ona taua i taimi uma nai lo mea tatou te le o iloa.”⁷

Ia faatino le faatuatua i le Alii o Iesu Keriso, o le uluai mataupu faavae lea o le talalelei.

Ma le mulimuli, saili se fesoasoani. E alolofa o tatou taitai ia te oe ma saili atu i le taitaiga faaleagaga e fesoasoani ai ia te oe. Matou te saunia le tele o punaoa e pei o [punaoa] o le a e maua e ala mai i le LDS.org ma isi lagolago mo le suesueina o le talalelei i le aiga. Ua i ai foi o tatou uso ma tuafafine o auaunaga ua valaauina e tuu atu fesoasoaniga alofa.

E finagalo lo tatou Tama Faalelagi alofa ia maua e Lana fanau le olioli aua o le faamoemoega lena o lo tatou foafoaga. O lena taunuuga fiafia o le ola e faavavau, lea e mafai ona tatou mauaina e ala i le fetaomi atu i luma ma le tumau i le mea ua tele ina ta’ua e lo tatou perofeta, o Peresitene Russell M. Nelson, o “ala o feagaiga.” O lana saunoaga lenei i lana uluai savali i le avea ai ma Peresitene o le Ekalesia, “Ia tumau i luga o le ala o feagaiga. O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea.”⁸

Ou te molimau faamaoni atu o mea na ou fai atu ai e moni, ma e mafai ona faia e ala i aoaoga ma le Togiola a Iesu Keriso, o le na te faia mea uma i lalo o le fuafuaga sili a le Atua, lo tatou Tama Faavavau. I le suafa, o Iesu Keriso, amene.