Taumafai

O’u uso e ma tuafafine, ou te faafetai mo le avanoa e lauga atu ai ia te outou. Ua uunaia ma faagaeetia a’u i lenei konafesi. O musika na lagiina ma upu na saunoaina ua aveina atu i totonu o o tatou loto e le Agaga Paia. Ou te tatalo o upu ou te tautala atu ai o le a auina atu ia te outou e lena lava Agaga e tasi.

I le tele o tausaga ua mavae, sa avea ai a’u ma se fesoasoani muamua i se peresitene o se itu i sasae o le Iunaite Setete. Na sili atu ma le faatasi, ao matou tietie atu i la matou tamai paranesi, na ia fai mai ai ia te a’u: “Hal, pe a feiloai i se tagata, taulimaina i latou e peiseai ua latou i ai i se faafitauli ogaoga, ma o le a sili atu ona e sa’o nai lo le afa o le taimi.” E le gata na sa’o o ia, ae sa ou aoaoina i le aluga o tausaga ua maualalo tele lana fua faatatau. I le asō, ou te fia faamalosiau atu ia te outou i luitau o feagai ma outou.

Ua mamanuina o tatou olaga faitino e se Atua alofa e avea ma tofotofoga ma puna o le tuputupu ae mo i tatou taitoatasi. Ua tou manatua afioga a le Atua e faatatau i Lana fanau i le Foafoaga o le lalolagi: “Ma o le a tatou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua.”¹

Talu mai le amataga, sa lei faigofie ia tofotofoga. O le a tatou fetaiai ma luitau lea e sau mai le mauaina o ni tino faitino. Ua tatou ola a’e uma i se lalolagi lea ua faasolosolo malosi ai le tau faasagatau mai o Satani i le mea moni ma lo tatou fiafia patino. E mafai ona foliga mai ia te oe le lalolagi ma lou olaga patino ua faateleina le vevesi.

O la’u faamautinoaga e faapenei: ua mamanuina e le Atua alofa o lē na faatagaina nei tofotofoga mo outou se auala mautinoa ia manumalo ai. E alofa tele le Tama Faalelagi i le lalolagi ua Ia auina mai ai Lona Alo Pele e fesoasoani ia i tatou.² Na foai mai e Lona Alo, o Iesu Keriso, Lona soifua mo i tatou. Na tauave e Iesu Keriso i Ketesemane ma luga o le satauro le mamafa o a tatou agasala uma. Sa Ia oo i faanoanoaga uma, tiga, ma aafiaga o a tatou agasala ina ia mafai ai ona Ia faamafanafana ma faamalosia i tatou e ala i tofotofoga uma i le olaga.³

Tou te manatuaina le fetalaiga a le Alii i Ana auauna:

“O le Tamā ma Aʼu ua tasi” Ua i ai Aʼu i le Tamā ma ua i ai le Tamā ia te Aʼu; ma talu ai ona ua outou talia aʼu, ua outou i ai ia te aʼu ma ua Ou i ai ia te outou.

“O le mea lea, ua Ou i ai i lo outou lotolotoi, ma o Aʼu o le leoleo mamoe lelei, ma le maa o Isaraelu. O ia o lē e ati aʼe i luga o lenei papa o le a lē paʼū lava.”⁴

Na tuuina mai foi e lo tatou perofeta, o Peresitene Russell M. Nelson lena lava faamautinoaga e tasi. Ma le isi, na ia faamatalaina se auala tatou te ono atiae ai i luga o lena papa ma tuu le suafa o le Alii i luga o o tatou loto e taialaina i tatou e ala atu i o tatou luitau.

Na ia saunoa mai: “O oe lena atonu o le a le fiafia i se taimi, manatua, o le olaga e lē o se mea faigofie. E tatau ona tauaveina tofotofoga ma onosaia faanoanoaga i le aluga o le ala. E pei ona e manatuaina ‘e leai se mea e le mafaia e le Atua’ (Luka 1:37), ia silafia o Ia o lo outou Tama. O oe o se atalii po o se afafine, ua foafoaina i Lona faatusa, ua e agavaa i le mauaina o faaaliga e fesoasoani i au taumafaiga amiotonu. E mafai ona e aveina i ou luga le suafa paia o le Alii. E mafai ona e agavaa e ta’ua le suafa paia o le Atua (tagai MF&F 1:20).”⁵

O le saunoaga a Peresitene Nelson ua faamanatu maia ia i tatou le folafolaga o loo maua i le tatalo o le faamanatuaga, o se folafolaga e faataunuu e lo tatou Tama Faalelagi pe a tatou faia mea na tatou folafola atu tatou te faia.

Faalogo i upu: Le Atua e, le Tamā Faavavau, matou te ole atu ia te oe i le suafa o lou Alo, o Iesu Keriso, ia e faamanuiaina ma faapaiaina lenei areto i agaga o i latou uma o e e fetagofi i ai, ina ia latou taumamafa i le faamanatuina o le tino o lou Alo, ma molimau atu ia te oe, le Atua e, le Tamā Faavavau, latou te loto ina ia ave i o latou luga le suafa o lou Alo, ma manatua pea o ia ma tausi i ana poloaiga ua ia tuuina mai ia te i latou; ina ia latou maua pea lona Agaga e faatasi ma i latou. Amene.”⁶

O taimi uma tatou te ta’ua ai le upu amene pe a tuuina atu lena tatalo mo i tatou, tatou te tauto atu o le ‘aai i le areto ua tatou loto e ave i o tatou luga le suafa paia o Iesu Keriso, manatua pea o Ia, ma tausi Ana poloaiga. I le isi itu, ua folafola mai ia i tatou, tatou te maua pea Lona Agaga e faatasi ma i tatou. Ona o nei folafolaga, o le Faaola o le papa lea e mafai ai ona tatou tutu saogalemu ma aunoa ma le fefe i soo se afā e fetaiai ma i tatou.

Ao o’u mafaufau loloto i upu o le feagaiga ma faamanuiaga fesootai ua folafola mai, ou te mafaufau po o le a le uiga o le loto e ave i o tatou luga o le suafa o Iesu Keriso:

Na faamalamalama mai e Peresitene Dallin H. Oaks: “E taua tele pe a tatou aai ma feinu i le faamanatuga tatou te le molimau atu tatou te aveina i o tatou luga le suafa o Iesu Keriso. Tatou te molimau atu ua tatou loto e faia. (Tagai MF&F 20:77.) O le mea moni e faapea ua na ona tatou molimau atu i lo tatou naunautai e faapea e i ai se isi mea e tatau ona tupu ae tatou te lei tauaveina tonu lena suafa paia i o tatou luga i le uiga aupito sili ona taua.”⁷

O le faaupuga ua tatou “loto ina ia ave i o [tatou] luga” Lona suafa ua tau maia ia i tatou e ui sa tatou tauaveina Lona suafa ina ua tatou papatiso, o le aveina o Lona suafa e lē gata i le papatisoga. E tatau ona tatou galulue faifaipea e tauave Lona suafa i o tatou olaga atoa, e aofia pe a tatou faafouina feagaiga i le laulau faamanatuga ma osia feagaiga i malumalu paia a le Alii.

O fesili taua la e lua mo i tatou taitoatasi o le “O le a le mea e tatau ona ou faia e ave ai i o’u luga Lona suafa?” ma le “E faapefea ona ou iloa pe o ou alualu i luma?”

O le faamatalaga a Peresitene Nelson ua fautuaina atu ai se tali aogā. Na ia saunoa mai e mafai ona tatou aveina i o tatou luga le suafa o le Faaola ma mafai ona tatou tautatala mo Ia. A tatou tautatala atu mo Ia, ua tatou auauna atu ia te Ia. “Aua pe faapefea ona iloa e se tagata le matai e lei auauna i ai o ia, ma o se foi o se tagata ese ia te ia, ma ua mamao mai mafaufauga ma faamoemoega o lona loto?”⁸

O le tautala atu mo Ia e manaomia ai se tatalo o le faatuatua. E manaomia ai se tatalo faatauanau i le Tama Faalelagi e aoao ai po o a upu e mafai ona tatou tautatala ai e fesoasoani ai i le Faaola i Lana galuega. E tatau ona tatou agavaa mo le folafolaga: “Pe i lou lava leo po o i le leo o a’u auauna, ua tutusa lava.”⁹

Ae, e manaomia ai le tautatala mo Ia ina ia ave i o tatou luga Lona suafa. E tatau ona i ai ni lagona i o tatou loto ia agavaa ai o ni Ana auauna.

Na faamatala e le perofeta o Mamona ia lagona ia e faaagavaaina i tatou ma mafai ai ona tatou ave i o tatou luga Lona suafa. O nei lagona e aofia ai le faatuatua, faamoemoe, ma le alofa mutimutivale, o le alofa mamā lea o Keriso.

Sa faamalamalama mai e Mamona:

“Ona ua ou matauina ua outou faatuatua ia Keriso ona o lo outou agamalu; ona a na fai tou te le faatuatua ia te ia po ua outou le agavaa e faitaulia i totonu o tagata o lana ekalesia.

“O lenei foi, ou uso pele e, ou te fia tautala atu ia te outou e uiga i le faamoemoe. E mafai faapefea ona outou maua o le faatuatua, vagana ai ua ia te outou le faamoemoe?

“Ma o le a le mea tou te faamoemoe i ai? Faauta ou te fai atu ia te outou, tou te faamoemoe, e ala i le togiola a Keriso ma le mana o lona toetu, ia faatutu mai outou i le ola faavavau, ma o le pogai ona o lo outou faatuatua ia te ia e tusa ma le folafolaga.

“O le mea lea, afai ua i ai i se tagata le faatuatua e tatau ona i ai ia te ia le faamoemoe; ona a aunoa ma le faatuatua e le mafai ona i ai se faamoemoe.

O lenei foi, faauta ou te fai atu ia te outou e le mafai ona i ai ia te ia le faatuatua ma le faamoemoe, vagana ai ua agamalu, ma maualalo o ia i le loto.

“Afai e faapea, ua le aoga lona faatuatua ma le faamoemoe, ona e leai se tasi e ono talia i luma o le Atua, vagana ai i latou o e ua agamalu ma maualalalo i le loto; ma afai e agamalu ma maualalo se tagata i le loto, ma tautino atu i le mana o le Agaga Paia o Iesu o le Keriso, e ao ina i ai ia te ia le alofa mama; aua afai e le i ai ia te ia le alofa mama, o se mea noa o ia; o le mea lea e ao ai ina i ai ia te ia le alofa mama.”

Ina ua uma ona faamalamalama mai le alofa mama, sa faaauau pea Mamona:

“Ae o le alofa mama o le alofa le pona lea o Keriso, ma e tumau e faavavau; ma o soo se tasi e maua ua i ai ia te ia i le aso gataaga, o le a lelei ia te ia.

“O le mea lea, ou uso pele e, ia outou tatalo atu i le Tamā ma le malosi atoa o le loto, ina ia faatumulia outou i lenei alofa, lea ua ia faaee mai i luga o i latou uma o e o soo moni o lona Alo, o Iesu Keriso; ina ia mafai ona avea o outou ma atalii o le Atua; a oo ai ina afio mai o ia o le a tatou faapei o ia, ona o le a tatou vaai ia te ia e pei ona i ai o ia; tau ina ia tatou maua lenei faamoemoe; tau ina ia mafai ona faamamaina i tatou e pei lava ona mama o ia. Amene.”¹⁰

Ou te molimau atu o loo tuuina e le Faaola Lona suafa i totonu o outou loto. O le toatele o outou, ua faateleina lo outou faatuatua ia te Ia. Ua outou lagonaina atili le faamoemoe ma o le a lelei mea uma. Ma ua outou lagonaina le alofa mama o Keriso mo isi ma mo oe lava ia.

Ou te vaai i ai i faifeautalai o loo auauna atu i le lalolagi atoa. O loo tautatala atu tagata o le ekalesia ia latou uo ma tagata o aiga e uiga i Le Ekalesia a Iesu Keriso o le Au Paia o Aso e Gata Ai. O loo auauna atu alii, tamaitai, tupulaga talavou, ma e oo lava i fanau iti ona o le alofa mo le Faaola ma mo o latou tuaoi.

I le muai lipotia mai o faalavelave i le salafa o le lalolagi, e faia e tagata o le ekalesia ni fuafuaga e o atu e laveai, o nisi taimi e sopoia ai le vasa, e aunoa ma le fesiligia. O nisi taimi e faigata ai ia i latou ona faatali seia mafai e nofoaga mafatia ona taliaina i latou.

Atonu o nisi o outou o faalogologo mai i le asō ua lagonaina le faatoilaloina o lo outou faatuatua ma le faamoemoe e a outou faafitauli. Ma e atonu e te manao ia lagona le alofa.

Uso e ma tuafafine, ua i ou autafa avanoa a le Alii ia lagona ai ma faasoa atu Lona alofa. E mafai ona e tatalo ma le mautinoa mo le Alii e taitaiina oe ia alofa atu i se tasi mo Ia. E tali mai o Ia i tatalo a volenitia agamalu e pei o oe. O le a e lagonaina le alofa o le Atua mo oe ma mo le tagata o e auauna i ai mo Ia. Ao e fesoasoani atu i fanau a le Atua i o latou luitau, o le a foliga mamasagia a oe lava luitau. O le a faamalosia lou faatuatua ma lou faamoemoe.

O au o se molimau o lena upumoni. I le gasologa o le olaga, na talanoa lo’u toalua mo le Alii ma auauna atu i tagata mo Ia. E pei ona ou ta’ua muamua, na fai mai se tasi o a matou epikopo ia te a’u “Ou te ofo. O taimi uma ou te faalogo ai i se tagata i le uarota o mafatia, ou te faanatinati atu e fesoasoani. Ae o le taimi ou te taunuu ai, e foliga mai ua i ai lava lou toalua iina.” E moni lena mea i nofoaga uma sa matou nonofo ai mo le 56 tausaga.

I le taimi nei na o ni nai upu e mafai ona ia tautala ai i le aso. E asia o ia e tagata sa ia alofa i ai mo le Alii. O po ma taeao uma ou te usuusu pese ia te ia ma ma tatalo. E tatau ona ou faaleoa ia tatalo. O nisi taimi e mafai ona ou vaaia lona memuina o upu o pese. E fiafia o ia i pese a tamaiti. O lagona ia e foliga mai e siili ona ia fiafia i ai o loo aoteleina lea i le pese “O Loo Ou Taumafai e Avea e Pei o Iesu.”¹¹

I le isi aso, ina ua uma ona usuina upu o le tali: “Ia fealofani e pei o Iesu. Agalelei i mea uma e fai,” sa ia fai mai lemu, ae na manino, “Taumafai.” Ou te manatu o le a ia mauaina, pe a ia vaai ia te Ia, ua tuu e lo tatou Faaola Lona suafa i totonu o lona loto ma ua avea o ia e pei o Ia. O loo Ia tauaveina o ia e ala atu i ona luitau i le taimi nei, e pei ona Ia tauaveina outou e ala atu i a outou [luitau].

Ou te tuuina atu lau molimau e silafia ma e alofa le Faaola ia te outou. Na te silafia lou igoa e pei ona e silafia Lona [suafa]. Na te silafia ou luitau. Na Ia oo i ai. E ala atu i Lana Togiola, ua Ia manumalo ai i le lalolagi. O le tou loto e ave i ō outou luga Lona suafa, o le a outou siitiaina ai avega o le lemafaitauina o isi. Ma o le a outou mauaina le sili atu o lo outou silafiaina o le Faaola ma sili atu lou alofa ia te Ia. O le a i ai Lona suafa i ō outou loto ma tamau i tou mafaufau. O le suafa lea o le a valaauina ai oe. Ou te molimau atu ai, ma le agaga faafetai mo Lona alofa-agalelei ia te a’u, i e pele ia te a’u, i le suafa o Iesu Keriso, amene.