ការអធិស្ឋាននៃសេចក្តីជំនឿ
នៅពេលយើងអធិស្ឋានដោយជំនឿ នោះយើងប្រែក្លាយជាផ្នែកដ៏សំខាន់មួយនៅក្នុងកិច្ចការរបស់ព្រះអម្ចាស់ នៅពេលទ្រង់រៀបចំពិភពលោកសម្រាប់ការយាងមកជាលើកទីពីររបស់ទ្រង់ ។
ការអធិស្ឋានរបស់អែលឌើរ ម៉េណេស នៅពេលចាប់ផ្ដើមសម័យប្រជុំទីមួយនៃសន្និសីទទូទៅនេះ កំពុងទទួលចម្លើយហើយ ។ ការបំផុសគំនិតកើតមានចំពោះយើងតាមរយៈសារលិខិតដ៏អស្ចារ្យ និងតន្ត្រីដ៏ពិរោះ ។ ការសន្យារបស់ប្រធាន រ័សុល អិម ណិលសុន ថា សន្និសីទនេះនឹងជាសន្និសីទដ៏អស្ចារ្យ និងគួរឲ្យចងចាំ គឺកំពុងចាប់ផ្ដើមបំពេញរួចទៅហើយ ។
ប្រធានណិលសុន បានកំណត់ឆ្នាំនេះជា « ការប្រារព្ធខួបលើកទី ២០០ ឆ្នាំ ចាប់តាំងពីព្រះជាព្រះវរបិតា និងព្រះរាជបុត្រាសំណព្វរបស់ទ្រង់ ព្រះយេស៊ូវ គ្រីស្ទ បានលេចមកឯយ៉ូសែប ស្ម៊ីធនៅក្នុងការនិមិត្តមួយ » ។ ប្រធាន ណិលសុន បានអញ្ជើញយើងឲ្យធ្វើផែនការផ្ទាល់ខ្លួនមួយដើម្បីរៀបចំ ខ្លួនសម្រាប់សន្និសីទជាប្រវត្តិសាស្ត្រនេះ ដែលលោករំឭកថា វានឹងជា « ចំណុចសំខាន់មួយក្នុងប្រវត្តិសាស្ត្រសាសនាចក្រ ហើយការចូលរួមរបស់បងប្អូនគឺសំខាន់ណាស់ » ។១
ប្រហែលជាបងប្អូនស្ដាប់ឮសារលិខិតរបស់លោក រួចសួរខ្លួនឯង ដូចជាខ្ញុំថា « តើការចូលរួមរបស់ខ្ញុំសំខាន់នៅត្រង់ណា ? » ប្រហែលជាបងប្អូនអាន និងអធិស្ឋានអំពីព្រឹត្តការណ៍នៃការស្ដារឡើងវិញ ។ ប្រហែលជា បងប្អូនបានអានដំណើររឿងទាំងនេះពីរបីរួចហើយនៅពេលដែលព្រះជាព្រះវរបិតាបានណែនាំខ្លួនព្រះរាជបុត្រាសំណព្វរបស់ទ្រង់ ។ ប្រហែលជាបងប្អូនបានអានអំពីឧទាហរណ៍ជាច្រើន នៅពេលព្រះអង្គសង្គ្រោះ បានមានបន្ទូលទៅកាន់កូនចៅរបស់ព្រះវរបិតាសួគ៌របស់យើង ។ ខ្ញុំដឹងថាខ្ញុំបានធ្វើរឿងទាំងអស់នេះនិងធ្វើបន្ថែមទៀត ។
នៅពេលខ្ញុំរកឃើញសេចក្ដីយោងទាំងឡាយនៅក្នុងការអានរបស់ខ្ញុំចំពោះបព្វជិតភាពនៃព្រះ និងការបើកនៃគ្រាកាន់កាប់ត្រួតត្រានានា ។ ខ្ញុំមានចិត្តរាបសារ ខ្ញុំបានចាប់ផ្ដើមដឹងថា ការរៀបចំខ្លួនរបស់ខ្ញុំសម្រាប់សន្និសីទនេះគឺជាចំណុចចម្បងមួយនៅក្នុងប្រវត្តិផ្ទាល់ខ្លួនរបស់ខ្ញុំ ។ ខ្ញុំមានអារម្មណ៍ផ្លាស់ប្ដូរនៅក្នុងចិត្តខ្ញុំ ។ ខ្ញុំទទួលអារម្មណ៍ដឹងគុណជាថ្មី ។ ខ្ញុំមានអារម្មណ៍ពេញដោយអំណរចំពោះទស្សនវិស័យ ដែលត្រូវបានអញ្ជើញឲ្យចូលរួមនៅក្នុងការប្រារព្ធនៃការស្ដារឡើងវិញជាបន្ដបន្ទាប់នេះ ។
ខ្ញុំនឹកស្រមៃថា អ្នកដទៃកំពុងទទួល អារម្មណ៍កាន់តែ មានអំណរ កាន់តែសុទិដ្ឋិនិយម និងកាន់តែប្ដេជ្ញាចិត្តដើម្បីបម្រើក្នុងគ្រប់សមាសធាតុដែលព្រះអម្ចាស់ត្រូវការ នោះគឺដោយសារតែការរៀបចំខ្លួនដោយយកចិត្តទុកដាក់ ។
ព្រឹត្តការណ៍នៃការយាងចុះមកពីស្ថានសួគ៌ ដែលយើងគោរព គឺជាការចាប់ផ្ដើមនៃគ្រាកាន់កាប់ត្រួតត្រាចុងក្រោយដែលបានព្យាករណ៍ ដែលព្រះអម្ចាស់កំពុងរៀបចំសាសនាចក្រ និងរាស្ត្ររបស់ទ្រង់ អស់អ្នកដែលលើកដាក់ព្រះនាមទ្រង់ ដើម្បីទទួលយកទ្រង់ ។ ជាចំណែកនៃការរៀបចំខ្លួនរបស់យើងសម្រាប់ការយាងមករបស់ទ្រង់ ទ្រង់នឹងលើកយើងម្នាក់ៗឡើង ដើម្បីយើងអាចលើកយើងទៅកាន់ឱកាស និងសំណូមពរខាងវិញ្ញាណដែលមិនទំនងជាធ្លាប់មាននៅក្នុងប្រវត្តិសាស្ត្រនៃពិភពលោកនេះ ។
នៅខែកញ្ញា ឆ្នាំ ១៨៤០ ព្យាការី យ៉ូសែប ស្ម៊ីធ និងទីប្រឹក្សារបស់លោកនៅក្នុងគណៈប្រធានទីមួយ បានប្រកាសដូចតទៅនេះ ៖ « កិច្ចការរបស់ព្រះអម្ចាស់នៅក្នុងថ្ងៃចុងក្រោយទាំងនេះ គឺមានទំហំដ៏ធំមួយ ហើយស្ទើរតែមិនអាចយល់បាននៅក្នុងជីវិតរមែងស្លាប់នេះ ។ សិរីល្អ គឺពុំអាចពិពណ៌នាបាន ហើយរុងរឿងជាអនេករកថ្លែងពុំបាន ។ វាគឺជាបាវចនា ដែលបានដាស់សតិរបស់ពួកព្យាការី និងបុរសសុចរិតតាំងពីការបង្កបង្កើតនៃលោកិយរហូតដល់ជំនាន់ក្រោយៗ និងគ្រាបច្ចុប្បន្ននេះ ហើយវាគឺជាគ្រាកាន់កាប់ត្រួតត្រានៃពេលពេញកំណត់យ៉ាងពិត ជាពេលដែលរឿងទាំងអស់ ដែលនៅក្នុងព្រះគ្រីស្ទ មិនថានៅស្ថានសួគ៌ ឬផែនដី នឹងប្រមូលផ្ដុំរួមគ្នានៅក្នុងទ្រង់ ហើយជាពេលអ្វីៗទាំងអស់នឹងបានស្ដារឡើងវិញ ដូចបានថ្លែងដោយពួកព្យាការីបរិសុទ្ធទាំងអស់ តាំងពីបង្កើតលោកិយ ដ្បិតនៅក្នុងនោះនឹងមាននូវការបំពេញតាមសេចក្ដីសញ្ញាដែលបានធ្វើឡើងចំពោះពួកជីដូនជីតាយ៉ាងរុងរឿង ខណៈដែលការបើកសម្ដែងនៃអំណាចនៃព្រះដ៏ខ្ពស់បំផុត នឹងមហិមា រុងរឿង និងឧត្ដុង្គឧត្តម »។
ពួកលោកបានបន្ដថ្លែងថា « យើងទទួលអារម្មណ៍ថាទុកឲ្យឆ្ពោះទៅមុខ ហើយរួបរួមកម្លាំងរបស់យើងដើម្បីកសាងនគរឡើង ហើយស្ថាបនាបព្វជិតភាពនៅក្នុងភាពពេញលេញ និងរុងរឿង ។ កិច្ចការដែលត្រូវសម្រេចនៅក្នុងថ្ងៃចុងក្រោយ គឺជារឿងសំខាន់បំផុតមួយ ហើយនឹងត្រូវការសកម្មភាពទាំងថាមពល ជំនាញ ទេពកោសល្យ និងសមត្ថភាពរបស់ ពួកបរិសុទ្ធ ដើម្បីអាចឆ្ពោះទៅមុខដោយសិរីរុងរឿង និងឬទ្ធានុភាពដូចដែលបានពិពណ៌នាដោយព្យាការី [ ដានីយ៉ែល ] [ សូមមើលដានីយ៉ែល ២:៣៤-៣៥, ៤៤-៤៥] ហើយនឹងតម្រូវឲ្យពួកបរិសុទ្ធសញ្ជឹងគិត ដើម្បីសម្រេចកិច្ចការដ៏ធំ និងមហស្ចារ្យនេះ » ។២
មានអ្វីៗជាក់លាក់ជាច្រើនដែលយើងនឹងធ្វើ ហើយនៅពេលយើងនឹងធ្វើវានៅក្នុងការបើកបង្ហាញពីការស្ដារឡើងវិញដែលពុំទាន់បានបើកសម្ដែងនោះ ។ ប៉ុន្តែគណៈប្រធានទីមួយ ទោះជានៅក្នុងជំនាន់មុននោះ បានដឹងអំពីវិសាលភាព និងជម្រៅមួយចំនួននៃកិច្ចការរបស់ព្រះអម្ចាស់ មាននៅខាងមុខពួកយើងរួចទៅហើយ ។ នេះជាឧទាហរណ៍មួយចំនួននៃអ្វីដែលយើងធ្វើដើម្បីដឹងនូវអ្វីដែលនឹងកើតឡើង ៖
តាមរយៈពួកបរិសុទ្ធរបស់ទ្រង់ ព្រះអម្ចាស់នឹងផ្ដល់អំណោយនៃដំណឹងល្អរបស់ទ្រង់ « ទៅគ្រប់ទាំងសាសន៍ គ្រប់ពូជមនុស្ស គ្រប់ភាសា ហើយគ្រប់ទាំងប្រជាជនផង » ។៣ បច្ចេកវិទ្យា និងអព្ភូតហេតុ នឹងបន្ដដើរតួនាទីជាផ្នែកមួយ— ក៏ដូចជាបុគ្គលម្នាក់ៗនឹងធ្វើគឺ « អ្នកនេសាទមនុស្ស » ៤ ដែលបម្រើដោយអំណាច និងចម្រើនជំនឿ ។
យើងជារាស្ត្រមួយ នឹងប្រែកាន់តែរួបរួមគ្នានៅក្នុងកណ្ដាលជម្លោះកាន់តែច្រើននេះ ។ យើងនឹងប្រមូលផ្ដុំកម្លាំងខាងវិញ្ញាណមកពីក្រុម និងក្រុមគ្រួសារនានាដែលមានពេញទៅដោយពន្លឺនៃដំណឹងល្អ ។
សូម្បីតែពិភពលោកដែលពុំជឿមួយនឹងទទួលស្គាល់ សាសនាចក្រ នៃ ព្រះ យេស៊ូវគ្រីស្ទ នៃ ពួក បរិសុទ្ធ ថ្ងៃ ចុងក្រោយ និងបានដឹងអំពីព្រះចេស្ដានៃព្រះនៅក្នុងសាសនាចក្រ ។ ពួកសិស្សស្មោះត្រង់ និងក្លាហាន នឹងលើកដាក់ព្រះនាមរបស់ព្រះគ្រីស្ទនៅក្នុងជីវិតរាល់ថ្ងៃរបស់ពួកគេដោយពុំភ័យខ្លាច ដោយរាបសារ និងដោយបើកចំហរ ។
បន្ទាប់មក តើយើងម្នាក់ៗអាចចូលរួមនៅក្នុងកិច្ចការដ៏ធំ និងរុងរឿងនេះបានយ៉ាងដូចម្ដេច ? ប្រធានណិលសុនបានបង្រៀនយើងអំពីរបៀបដើម្បីចម្រើននៅក្នុងអំណាចខាងវិញ្ញាណ ។ នៅពេលយើងទទួលយកការប្រែចិត្តជាឱកាសដ៏អំណរមួយ ដោយសារតែការរីកចម្រើនជំនឿរបស់យើងថា ព្រះយេស៊ូវគឺជាព្រះគ្រីស្ទ នៅពេលយើងយល់ និងជឿថា ព្រះវរបិតាសួគ៌ ព្រះសណ្ដាប់គ្រប់ការអធិស្ឋានរបស់យើង នៅពេលយើងព្យាយាមគោរព និងរស់នៅតាមបទបញ្ញត្តិនានា នោះយើងយើងចម្រើនអំណាច ដើម្បីទទួលបានវិវរណៈជាបន្ដបន្ទាប់ ។ ព្រះវិញ្ញាណបរិសុទ្ធអាចក្លាយជាដៃគូដ៏ខ្ជាប់ខ្ជួនរបស់យើង ។ អារម្មណ៍នៃពន្លឺស្ថិតនៅជាមួយយើង ទោះជាពិភពលោកនៅជុំវិញយើងកាន់តែងងឹតក្ដី ។
យ៉ូសែប ស៊្មីធ គឺជាឧទាហរណ៍មួយអំពីរបៀបដើម្បីចម្រើននៅក្នុងអំណាចខាងវិញ្ញាណដូច្នេះ ។ លោកបានបង្ហាញ យើងថា ការអធិស្ឋានដោយជំនឿ គឺជាកូនសោទៅកាន់វិវរណៈមកពីព្រះ ។ លោកបានអធិស្ឋានដោយជំនឿ ជឿថាព្រះជាព្រះវរបិតានឹហឆ្លើយតបការអធិស្ឋានរបស់លោក ។ លោកបានអធិស្ឋានដោយជំនឿជឿថាមានតែតាមរយៈព្រះយេស៊ូវគ្រីស្ទប៉ុណ្ណោះ ទើបលោកអាចបានរួចពីកំហុស ដែលលោកមានចំពោះអំពើបាបរបស់ខ្លួន ។ ហើយលោកបានអធិស្ឋានដោយជំនឿ ជឿថាលោកចាំបាច់ត្រូវរកសេចក្ដីពិតអំពីសាសនាចក្រនៃព្រះយេស៊ូវគ្រីស្ទដើម្បីទទួលបានការអភ័យទោសនោះ ។
តាមរយៈការងារបម្រើជាព្យាការីរបស់លោក យ៉ូសែប ស៊្មីធ បានប្រើការអធិស្ឋានដោយជំនឿដើម្បីទទួលបានវិវរណៈជាបន្ដបន្ទាប់ ។ នៅពេលយើងជួបនឹងឧបសគ្គបច្ចុប្បន្ននេះ និងឧបសគ្គដែលនឹងមកដល់ នោះយើងនឹងចាំបាច់ត្រូវអនុវត្តតាមលំនាំដូចគ្នានេះផងដែរ ។ ប្រធាន ព្រិកហាំ យ៉ង់ បានមានប្រសាសន៍ថា « ខ្ញុំពុំដឹងរបៀបណាទៀតសម្រាប់ពួកបរិសុទ្ធថ្ងៃចុងក្រោយ ជាជាងឲ្យពួកគេអធិស្ឋានគ្រប់ដង្ហើមចេញចូលទៅព្រះសូមការដឹកនាំ និងការណែនាំដល់រាស្ត្ររបស់ទ្រង់នោះទេ » ។៥
ពាក្យទាំងនេះចេញមកពីការអធិស្ឋានសាក្រាម៉ង់ ដែលពិពណ៌នាអំពីជីវិតប្រចាំថ្ងៃរបស់យើង ៖ « តែងតែចងចាំទ្រង់ជានិច្ច » ។ ពាក្យ« ទ្រង់ » គឺ សំដៅ ទៅលើ ព្រះយេស៊ូវ គ្រីស្ទ ។ ពាក្យបន្ទាប់ « ហើយរក្សាបទបញ្ញត្តិរបស់ទ្រង់ » ផ្ដល់យោបល់អំពីអត្ថន័យដល់យើងដើម្បីចងចាំទ្រង់ ។៦ នៅពេលយើងចងចាំព្រះយេស៊ូវគ្រីស្ទជានិច្ច នោះយើងអាចសួរដោយស្ងាត់ៗនៅក្នុងការអធិស្ឋានថា « តើទ្រង់នឹងឲ្យខ្ញុំធ្វើអ្វីខ្លះ ? »
ការអធិស្ឋានដូច្នេះ បានធ្វើឡើងដោយមានជំនឿទៅលើព្រះយេស៊ូវគ្រីស្ទ ដែលមាននៅក្នុងគ្រាកាន់កាប់ចុងក្រោយនេះ ។ ហើយវានឹងជាផ្នែកសំខាន់នៃយើងម្នាក់ៗដើរតួនៅក្នុងការបើកសម្ដែងជាបន្ដបន្ទាប់ ។ ខ្ញុំបានរកឃើញ ដូចជាបងប្អូន ឃើញមានគំរូដ៏អស្ចារ្យអំពីការអធិស្ឋានដូច្នេះ ។
ទីមួយគឺ យ៉ូសែប ស៊្មីធ ។ លោកបានសួរដោយជំនឿដូចជាកូនក្មេងនូវអ្វីដែលព្រះអម្ចាស់នឹងឲ្យលោកធ្វើ ។ ចម្លើយរបស់លោកបានផ្លាស់ប្ដូរប្រវត្តិសាស្ត្រនៃពិភពលោក ។
ចំពោះខ្ញុំ មេរៀនសំខាន់បំផុតមួយកើតចេញមកពីចម្លើយរបស់យ៉ូសែបចំពោះការវាយលុករបស់សាតាំងគឺ នៅពេលយ៉ូសែប លុតជង្គង់អធិស្ឋាន ។
ខ្ញុំដឹងមកពីបទពិសោធន៍ថា សាតាំង និងពួកបាវបម្រើរបស់វាព្យាយាមធ្វើឲ្យយើងមានអារម្មណ៍ថា យើងមិនត្រូវអធិស្ឋាន ។ នៅពេលយ៉ូសែបបានខិតខំអស់ពីអំណាចរបស់លោកដើម្បីអំពាវនាវទៅព្រះដើម្បីរំដោះលោកពីអំណាចដែលបានព្យាយាមចងលោក នោះការអធិស្ឋានរបស់លោកសុំការរំដោះត្រូវបានឆ្លើយតប ហើយព្រះវរបិតាសួគ៌ និងព្រះយេស៊ូវគ្រីស្ទបានបង្ហាញព្រះកាយមក ។
ការប៉ុនប៉ងរបស់សាតាំងដើម្បីធ្វើឲ្យការចាប់ផ្ដើមការស្ដារឡើងវិញខកខាន គឺមានខ្លាំងបំផុត ដោយសារការអធិស្ឋានរបស់យ៉ូសែប សំខាន់បំផុត ។ បងប្អូន និងខ្ញុំមានចំណែកតូចមួយដើម្បីធ្វើនៅក្នុងការស្ដារឡើងវិញជាបន្ដបន្ទាប់ ។ ប៉ុន្តែមារសត្រូវនៃការស្ដារឡើងវិញនឹងព្យាយាមបញ្ឈប់យើងពីការអធិស្ឋាន ។ គំរូនៃសេចក្ដីជំនឿរបស់យ៉ូសែប និងការប្ដេជ្ញាចិត្តរបស់លោក អាចពង្រឹងយើងនៅក្នុងដំណោះស្រាយរបស់យើង ។ នេះគឺជាមូលហេតុមួយនៃមូលហេតុជាច្រើនដែលការអធិស្ឋានរបស់ខ្ញុំមានដាក់បញ្ចូលនូវការអរគុណដល់ព្រះវរបិតាសួគ៌ចំពោះព្យាការីយ៉ូសែប ។
អេណុសនៅក្នុងគម្ពីរមរមន គឺជាលំនាំមួយទៀតសម្រាប់ការអធិស្ឋានរបស់ខ្ញុំអំពីសេចក្ដីជំនឿ នៅពេលខ្ញុំព្យាយាមដើរតួចំណែករបស់ខ្ញុំនៅក្នុងការស្ដារឡើងវិញជាបន្ដបន្ទាប់ ។ មិនថាចំណែករបស់បងប្អូនជាអ្វីទេ បងប្អូនអាចទទួលយកលោកជាអ្នកនាំផ្លូវដោយផ្ទាល់ ។
ដូចជាយ៉ូសែបដែរ អេណុសបានអធិស្ឋានដោយសេចក្ដីជំនឿ ។ លោកបានពិពណ៌នាបទពិសោធន៍របស់លោកតាមរបៀបនេះ ៖
« ហើយព្រលឹងខ្ញុំស្រេកឃ្លាន ហើយខ្ញុំបានលុតជង្គង់ចុះនៅចំពោះព្រះដែលបង្កើតខ្ញុំ ហើយខ្ញុំបានអំពាវនាវដល់ព្រះអង្គដោយការអធិស្ឋាន និងការទូលអង្វរដ៏ខ្លាំង សម្រាប់ព្រលឹងខ្ញុំផ្ទាល់ ហើយខ្ញុំបានអំពាវនាវដល់ព្រះអង្គអស់ពេញមួយថ្ងៃ មែនហើយ ហើយដល់ពេលយប់ ខ្ញុំបានស្រែកអំពាវនាវយ៉ាងខ្លាំង លុះត្រាបានឮដល់ស្ថានសួគ៌ ។
« ហើយស្រាប់តែមានសំឡេងបន្លឺមកខ្ញុំថា ៖ អេណុស បាបទាំងឡាយរបស់អ្នកត្រូវបានអត់ទោសឲ្យហើយ ហើយអ្នកនឹងបានពរ ។
« ហើយខ្ញុំ អេណុស ដឹងថា ព្រះពុំកុហកឡើយ ហេតុដូច្នោះហើយ ទោសរបស់ខ្ញុំបានបំបាត់ចោលទៅ ។
« ហើយខ្ញុំបានទូលថា ៖ ឱព្រះអម្ចាស់អើយ ចុះតើការណ៍នេះបានធ្វើយ៉ាងណាទៅ ?
« ហើយទ្រង់បានមានបន្ទូលមកខ្ញុំថា ៖ ពីព្រោះមកពីសេចក្ដីជំនឿដែលអ្នកមានដល់ព្រះគ្រីស្ទ ដែលអ្នកពុំដែលបានឮ ឬបានឃើញពីមុនមកឡើយ ។ ហើយជាច្រើនឆ្នាំបានកន្លងផុតទៅពីមុនទ្រង់បានបង្ហាញព្រះកាយនៅក្នុងសាច់ឈាម ហេតុដូច្នោះហើយ ចូរអ្នកទៅចុះ សេចក្ដីជំនឿរបស់អ្នក បានជួយសង្គ្រោះអ្នកហើយ » ។ ៧
មេរៀនដែលបានប្រទានពរដល់ខ្ញុំនៅ ក្នុងពាក្យទាំងនេះ គឺ ៖ « ពីព្រោះមកពីសេចក្ដីជំនឿដែលអ្នកមានដល់ព្រះគ្រីស្ទ ដែលអ្នកពុំដែលបានឮ ឬបានឃើញពីមុនមកឡើយ » ។
យ៉ូសែប មានជំនឿទៅលើព្រះគ្រីស្ទដោយចេញទៅក្នុងព្រៃ ហើយក៏បានអធិស្ឋានទូលសូមការរំដោះពីអំណាចរបស់សាតាំង ។ លោកពុំបានមើលឃើញព្រះវរបិតា និងព្រះរាជបុត្រាទេ ប៉ុន្តែលោកបានអធិស្ឋានដោយជំនឿអស់ពីថាមពលនៃដួងចិត្តលោក ។
បទពិសោធន៍របស់អេណុស បានបង្រៀនខ្ញុំនូវមេរៀនដ៏មានតម្លៃដូចគ្នា ។ នៅពេលខ្ញុំអធិស្ឋានដោយជំនឿ ខ្ញុំមានព្រះអង្គសង្គ្រោះជាអង្គសង្រួបសង្រួមរបស់ខ្ញុំជាមួយព្រះវរបិតា ហើយខ្ញុំអាចមានអារម្មណ៍ថា ការអធិស្ឋានរបស់ខ្ញុំបានឡើងទៅដល់ស្ថានសួគ៌ ។ ចម្លើយកើតមាន ។ ពរជ័យត្រូវបានទទួល ។ មានសេចក្ដីសុខសាន្ដ និងអំណរក្នុងគ្រាលំបាកៗ ។
ខ្ញុំចងចាំគ្រា ដែលខ្ញុំបានលុតជង្គង់ជាមួយអែលឌើរ ដាវីឌ ប៊ី ហេត ក្នុងនាមជាសមាជិកកូរ៉ុមនៃពួកសាវកដប់ពីរនាក់ថ្មីបំផុត ។ លោកមានវ័យស្របាលខ្ញុំនាពេលនេះ ដោយមានឧបសគ្គនានាដែលខ្ញុំមាននៅពេលនេះ ។ ខ្ញុំចាំពីសម្លេងរបស់គាត់ នៅពេលគាត់អធិស្ឋាន ។ ខ្ញុំពុំបើកភ្នែកមើលទេ ប៉ុន្តែវាហាក់ដូចជាបញ្ជាក់ដល់ខ្ញុំថាគាត់កំពុងញញឹម ។ គាត់បានថ្លែងជាមួយព្រះវរបិតាសួគ៌ដោយអំណនៅក្នុងសំឡេងរបស់គាត់ ។
ខ្ញុំអាចស្ដាប់ឮក្នុងចិត្តខ្ញុំនូវសុភមង្គលរបស់គាត់ នៅពេលគាត់ថ្លែងថា « នៅក្នុងព្រះនាមនៃព្រះយេស៊ូវគ្រីស្ទ » ។ ចំពោះខ្ញុំវាហាក់ដូចជា អែលឌើរ ហេត មានអារម្មណ៍ដឹងពីព្រះអង្គសង្គ្រោះកំពុងបញ្ជាក់ក្នុងគ្រានោះនូវសារលិខិតដែលគាត់បានអធិស្ឋានទៅកាន់ព្រះវរបិតា ។ ហើយខ្ញុំប្រាកដថា គាត់ទទួលបានដោយស្នាមញញឹម ។
សមត្ថភាពរបស់យើងដើម្បីធ្វើការបរិច្ចាគសំខាន់ចំពោះការស្ដារឡើងវិញជាបន្ដបន្ទាប់ដ៏អស្ចារ្យ នឹងចម្រើន ឡើង នៅពេលយើងរីកចម្រើនជំនឿទៅលើព្រះយេស៊ូវគ្រីស្ទ ជាព្រះអង្គសង្គ្រោះនិង ព្រះវរបិតាសួគ៌ ជាព្រះបិតាជាទីស្រឡាញ់របស់យើង ។ នៅពេលយើងអធិស្ឋានដោយជំនឿ នោះយើងប្រែក្លាយជាផ្នែកដ៏សំខាន់មួយនៅក្នុងកិច្ចការរបស់ព្រះអម្ចាស់ នៅពេលទ្រង់រៀបចំពិភពលោកសម្រាប់ការយាងមកជាលើកទីពីររបស់ទ្រង់ ។ ខ្ញុំអធិស្ឋានសូមឲ្យយើងទាំងអស់គ្នារកបានអំណរនៅក្នុងការធ្វើកិច្ចការ ដែលទ្រង់បានអញ្ជើញយើងម្នាក់ៗឲ្យធ្វើ ។
ខ្ញុំសូមថ្លែងទីបន្ទាល់ថា ព្រះយេស៊ូវមានព្រះជន្មរស់ ។ នេះ គឺជាសាសនាចក្រ និងនគររបស់ទ្រង់នៅលើផែនដី ។ យ៉ូសែប ស្ម៊ីធ គឺជាព្យាការីនៃការស្តារឡើងវិញ ។ ប្រធាន រ័សុល អិម ណិលសុន គឺជាព្យាការីនៃព្រះអម្ចាស់នៅលើផែនដីសព្វថ្ងៃនេះ ។ លោកកាន់គ្រប់កូនសោទាំងអស់នៃ បព្វជិតភាពនៅក្នុងសាសនាចក្ររបស់ព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕