Me Tini Vinaka na Cakacaka ni Dauvosota, ka Nanuma Me Ka ni Reki Sara!

E mai takosova na ilati, o Chad, na taciqu tagane gone duadua, ena rua na yabaki sa oti, . Na nona tokitoki ki tai kadua e laiva tu e dua na mavoa e utoi noqu daku, o Stephanie, na luvedrau lalai e rua, o Brayden kei Bella; ka vakakina na vo ni matavuvale. Keitou kune vakacegu voli ena vosa nei Elder Neil L. Anderson ena koniferedi raraba ena macawa ni se bera ni leqa kina o Chad: “Ena veivakatovolei drakidrakita e vuravura, toso ki liu ena yalomalua, ka na kauta mai vei iko na veivakabulai qaqa ni iVakabula na rarama, kilaka, vakacegu, kei na inuinui.” (“Mavoa,,” Liaona, Nove. 2018, 85).

E tu na neitou vakabauti Jisu Karisito; keitou kila ni keitou na sotavi Chad tale, ia na yali ni nona iserau vakayago e mosi! E vuqa era sa yali na nodra daulomani. E dau dredre na vosota vakadede ka waraka na gauna me da veisotari tale kina.

Na yabaki tarava nona mate, e vaka e dua na o loaloa e vakaruguti keitou tu. Keitou vakasaqara na vakacegu ena vulici ni ivolanikalou, masumasu vagumatua cake, ka taleva vakawasoma na valetabu. Na qaqa ni serenilotu oqo e vesuka na yaloi keitou ena gauna oya: “Kida na mataka, eda sa yadra mai, butobuto ni bogi sa seavu” (“Kida Na Mataka,” Serenilotu, naba. 27).

E sa vakatulewa na neitou matavuvale ni 2020 me sa yabaki ni vakavoui! Keitou a vulica tiko na neitou lesoni mai na Veiyalayalati Vou ena Lako Mai, Mo Muri Au mai na ivola i Jemesa ena mua ni Noveba 2019 ka vakatakilai mai vei keitou e dua na vakasama. Na Jemesa wase 1 tikina e 2 e tukuna, “Oi kemudou na wekaqu, dou nanuma me ka ni reki sara, ni dou sa lutu ki na ka e vuqa sa dauveivakatovolei” (iVakadewa i Josefa Simici, Jemesa 1:2 [ena Jemesa 1:2, idusi e ra a]). Ena neitou gagadre me kidavaki kina ena reki e dua na yabaki vou, na yabakitini vou, keitou sa lewa ni yabaki 2020 keitou na “nanuma me ka ni reki sara.” Keitou vakila sara vakaukauwa na ka oqo ena Kirisimasi sa oti keitou veisoli yaka na Sote ka volai ena matanivola kata, “Nanuma Me Ka Sara Ni Reki.” Na yabaki 2020 ena yabaki dina ni reki kei na mamarau.

Io, eda sa tu oqo—na 2020 e qai kauta mai na matedewa e vuravura na COVID-19, na tiko yavavala, na leqa tubukoso eso, kei na dredre vakailavo. Sa vakatara beka na Tamada Vakalomalagi na gauna meda vakararai ka navuca na noda kila matata baleta na dauvosota kei na noda vakatulewa matata meda digia na reki.

Na ivola i Jemesa e sa taura tale e dua na ibalebale vou vei keitou. Na Jemesa wase 1 tikina e 3 kei na 4 e tomana:

“Ni dou sa kila sa vakatubura na dauvosota na vakatovolei ni nomudou vakabauta.

“Ia me tini vinaka na cakacaka ni dauvosota, mo dou vinaka taucoko sara kina, me kakua na ka e yali”.

Ena noda sasaga meda kunea na marau ena maliwa ni noda vakatovolei, eda sa guilecava ni noda dauvosota e idola me laiva na vakatovolei oqori me vu ni noda vinaka.

Ea vakatavulica na Tui o Penijamini me biuta tani na itovo vakayago ka yaco “me tamata yalosavasava ena vuku ni isoro i Karisito na Turaga, ia [meda vaka] na gone lailai, meda talairawarawa, yalomalua, yalomalumalumu, dauvosota, dauloloma, ka talairawarawa ki na veika kece” (Mosiah 3:19).

Na wase 6 ni Vunautaka na Noqu Kosipeli e vakatavulica na ivakarau bibi nei Karisito ka rawa ni da vakatotomuria: “Na vosota sa i koya na noda rawata me da vosota tu na bera, na leqa, na veisaqasaqa, se veivakararawataki ka sega ni cudru, vuturi, se lomaleqa. Sa ikoya na igu me vakayacora na lewa ni Kalou ka ciqoma na Nona gauna. Ni ko sa dauvosota, ko na dei tu ena veigauna drakidrakita ka na rawa ni o sotava na veigauna vakaoqori ena vakacegu kei na vakanuinui” ( Vunautaka na Noqu Kosipeli: A iDusidusi ki na Veiqaravi Vakaulotu [2019], 126).

Na ivakaraitaki uasivi ni cakacaka ni dauvosota ena bula oqo sai koya ena bula ni dua na tisaipeli taumada na Karisito, Saimoni na kai Kenani. Ko ira na Gumatua ea dua na ilawalawa Jiu tu taka na vanua ka ra saqata kaukauwa na lewa vaka Roma. Na itosotoso ni Gumatua (Zealot) e vunautaka na ivalavala kaukauwa vei ira na kai Roma, kei ira na veitokoni vei ira na Jiu, kei ira na Setoki ena nodra sikata na kedra vakarautaki ka segata na ivalavala tale eso me vukea nodra inaki (raica na Encyclopedia Britannica,Zealot,” britannica.com/topic/Zealot).( www.britannica.com/topic/Zealot). Ko Saimoni na kai Kenani ea dua vei ira na Gumatua (raica na Luke 6:15). Raitayaloyalotaki mada ni sa cikevaka tiko o Saimoni vua na iVakabula me lave iyaragi, ka liutaka tiko e dua na ilawalawa vakatubuivalu se vakatubuca e Jerusalemi. E vakatavulica o Jisu:

“Sa kalougata ko ira sa yalomalua, ni ra na taukena na vanua.

“Sa kalougata ko ira e dauloloma: ni ra na lomani.

“Sa kalougata ko ira sa dautataro: ni ra na vakatokai me luve ni Kalou” (Maciu 5:5, 7, 9).

Ea rairai karona ka vunautaka na nona ivakavuvuli ko Saimoni ena nona igu kei na doudou, ia e vakatututaka na ivolanikalou ni yaco ena idre kei na ivakaraitaki ni iVakabula, ea veisau kina na nona rai. Na nona itutu vakatisaipeli i Karisito e sa yaco me iusutu ni vakanamata ni sasaga ni nona bula.

Ni da sa cakava ka maroroya na veiyalayalati kei na Kalou, na iVakabula e sa rawa ni vukei keda meda “sucu tale; io, me ra sucu va-Kalou, ka saumaki mai na nodra ivalavala vakayago kei na nodra lutu, me ra ivalavala dodonu, ni sa sereki ira na Kalou, ka sa yaco ni ra sa luvena tagane ka luvena yalewa” (Mosaia 27:25).

Vei ira kece na sasaga gumatua vakaisoqosoqo, vakalotu ka vakapolitiki ena noda gauna, noda sa tisaipeli i Jisu Karisito me isema rogo ka vakadeitaki duadua. “Ni na tiko talega na yalomudou ena yasana sa tiko kina na nomudou iyau.” (Maciu 6:21). Meda kakua ni guilecava, ni sa oti mada na nodra sa “cakava na lewa ni Kalou,” na tisaipeli yalodina, e “[se] yaga ga vei ira na vosota” (Iperiu 10:36

Me vaka ga na vakatovolei ni noda vakabauta ena cakacakataki kina na vosota e lomada, ni da bulataka na vosota, ena vakatuburi kina na noda vakabauta. Ni tubu tiko na noda vakabauta, sa na vaka kina na noda reki.

Ena vula ko Maji se qai sivi, na ikarua ni luvei keirau yalewa, ko Emma, ea laki vakatikitikitaki vakalawa, me vaka ga e levu na daukaulotu ena lotu. E levu na daukaulotu era lesu ki nodra vanua. E levu na daukaulotu era waraka na ilesilesi vou. E levu era sega ni ciqoma na veivakalougatataki ni valetabu ni bera ni ra lako yani ki na buturara ni cakacaka. Vinaka vakalevu, kemuni na taciqu kei na ganequ. Keimami lomani kemuni!

E rau cakacaka vakaukauwa ko Ema kei na nona itokani mai Oladi ena vica na macawa taumada—ka so na gauna e yaco na veitagicaki. Ni leailai wale na madigi ni sota vakatamata ka yalani na tiko e tautuba, ea tubu cake na nona vakararavi ko Ema vua na Kalou. Keitou a masu vata kaya ena initaneti ka taroga na sala cava keitou rawa ni veivuke kina. Ea kerei keitou o koya me keitou sema kei na nona itokani ka e vakavulica tiko ena initaneti!

Keitou tekivu sema vakavuvale ena initaneti, yadudua, vata kei ira na itokani nei Emma mai Oladi. Keitou sureti ira mera sema kei keitou e veimacawa, ena initaneti, vakavuvale raraba Lako Mai, Mo Muri Au na vuli. Ko Floor, Laura, Renske, Freek, Benjamin, Stal kei Muhammad era sa mai neitou itokani kece. Eso vei ira na neitou itokani mai Oladi era sa curu “ki na matamata ni koro qiqo” (3 Nifai 14:13). Eso tale era sa tuberi tiko ena “kena qiqo na sala, kei na kena rabailailai na matamata, mera curu kina” (2 Nifai 31:9). Era sa tacida ka ganeda vei Karisito. E veimacawa keimami sa “nanuma me ka ni reki sara” ni keimami cakacaka vata ena neimami toso ki liu ena sala ni veiyalayalati.

Eda “tinia vinaka na cakacaka ni dauvosota” (Jemesa 1:4) e loma ni noda sega ni rawata meda veisotari mata vaka matavuvale ena tabanalevu ena dua na draki ni bula. Ia keitou rekitaka na tubu ni vakabauta ni noda matavuvale mai na isema vovou ni tekinoloji kei na vulici ni Lako Mai Mo Muri Au mai na iVola i Momani.

Sa yalataka o Peresitedi Russell M. Nelson, “Na nomuni sasaga tiko ena cakacaka oqo—ena gauna mada ga vakaoqori o a vakila beka o sega ni rawata sara e dua na ka—ena veisautaka nomu bula, nomu vuvale, kei na vuravura” (“Toso ki Liu ena Vakabauta,” Liaona, Me 2020, 114).

Na vanua eda caka veiyalayalati tabu kina kei na Kalou—na valetabu—e sogo tiko vakawawa. Na vanua eda maroroya kina na veiyalayalati kei na Kalou—na vale—e dola tiko! E tu vei keda na madigi mai vale me vulica ka tugana na totoka vakasakiti ni veiyalayalati ni valetabu. Ni sega mada na curu ki na vanua tabu vakayago oya, “na yalo[da] … ena reki ni sa rawata na veivakalougatataki ka na sovaraki yani” (Vunau kei na Veiyalayalati 110:9).

E levu e sa yali nodra cakacaka; eso tale sa yali nodra madigi. Eda reki, se cava ga, vata kei Peresitedi Nelson, ka a tukuna wale toka ga: “Na isolisoli ni lolo lomagalala mai vei ira na noda lewenilotu e sa tubu ga, ka vakakina na cau lomagalala ki na tobu ni veivuke raraba. Ni da tuvata eda na ulabaleta na gauna dredre oqo. Ena vakalougatataki kemuni na Turaga ni ko ni tomana na vakalougatataki ira na tani” (Russell M. Nelson’s Facebook page, post from Aug. 16, 2020, facebook.com/russell.m.nelson).

“Dou vakacegu” sa ivakaro mai vua na Turaga, sega ni dou rere (Maciu 14:27).

Ena so na gauna eda dau vuturi ni da nanuma ni da sa “cakava donu tiko na veika kece” ia eda se sega tiko ga ni ciqoma na veivakalougatataki eda gadreva. Ko Inoke ea lako tiko kei na Kalou me 365 na yabaki ni bera ni qai kau ko koya kei ira na nona tamata. Tolu na drau ono sagavulu ka lima na yabaki ni tovolea tiko me cakava vakadodonu na ka kece, ka qai yaco! (Raica na Vunau kei na Veiyalayalati 107:49.)

Na takali ni taciqu o Chad ea yaco ni oti e vica na vula mai na neirau vakacegu ena veiliutaki mai na Tabana ni Kaulotu e Utah Ogden. Ea vakurabui ni keirau a tiko mai na Ceva kei California, ka lesi mai na 417 na tabana ni kaulotu keirau a rawa ni kaulotu kina ena yabaki 2015, keirau a lesi ki na vualiku kei Utah. Na itikotiko ni kaulotu e 30 na miniti ni da draiva ki na vale nei Chad. Na cancer nei Chad ea kunei ni oti neirau ciqoma neirau ilesilesi ni kaulotu. Ena loma mada ga ni neitou veivakatovolei dredre duadua, keitou kila ni Tamada Vakalomalagi e kauwaitaki keitou ka vukei keitou tiko me keitou kunea na marau.

Au vakadinadinataka na veisereki, veivakatabui, veivakadeitaki, kei na kaukauwa rekitaki ni iVakabula ko Jisu Karisito. Au vakadinadinataka ni da masu vei Tamada Vakalomalagi ena Yaca i Jisu, ena sauma vei keda o Koya. Au vakadinadinataka ni da rogoca, ka muria na domo ni Turaga kei koya na parofita bula, o Peresitedi Russell M. Nelson, sa rawa “me tini vinaka na cakacaka ni dauvosota,” ka “nanuma me ka ni reki sara.” Ena yaca i Jisu Karisito, emeni.