Cakava na Veika E Bibi Duadua

Dua na gauna lekaleka se qai oti qo, a vakila dua noqu itokani vinaka ni dodonu me sikova e dua na marama ena nona tabanalevu. A sega sara ni muria na veika a vakila oqo baleta ni sega ni kilai koya vinaka sara—e sega ni vakaibalebale vua. Baleta ni sa lako tiko ga mai vua na vakila oqo,sa navuca sara me muria na veivakayarayarataki. Baleta ni sa nuiqawaqawa rawa tiko ena veisiko e sebera ni yaco oqo, sa nanuma sara me kauta e dua na ka vua na marama oqo me vakamamadataka na nuiqawaqawa. Sa sega saraga ni rawa ni lako liga lala! Sa volia sara o koya e dua na ice cream ka gole sara ena veisiko e sa ririko taka tiko mai.

Tukituki sara ena katuba nei koya na marama oqo, sa sauma sara mai na marama. E sa solia sara noqu itokani vua na ice cream tawani toka ena dua na kato pepa, sa tekivu sara nodrau veitalanoa. Sega ni dede sa kila sara noqu itokani na vuna e gadrevi kina na veisiko oqo. Nodra dabe toka ena matani varada, sa wasea sara na marama oqo e vuqa na ibolebole e lako curuma tiko. Oti e dua na aua na veitalanoa ena draki katakata oqo, sa raica sara na noqu itokani ni sa waicala tiko na ice cream ena loma ni kato pepa.

Sa tukuna cake sara, “Vosota sara ni sa waicala na memu ice cream!”

Sauma sara vakavinaka na marama oqo, “Sa o koya tiko! Au sega ni rawa ni gunu sucu!”

Ena tadra, a tukuna na Turaga vei Liai, “Ko sa kalougata Liai, ena vuku ni veika ko sa vakayacora .”¹

Ni da tisaipeli i Jisu Karisito e vuqa tale na veika eda vakaitavi kina ka sega walega ni nuinui kei na vakabauta. E gadrevi kina na sasaga, na toso, kei na yalo dina. E gadrevi me da cakava e dua na ka, me da “muria na vosa, ka kakua ni rogoca walega.”²

Na kisi ni ice cream waicala, na cava e bibi duadua? Na ice cream? Se ni laki sikovi koya na noqu itokani?

Dua dina na gauna talei kei na dua na goneyalewa taleitaki ka taroga vei au e dua na taro bibi: “Sister Craven, o kila vakacava ni dua na ka me baleta na Lotu e dina? Baleta au sega ni vakila e dua na ka.”

Ni bera noqu rikava yani e dua na isau ni taro, au taroga mada e liu eso na taro. “Tukuna mada vei au dua na ka me baleta na nomu vulica tiko na ivolanikalou vakataki iko.”

A sauma mai, “Au sega ni dau wilika na ivolanikalou.”

Au taroga sara, “Vakacava kei na nomu matavuvale? O dau wilika vata na Lako Mai, Mo Muri Au ?”

Kaya mai o koya, “Sega.”

Au taroga sara kevaka e dau masu: “Na cava o vakila ni o masu?”

A sauma mai: “Au sega ni dau masu.”

Au sauma vakarawarawa vua ka kaya, “Kevaka o via kila e dua na ka, e dodonu mo na cakava kina e dua na ka.”

E sega ni dina beka oya ena veika kece e da via vulica se kila? Au sureti noqu itokani vou me tekivu cakacakataka na kosipeli i Jisu Karisito: masulaka, vulica, veiqaravi vei ira na tani, ka vakararavi vua na Turaga. Ena sega ni yaco na saumaki mai kevaka e sega ni cakavi e dua na ka. E dau lako mai ena kaukauwa ni Yalo Tabu ni da sasagataka vakainakinaki me da taroga, vakasaqara, ka tukituki. E dau lako mai ni da cakava e dua na ka.³

Ena Vunau kei na Veiyalayalati, tukuna vakavica na Turaga, “Ni sega ni bibi”⁴ E vakavuna meu vakasamataka vakabibi ni kevaka eso na ka eda lewa ga, se sega ni bibi soti, eso beka na veika e bibi sara vakalevu. Ena noda sasaga me da cakava e dua na ka se koya ga e rawa, e dodonu me da tarogi keda, “Na cava e bibi duadua?”

O ira na dau kacikacivaki era vakayagataka na yaca me vaka na “Gadrevi” se “Dodonu Me Tiko” ena inuinui me vagolei na noda vakasama me da vakabauta na iyaya era volitaka tiko e gadrevi me vakamarautaki keda se vakataucokotaka na bula. Ia na veika beka era volitaka tiko e gadrevi dina? E dodonu me tiko dina vei keda? E bibi dina soti?

Oqo eso na taro me vakasamataki. Na cava e bibi duadua?

• Na levu na kena “taleitaki” tiko na veika eda vakabira ena volamata? Se na levu ni nona lomani keda ka taleitaki keda na Tamada Vakalomalagi?

• Na kena daramaki na isulu e taka tiko ena gauna oqo? Se na noda vakarokorokotaka na yagoda ena noda itovo ni vakaisulu maqosa?

• Na vakasaqarai ni sau ni taro ena initaneti? Se na ciqomi ni sau ni taro mai vua na Kalou mai vua na Yalo Tabu?

• Na vinakata vakalevu? Se na kena dau rauti keda vinaka na veika sa soli mai vei keda.

E kaya o Peresitedi Russell M. Nelson:

Ni sa nomu itokani na Yalo Tabu, ko na rai basikata na itovo veilasamaki vakavuravura sa vakacacana tu na noda bula. Sa rawa mo vuku cake sara mai vei ira na itabatamata taumada. …

Mo ivakatagedegede ki na vuravura oqo!”⁵

E taura na igu me da raica matua na veika eda gadreva dina me dei kina na noda marau. Sega tale ni dua na ka e vinakata cake o Setani mai na noda vakaisosomitaka na veika e bibi ka tawamudu, vakavuna me da vakalusia na gauna, taledi, kei na kaukauwa vakalou ena veika e sega ni bibi. Au sureti kemuni yadudua mo ni masulaka na veika e kauti iko tani mai na veika e bibi duadua.

Na qasenivuli kalasi tolu nei luvei keirau qase duadua e vakavulica na nona kalasi me “lewa na nomu mona.” E vakananuma vei ira na nona gonevuli lalai ni ra lewa o ira na vei vakasama e dau basika ka e rawa me ra lewa na nodra ivalavala. Au vakananumi au kina meu “lewa vinaka noqu mona” niu dau liaca niu sa veiyawakitaki au tiko mai na veika e sega ni bibi.

E dua na gonevuli itabagone a se qai tukuna tiko vei au ni sa taka tiko na gauna oqo vei eso na itabagone ni Lotu me ra sega ni via muria na ivakaro baleta era sa fikataka me ra qai veivutuni ena dua na gauna malua. Tukuni vei au, “E vaka tu e dua na ka dokai.” E dina, na Turaga ena dau vosoti ira era veivutuni ena yalomalumalumu “ena lomamudou taucoko.”⁶ Ia na Veisorovaki loloma veivueti ni iVakabula me kakua vakadua ni vakayagataki ena ivakarau ni veivakaisini. E da kila na italanoa ni dua na sipi sa yali. E dina sara, ni na biuta na daunisipi e lewe 99 me vakasaqara ga e dua koya e yali. O rawa ni raitayaloyalotaka na marau e vakila na Daunisipi Vinaka vei ira era digitaka me ra 99? O ira era cokotivata ka ra veivukeitaka na kena bulataki na nodra veiyalayalati? E rawa li mo raitayaloyalotaka na cava ena yaco ena nomu koronivuli se nomu cakacaka, se ena nomu lomanivale kevaka na talairawarawa e bulataki raraba? E sega niu tukuna na cakacakataki ni bula me taucoko sara—ia sa ikoya na noda kune marau ni da saga ena noda igu me da bulataka na veiyalayalati eda cakava kei na Turaga.

Ni sa tubu tiko na kena vakaraitaki na nodra lecava na Kalou o vuravura, tubuvata kei na veilecakayaki kei na nuiqawaqawa, oqo na gauna me da toka volekata kina na parofita. Ni sa gusuna tiko na Turaga, eda rawa ni niutaka na veika e kerei keda kina, vakasalataka, ka vakamasuta vei keda sa ikoya na veika e bibi duadua.

Dina ga ni sega ni dau rawarawa, e dau tiko na gaunisala me da caka dodonu kina. Ena dua na veitalanoa a yaco kei dua na ilawalawa itokani e koronivuli, e qai kurabui na yaloi dua na goneyalewa ni sa vagolei na veitalanoa me vakawa na iyavu raraba ni Lotu. Sa qai liaca o koya ni sega ni rawa me galu tiko—e dodonu me cakava e dua na ka. Ena yalo vakarokoroko, sa tukuna sara o koya na loloma ni Tamada Vakalomalagi kei na ivakarau me vakalougatataki ka taqomaki ira kece na luvena na Nona ivakaro. Ena rawarawa cake kevaka me sega ni tukuna e dua na ka. Ia, na cava e bibi duadua? Meda vakataka ga na noda ilawalawa? Se tutaka ka kilai me ivakadinadina ni Kalou ena “vei gauna kei na veikakecega, kei na veivanua kecega”?⁷

Kevaka me kilai na Lotu vakalesuimai i Jisu Karisito, o keda me da na tucake ka kilai. Me vaka ni da marama bulataka na noda veiyalayalati, e dodonu me da cinava na noda rarama ni kosipeli ki vuravura taucoko ena noda taura na ikalawa cake kei na veika me da kilai tani kina. Eda cakava vata vaka luvena yalewa na Kalou—ai lawalawa kaukauwa vaka 8.2 na milioni ni marama mai na yabaki 11 ka sivia yani e tautauvata kece na noda cakacaka. Eda vakasokomuni Isireli ni da vakaitavi ena cakacaka ni veivakabulai kei na bula vakalou: sasagataki na bulataki ni kosipeli i Jisu Karisito, kauwai vei ira era gadreva, sureti ira kece mera ciqoma na kosipeli, ka soqoni ira vata mai na vuvale me tawamudu.⁸ Na kosipeli i Jisu Karisito e kosipeli ni cakacaka kei na kosipeli ni marau! Meda kakua ni beca na veika e tiko rawa vei keda me da cakava na veika e bibi duadua. Na noda kawa vakalou e solia na kaukauwa kei na nuidei me da cakava ka vakataka na veika kece e kila na Tamada Vakalomalagi loloma e da rawa ni vakataka.

Na itoko ni itabagone ni yabaki oqo e kau mai ena Vosa Vakaibalebale 3:5–6:

“Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua.

“Mo vakarogotaka vua na nomu sala kecega, Ia ena vakadodonutaka na nomu ilakolako ko koya.”

E dua na idola bibi ni vakararavi vua na Turaga sa ikoya na toso tiko i liu, vakabauta tiko ni na karoni iko o Koya kevaka madaga e sega ni tiko vei iko na isau ni taro.

Kemuni na taciqu, e sega ni baleta ga na ice cream. Ka sega talega ni o koya me da valevutaka na ka eda cakava. Sa ikoya me da cakava na veika e bibi duadua. Sa ikoya me da bulataka na ivakavuvuli i Karisito ena noda bula ni da dusimaka na noda bula me vakataki Koya cake.

Na levu ni noda cakacakataka meda dei kina ena sala ni veiyalayalati, na levu ni na kena tubu na noda vakabauti Jisu Karisito. Na levu ni kena tubu na noda vakabauta, na levu ni kena na tubu na noda gagadre me da veivutuni. Kei na levu ga ni noda veivutuni, na levu ni noda na vakaukauwataka na isema ni veiyalayalati vatakei na Kalou. Na isema vakaveiyalayalati e kauti keda vakavolekata na valetabu, baleta na kena maroroi na veiyalayalati sa ikoya na noda na vosota tiko me yacova na ivakataotioti.

Ni da vakataudonutaka na noda bula vei Jisu Karisito, eda na dusimaki meda vakayacora na veika e bibi duadua. Eda na vakalougatataki ena kaukauwa vakayalo, vakacegu, kei na reki Ena yacai Jisu Karisito, emeni.