Na Veiyalayalati kei na Kalou e Vakaukauwataki, Taqomaki, ka Vakarautaki Keda ki na Tawamudu Lagilagi

Kemuni na Taciqu, ka marautaki na soqoni raraba vaka marama e vuravura! Ni da marama vakaitavi ka bulataka na veiyalayalati kei na Kalou, eda wasea e dua na isema vakalou koya e vukei keda me da sotava tiko na bolebole ni veisiga ka vakarautaki keda ena iKarua ni Lesu Mai i Jisu Karisito. Na bulataki ni veiyalayalati oya e vakatarai keda me da marama dau veivakayarayarataki vei ira tale eso ka muataki ira vua na iVakabula.

O ira era sa papitaiso oti era yalataka ena siga sega-ni-guilecavi-rawa me ra taura na yaca i Jisu Karisito, ka dau nanumi Koya, maroroya na Nona ivakaro, ka qaravi Koya me yacova na ivakataotioti. Ni da cakava na veika oqo, e yalataka na Tamada Vakalomalagi ni na vosota na noda ivalavala ca ka solia na veitokani ni Yalo Tabu. Na veivakalougatataki oqo e tekivutaki keda ena dua na sala, kevaka eda toso tikoga e liu ka vosota vakadede, ena vakatara me da bula vata kei Koya kei na Luvena, ena matanitu vakasilesitieli. Tamata kece era papitaiso e taukena na iyalayala ni vei madigi oqo kevaka era maroroya na nodra veiyalayalati e vakayacori ena siga talei oya.

O ira era tomana sara na nodra ciqoma na veiyalayalati ena valetabu era na ciqoma e dua na iyalayala kaukauwa ka vakatau talega ena nodra bula ni vakabauta vakayadua. Eda yalataka ena yalo bibi ka dokai me da muria na ivakaro ni Kalou, bulataka na kosipeli i Jisu Karisito, me da bula savasava, solia vakatabakidua na noda gauna kei na taledi vua na Turaga. Na kena isau, e yalataka na Kalou na veivakalougatataki ena noda bula kei na madigi meda lesu ki Vua.¹ Na cakacakataki ni veika e soli vei keda, se koya eda vakarautaki kina ena solia na kaukauwa mo kila na dodonu mai na veika e lasu, na dina mai na veika e cala, ena maliwa ni domo veilecayaki kei na veivakasewasewani koya e bolei keda tu. Sa qai dua na isolisoli totoka!

Noqu vakavakarau ni imatai ni golegole ki na valetabu, o ira na lewe ni iSoqosoqo ni Veivukei kei tinaqu a vukei au meu digia na veiyaya au na gadreva, oka kina na isulu tabu totoka ni valetabu. Ia na vakavakarau bibi duadua a yaco ni bera na noqu mai kila na veika e dau daramaki. Ni oti na noqu veivakatarogi me kilai na noqu bula kilikili, a vakamacalataka na bisopi na veiyalayalati au na vakaitavitaki au kina. Nona vakamacala matau e vakavuna meu vakasamataka ka vakarautaki au meu ciqoma noqu veiyalayalati.

Ni sa yaco mai na siga oya, au vakaitavitaki au ena yalo ni vakavinavinaka kei na vakacegu. Dina ga au sega ni kila na kena bibi taucoko ni veiyalayalati au ciqoma, au kila niu sa vauci vua na Kalou ena vuku ni veiyalayalati kei na veivakalougatataki ni iyalayala se sega sara ni matata vei au kevaka meu bulataka. Mai na imatai ni veika au lako curuma oya, e vakadeitaki au tuga na noqu maroroya na veiyalayalati eda cakava kei na Kalou ka vakatara me da toro volekata na kaukauwa ni iVakabula, o koya e vakaukauwataki keda ena gauna veibolei edau yaco, vakarautaka na tataqomaki mai na veivakayarayarataki ni vunica, ka vakarautaki keda ena tawamudu lagilagi.

Na veika eda lako curuma ena noda bula e tekivu mai na veidredrevaki ki na mosi ni yalo, mai na bula tatao ki na bula lagilagi. Na veika lako curumi yadua oqo e vukei keda me da kila e vuqa na veika me baleta na loloma veiroboti ni Tamada kei na noda rawa ni veisau ena nona loloma cecere na iVakabula. Na maroroi ni veiyalayalati e vakatara na kaukauwa ni iVakabula me savai keda ni da vuli tiko mai na veika eda lako curuma—kevaka sara e dua na vakalelewa lailai se mani dua na lutu levu. Sa tu vakarau na noda Dauveivueti me ciqomi keda ni da lutu kevaka eda na rai ki Vua.

iVakatakilakila

Vakalutulutu sobu ena baranisavu

O sa bau tucake tu ena dua na barinisavu levu, na qaqalo ni yavamu me tu saratuga ena tutuna, qai o vanadaku tu ena loma ni barinisavu levu oqo? Nomu lako sobu tiko, dina ga ni vakadrevinaka tu e yagomu e dua na vakarau ni beleti kaukauwa kei na gacagaca e rawa ni lako sobu ki na botoni barinisavu, na tucake tu ena tutu ni barinisavu e sa dua na ka vakatubuicegu dina. Nomu kalawa e muri mai na tutu ni barinisavu kei na nomu cowiri e maliwa lala e gadreva mo vakararavi ena ikelekele e vakadre vinaka tu ena dua na iyaya sega ni yavalati rawa. E gadrevi na nuitaki ni tamata koya na dreta toka na dali ni ko sa lako sobu tiko mai. Dina ga ni rawa ni vakarautaka na veigacagaca oqo na kena qarauni vinaka na nomu lako sobu mai, o iko talega mo nuidei tiko ni na sega ni vakatara mo lutu na nomu itokani.

iVakatakilakila

Na kelekele ni Vakalutulutu sobu

iVakatakilakila

E dua na goneyalewa vakalutulutu sobu ena baranisavu

Au nanuma sara noqu sa lako sobu tiko mai kei na dua na ilawalawa ni goneyalewa. Au a matai ena noqu ilawalawa meu lako sobu. Noqu sa butu i muri, sa tekivu meu lutu sobu vakaveitalia. Au vakavinavinakataka, ni na dali qai dreti au ka tarova na totolo ni noqu lutu sobu. Noqu sa tekivu lutu sobu, veimama ni vanua veivatuvatu ena mata ni barinisavu oqo, sa tekivu meu masu vagumatua me o cei ga se na cava ga e rawa ni tarova na noqu lutu sobu ena veivatuvatu e ra.

E muri, au qai kila ni na ikelekele a talave ka sega ni vesuki vinaka tu, na gauna au vakalutuki au kina, o koya e taqomaka ka dreta tiko na dali a qai laudre e dakuna ka dreti ki na tutuni barinisavu. Qai yaco me vakarabarabataka na yavana ena veivatuvatu me tarovi koya. Nona sa tudei rawa ena ituvaki oya, sa qai rawa ni vakalutumi au vakamalua ia sa bau dua na cakacaka oca, na kena veisau tiko na dali liga ki na liga. Dina ga niu sega ni rawa ni raici koya, au kila ni sa bau sasaga ena nona igu taucoko me vakabulai au. E dua tale na itokani a tiko ena botoni barinisavu, vakarautaki koya tu me ciqomi au kevaka e sega ni tauri au na dali. Noqu sa yaco mai vakavoleka, sa taura sara na noqu dali ka vakalutuki au vakamalua ki na rara.

Ni noda ikelekele ka itokani vakasakiti o Jisu Karisito, eda vakataudeitaki ena kaukauwa ni Nona loloma ena gauna ni veibolei kei na veisereki edau yaco baleti Koya. Vakavulica o Peresitedi M. Russell Ballard: “Na nodra vakabauta na Kalou kei na Luvena ko Jisu Karisito, sa ikelekele … me tiko ena noda bula ka tautauri matua kina ena gauna yavavala raraba kei na ivalavalaca … Noda vakabauta … me vakatabakidua ki vei Jisu Karisito, Nona bula kei Nona veisorovaki, kei na kena vakalesui mai na kosipeli.”²

Na iyaya vakayalo koya e tarova na noda rawa ni vakamavoataki ena veivatuvatu ni gauna dredre sa ikoya na noda ivakadinadina i Jisu Karisito kei na veiyalayalati eda vakayacora. Eda rawa ni vakararavi ena veitokoni oqo me karoni ka laveti keda kina tataqomaki. Ni noda itokani vinaka, na iVakabula ena sega ni vakatara me da lutu vakayawa mai na Ligana loloma. Ena gauna sara madaga ni rarawa, e tu o Koya me laveti keda ka vakayaloqaqataki. Na Nona kaukauwa e vukei keda me da bula mai na irevurevu veivakarusai ni idigidigi cala ni eso. Ia, meda daramaka yadudua na veibeleti ka raica me vesuki vinaka kece ni tataqomaki. Meda digitaka vakaikelekele vua na iVakabula, me da vauci ki Vua ena veiyalayalti.³

Eda vaqaqacotaka vakacava na ikelekele? Eda masulaka ena yalomalumalumu, wilika ka vakasamataka na ivolanikalou, taura na sakaramede ena yalo ni veivutuni kei na vakarokoroko, sasagataka mo muria na ivakaro, ka muria na ivakasala ni parofita. Ni da sa bulataka tiko ena veisiga na noda itavi ena dua na ivakarau “cecere ka tabu” ⁴, eda na sema sara kina vakalevu vua na iVakabula ka da na vukei ira talega kina eso me lako mai Vua.

E vakacava beka na irairai ni “ivakarau cecere ka tabu”? Eda rawa ni bulataka na kosipeli ena noda veimaliwai e veisiga. Eda kauwaitaki ira era gadreva dina na veiqaravi, na noda vakaraitaka na loloma ena veiqaravi lalai. Eda wasea na itukutuku vinaka ni kosipeli vei ira era gadreva na vakacegu kei na kaukauwa ka “sega ni kila na vanua me ra vakasaqara kina.”⁵ Eda cakacakataka na vakaduavatataki ni matavuvale me tawamudu ena yasana ruarua ni ilati. Vei ira era sa veiyalayalati ena vale ni Turaga, me vaka e vakamacalataka o Peresitedi Russell M. Nelson, “O ira na petereni itabaqase ni valetabu ena daramaka na isulu tabu ni matabete [ka] … vakananuma vei keda … me da vakamuria na sala ni veiyalayalati ena veisiga ena ivakarau cecere ka tabu”⁶ Na veikalawa oqo e sege ni da cakava ga vagumatua vagauna ia e tiki bibi ni noda marau ena veisiga—kei na marau tawamudu.

E sega ni dua na ka e bibi cake ena noda toso volekata na bula tawamudu mai na kena bulataki tiko na noda veiyalayalati kei na Kalou. Ni tudei na noda veiyalayalati ena valetabu, eda rawa ni niutaka na cokovata marautaki kei ira na noda daulomani ena yasana kadua ni ilati. Na gone, se itubutubu, se na watimu e sa takali yani e niutaka tu ena yalona taucoko ni o na dina ena nomu veiyalayalati koya e semai kemudrau vata. Kevaka me da vakawalena na noda veiyalayalati kei na Kalou, eda sa na biuta tiko na isema tawamudu oqo ena dua na vanua rerevaki. Oqo na gauna ni veivutuni, vakavinakataka, ka tovolea tale mada!

E sega ni vakalomana na marau kevaka me da vakaisosomitaka na veivakalougatataki kei na veika rawarawa ni dua ga na gauna lekaleka oqo. Mani vakacava na kemu yabaki ni bula, oqo e dua na dina ni veigauna; na idola ni marau vakadede sa ikoya na bulataki ni kosipeli i Jisu Karisito kei na maroroi ni noda veiyalayalati. Na noda Parofita, o Peresitedi Nelson, a sa vakadeitaka ni “noda idrodro levu duadua kei na noda marau tudei e tiko ena noda tautauri matua ena kau kaukamea ni kosipeli vakalesuimai i Jisu Karisito, ka taucoko ena kena veiyalayalati kei na cakacaka vakalotu. Ni da cakava na veika oqo, eda rawa ni taqomaki ena kena sokoti na wasawasa voravora baleta ni da sa sema tiko ena kaukauwa ni Kalou.”⁷

E vuqa vei keda eda sokota tiko na wasawasa voravora. Ni da viritaki ena ua ni veivakatovolei ka so na gauna eda vakamatabokotaki ena drodro ni wai ni mata ena gauna dredre oya, eda sega ni kila na vanua me da muataka kina na noda waqa ni bula. Eda na sega madaga ni nanuma ni tiko na kaukauwa me da yaco yani ki baravi. Nanuma tiko ocei o iko—o dua na luvena lomani na Kalou—na vuna o tiko kina e vuravura, kei na nomu inakinaki ni bula kei na Kalou kei ira o lomana e rawa ni vakamatatataka na nomu rai ka muataki iko ena gaunisala donu. Ena loma ni gauna ni cava, e tiko na cina rarama me vakaraitaka na sala. “Koi Au na rarama sa cilava na butobuto,.” e tukuna o Jisu.⁸ Eda vakadeitaki ni na taqomaki keda na rai ki na Nona rarama ka tutaka na dina ni noda veiyalayalati.

Sa dua na madigi talei na sota kei ira na marama ni veiyabaki ni bula mai na veituvaki ni bula, era maroroya tikoga na nodra veiyalayalati. Era rai vua na Kalou ena veisiga kei na veiliutaki ni Nona parofita, ka sega ni ra rai ena itukutuku vakavuravura kilai raraba. Dina ga ni tu na veibolei yadua kei na itukutuku veivakarusai ni vuravura koya dau saga me vakacalai ira mai na nodra bulataka tiko na nodra veiyalayalati, era sasaga tikoga me ra tiko ena salatu ni veiyalayalati. Era vakararavi ena iyalayala ni “na ka kecega sa tu vei Tamaqu.”⁹ Na cava ga na nomu yabaki ni bula, o kemuni yadua na marama sa ciqoma na nomuni veiyalayalati kei na Kalou e tiko vei kemuni na madigi mo taura cake na rarama ni Turaga ka liutaki ira tale eso ki vei Koya.¹⁰ Na nomu bulataka na nomu veiyalayalati, ena vakalougatakataki iko na Nona kaukauwa vakamatabete ka vakatara mo dauniveivakayarayarataki kaukauwa vei ira o veimaliwai vata. Me vaka e tukuna o Peresitedi Nelson, sai kemuni na marama koya na vakayacora na veika sa parofisaitaki oti! ¹¹

Kemuni na taciqu, na ka bibi duadua, mo tiko ena sala ni veiyalayalati kei Jisu Karisito! Eda sa kalougata ni da lako mai ki vuravura ena dua na gauna esa roboti vuravura tu na valetabu. Na kena ciqomi ka maroroi na noda veiyalayalati ena valetabu e tu vakarau vei ira kece na lewenilotu yalodina. Kemuni na itabagone qasecake, e sega ni gadrevi mo wawa mo vakamau se mo kaulotu mo ciqoma na veiyalayalati tabu. E rawa mo vakarautaki iko ni o se goneyalewa mo ciqoma na tataqomaki kei na kaukauwa ni veiyalayalati ena valetabu ni o sa yacova na yabaki 18, mo vakarautaki iko ka tiko na gagadre mo doka na veiyalayalati tabu ni valetabu.¹² Oi kemuni sa ciqoma oti na veivakalougatataki ni valetabu, kakua ni vakatarai ira na dau nuinuica me ra dreti iko tani mai na dina tawamudu. Vulica ka taroga na ivurevure niutaki eso mo kila vinaka na kena vakatabui ka bibi ni veiyalayalati ko sa cakava. Lako vakawasoma ki na valetabu ka vakarorogo ki na Yalotabu. O na vakila na veivakadeitaki kamica ni o tiko ena salatu ni Turaga. O na kunea na veiqaqacotaki mo tomana tiko ka kauti ira tale mai eso vatakei iko.

Au vakadinadinataka ni da sa digitaka na veiyalayalati kei na Tamada Vakalomalagi ka vakayagataka na kaukauwa ni iVakabula me da bulataka, ena vakalougatataki keda ena yalo marau ena bula oqo koya eda sega ni tadra rawa kei na lagilagi ni bula tawamudu. ¹³ Ena yacai Jisu Karisito, emeni.