Fa Gyedzi Anamɔntu Ka Jesus Christ Do

Adwontokuw, meda hom ase, dɛ wɔatow “Faith in Every Footstep.” Ndwom no na no mu nsɛm no Onuabanyin Newell Dayley¹ kyerɛɛw no afe 1996 mu ber a wɔreyɛ ahoboa ahyɛ afe a otsĩa 150 a ahyɛse edzikamfo no koduur Salt Lake Bɔnsa mu no wɔ afe 1847 mu ho fã.

Ndwom yi wɔkyerɛɛw no ma dɛm afahyɛ no dze, naaso no mu asɛm no fa wiadze ne nyina ho.

Maadɔ ngyedo no daa:

Enuanom na nkyerɛbaa, megye dase dɛ sɛ yɛdze gyedzi wɔ anamɔntu biara ka Jesus Christ do a, enyidado wɔ hɔ. Enyidado wɔ Ewuradze Jesus Christ mu. Enyidado wɔ hɔ ma obiara wɔ abrabɔ yi mu. Enyidado wɔ hɔ a yɛdze bedzi hɛn mfom, hɛn awerɛhow, na hɛn aperdzi, na hɛn nsɔhwɛ na hɛn ɔhaw dodow do konyim. Enyidado wɔ nnuhu mu na wɔdze hɛn bɔn bɛkyɛ hɛn na yɛdze binom dze kyɛ hɔn. Megye dase dɛ enyidado na asomdwee wɔ Christ mu. Obotum amaa hɛn do ndɛ dze hɛn edua nkõdzen mber mu. Ɔyɛɛ maa ahyɛse edzikamfo no, na Ɔbɛyɛ no sesei ama hɛn mu kor biara.

Afe yi hyɛ afe a otsĩa 175 no fa a ahyɛse edzikamfo no koduur Salt Lake Bɔnsa no mu, a ɔmaa modwendwen m’ewuakɔr ho, hɔn mu binom nantsewee fi Nauvoo baa Salt Lake Bɔnsa no mu. Mowɔ nanasumfo a wɔnantsew sar no do wɔ hɔn mbabun mber mu. Henry Ballard nna oedzi mfe 20;³ Margaret McNeil nna oedzi mfe 13;⁴ na Joseph F. Smith a, ekyir no ɔbɛyɛɛ Asɔr no ne President a otsĩa esia, nna oedzi mfe 9 ber oboduur Salt Lake Bɔnsa mu no.⁵

Wohyia ihia ahorow nyina wɔ kwan no do, tse dɛ awɔw ber nwinwin, yarba horow, edziban na efuradze na ho nã. Mfatoho, ber a Henry Ballard hɛɛn Salt Lake Bɔnsa no mu no, odzii dɛw dɛ oehu “Anohoba Asaase” no naaso ɔtsenaa suro mu osiandɛ bia obi bohu no osiandɛ n’atar a nna ɔhyɛ no atsetsew ara ma onntum nnkata noho nyina. Osumaa noho wɔ efuw mu da no nyina mu kesii adzesaa. Nkyii ɔkɔr fie bi mu kɛseraa efuradze ama oeetum aasɔw n’akwantu no do akɔhwehwɛ n’awofo. Nna ɔdze ndaase ma Nyame dɛ oekudur ne ndaamba fie dwudwodwo.⁶

Me nanasumfo no dze gyedzi anamɔntu kaa Jesus Christ do wɔ hɔn nsɔhwɛ kor biara mu. Ɔyɛ me enyisɔ dɛ wɔammpa abaw dabiarada. Hɔn gyedzi anamɔntu no ehyira me na ebusuasantsen a wodzii do no, tse dɛ ma wo gyedzi anamɔntu ndɛ behyira wo mbasantsen.

Kasafua odzikanyi yɛ dzin na nyɛe so. Ɔyɛ dzin a obotum akyerɛ obi a odzii kan kɔhwehwɛɛ anaa ɔkɛtsenaa asaase fofor do. Ɔyɛ nyɛe a ɔkyerɛ ibobue kwan anaa ibɛkyerɛ nkaafo no kwan a wɔbɛfa do.⁷

Sɛ modwen edzikamfo a woesiesie kwan ama binom a, midzi kan dwen Nkɔnhyɛnyi Joseph Smith ho. Nna Joseph yɛ odzikannyi osiandɛ ne gyedzi anamɔntu no gyaa no ma ɔkɔr ndua kwã mu, bea a obuu nkotodwe wɔ mpaabɔ mu na obuei kwan no ma hɛn a yebenya Jesus Christ n’asɛmpa ne mãhyɛ no. Joseph ne gyedzi dɛ “obisa Nyankopɔn”⁸ dɛm fefɛw ber anapa 1820 mu no buei kwan ma Jesus Christ asɛmpa ne mãhyɛ ne Nsanananmu a nkɔnhyɛfo na asomafo a wɔafrɛ hɔn ma wɔrosom asaase do bio no kã ho.⁹ Minyim dɛ Joseph Smith yɛ Nyankopɔn no nkɔnhyɛnyi. Minyim dɛ n’anamɔntu a gyedzi ahyɛ mu mã no gyaa no ma okobuu nkotodwe wɔ Nyame Egya na No Dɔba, Jesus Christ enyim.

Nkɔnhyɛnyi Joseph ne gyedzi anamɔntu no maa otumii yɛɛ Ewuradze ne edwindadze no a ɔdze Mormon Nwoma, a ɔyɛ Jesus Christ na N’adom mponee n’ahyɛmu kor so no, puei guado no.

Ɔnam Joseph Smith ne gyedzi na n’abotar mapã wɔ nkõdzen na ɔkõtsia yaayaw nyina ekyir no, otumii bɛyɛɛ edwindadze wɔ Ewuradze ne nsa mu wɔ Jesus Christ N’Asɔr ne nkyekyeree bio wɔ asaase do

Ndaansa wiadze mfɛndzanan ehyiadzi mu no, mekãa mbrɛ etuhoakyɛ asɛmpasomafo som aboa m’abrabɔ ho asɛm. Wohyiraa me ber a mekyerɛkyerɛɛ Ɔsor Egya n’enyimnyam nkwagye nhyehyɛɛ, Joseph Smith n’Enyido-adzehu a Odzi Kan, na ne Mormon Nwoma no nkyerɛasee ho nsɛm. Nkyerɛkyerɛ yinom a wɔdze asan ananmu aba no maa me gyedzi anamɔntu no kwankyerɛ ber a merekyerɛ hɔn a woenya pɛ dɛ wobetsie Asɛmpa Nsanananmu amandzɛɛbɔ no

Ndɛ hɛn asɛmpasomafo no yɛ ndɛ nda yi mu edzikamfo osiandɛ wɔnye nkorɔfo a wɔwɔ wiadze nyina mu kyɛ enyimnyam amandzɛɛbɔ no, dɛm ntsi wobue kwan ma hɛn Ɔsor Egya ne mba no ma wohu No na Ne Ba, Jesus Christ. Erepen do agye Jesus Christ asɛmpa no bue kwan ma obiara ma ɔyɛ ahoboa na ɔgye ayɛdze horow na Asɔr no na temple nhyira.

Ndaansa wiadze mfɛndzanan ehyiadzi no, President Russell M. Nelson sii do “dɛ Ewuradze ase aberantsɛ a odzi mu na obotum biara dɛ ɔnyɛ ahoboa na ɔnsom asɛmpakã dwuma” Na dɛ “asɛmpakã dwuma no yɛ kwan a ɔyɛ ndam, “nkataasia no a hom botum no” hom ara nsan mu iyi.”¹⁰

Mberantsɛ na nkataasia, hom gyedzi anamɔntu no bɔboa hom ma woedzi Ewuradze ne nsato dɛ hom nsom asɛmpakã—wɔbɛyɛ ndɛ nda yi mu edzikamfo—ber a hom bue kwan ma Nyankopɔn ne mba ma wohu na wotsim wɔ ahyɛmu anamɔn kwan no a ogya kɔ N’enyimnyam enyim no.

President Nelson ayɛ odzikanyi wɔ Asɔr no mu. Dɛ ɔyɛ Ɔsomafo no oetu kwan akɔ aman pii do ekobue aman pii ama nsɛmpa ne nkãe no. Ɔyɛɛ nkɔnhyɛnyi na Asɔr no ne President no annkyɛr na ɔtotɔe serɛɛ hɛn dɛ “yɛntow [hɛn] sunsum mu tum a yɛdze nya nyikyerɛ no mu.”¹¹ Ɔkɔ do kyerɛkyerɛ hɛn dɛ yɛnhyɛ hɛn dasegye dzen. Mpaabɔsom ma young adultfo mu no, ɔkãa dɛ:

“Mototɔ serɛ hom nhwɛ hom dasegye do. Yɛ ho edwuma. Ma ɔnyɛ wankasa wo dze. Hwɛ do yie. Nyɛn no ama oeenyin.”

[Nkyi] hwɛ anwanwadze kwan wɔ w’abrabɔ mu.”¹²

Ɔrekyerɛkyerɛ hɛn mbrɛ yebesi bɛyɛ sunsum mu ahodan ara yie. Ɔakã dɛ, “Nda a ɔreba mu no, yennkotum atsena ase sunsum mu a Sunsum Krɔnkrɔn ne bambɔ, n’akwankyerɛ. ne kyerɛpɛn, n’awerɛkyekyer, na ne daa daa nhyɛdo nnkã ho.’’¹³

Megye dase dɛ President Russell M. Nelson yɛ Nyame no nkɔnhyɛnyi wɔ asaase no do ndɛ.

Hɛn Agyenkwa, Jesus Christ, nye odzikanyi abɔsõ wɔ kwan no nsiesie no. Nokwar, Ɔno nye “ɔkwan”¹⁴ ma woetum ayɛ nkwagye nhyehyɛɛ no ama yeetum enu hɛnho na, yedua gyedzi wɔ no mu do, asan akɔ hɛn Ɔsor Egya nkyɛn.

“Jesus see dɛ, Emi nye ɔkwan no, nye nokwar no, nye nkwa no; obi mmba Egya no hɔ, gyedɛ ɔnam mo do.”¹⁵ Ɔabɔ anohoba dɛ orinngya hɛn ngyanka, na Ɔbɛba hɛn nkyɛn wɔ hɛn nsɔhwɛ ber mu.¹⁶ Ɔato nsa afrɛ hɛn dɛ yɛmfa “akoma a odzi mu [mbra Ne] nkyɛn, na [Ɔ]bɛsa no yarba.”¹⁷

Megye dase dɛ Jesus Christ nye hɛn Agyenkwa na hɛn Pomfo, hɛn Dzimafo wɔ Egya n’enyim. Hɛn Ɔsor Egya ebue kwan no ama hɛn dɛ yɛbɛka No Dɔba, Jesus Christ do, a yɛdze gyedzi wɔ anamɔntu biara mu, dze asan aba Ne nkyɛn.

Me nanasumfo na ahyɛse edzikamfo no hyiaa ntotoananmu pii ber a wɔdze hwiir a anantwi twe, hwiir a nsa pĩa, na wɔnantsewee kɔɔr Salt Lake Bɔnsa mu no. Hɛn so yebehyia ɔhaw pii wɔ hɛn ankorankor akwantu mu hɛn abrabɔ ber nyina. Yerimmpĩa hwiir anaa yɛrenkã hwiir a wɔakata do wɔ mbepɔw sorɔmsorɔm do na yenndua esukwankyɛba a wɔatɔ mu; yɛrobɔ mbɔdzen dɛ mbrɛ wɔyɛe no dɛ sunsum mu no, yebedzi hɛn nda yi mu nsɔhwɛ na ɔhaw do konyim. Yɛwɔ akwan twa; yɛwɔ akoko—na ɔtɔfabi a mbepɔw—a yɛbɔfow. Ɔson ndɛ akwan no na ahyɛse edzikamfo dze no dze, naaso no mu haw no yɛ kor noara.

Ohia kɛse dɛ yɛbɛka nkɔnhyɛnyi no do na yɛama hɛn anan etsim nokwar ahyɛmu anamɔn kwan do, dɛ mbrɛ ahyɛse edzikamfo no dze yɛe no.

Hom mma yɛmfa gyedzi nka Jesus Christ do wɔ anamɔntu biara mu. Ohia dɛ yɛsom Ewuradze na yɛsom hɛnho nkorkor. Ohia dɛ yesie hɛn ahyɛmudzi no na yedzi no nyi dze hyɛ hɛnho dzen wɔ sunsum mu. Onnyi dɛ yɛyew mbrasɛm ne nsie ntsɛmpa nara ho hia a ohia no. Satan bɔ mbɔdzen dɛ obodum hɛn enyimpi si na hɛn dɔ ma Nyankopɔn na Ewuradze Jesus Christ. Meserɛ hom nkaa dɛ sɛ obiara yew hɔn kwan a, yennkɛyew ama hɛn Agyenkwa dabiarada. Yɛdze nnuho mu nhyira no, yebotum adan aba No hɔ. Ɔbɔboa hɛn ma yesũa adze, yeenyin, na yɛasesã ber a yɛbɔ mbɔdzen dɛ yɛbetsim wɔ ahyɛmu anamɔn kwan do no.

Nkyɛ aber nyina yɛakã Jesus Christ anamɔn kwan no do na, yɛdze gyedzi wɔ anamɔntu biara mu no, etsim wɔ No do, a hɛn anan etsim yie wɔ ahyɛmu anamɔn kwan no do, nye m’ahobrɛadze mpaabɔ wɔ Jesus Christ ne dzin mu, amen.