Erotwe Rebɛn Agyenkwa no

Ewuradze kyerɛkyerɛɛ mu dɛ mber a odzi ewie ansaana Ne mbae no “ewifua,” a Ɔkyerɛɛ dɛ wɔyɛ “ahenman no ne mba no,”⁵ nye “nworahaban,” hɔn a wɔnndɔ Nyankopɔn na wonnsie Ne mbrasɛm no, benyin afã na afã. Hɔn “ebien nyina nnyin,”⁶ afã na afã.

Iyi bɛyɛ hɛn wiadze kesi dɛ Agyenkwa no bɛsan aba, a papa pii na dza ɔyɛ bɔn pii wɔ beebiara afã.⁷

Bia ɔtɔfabi a nnya atsenkã dɛ ayɛ wifua abaw a ɔyɛ dzen. Nya abotar ma woho. Ewuradze kãa dɛ afɔr a wɔrefifir bɛkã ewifua no ho.⁸ Hɛn nyina, yɛyɛ Ne Nda a odzi ekyir Ahotseweefo, na mbom yɛnnyɛ dza yɛpɛ ayɛ nyina, naaso hɛn enyi ber dɛ yɛbɛyɛ N’esuafo nokwafo.

Yehu dɛ ber a bɔn rodɔɔ sõ wɔ wiadze mu no, hɛn sunsum mu konyimdzi, na hɔn a yɛdɔ no hɔn sunsum mu konyimdzi no, behia dɛ yɛnyɛn, yɛma ahom, na yɛhyɛ hɛn gyedzi wɔ Jesus Christ no ndwow dzen ara yie. Ɔsomafo Paul tuu hɛn fo dɛ yɛngye ndwow,⁹ yengyina fapem do, na yɛmee¹⁰ wɔ hɛn dɔ ma Agyenkwa na hɛn pisi dɛ yɛbɛka No do. Ndɛ na nda a ɔreba mu no obehia dɛ yetsim na hɛn mbɔdzembɔ yɛ kor, dze bɔ ban tsia mpaapaamu na enyigudo.¹¹

Mbom wiadze ne nhyɛdo a ɔbɔ hɛn ho aprɔw rodɔɔ sõ no, onnyi dɛ yesuro. Ewuradze rengyaa N’ahyɛmu nkorɔfo hɔ dabiarada. Sunsum mu akyɛdze tum na sor kwankyerɛ ma atseneneefo no boa hɛn.¹² Dɛm Sunsum mu tum nhyira a ɔbɛkã ho no, ommbogu hɛn do osian ara dɛ yɛkã ebusuasantsen yi ho. Ɔba ber a yɛhyɛ hɛn gyedzi wɔ Ewuradze Jesus Christ mu dzen na yesie Ne mbrasɛm, ber a yɛba bohu No na yɛdɔ No no. Jesus bɔɔ mpaa dɛ, “Na iyi nye onnyiewiei nkwa, dɛ wobohu ɔwo, nokwar Nyame kor no, nye nyia esomaa no, mekyerɛ Jesus Christ.”¹³

Dɛ mbrɛ yenyim no yie no, irinya gyedzi wɔ Jesus Christ mu na ereyɛ osuanyi nokwafo no nnyɛ aber-kor nsanmuyi ara—ɔbor dza osi-ber kor. Ɔyɛ krɔnkrɔn, ɔyɛ ndzeyɛɛ kwan a ɔkɔ do na onyin na ɔyɛ kɛse wɔ hɛn abrabɔ ne hyɛber mu, na ɔkɔ do ara kɛpem dɛ yebobu nkotodwe wɔ N’ananho.

Ewifu no rinyin wɔ nworahaban no mu wɔ wiadze mu no, yebesi dɛn bɛma hɛn enyimpi si ma Agyenkwa no adɔ bun mu na wɔahyɛ dzen wɔ nda a ɔreba no mu?

Adwenkyerɛ ebiasa nye yi:

Odzi Kan, yebotum dze hɛnho ahyɛ Jesus Christ N’abrabɔ, Ne nkyerɛkyerɛ, N’ahendzi, No tum, na No werdam afɔrbɔ no mu korakora. Agyenkwa no kãa dɛ, “Hom nhwɛ me wɔ hom adwendwen biara mu.”¹⁴ Ɔsomafo John kaa hɛn dɛ, “Yɛdɔ, osiandɛ ɔno na odzi kan dɔɔ hɛn.”¹⁵ Sɛ yenya No dɔ ho sũahu yie a, yɛdɔ No mbordo mpo, na ɔnnyɛ dzen koraa, dɛ yebedzi Ne fasusu do dze adɔ na yɛahwɛ hɔn a wɔbɔ hɛnho aprɔw no. Tsenenee ahokekã biara a yɛyɛ dze bɛn No no, ɔma yehu No ara yie.¹⁶ Yɛdɔ No na yɛbɔ mbɔdzen dɛ wɔ hɛn akwan kumabaa mu yɛbɛyɛ dza Ɔyɛe no.¹⁷

Odzi do, ber a yeruhu Agyenkwa no na yɛrodɔ No no, yenya pɛ mbordo dɛ yɛdze hɛn sompa na awerɛhyɛmu bɔbɔ no anohoba. Yɛnye No dzi ahyɛmu. Yɛhyɛ hɛn anohoba no ase wɔ enuma ber, na yesi anohoba yinom na binom so pi ber a yenu hɛnho daa daa, yebisa bɔnfakyɛ, na yɛdze enyika hwɛ kwan dɛ yɛbɛgye sacrament no dapɛn biara. Yɛbɔ anohoba dɛ “[yɛbɛ]kaa no aber nyina na [ye]dzi ne mbrasɛm a ɔdze ama no do,”¹⁸

Yɛyɛ krado a, yefua temple ayɛdze ma ahyɛmudzi horow no. Yerenya onnyiewiei nhyɛdo ho atsenkã wɔ hɛn mber kumaa krɔnkrɔn, dzinn mu wɔ Ewuradze ne fie no, enyigye mu ara yɛnye Nyame dzi ahyɛmu na ɔhyɛ hɛn enyimpi si dzen dɛ yebesie ahyɛmudzi no.

Yeridzi ahyɛmu na yerisie no ma kwan ma Agyenkwa no dɔ no kɛhɛn hɛn akoma no bun mu yie. Bosoom yi ne Liahona no, President Russell Nelson see dɛ “[Hɛn] ahyɛmudzi begya hɛn ma yɛabɛn No ara yie. … Nyankopɔn renndan N’ekyir mma hɔn a wɔnye No akyekyer dɛm nkitahodzi no.”¹⁹ Na dɛ ma President Nelson kãa no dɛɛdɛdɛw anapa yi, “Temple kor biara a wotu hyɛ Nyame nsa no, Nyame tum bi bɛkã ho wɔ wiadze mu dze ahyɛ hɛn dzen na woegyina etsia ɔsɛɛfo no mbɔdzembɔ a ɔreyɛ kɛse no.”²⁰.

Ana yebotum ehu siantsir a Ewuradze bɛkyerɛ No nkɔnhyɛnyi ma ɔdze temple krɔnkrɔn abɛn hɛn yie na wɔama hɛn kwan ma yɛataa akɔ Ne fie?

Sɛ yɛhɛn temple mu a, yenya ahotɔ mber kakra fi wiadze ne nhyɛdo ahorow pii a otsia hɛn, ber yesũa hɛn botae wɔ abrabɔ yi mu na onnyiewiei akyɛdze a wɔdze duaa hɛn Agyenkwa, Jesus Christ mu ma hɛn no.

Ewiei, m’adwen nsusui ɔtɔ do ebiasa: ahwehwɛdze krɔnkrɔn yi mu no, ɔsom hɛn bo, yɛbɔ ho ban, na yɛhwɛ Sunsum Krɔnkrɔn akyɛdze no do yie. President M. Russell Ballard akã no dadaw na Elder Kevin W. Pearson mber kumabaa a abɛsen no, hɔn beenu nyina kãa President Nelson no kɔkɔbɔ nkɔnhyɛ a mibesi do akã no bio: “Yennkotum atsena ase sunsum mu a Sunsum Krɔnkrɔn ne bambɔ, n’akwankyerɛ. ne kyerɛpɛn, n’awerɛkyekyer, na ne daa daa nhyɛdo nnkã ho.”²¹ Iyi yɛ akyɛdze a wonntwa ho bo. Yɛbɔ hɛn mbɔdzen ara yie dɛ yɛbɔbɔ hɛn daa daa sũahu ho ban, ama Sunsum Krɔnkrɔn ne nhyɛdo no aka hɛn nkyɛn. Yɛyɛ wiadze no kan, na sɛ okehia a, ɔpɛ mu ara yɛsan mu yi dɛ ɔbɔson hɛn na nkaafo no. Ndaansa yi President Dallin H. Oaks bisaa young adultfo: “Ana hom gye enyim yɛ soronko? … [Nkanka] nsanmuyi a ohia kɛse … a hom reyɛ wɔ hom ankorankor abrabɔ mu. … Ana hom rokɔ kan etsia wiadze no ɔkõtsia a?”²²

Ndaansa yi mu social media nkyerɛwee no, mibisaa esuafo mfɛfo dɛ wɔnkyɛ nsanmuyi a wɔayɛ a okehiaa dɛ wɔyɛ soronko fi wiadze no. Minyaa mbuae ɔha ɔha.²³ No mu kakrabaa nye yi:

Amanda: Meyɛ ɔbaa nɛɛs a meyɛ edwuma wɔ apaamu efiadze. Mobɔ mbɔdzen dɛ mobɔhwɛ hɔn a wɔwɔ hɔ no dɛ mbrɛ Christ bɛyɛ.

Rachel: Meyɛ ndwontofo wɔ bagua mu, na wɔtaa dwen dɛ atar wɔdze ma me na mebɛhyɛ a wɔnnhwɛ n’ahosanyɛ. [Osiandɛ magye me endowment ntsi,] mekãa kyerɛ ahwɛdofo no dɛ atar no wɔ dɛ ɔyɛ [ahosan]. Nna ɔnnyɛ hɔn dɛw … naaso wɔyɛɛ nsesã no a wɔmmpɛ no. Merennfa asomdwee a ofi irigyina dɛ dasefo ama Christ aber nyina no nsesã biribiara.

Chriss: Nsãnom aka mo hɔ (mereyɛ ho edur), mefata temple nkɔree, na meyɛ Asɔrba. Mennfa mo sũahu wɔ suban bɔn no ho na merenya [Jesus Christ] No Werdambɔ ho dasegye no nnhyɛ hɔ dzinn.

Lauren: Menye me high skuulfo classmates rekyerɛw dza wɔbɔhwɛ do ayɛ agodzi ɔyɛkyerɛ. Nna wɔpɛ dɛ nyia mebɛyɛ no a no su yɛ dzinn dzinn no awerɛfir mu ara ɔakekamu ɔakã ehuhusɛm. Wɔkɔr do hyɛɛ me, naaso mopowee na migyinaa m’anan do.

Adam: Nkorɔfo pii nngye nndzi sɛ mekã kyerɛ hɔn dɛ misie ahosie ho mbra na me san mu yi dɛ monnkɔhwɛ ehuhuu mfonyin. Wɔnntse ase dɛ ɔma me enyigye na asomdwee wɔ m’adwen mu.

Ella: Me papa yɛ LGBTQ kuwba. Mobɔ mbɔdzen dɛ mobɔdwen binom hɔn atsenkã ho ber mirigyina dɛ Christ dasefo na miridzi nokwar wɔ dza megye dzi ho.

Andrade: Misii m’adwen pi dɛ mobɔkɔ do akɔ asɔr ber a m’ebusua yɛɛ hɔn adwen dɛ wɔnnkɔkɔ bio.

Na ewiei no, fi Sherry: Nna yɛakɔ nhyiamu bi wɔ ambrado no ne fie kɛse no mu. Wɔhyɛɛ ase kyekyɛɛ champagne maa hɛn dɛ yɛdze bɔnom ambrado no ne “tsir nsã.” Misii no nketse dɛ mepɛ nsu, edwumayɛnyi no mpo kãa dɛ ɔbɛyɛ mpowatwa. Yɛnoom ambrado ne tsir nsã, na musuoo me nsu tumbɛr mu wɔ sor. Ambrado no no bo ennfuw.

President Nelson kãa dɛ, “Nyew, hom tse wiadze no mu, mbom hom wɔ gyinapɛn a ɔson wiadze dze no ama wɔaaboa hom ma woekwetsir wiadze nkekãa no.”²⁴

Anastasia, Ukrainenyi enã kumabaa, da asopitsi a ɔwoo babanyin abɔdomaba o annkyɛr na towpae hyɛɛ ase towtowee wɔ Kyiv Kwakwar bosoom a abɛsen yi. Nɛɛs basia bi bue asopitsi abow no na ɔdze ndze dzendzen see dɛ, “Fa w’abɔdomaba no, fa kuntu kyekyer noho na kɔ asado hɔ—ntsɛm!”

Ekyir no Anastasia kãa wɔ ho dɛ:

“Mennsusu ho da dɛ m’abaatanyɛ ahyɛse no bɛyɛ dzen dɛm, … naaso … miritsim wɔ … nhyira na anwanwadze a meehu do. …

“Sesei dze, … ɔbɛyɛ dzen koraa dɛ medze bɛkyɛ hɔn a wɔdze ɔsɛɛ na pira dɛm aba … ,naaso dɛ meyɛ Christ osuanyi, mowɔ gyedzi dɛ mubotum dze [akyɛ]. …

“Minnyim dza ndaamba dze bɛba … naaso minyim dɛ yerisie hɛn ahyɛmudzi no bɛma Sunsum no kwan ma Ɔawɔ hɛn nkyɛn daa daa, … a Ɔbɛma yeenya enyigye na enyidado ho atsenkã, … wɔ nkõdzen ber mpo mu.”²⁵

Mo nuanom na nkyerɛbaa adɔfo, wɔayɛ me adom mbordo dɛ menya hɛn Agyenkwa, Jesus Christ dɔfo no dɔ. Minyim dɛ Ɔtse ase na Ɔma No dwuma krɔnkrɔn no kwankyerɛ. Minnyi nsɛmfua a medze botum akyerɛ mo dɔ ma No.

Hɛn nyina yɛyɛ “ahyɛmu mba” yɛtserɛw wɔ asaase aman na amambra horow wɔ asaase-tɔw biara do, hɛn dodow ɔpepe ɔpepe ber a yɛtweɔn hɛn Ewuradze na Agyenkwa Ne mbae wɔ enyimnyam mu. Yɛrehyerɛn dɛ kan ama hɔn a woetwa hɛnho ehyia no, yɛdze adwendahɔ hyehyɛ hɛn apɛdze, adwendwen, nsanmuyi, na ndzeyɛɛ. Yɛdze hɛn akoma nyina hwehwɛ dɛ yebohu na yɛbɔdɔ Agyenkwa no, yɛdua ahyɛmu a yɛnye Nyame dzi no do dze paa hɛnho efi wiadze ho, yɛada edzi, a ɔnntɔ kã, na yɛayɛ soronko ber a yedzi Ɔno na Ne nkyerɛkyerɛ nyi a yɛnntsew hɛnho mmfi hɔn a ɔson dza wɔgye dzi no ho.

Ɔyɛ akwantu nwanwa dɛ yɛbɛyɛ wifua wɔ nworahaban mu, ɔtɔfabi a ogya tsirpaa, naaso hɛn gyedzi a orinyin na ɔma hɛn awerɛhyɛmu na ɔdwedwe hɛn. Ber hom ma kwan ma hom dɔ ma Agyenkwa na No dɔ ma hom no hɛn hom akoma no bun mu no, mobɔ hom anohoba wɔ awerɛhyɛmu, asomdwee, na enyigye ntowdo dze ehyia hom abrabɔ mu ɔhaw horow do. Na hom nkaa anohoba yi a ofi Agyenkwa no hɔ: “Mo[bɔ]boaboa mo nkorɔfo ano, dɛ mbrɛ mbɛbusɛm a ɔfa ewifua na nworahaban ho kyerɛ no, ama wɔdze ewifua no eekesie yie ma woenya onnyiewiei nkwa, na wɔdze celestial enyimnyam no abɔ hɔn abɔtsir.”²⁶ Jesus Christ ne dzin mu, amen.