Ena Vukudra na Nomu Kawa
Mo kua ni malumalumu ena sinucodo ni vakabauta totoka o sa tekivuna, se o ciqoma, me ivotavota. Mo kaukauwa.
Vica na yabaki sa oti, ena noqu veiqaravi tiko ena iwasewase ni Ceva ni Vualiku i Ra kei Amerika ka vakaitikotiko i Lima, Peru, e dua na ka totoka au sotava au na via wasea vei kemuni.
E yaco ena noqu lesu tiko i vale ni oti e dua na mua ni macawa osooso ni ileselesi. Ni oti na kena qaravi na ivakarau ni curu vanua ena rara ni waqavuka, au kunea e dua na draiva ni motoka e waraki au tiko ena neitou vanua ni veiqaravi ni motoka. E kauti au kina nona motoka, ka au dabe sara imuri, vakarau meu vakacegu ka marautaka e dua na ilakolako vakanomodi ivale. Ni oti ga e vica na buloko na nona draiva voli, a ciqoma o draiva e dua na qiri mai vei nona supavaisa ka tukuna vei koya ni au kauta na motoka cala. E dua tale na motoka e maroroi tu vei au, ka taroga na supavaisa kevaka au vinakata me veisau na motoka ka me kauti au lesu okoya ki na rara ni waqavuka. Au tukuna vua ni sega ni gadrevi, ka keirau rawa ni tomana na ilakolako. Ni oti e vica na miniti ni vakanomodi, e raica au mai ena iloilo ka taroga, “O iko e dua na Momani, se sega?”
Ni oti na taro ni veisureti oya, au kila ni noqu gauna ni vakanomodi sa oti. Au sega ni tarova rawa na vanua ni vakadidike ena kauti keirau kina na nona taro.
Au vulica ni yacana o Omar, na yacai watina o Maria Teresa, ka rua na luvedrau—Carolina, yabaki 14, kei Rodrigo, yabaki 10. O Omar e lewe ni Lotu ni se gone sara. Na nona matavuvale e dau vakaitavi, ia ena dua na gauna, sa sega ni lako i lotu na nona itubutubu. Ena yabaki 15 o Omar sa sega saraga ni vakaitavi. E sa yabaki 40 okoya ena gauna oya.
Ena gauna oya au kila ni sega ni au taura na motoka cala. E sega ni ka vakacalaka! Au tukuna vua o cei o au kau tiko ena nona motoka baleta na Turaga sa kacivi koya me lesu kina Nona bai.
Keirau mani veitalanoataka sara na gauna se vakaitavi kina okoya kei nona matavuvale ena Lotu. E vakananuma na gauna ni lotu vata vakamatavuvale taleitaki, kei eso na sere ni Lalai. E lagata o koya e vica na qaqa ni sere ni “Au luve ni Kalou.”1
Ni oti noqu taura na vanua e tiko kina, naba ni talevoni, kei na veivakadonui meu wasea vei nona Bisopi, au tukuna vei koya ni au na vaqara e dua na sala meu na tiko e valenilotu ena nona matai ni siga lesu i lotu. Keirau mai vakacavara na neirau ilakolako mai na rara ni waqavuka i vale, vaka talega kina e dua na ilakolako lailai kina nona gauna sa oti, ka keirau dui gole sara.
Ni oti e vica na macawa e qiriti au o nona Bisopi, ka tukuna vei au ni sa navunavu tiko o Omar me laki lotu ena dua na Sigatabu. Au mani tukuna vua ni au na tiko e kea. Na Sigatabu oya, sa tiko o Omar vata kei luvena tagane. Na watina kei na luvena yalewa a sega ni taleitaka. Ni oti e vica na vula, qiri mai na nona bisopi, me tukuna mai ni o Omar ena papitaisotaki watina kei rau na luvena, ka sureti au meu tiko kina. Oqo na itaba ni Sigatabu eratou a vakadeitaki kina me lewena na Lotu.
Na Sigatabu vata oya, au tukuna vei Omar kei na nona vuvale ni kevaka eratou vakarau, ena dua na yabaki sa ka dokai vei au meu na vakayacora na nodratou veivauci ena Valetabu e Lima Peru. Oqo na itaba mai na gauna veivakananumi vei keitou kece, e tauri ni oti e dua na yabaki.
Na cava na vuna au wasea vata tiko kina kei kemuni na veika oqo? Au wasea tiko me rua na inaki.
iMatai, me vakadreti ira na lewenilotu vinaka ka eso na vuna era sa lutu tani mai na kosipeli vakalesui i Jisu Karisito. iKarua, me vakadreti talega o ira na lewenilotu vakaitavi nikua ka era sega beka ni yalodina ki na nodra veiyalayalati me vaka na kena ivalavala. Vei rau na tikina ruarua oqo, o ira na kawa e muri era na vakila na kena revurevu, kei na veivakalougatataki kei na iyalayala ka maroroi tu vei nodra kawa sa rawa ni kautani.
Meda tekivu ena imatai ni ituvaki, lewenilotu vinaka era sa gole tani mai na salatu ni veiyalayalati, me vaka ni yaco vei noqu itokani o Omar mai Peru. Ni au tarogi koya na vuna e vakatulewa kina me lesu mai, e tukuna ni baleta okoya kei watina e vakila ni na marau vakalevu o rau na luvedrau ni bula vata kei na kosipeli i Jisu Karisito. E vakila okoya ni sa kena gauna me lesu ki lotu ena vukudrautou na gone.
E ka ni rarawa ni da sotavi ira na lewenilotu luluqa se sega ni lewe ni Lotu, ka era lewena tu na lotu na nodra vuvale, a mai yali ga baleta na nodra digidigi na itubutubu se tubudra me ra lako tani mai na lotu. Na vakatulewa oya e rawa ni vakilai ena nodra kawa me tawamudu!
Na luvedra kei na makubudra era sa tarovi mai na veitaqomaki kei na veivakalougatataki ni kosipeli i Jisu Karisito ena nodra bula. E vakamosi yalo sara, era sa vakayalia na iyalayala ni matavuvale tawamudu ka a tiko ena dua na siga. Na digidigi ni dua sa vakilai ena sinucodo taucoko ni kawa. E dua na ivotavota ni vakabauta sa mai voroki.
Ia, eda kila, na cava ga e kavoro e rawa ni vakavinakataki mai vei Jisu Karisito. Me inaki oqo, yalovinaka vakasamataka na veisureti oqo mai vei Peresitedi Russell M. Nelson: “Ia oqo, kevaka o sa lutu laivi mai na salatu, au sa sureti kemuni ena vakanuinui taucoko ni yaloqu mo lesu mai. Se cava ga na nomu kauwai, se cava e bolei iko, sa tiko e dua na vanua vei iko eke, ena Lotu ni Turaga. Ena kaulougata o iko, kei na itabatamata e se bera ni sucu mai, era na vakalougatataki ena nomu ivakarau oqo me ra lesu tale ki na salatu ni veiyalayalati.”2
Meda raica na ikarua ni ituvaki, o ira na lewenilotu vakaitavi nikua ka ra sega sara ni yalodina me vaka era rawa. Me vaka ga na kena revurevu na veika dina nikua ena vakatulewa na noa, na vakatulewa nikua ena tara na noda veisiga ni mataka kei na nodra veisiga ni mataka na lewe ni noda matavuvale.
E vakavulica o Peresitedi Dallin H. Oaks vei au:
“E vakauqeti keda na kosipeli vakalesui mai i Jisu Karisito meda vakasamataka na veigauna ni mataka. E vakatavulica na veivakasama levu eso ni bula ena veisiga ni mataka me dusimaka na veika eda vakayacora nikua.
“E kena veibasai, eda sa kila kece na tamata ka ra kauwaitaka ga na gauna oqo: vakayagataka nikua, rekitaka nikua, ka kua ni nanuma na veisiga ni mataka.
“Ni keda vakarau vakatulewa, sa dodonu meda dau taroga, ‘Ena veimuataki kivei na veika oqo?3 Na noda vakatulewa nikua ena muataki keda kina reki nikua ka tawamudu, se liutaki keda ki na rarawa kei na wainimata?
Eso beka na nanuma, “E sega ni gadrevi vei kedatou me tou lai lotu ena vei Sigatabu,” se “Kedatou na qai saumi ikatini ni sa toso vinaka,” se “Au na sega ni tokoni ira na iliuliu ni Lotu ena ulutaga oqo.”
“Ia,” era tukuna, “keitou kila ni dina na Lotu, ka keitou na sega ni biuta na kosipeli i Jisu Karisito.”
O ira e tiko vei ira na vakasama vakaoqo era sega ni kila na revurevu ca ni mataqali lewenilotu “tunumaka” ena nodra bula kei na bula ni nodra kawa. O rau na itubutubu e rawa ni bulabula tiko, ia na ririko ni yali na luvedra e levu cake—ena bula oqo vata kei na tawamudu.
Me baleti ira na sega ni taukena na ilagilagi vakaselesitieli vata kei na nodra matavuvale, e kaya na Turaga, “Ko ira oqo sai ira era sa sega ni gumatua ena nodra ivakadinadina me baleti Jisu; ia, era sa sega ni rawata na isala vakaturaga ena nona matanitu na noda Kalou.”4 Oqo beka na veika e vinakati vei kemuni kei na luvemuni? E sega beka ni dodonu meda yaloqaqa ka sega ni tunumaka ena vuku ni noda kawa?
Wasea o Peresitedi M. Russell Ballard na vakanananu vata oqo:
“Kivei ira eso, na veisureti i Karisito mera vakadinata ka tiko ga kina e se dredre tiko ga—se dredre tikoga me ciqomi. Eso na tisaipeli a dredre mera kila vinaka e dua na lawa se ivakavuvuli ni Lotu. Eso era vakalewa na keda itukutuku makawa se nodra malumalumu eso na lewenilotu kei na iliuliu, ena gauna sa oti kei na gauna oqo.
“Na lewa mo “sega tale ni lako vata kaya” kei ira na lewe ni Lotu kei ira na iliuliu digitaki ni Turaga ena rawa me balavu na kena revurevu ka sega ni raici rawa ena gauna oqo.”5
Sa dua na ivotavota rarawa me pasitaki yani—ka cava na kena inaki? Se cava ga, e sega ni rauta me vakawalena na revurevu ca vakayalo e na vakaduria vei ira na itabatamata mai muri.
Kemuni na taciqu kei na ganequ lomani, kevaka o gole tiko ena dua vei rau na ituvaki au sa qai vakamacalataka oqo ena noqu itukutuku, yalovinaka vakasamataka tale na veika o na cakava. O kila ni sa tiko na ituvatuva baleti keda ena bula oqo. Au kila ni rawa me tawamudu na matavuvale. Na cava o via vakaleqa kina na nomu? Mo kua ni malumalumu ena sinucodo ni vakabauta totoka o sa tekivuna, se o ciqoma, me ivotavota. Mo kaukauwa. Sa nomu gauna mo kitaka, ka na vukei iko kina na Turaga.
Mai na vu ni yaloqu, au sureti iko mo vakasamataka, rai ki liu ka vakadikeva “na vanua cava ena mua kina” ka, kevaka e gadrevi, mo yaloqaqa ena kena moici na nomu salatu ena vuku ni nomu kawa. Ena yacai Jisu Karisito, emeni.