O Vinakata Li Mo Bula Marau?

E kaya o Elder Dale G. Renlund: “Na vosa sala ni veiyalayalati e tukuna tiko e vica na veiyalayalati eda lako mai kina vei Karisito ka semati Vua. Ena ivau ni veiyalayalati oqo, eda na rawata kina na Nona kaukauwa tawamudu. E tekivu na sala ena vakabauti Jisu Karisito kei na veivutuni, qai tarava mai na papitaiso kei na ciqomi ni Yalo Tabu.”² Eda vakavouia na veiyalayalati oqo ena gauna yadua eda vakayagataka kina na sakaramede.

Tekivutaki ena veiyalayalati ni papitaiso, eda cakava na veiyalayalati ena noda bula taucoko. A kaya tale o Elder Renlund: “Na salatu ni veiyalayalati e liutaki keda ki na cakacaka vakalotu ni valetabu, me vaka na edaumeni ni valetabu. Na edaumeni sai koya na isolisoli ni Kalou ni veiyalayalati tabu ka na taucoko kina noda semati Vua. ”³

Eso na gauna ni da cakava na veiyalayalati, eda sega ni maroroi ira. Ni yaco oqo, o na lesu vakacava ki na sala ni veiyalayalati? Meu wasea mada e vica na ivakaraitaki ni lesu ki na sala ni veiyalayalati.

Ena dua na vula vakacaca sa oti, au a taura e dua na itukutuku mai vua e dua na daukaulotu oti vei keimami. A kaya:“Na kena iotioti sa dredre sara. Navaluti ni bula veilecayaki kei na lomaocaoca e veisiga sa vakamalumutaki au sara, ka sa dredre dina. Au vakila na galili ka yalorarawa. Au sa masu tikoga me dusimaki au na Tamada Vakalomalagi meu vakacegu ka kune vinaka ena ka meu cakava meu valuta na dredre oqo. Niu sa masu tiko, au sa vakila na veiuqeti ni Yalotabu ni kaya mai meu sauma vakataucoko na noqu ikatini. Au a vakila vakaukauwa na Yalotabu, ka vakila e kea na igu meu cakava sara. Ena gagadre meu sa cakava, au vakila na veivakauqeti ni ‘kevaka mo na sauma na nomu ikatini ena vinaka na veika kece.’ Au se saga tikoga meu kune vakacegu, ia e tiko na noqu ivakadinadina ni noda iVakabula ni noqu sa talairawarawa, sa rawa meu vakila ka kunea na vakacegu au vakasaqara tiko e yaloqu kei na vakasama. Walega qo au sa via lesu mai ki lotu meu vakasaqara na Yalotabu ena ka kece au cakava.”

Ia nikua sa bula vinaka tiko. Sa rawa talega mo kerea vua na Tamada Vakalomalagi na vakacegu, ia ena rawa me duidui na kena isau mai na kena o a namaka. Mo vakasaqara ga mo kila mai vua na iVakabula ka masuta na Tamada Vakalomalagi, ena solia vei iko e dua na kena isau tudei.

A vakavulica o Peresitedi Thomas S. Monson:

E vakavuliuca o Peresitedi Monson: “Na lesoni levu duadua eda rawa ni vulica ena bula oqo o ya ni gauna e vosa kina na Kalou ka da muria, eda na dodonu tikoga.”⁴

“Nida sa muria na ivunau, eda na bula marau cake, vakataucokotaki, ka sega soti ni dredre. Na noda ibolebole kei na leqa ena mamada cake, ka da na ciqoima na kalougata yalataki [ni Kalou] ”⁵

Niu sa kacivi meu bisopi, a gauna dredre dina sara ga vei au ena noqu bula. Au se qai tama vou ga ka yabaki 30 tiko, ia au sa leqa tu vakailavo baleta na ibolebole vakavuvale. Sa sega niu raica e dua na iwali, kau nanuma ni na sega ni oti na ibolebole. Au sa lomaocaoca vakailavo kei na ituvaki ni lomaqu. Au sa tekivu vakatitiqataka tale ga na noqu kaukauwa vakayalo. Ena gauna dredre sara ga oqo a solia mai o peresitedi ni iteki na veikacivi. Au sa mani ciqoma ga na veikacivi, dina ni a ka dredre.

A vakatarogitaki talega o watiqu mai vei peresitedi ni iteki, ia a dredre vua me vakaio kina, ka sega talega ni vakasuka ia a tagi tikoga. A tagi tiko ena macawa taucoko, ni taroga tiko na Tamada Vakalomalagi, “Me cava nikua?” ka “O sa kila beka na tamata yadua?” A sega ni saumi mai vua, ia au sa mani tokoni meu bisopi ena Siga Tabu e tarava. A sega tale ni taroga na Tamada Vakalomalagi na taro o ya ia a qai tokona na noqu veikacivi me ono na yabaki.

Ena Siga Tabu niu sa vakacegui kina, a rogoca o watiqu e dua na domo ni ciqoma tiko na sakaramede. A vosamalua vua e dua na domo, “Baleta ni sa dredre vei iko mo lako, Au a kacivi koya me bisopi me rawa ni tauri iko ka lako ena vukumu.” Ni raica lesu na ono na yabaki o ya, sa qai kila ni veibolebole e vuqa kece o ya sa vaka me a tawaoti rawa era sa mai wali ena ilakolako oqo.

Keirau a vulica ni gauna keirau nanuma kina ni gauna cala me keirau ciqoma kina na veikacivi, a rairai kena gauna donu me keirau gadreva vakalevu kina na veikacivi. Ena veigauna e kerei keda kina na Turaga meda veiqaravi ena dua na veikacivi, e mamada se ka bibi sara, sa raica tu o Koya na noda gagadre. Sa vakarautaka o Koya na kaukauwa eda gadreva ka vakarautaka tu na kalougata me sovaraki mai meda veiqaravi ena yalodina.

E vuqa tale na ka e kauti keda tani meda kua ni tiko ena sala ni veiyalayalati. Se na cava ga o ya, se sega ni bera meda golea na yaloda vua na Tamada Vakalomalagi meda vukei. E vakavulica o Elder Paul V. Johnson: “Ni da vakamuri Setani, eda sa solia vua na kaukauwa. Ni da muria na Kalou, ena solia vei keda na kaukauwa.”⁶

Na Tui o Penijamini ena Vola i Momani e vakadinata: “Ka dua tale, au gadreva mo ni vakasamataka na ituvaki ni bula kalougata ka mamarau e nodra ko ira era sa muria na ivakaro ni Kalou. Ia raica, era sa vakalougatataki ena veika kece sara, na veika vakayago kei na veika vakayalo; ka kevaka era sa yalodina tiko me yacova na ivakataotioti era na curu ki lomalagi, me ra tiko marau kina vata kei na Kalou me tawamudu.”⁷

E kaya o watiqu ni neirau vakamau e vakaivuataki keirau vata, ena vuku ni ka oqori sa cakava rawa na veika a sega ni cakava rawa tu e liu. Me vakataka, ni se gone kina, a dau dredre sara vua me dau lako ena bogi, ia oqo sa sega tale ni dredre vua baleta niu sa lako tiko kei koya. E lekaleka o koya ka dredre vua me tatara ena vata e cake vakavo ga ke tucake ena dabedabe se kabakaba, ia au rawa ni tara na veika ena vata e cake baleta niu balavu cake vua. Sa vaka o ya ni da taura na ivua ni iVakabula vei keda. Ni da vakaivuataki keda Vua, eda na cakava rawa na veika eda sega ni cakava rawa baleta ni rawa Vua me cakava na veika eda sega ni cakava rawa.

E kaya o Elder David A. Bednar: “Na kena caka ka maroroi na veiyalayalati tabu eda sa vakaivuataki keda vata tiko kei na Turaga o Jisu Karisito. Sa kena irairai, ni sa kacivi keda na iVakabula meda vakararavi ka cola vata kei Koya, dina ga na noda vinaka duadua ena sega ni veiraurau kei na Nona. Ni da sa vakararavi ka cola vata kei Koya ena ilakolako ni bula oqo, sa rawarawa sara na Nona ivua ka mamada na Nona icolacola. ”⁸

Me vaka e vakavulica o Peresitedi Nelson:

Tukuna o koya, Ia ni o vauci iko vua na iVakabula e kena ibalebale ni o rawa ni vakayagataka na Nona kaukauwa kei na kaukauwa ni Nona veivueti.”⁹

“Na isau ni maroroi veiyalayalati kei na Kalou o ya na kaukauwa vakalomalagi—e vaqaqacotaki keda meda saqata vinaka na veivakatovolei, veitemaki, kei na lomararawa. Na kaukauwa oqo e vakarawarawataka noda sala. O ira era bulataka na lawa cecere i Jisu Karisito era na rawata na Nona kaukauwa e cecere cake.”¹⁰

“Na maroroi ni veiyalayalati ena vakarawarawataka dina na bula! Na tamata yadua e caka veiyalayalati ena tobu ni papitaiso kei na valetabu—ka maroroi ira—ena vakalevutaka na nona rawata na kaukauwa i Jisu Karisito.”¹¹

Kemuni na taciqu kei na ganequ, o vinakata li mo bula marau? Mo tiko ga ena sala ni veiyalayalati. Na nomu bula ena rawarawa, marau cake, ka sinai ena reki. Sa sureti keda na noda iVakabula, “Dou lako mai vei au, koi kemudou vakaaduaga sa oca, ka colata na icolacola bibi, ia kau na vakacegui kemudou.”¹² Sai Koya na Karisito sa bula. Sa colata na noda icolacola ka vakarawarawataka na noda bula. Ena yaca i Jisu Karisito, emeni.