ផលដែលបាននៅជាប់

ដោយអែលឌើរ ម៉ាធ្យូ អិល ខាភិនធើរ

នៃពួកចិតសិបនាក់

ការមានព្រះវិញ្ញាណបរិសុទ្ធផ្សារភ្ជាប់ពិធីបរិសុទ្ធរបស់យើង គឺវាចាំបាច់ណាស់ បើយើងចង់មានពរជ័យដែលបានសន្យាសម្រាប់អស់កល្បជានិច្ច ។

កាលនៅក្មេង ខ្ញុំចូលចិត្តផ្លែប៉ែសទុំស្រស់ៗ ។ មកដល់ពេលនេះ ទិដ្ឋភាពនៃការខាំផ្លែប៉ែសទុំដ៏មានឱជារសជូរអែមនោះធ្វើឲ្យខ្ញុំស្រក់ទឹកមាត់ ។ នៅពេលផ្លែប៉ែសទុំល្មមបេះ វាអាចទុកបានពីរទៅបួនថ្ងៃមុនពេលវាខូច ។ ខ្ញុំមានអនុស្សាវរីយ៍ដ៏ល្អៗក្នុងការជួយម្តាយ និងបងប្អូនខ្ញុំនៅក្នុងផ្ទះបាយ នៅពេលយើងធ្វើដំណាប់ផ្លែប៉ែសដែលបានបេះសម្រាប់រដូវរងារខាងមុខនេះ ដោយច្រកវាចូលក្នុងដបបិទជិត ។ បើយើងរក្សាផ្លែប៉ែសឲ្យបានត្រឹមត្រូវ នោះផ្លែឈើដ៏ឆ្ងាញ់នេះនឹងអាចទុកបានយូរច្រើនឆ្នាំ ពុំមែនពីរបីថ្ងៃនោះទេ ។ ប្រសិនបើបានរៀបចំ និងចម្អិនឲ្យបានត្រឹមត្រូវ នោះផ្លែឈើនេះអាចរក្សាទុកបានរហូតដល់របើកគម្រប ។

ព្រះគ្រីស្ទបានដឹកនាំយើងឲ្យ « ទៅបង្កើតផល … ហើយឲ្យផលរបស់អ្នករាល់គ្នាបាននៅជាប់ផង » ។^១ ប៉ុន្តែទ្រង់ពុំមានបន្ទូលអំពីផ្លែប៉ែសទេ ។ ទ្រង់មានបន្ទូលអំពីពរជ័យរបស់ព្រះទៅដល់បុត្រាបុត្រីទ្រង់ ។ បើយើងធ្វើ ហើយរក្សាសេចក្ដីសញ្ញានឹងព្រះ នោះពរជ័យទាំងឡាយដែលទាក់ទងនឹងសេចក្ដីសញ្ញាយើងអាចមានហួសពីជីវិតនេះ ហើយត្រូវបានផ្សារភ្ជាប់លើយើង ឬបានរក្សាទុកជារៀងរហូត ក្លាយជាផលផ្លែដែលបន្ដមានដ៏អស់កល្បជានិច្ច ។

ព្រះវិញ្ញាណបរិសុទ្ធ នៅក្នុងតួនាទីដ៏ទេវភាពរបស់ទ្រង់ ក្នុងនាមជាព្រះវិញ្ញាណបរិសុទ្ធនៃការសន្យា នឹងផ្សារភ្ជាប់ពិធីបរិសុទ្ធនីមួយៗមកលើជនស្មោះត្រង់ចំពោះសេចក្ដីសញ្ញាពួកគេ ដើម្បីពួកគេនឹងមានសុពលភាពបន្ទាប់ពីជីវិតរមែងស្លាប់នេះ ។^២ ការមានព្រះវិញ្ញាណបរិសុទ្ធផ្សារភ្ជាប់ពិធីបរិសុទ្ធរបស់យើង គឺវាចាំបាច់ណាស់ បើយើងចង់មានពរជ័យដែលបានសន្យាសម្រាប់អស់កល្បជានិច្ច ដើម្បីក្លាយជាផលដែលបាននៅជាប់ផងនោះ ។

ការណ៏នេះគឺសំខាន់ជាពិសេស បើយើងចង់ទទួលបានភាពតម្កើងឡើង ។^៣ ដូចប្រធាន រ័សុល អិម ណិលសុន បានបង្រៀនថា ៖ « យើងគួរតែមានគោលដៅច្បាស់លាស់ ។ ពិតណាស់ យើងម្នាក់ៗ « នៅទីបញ្ចប់ » ដែលយើងនឹងសម្រេចបាន គឺរស់នៅជារៀងរហូតជាមួយគ្រួសារយើងនៅក្នុងស្ថានភាពតម្កើងឡើង ដែលយើងនឹងនៅក្នុងវត្តមានរបស់ព្រះ ជាព្រះវរបិតាសួគ៌យើង និងព្រះរាជបុត្រាទ្រង់ ព្រះយេស៊ូវគ្រីស្ទ » ។^៤ ប្រធានណិលសុន ក៏បានថ្លែងថា ៖ « អាពាហ៍ពិពាហ៍សេឡេស្ទាល គឺជាផ្នែកដ៏សំខាន់នៃការរៀបចំសម្រាប់ជីវិតអស់កល្បជានិច្ច ។ វាតម្រូវឲ្យមនុស្សម្នាក់រៀបការជាមួយមនុស្សដែលត្រឹមត្រូវ នៅទីកន្លែងត្រឹមត្រូវ ដោយសិទ្ធិអំណាចត្រឹមត្រូវ ហើយគោរពតាមសេចក្តីសញ្ញាដ៏ពិសិដ្ឋនោះដោយស្មោះត្រង់ ។ បន្ទាប់មក មនុស្សនោះអាចត្រូវបានធានាថានឹងមានភាពតម្កើងឡើងនៅក្នុងនគរសេឡេស្ទាលនៃព្រះ » ។^៥

តើពរជ័យនៃភាពតម្កើងឡើងមានអ្វីខ្លះ ? ពរជ័យទាំងនោះរួមមានការរស់នៅក្នុងវត្តមានរបស់ព្រះសម្រាប់ភាពអស់កល្បជានិច្ចជាមួយគ្នាជាស្វាមី និងភរិយា ទទួលមរតក « ហើយនឹងបានគ្រងបល្ល័ង្កទាំងឡាយ នគរទាំងឡាយ ក្សត្របុរីទាំងឡាយ និងអំណាចទាំងឡាយ … នឹងបានពូជដ៏បរិបូរ និងបន្តបន្ទាប់ជារៀងដរាបតទៅ។ »^៦ទទួលបានគ្រប់អ្វីទាំងអស់ ដែលព្រះវរបិតាយើងមាន ។^៧

ព្រះអម្ចាស់បានបើកសម្ដែងតាមរយៈ យ៉ូសែប ស្ម៊ីធ ថា ៖

« នៅក្នុងសិរីល្អខាងសេឡេស្ទាលនោះមានស្ថានសួគ៌ ឬលំដាប់បី

ហើយដើម្បីឲ្យបានលំដាប់ខ្ពស់បំផុត នោះមនុស្សត្រូវចូលក្នុងរបៀបនៃបព្វជិតភាពនេះ [ មានន័យដល់សេចក្ដីសញ្ញាថ្មី ហើយអស់កល្បអស់កាលជានិច្ចខាងអាពាហ៍ពិពាហ៍ ]

ហើយបើសិនជាគេពុំចូលទេ នោះគេពុំអាចបានលំដាប់នោះឡើយ ។

គេអាចចូលលំដាប់ផ្សេងទៀតបាន ប៉ុន្តែនោះហើយជាទីបញ្ចប់នៃនគររបស់គេ ដែលគេពុំអាចបានភាពចម្រើនឡើយ ។ »^៨

យើងរៀននៅទីនេះថា មនុស្សម្នាក់អាចស្ថិតនៅក្នុងនគរសេឡេស្ទាល ឬរស់នៅក្នុងវត្តមាននៃព្រះ ហើយនៅលីវ ។ ប៉ុន្តែដើម្បីទទួលបានភាពតម្កើងឡើងនៅក្នុងលំដាប់ដ៏ខ្ពស់បំផុតនៃនគរសេឡេស្ទាល អ្នកនោះត្រូវតែរៀបការដោយសិទ្ធិអំណាចត្រឹមត្រូវ ហើយបន្ទាប់មកស្មោះត្រង់ចំពោះសេចក្ដីសញ្ញាដែលបានធ្វើឡើងនៅក្នុងអាពាហ៍ពិពាហ៍នោះ ។ ពេលយើងស្មោះត្រង់នឹងសេចក្តីសញ្ញាទាំងនេះ នោះព្រះវិញ្ញាណបរិសុទ្ធនៃសេចក្ដីសន្យាអាចផ្សារភ្ជាប់សេចក្តីសញ្ញាអាពាហ៍ពិពាហ៍របស់យើង ។^៩ ពរជ័យដែលបានផ្សារភ្ជាប់នេះក្លាយជាផលដែលបាននៅជាប់ ។

តើតម្រូវឲ្យមានអ្វីខ្លះ ដើម្បីរក្សាសេចក្ដីសញ្ញាថ្មី និងអស់កល្បជានិច្ចនៃអាពាហ៍ពិពាហ៍ដោយសោ្មះត្រង់ ?

ប្រធាន រ័សុល អិម ណិលសុន បានបង្រៀនថាមានចំណងពីរប្រភេទនៅពេលយើងចូលទៅក្នុងសេចក្ដីសញ្ញាអាពាហ៍ពិពាហ៍ដ៏អស់កល្បនេះគឺ ៖ ចំណងរវាងស្វាមី និងភរិយា និងចំណងទៅជាមួយនឹងព្រះ ។^១០ ដើម្បីទទួលពរជ័យនៃភាពតម្កើងឡើងដែលបានផ្សារភ្ជាប់មកលើយើង ហើយបន្តមានបន្ទាប់ពីជីវិតនេះ នោះយើងត្រូវតែសោ្មះត្រង់ចំពោះសេចក្តីសញ្ញានៃចំណងរវាងស្វាមី និងភរិយា និងចំណងទៅជាមួយនឹងព្រះ ។

ដើម្បីរក្សាចំណងរវាងស្វាមី ឬភរិយាព្រះបានទូន្មានយើងឲ្យ « ស្រឡាញ់ ប្រពន្ធ [ ឬស្វាមី ] [ អ្នក ] ឲ្យអស់ពីចិត្ត [ អ្នក ] ហើយ … ត្រូវនៅជាប់នឹងនាង [ ឬគាត់ ] និងគ្មាននរណាទៀតឡើយ » ។^១១ សម្រាប់បងប្អូនដែលបានរៀបការហើយ ត្រូវនៅជាប់នឹងនាង ឬគាត់ ហើយគ្មាននរណាទៀតឡើយ មានន័យថាបងប្អូនប្រឹក្សានឹងគ្នាដោយក្ដីស្រឡាញ់ បងប្អូនស្រឡាញ់ និងមើលថែគ្នាបងប្អូនផ្តល់អាទិភាពពេលវេលាជាមួយស្វាមី ឬភរិយាខ្លួនលើសចំណាប់អារម្មណ៍ផ្សេងទៀត ហើយបងប្អូនអំពាវនាវដល់ព្រះឲ្យជួយបងប្អូនយកឈ្នះលើភាពទន់ខ្សោយខ្លួន ។^១២ វាក៏មានន័យថាគ្មានទំនាក់ទំនងផ្លូវចិត្ត ឬផ្លូវភេទណាមួយក្រៅអាពាហ៍ពិពាហ៍ខ្លួនឡើយ រួមទាំងការចែចង់ ឬការដើរលេងជាគូ ហើយគ្មានការណ៍អាសគ្រាមដែលនាំឲ្យមានចំណង់នោះដែរ ។^១៣

ដើម្បីរក្សាចំណងទ្វេភាគីនៅក្នុងសេចក្ដីសញ្ញា ដៃគូនីមួយៗត្រូវតែមានបំណងចង់រៀបអាពាហ៍ពិពាហ៍នោះ ។ ប្រធាន ដាល្លិន អេក អូក កាលពីថ្មីៗនេះបានបង្រៀនថា ៖ « យើងក៏ដឹងផងដែរថាទ្រង់ [ ព្រះ ] នឹងមិនបង្ខិតបង្ខំនរណាម្នាក់ឲ្យផ្សារភ្ជាប់ទំនាក់ទំនងប្រឆាំងនឹងឆន្ទៈរបស់ខ្លួនគេឡើយ ។ ពរជ័យនៃទំនាក់ទំនងដែលផ្សារភ្ជាប់គឺធានាសម្រាប់អស់អ្នកដែលរក្សាសេចក្តីសញ្ញាប៉ុន្តែមិនដោយសារការបង្ខិតបង្ខំឲ្យផ្សារភ្ជាប់ទំនាក់ទំនងលើមនុស្សម្នាក់ដោយមិនសក្តិសម ឬមិនចង់នោះឡើយ^១៤

តើចំណងទៅព្រះដែលលើកឡើងដោយប្រធាន ណិលសុនគឺជាអ្វី ? ចំណងទៅនឹងព្រះគឺជាចំណងមួយដែលយើងធ្វើជាមួយនឹងព្រះ។

ដើម្បីរក្សាចំណងទៅជាមួយនឹងព្រះ យើងស្មោះត្រង់ចំពោះសេចក្ដីសញ្ញាក្នុងព្រះវិហារបរិសុទ្ធដែលយើងបានធ្វើ ដែលទាក់ទងនឹងច្បាប់នៃការគោរពប្រតិបត្តិ ការពលិកម្ម ព្រហ្មចារីភាព និងការថ្វាយ ។ យើងក៏បានចុះសេចក្តីសញ្ញាជាមួយនឹងព្រះ ដើម្បីទទួលយកដៃគូដ៏អស់កល្បជានិច្ចរបស់យើង ហើយធ្វើជាគូស្វាមីភរិយា និងឪពុកម្ដាយដ៏សុចរិតផងដែរ ។ នៅពេលយើងរក្សាចំណងទៅជាមួយនឹងព្រះនោះ យើងមានលក្ខណៈសម្បត្តិគ្រប់គ្រាន់សម្រាប់ពរជ័យនៃការក្លាយជាផ្នែកមួយនៃគ្រួសាររបស់ព្រះ តាមរយៈសេចក្ដីសញ្ញាអ័ប្រាហាំ រួមទាំងពរជ័យនៃកូនចៅ ដំណឹងល្អ និងបព្វជិតភាព ។^១៥ ពរជ័យទាំងនេះគឺជាផលដែលបាននៅជាប់ផងដែរ ។

ខណៈដែលយើងសង្ឃឹមថាអស់អ្នកដែលចូលក្នុងសេចក្ដីសញ្ញាថ្មី និងអស់កល្បជានិច្ចនៅតែបន្តស្មោះត្រង់ ហើយមានពរជ័យផ្សារភ្ជាប់លើពួកគេសម្រាប់ភាពអស់កល្បជានិច្ច ពេលខ្លះគំនិតនេះហាក់ដូចជាហួសពីលទ្ធភាពយើង ។ នៅក្នុងការងារបម្រើខ្ញុំបានជួបនឹងសមាជិកដែលចុះ និងរក្សាសេចក្ដីសញ្ញា ខណៈដែលស្វាមី ឬភរិយារបស់ពួកគេពុំចុះទេ ។ ក៏មានអ្នកនៅលីវ ពុំមានឱកាសរៀបការក្នុងជីវិតរមែងស្លាប់នេះផងដែរ ។ ហើយក៏មានអ្នកពុំស្មោះត្រង់ក្នុងសេចក្ដីសញ្ញាអាពាហ៍ពិពាហ៍របស់ខ្លួនផងដែរ ។ តើមានអ្វីកើតឡើងចំពោះបុគ្គលម្នាក់ៗក្នុងស្ថានភាពនីមួយៗទាំងនេះ ?

បើបងប្អូននៅស្មោះត្រង់ចំពោះសេចក្ដីសញ្ញាដែលបានធ្វើពេលទទួលអំណោយទានពិសិដ្ឋ នោះបងប្អូននឹងទទួលបានពរជ័យដែលបានសន្យាក្នុងអំណោយទានពិសិដ្ឋនោះផ្ទាល់ខ្លួន ទោះបីជាស្វាមី ឬភរិយាបងប្អូនបានធ្វើខុសសេចក្តីសញ្ញារបស់គាត់ ឬក៏បានដកខ្លួនចេញពីអាពាហ៍ពិពាហ៍ នោះក៏ដោយ ។ បើបងប្អូនត្រូវបានផ្សារភ្ជាប់ ហើយក្រោយមកលែងលះគ្នា ហើយបើការផ្សារភ្ជាប់របស់បងប្អូនមិនត្រូវបានលុបចោល នោះពរជ័យផ្ទាល់ខ្លួននៃការផ្សារភ្ជាប់នោះនៅតែមានប្រសិទ្ធិភាពសម្រាប់បងប្អូន បើបងប្អូននៅតែស្មោះត្រង់ ។^១៦

ពេលខ្លះ អារម្មណ៍ដែលត្រូវគេក្បត់ ហើយឈឺចាប់ខ្លាំង ស្វាមី ឬភរិយាដ៏ស្មោះត្រង់ម្នាក់នោះប្រហែលជាចង់លុបចោលការផ្សារភ្ជាប់ជាមួយនឹងស្វាមី ឬភរិយាដែលមិនស្មោះត្រង់របស់ខ្លួន ដើម្បីចេញទៅឲ្យឆ្ងាយពីពួកគេតាមដែលអាចធ្វើទៅបាន ទាំងនៅលើផែនដី និងអស់កល្បជានិច្ច ។ បើបងប្អូនបារម្ភថាបងប្អូននឹងត្រូវចងភ្ជាប់ជាមួយអតីតស្វាមី ឬភរិយាដែលមិនប្រែចិត្តនោះ សូមចងចាំថា បងប្អូននឹងមិនចងភ្ជាប់ជាមួយគ្នានោះទេ ! ព្រះនឹងមិនតម្រូវឲ្យនរណាម្នាក់បន្ដនៅក្នុងទំនាក់ទំនងដែលបានផ្សារភ្ជាប់រហូតអស់កល្បជានិច្ច ទាំងប្រឆាំងនឹងបំណងរបស់ពួកគេនោះឡើយ ។ ព្រះវរបិតាសួគ៌នឹងធានាថាយើងនឹងទទួលបានរាល់ពរជ័យដែលយើងប៉ងប្រាថ្នានិងជ្រើសរើស ។^១៧

ទោះយ៉ាងណាក្តី បើចង់លុបចោលការផ្សារភ្ជាប់ គឺយើងគោរពតាមសិទ្ធិជ្រើសរើសនោះ ។ នីតិវិធីជាក់លាក់អាចត្រូវបានអនុវត្ត ។ ប៉ុន្តែការណ៍នេះមិនគួរធ្វើឡើងដោយសាមញ្ញឡើយ ! គណៈប្រធានទីមួយកាន់នូវកូនសោដើម្បីចងទុកនៅលើផែនដី និងនៅលើស្ថានសួគ៌ ។ នៅពេលការលុបចោលការផ្សារភ្ជាប់ត្រូវបានអនុម័តដោយគណៈប្រធានទីមួយ នោះពរជ័យដែលទាក់ទងនឹងការផ្សារភ្ជាប់នោះលែងមានប្រសិទ្ធភាពទៀតហើយ ។ វាសំខាន់ណាស់ដែលត្រូវដឹងថា ដើម្បីទទួលបានពរជ័យនៃភាពតម្កើងឡើង យើងត្រូវតែបង្ហាញថា យើងមានឆន្ទៈចូលទៅក្នុងសេចក្ដីសញ្ញាថ្មី និងអស់កល្បជានិច្ចនេះ ហើយរក្សាតាមយ៉ាងស្មោះត្រង់ ទាំងក្នុងជីវិតនេះ ឬជីវិតបន្ទាប់ទៀត ។
សម្រាប់បងប្អូនដែលជាសមាជិកនៃសាសនាចក្រនៅលីវ សូមចងចាំថា « តាមរបៀប និងពេលវេលារបស់ព្រះអម្ចាស់ផ្ទាល់ នោះពុំមានពរជ័យណាដែលនឹងត្រូវដកចេញពីពួកបរិសុទ្ធដ៏ស្មោះត្រង់របស់ទ្រង់នោះទេ ។ ព្រះអម្ចាស់នឹងកាត់សេចក្ដី ហើយប្រទានរង្វាន់ដល់បុគ្គលម្នាក់ៗស្របតាម[ បំណងប្រាថ្នា ]ដ៏ស្មោះសរ និងទង្វើរបស់គេ » ។^១៨
ប្រសិនបើបងប្អូនមិននៅស្មោះត្រង់ចំពោះសេចក្ដីសញ្ញាក្នុងព្រះវិហារបរិសុទ្ធទេ តើមានសេចក្ដីសង្ឃឹមដែរឬទេ ? បាទ មាន ! ដំណឹងល្អនៃព្រះយេស៊ូវគ្រីស្ទ គឺជាដំណឹងល្អនៃសេចក្តីសង្ឃឹម ។ សេចក្ដីសង្ឃឹមនោះបានកើតឡើងតាមរយៈព្រះយេស៊ូវគ្រីស្ទ ជាមួយនឹងការប្រែចិត្តយ៉ាងស្មោះ ហើយធ្វើតាមការបង្រៀនរបស់ព្រះគ្រីស្ទដោយការគោរពប្រតិបត្តិ ។ ខ្ញុំបានឃើញបុគ្គលធ្វើកំហុសធ្ងន់ធ្ងរ ធ្វើខុសសេចក្ដីសញ្ញាពិសិដ្ឋ ។ តាមលំនាំ ខ្ញុំឃើញអ្នកដែលប្រែចិត្ដដោយស្មោះ ត្រូវបានអភ័យទោស ហើយត្រឡប់ទៅផ្លូវនៃសេចក្តីសញ្ញាវិញ ។ បើបងប្អូនបានធ្វើខុសសេចក្ដីសញ្ញាក្នុងព្រះវិហារបរិសុទ្ធ ខ្ញុំសូមជំរុញទឹកចិត្តឲ្យបងប្អូនបែរទៅរកព្រះយេស៊ូវគ្រីស្ទ សូមប្រឹក្សាជាមួយប៊ីស្សព ប្រែចិត្ត ហើយបើកព្រលឹងបងប្អូនទៅកាន់អំណាចនៃការព្យាបាល ដ៏អស្ចារ្យ ដែលមានព្រោះតែដង្វាយធួនរបស់ព្រះយេស៊ូវគ្រីស្ទ ។

បងប្អូនប្រុសស្រី ព្រះវរបិតាសួគ៌ជាទីស្រឡាញ់របស់យើង បានប្រទានសេចក្ដីសញ្ញា ដើម្បីឲ្យយើងអាចទទួលគ្រប់យ៉ាងដែលទ្រង់បានរក្សាទុកសម្រាប់យើង ។ ពរជ័យដ៏ពិសិដ្ឋទាំងនេះមកពីព្រះគឺមានរសជាតិឆ្ងាញ់ជាងផ្លែឈើនានានៅលើផែនដីទៅទៀត ។ ពរជ័យដ៏ពិសិដ្ឋទាំងនេះអាចត្រូវបានរក្សាទុកសម្រាប់យើងជារៀងរហូត ជាផលដែលបាននៅជាប់ ពេលយើងស្មោះត្រង់ចំពោះសេចក្ដីសញ្ញា ។

ខ្ញុំសូមថ្លែងទីបន្ទាល់ថា ព្រះបានស្ដារសិទ្ធិអំណាចឡើងវិញសម្រាប់ចងទុកនៅលើផែនដី និងនៅឯស្ថានសួគ៌ ។ សិទ្ធិអំណាចនោះមាននៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ សិទ្ធិអំណាចនេះត្រូវបានកាន់ដោយគណៈប្រធានទីមួយ និងកូរ៉ុមនៃពួកសាវកដប់ពីរនាក់ និងត្រូវបានអនុវត្តក្រោមការដឹកនាំរបស់ប្រធាន រ័សុល អិម ណិលសុន ។ អស់អ្នកដែលចូលទៅក្នុងសេចក្ដីសញ្ញាថ្មី និងអស់កល្បជានិច្ចនៃអាពាហ៍ពិពាហ៍ ហើយរក្សាសេចក្ដីសញ្ញានោះ អាចបានល្អឥតខ្ចោះ ហើយនៅទីបំផុតទទួលបាននូវភាពរុងរឿងដ៏ពេញលេញរបស់ព្រះវរបិតា ដោយពុំគិតពីស្ថានភាពដែលហួសពីការគ្រប់គ្រងរបស់ពួកគេឡើយ ។^១៩

ពរជ័យដែលបានសន្យាទាក់ទងនឹងសេចក្តីសញ្ញារបស់យើងទាំងនេះ អាចត្រូវបានផ្សារភ្ជាប់មកលើយើងដោយព្រះវិញ្ញាណបរិសុទ្ធនៃសេចក្ដីសន្យាហើយក្លាយជាផលដែលបាននៅជាប់ជារៀងរហូត ។ ខ្ញុំសូមថ្លែងទីបន្ទាល់យ៉ាងដូច្នេះ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។