Ngaahi manatú
Mālie!
ʻOku nofo ʻa e tokotaha naʻá ne faʻú ʻi ʻOlikoni, USA.
Naʻe tokoni ha tokotaha taʻu fā ke u houngaʻia ʻi he sākalamēnití ʻi ha founga foʻou.
Tā fakatātaaʻi ʻe Carolyn Vibbert
Naʻe tāfataha ʻeku fakakaukaú ki he Fakamoʻuí ʻi he ʻosi hono hivaʻi ʻe he haʻofangá ʻa e himi sākalamēnití, ka ʻi he kamata ke u tāpuniʻi ʻa e himí, naʻe hoko atu pē ʻa e hivá. Naʻe lava ʻe ha haʻofanga tokolahi ʻo hivaʻi he ʻaho ko iá ha toe veesi kehe ʻe ua kae fakaʻosi ʻe he kau taulaʻeikí hono paki ʻo e maá. Ne u houngaʻia koeʻuhí ko e toe taimi makehe ko iá. Naʻá ne tuku mai ha toe momeniti ke u fakalaulauloto ʻi he loto ʻapasia kimuʻa pea tāpuakiʻi e sākalamēnití.
Lolotonga e lotú, ne u fanongo tokanga ki he ngaahi lea naʻe lea ʻaki ʻe he ongo taulaʻeikí ʻi heʻena tāpuakiʻi e ongo fakataipe ʻo e feilaulau ʻa Kalaisi maʻatautolú. ʻI he ʻosi pē ʻa e lotu fakaʻosí pea ʻi he taimi naʻe ʻēmeni ai e haʻofangá, naʻe fakafokifā ha ongo mai ha leʻo ʻo ha kiʻi tamasiʻi taʻu fā mei he sea ʻe ua kimui ʻiate aú.
Naʻá ne kalanga, “Mālie!”
Naʻe leʻolahi feʻunga pē ʻene kaila tuʻungaʻa ko ʻení ke makiʻikiʻi ai e niʻihi ʻo e fānau ne nau ofi mai he tafaʻakí. Naʻá ku kau mo au ai he naʻá ne fakatupu ha malimali fakafehuʻia ʻiate au.
“Mālie?” Ne u fakakaukau. Ko ha tali faikehe ia ke fai ʻi he tāpuaki sākalamēnití. Naʻe mahino ko ha tali ia naʻe teʻeki pē ke u fanongo ai kimuʻa pea ngalingali he ʻikai pē ke u toe fanongo ai. ʻI he hili kotoa iá, ne fakaʻosi ʻemau lotú ʻaki e “ʻemeni.”
Mahalo naʻe ongoʻi ʻe he leka ko iá ha moʻoni ʻo lahi ange ia ʻiate au.
ʻOku fakafetuʻutaki mai ʻe he Mālié ʻa e fiefia. Ko ha kalanga ia ʻo e fiefia, ʻo angamaheni ʻaki ko ha ikuna. Taimi ʻe niʻihi ʻoku kalangaʻi ke fakahā ha poupou ki ha taha kuó ne ʻosiki lelei ha ngāue faingataʻa.1
Tuai e kemo ʻeku saiʻia he fakakaukau ko iá. Ne u fakakaukau, ʻio, mālie hono ikunaʻi ʻe Sīsū Kalaisi ʻa e maté ka tau lava kotoa ʻo toetuʻu! Mālie koeʻuhí ko ʻEne Fakaleleí, te Ne fakamolemoleʻi ai ʻetau ngaahi angahalá! Ke toe mahino angé, te Ne fakamolemoleʻi au ʻi heʻeku ngaahi angahalá! Malie ko ʻEne ʻaloʻofá te u lava ʻo foki hake ai ki heʻeku Tamai Hēvaní pea fiefia ʻi he ʻamanaki lelei ki he moʻui taʻengatá! ʻIo! Mālie!
ʻI heʻeku kalanga fakalongolongo ʻaki ʻa e ngaahi fakamālō ko ʻení ki heʻeku Tamai Hēvaní, naʻe fakafonu ʻe he Laumālie Māʻoniʻoní hoku lotó ʻaki ha fiefia ʻa ia ne u meimei tangi ai. Naʻe tataki au ʻe ha kiʻi leka he ʻaho ko iá (vakai, ʻĪsaia 11:6), pea ʻoku ou fiefia ʻi ha mahino foʻou koeʻuhí ko e ngaahi tāpuaki ʻo e Fakalelei ʻa e Fakamoʻuí ʻi heʻeku moʻuí.