« ទទួលស្គាល់ថាវិវរណៈគឺជាដំណើរការមួយ » ប្រធានបទ និង សំណួរ ( ឆ្នាំ ២០២៣ )
ការស្វែងរកចម្លើយចំពោះសំណួររបស់បងប្អូន
ទទួលស្គាល់ថាវិវរណៈគឺជាដំណើរការមួយ
វាងាយស្រួលក្នុងការស្រមៃថា នៅពេលដែលព្រះមានព្រះទ័យចង់ប្រាស្រ័យទាក់ទងអ្វីមួយ នោះទ្រង់គ្រាន់តែទាក់ទងទៅកាន់ថ្នាក់ដឹកនាំសាសនាចក្រដើម្បីប្រាប់ពួកលោក ។ ប៉ុន្តែប្រវត្តិសាស្រ្តនៃការស្តារឡើងវិញបង្ហាញថា វិវរណៈគឺជាដំណើរការនៃការស្វែងរកដើម្បីស្គាល់ព្រះរាជបំណងរបស់ព្រះ ហើយជាញឹកញាប់ត្រូវបានទទួលបន្ទាប់ពីការជញ្ជឹងគិត និងការអង្វរករ ។ នេះជាការពិតសម្រាប់ពួកព្យាការី និងសម្រាប់យើងម្នាក់ៗ ។ ប្រធាន រ័សុល អិម ណិលសុន បានលើកទឹកចិត្តយើងទាំងអស់គ្នាឲ្យ « ខិតខំបន្ថែមទៀតលើសពីលទ្ធភាពខាងវិញ្ញាណ [ របស់យើង ] នៅពេលនេះ ដើម្បីទទួលបានវិវរណៈផ្ទាល់ខ្លួន » ។១
ទាំងនេះគឺជាគោលការណ៍មួយចំនួនដែលនឹងជួយបងប្អូន នៅពេលបងប្អូនសិក្សាអំពីការលាតត្រដាងនៃវិវរណៈ ទាំងនៅក្នុងសាសនាចក្រ និងក្នុងជីវិតរបស់បងប្អូនផ្ទាល់ ៖
-
សូមចាំថាវិវរណៈនោះជាធម្មតាចាប់ផ្ដើមដោយសំណួរ ។ គំរូរបស់ យ៉ូសែប ស្ម៊ីធ បង្ហាញថាសិទ្ធិជ្រើសរើស និងសំណួរដ៏ស្មោះត្រង់របស់យើងមានតួនាទីដ៏សំខាន់មួយក្នុងដំណើរការនៃវិវរណៈ ។ ស្ទើរតែគ្រប់ផ្នែកទាំងអស់នៃគោលលទ្ធិ និងសេចក្ដីសញ្ញាបានមកពីការឆ្លើយទៅនឹងសំណួរមួយ ។ ព្រះអម្ចាស់បានបង្រៀន យ៉ូសែប ឲ្យសិក្សារឿងនានានៅក្នុងគំនិតរបស់លោក ហើយស្វែងរកវិញ្ញាណនៃវិវរណៈ ។ ដំណើរការនៃការប្រឈមមុខទៅនឹងបញ្ហា ការស្វែងរកការយល់ដឹង ការសាកល្បងចំពោះចម្លើយផ្សេងៗដែលអាចធ្វើទៅបាន និងការអធិស្ឋានសម្រាប់ការណែនាំរៀបចំដួងចិត្តរបស់យើង និងបើកគំនិតរបស់យើង ។ វាជួយយើងឲ្យទទួល យល់ និងធ្វើសកម្មភាពលើវិវរណៈ ។
-
សូមទទួលស្គាល់ថាវិវរណៈនោះបានកើតឡើងមួយបន្ទាត់ម្ដងៗ ។ ប្រធាន រ័សុល អិម ណិលសុន បានមានប្រសាសន៍ថា ៖ « យើងជាសាក្សីចំពោះដំណើរការមួយនៃការស្ដារឡើងវិញ » ។ ប្រសិនបើបងប្អូនគិតថាសាសនាចក្រត្រូវបានស្ដារឡើងវិញពេញលេញហើយ នោះបងប្អូនទើបតែឃើញការចាប់ផ្ដើមប៉ុណ្ណោះ ។២ នេះគឺជាសាសនាចក្រសកម្មមួយ ។ ខណៈពេលដែលសេចក្ដីពិតនៃដំណឹងល្អសំខាន់ៗមិនផ្លាស់ប្ដូរ គោលនយោបាយ កម្មវិធី អង្គការ និងការបង្រៀនរបស់សាសនាចក្រត្រូវបានបង្ហាញមួយបន្ទាត់ម្ដងៗក្នុងរយៈពេលជាច្រើនខែ ឆ្នាំ និងច្រើនទសវត្សរ៍មកហើយ ។ ហើយដំណើរការនេះនៅបន្ត ។ យើងមិនអាចមើលឃើញទីបញ្ចប់នៃការចាប់ផ្តើមបានទេ ប៉ុន្តែយើងអាចទុកចិត្តថាព្រះអម្ចាស់នឹងបន្តធ្វើការជាមួយបុត្រាបុត្រីរបស់ទ្រង់ ដើម្បីនាំឲ្យពួកគេមានពន្លឺកាន់តែច្រើនថែមទៀត ។
-
សូមចងចាំថាព្រះមានបន្ទូលមកយើងស្របតាមការយល់ដឹងរបស់យើង ។ មនុស្សគ្រប់រូបបានបង្កើតឡើងដោយវប្បធម៌ ៖ សេចក្តីជំនឿ ទំនៀមទម្លាប់ ភាសា និងគុណតម្លៃដែលយើងចែករំលែកជាមួយគ្នា ។ វប្បធម៌មានភាពខុសគ្នាយ៉ាងខ្លាំងពីកន្លែងមួយទៅកន្លែងមួយ និងទៅតាមពេលវេលា ។ ព្រះសព្វព្រះទ័យដើម្បីនាំវិវរណៈដែលនិយាយមកកាន់យើងក្នុងវប្បធម៌របស់យើង ហើយស្របតាមការយល់ដឹងរបស់យើង គឺជាសេចក្តីពិតដ៏ស្រស់ស្អាតនៃការស្ដារឡើងវិញ ។ ការចងចាំនេះអាចជួយយើងឲ្យចូលទៅជិតព្រះគម្ពីរ និងពាក្យសម្តីរបស់ព្យាការីពីមុនដោយភាពរាបសា ។ ព្រះបានមានបន្ទូលទៅកាន់ពួកសាសន៍អ៊ីស្រាអែលពីបុរាណស្របតាមការយល់ដឹងពីបុរាណនៅជិតភាគខាងកើតរបស់ពួកគេ ។ ទ្រង់បានមានបន្ទូលទៅកាន់ យ៉ូសែប ស្ម៊ីធ ដោយប្រើនិមិត្តសញ្ញា និងភាសាមកពីវប្បធម៌អាមេរិកាំងនៅទសវត្សរ៍ឆ្នាំ១៨០០ ។ ហើយព្រះប្រាស្រ័យទាក់ទងមកកាន់យើងនៅសព្វថ្ងៃនេះស្របតាមសមត្ថភាពដែលមានកម្រិតរបស់យើង នៅតាមរបៀបដែលយើងអាចយល់បាន ។
-
ចូរស្មោះត្រង់ ហើយជឿ ។ ពួកបរិសុទ្ធថ្ងៃចុងក្រោយតែងតែប្រកាសថា « ខ្ញុំដឹង » នៅពេលពួកគេចែកចាយទីបន្ទាល់របស់ពួកគេ ។ ការបង្ហាញដ៏ស្មោះអស់ពីដួងចិត្តទាំងនេះពិពណ៌នាអំពីបទពិសោធន៍ខាងវិញ្ញាណផ្ទាល់ខ្លួន ដែលទទួលបានដោយការសិក្សា និងការរស់នៅតាមដំណឹងល្អ ។ ប៉ុន្តែយើងទាំងអស់គ្នាដើរដោយសេចក្ដីជំនឿនៅក្នុងជីវិតនេះ ។ ព្រះយេស៊ូវគ្រីស្ទគ្រាន់តែសុំឲ្យយើងចាប់ផ្ដើមដោយការជឿ ។ វាគ្មានបញ្ហាទេ ប្រសិនបើបងប្អូនមានភាពមិនប្រាកដប្រជា ។ វាគ្មានបញ្ហាទេ ប្រសិនបើឥឡូវនេះអ្វីដែលបងប្អូនមានគឺជាបំណងចង់ជឿ ។ ដូចឪពុកម្នាក់ដែលបានសូមឲ្យព្រះយេស៊ូវព្យាបាលកូនរបស់លោក បងប្អូនអាចនិយាយថា « ព្រះអម្ចាស់ ខ្ញុំជឿហើយ ជួយចំពោះសេចក្តីណាដែលខ្ញុំមិនជឿផង » ។៣
-
សូមចាំថាសេចក្ដីល្អទាំងអស់កើតចេញពីព្រះ ។ នៅពេលដែលទេវតាមរ៉ូណៃបានបង្ហាញព្រះកាយទៅកាន់ យ៉ូសែប ស្ម៊ីធ ទ្រង់បានរៀបរាប់ឡើងអំពីការព្យាកររបស់យ៉ូអែលថា ព្រះអម្ចាស់នឹងចាត់វិញ្ញាណរបស់ទ្រង់ទៅលើគ្រប់ទាំងមនុស្សនៅថ្ងៃចុងក្រោយនេះ ។៤ ខណៈដែលមានអំពើអាក្រក់ជាច្រើននៅក្នុងពិភពលោកក៏ដោយ ក៏វាមានពោរពេញទៅដោយភាពល្អ និងសេចក្ដីពិតផងដែរ ។ ការណ៍នេះរួមមានការរីកចម្រើនខាងវិទ្យាសាស្ត្រ និងវេជ្ជសាស្ត្រ និងកិច្ចខិតខំប្រឹងប្រែងដើម្បីបង្កើនការគោរពដល់មនុស្សទាំងអស់ ។ ថ្នាក់ដឹកនាំសាសនាចក្របានបង្រៀនថា ព្រះមានបន្ទូលទៅកាន់បុគ្គលម្នាក់ៗនៅគ្រប់វប្បធម៌ ។ ដូចដែលយើងអញ្ជើញអ្នកដទៃឲ្យចូលរួមជាមួយនឹងយើង ហើយ « នាំមកជាមួយបងប្អូននូវអ្វីដែលល្អទាំងអស់ដែលបងប្អូនមាន » យើងឱបក្រសោបសេចក្ដីពិតនៅកន្លែងណាដែលយើងរកឃើញវា ។៥
-
ដឹងថាការទទួលបានវិវរណៈអាចជាការលំបាកមួយ ។ ខណៈពេលដែលចម្លើយចំពោះសំណួររបស់យើងពេលខ្លះកើតឡើងយ៉ាងលឿន និងងាយស្រួល វិវរណៈក៏អាចចំណាយពេលជាច្រើនឆ្នាំក្នុងការខិតខំផងដែរ ។ ស្ថានភាពរបស់យើងនៅក្នុងជីវិត ក៏អាចបណ្ដាលឲ្យយើងមានការលំបាកនៅពេលយើងស្វែងរកវិវរណៈផ្ទាល់ខ្លួនផងដែរ ។ ជាឧទាហរណ៍ មនុស្សមួយចំនួនជួបនឹងជំងឺ ដូចជាជំងឺធ្លាក់ទឹកចិត្តដែលធ្វើឲ្យមានការលំបាកក្នុងការមានអារម្មណ៍ជិតស្និទ្ធនឹងព្រះ ។ យើងអាចធ្វើផ្នែករបស់យើងដើម្បីដោះស្រាយបញ្ហាទាំងនេះ ខណៈដែលការបន្តទុកចិត្តថាព្រះអម្ចាស់នឹងជួយយើងឲ្យស្វែងរកសេចក្ដីសុខសាន្ត ។ ដោយសារបងប្អូនមិនបានទទួលចម្លើយពីព្រះ មិនមែនមានន័យថាបងប្អូនកំពុងធ្វើអ្វីខុសនោះទេ ។ ចូរអត់ធ្មត់ និងបណ្តុះសេចក្តីជំនឿរបស់បងប្អូននៅពេលដែលបងប្អូនរង់ចាំព្រះអម្ចាស់ ។
-
ចូរបន្តស្វែងរកវិវរណៈ ។ ខណៈពេលបងប្អូនស្វែងរកភាពសុខសាន្តដែលទាក់ទងទៅនឹងសំណួររបស់បងប្អូន សូមបន្តធ្វើមូលដ្ឋានគ្រឹះទាំងឡាយ ៖ អធិស្ឋាន សិក្សាព្រះគម្ពីរ ទទួលទានសាក្រាម៉ង់ ព្យាយាមរក្សាព្រះបញ្ញត្តិ និងការថ្វាយបង្គំនៅក្នុងព្រះវិហារបរិសុទ្ធ ។ លើសពីនេះទៀត បងប្អូនអាចស្វែងរកភាពជិតស្និទ្ធទៅនឹងព្រះអម្ចាស់ ដោយបម្រើអ្នកដទៃក្នុងគ្រួសារ ក្រុមជំនុំ ឬសហគមន៍របស់បងប្អូនដោយចំណាយពេលក្នុងធម្មជាតិ ឬដោយការស្មិងស្មាធិ៍អំពីរឿងខាងវិញ្ញាណ ។ ការខិតទៅកាន់តែជិតព្រះនឹងជួយធានាថាផ្លូវនៃវិវរណៈនៅតែបើកចំហ ។
ព្រះគម្ពីរសំខាន់ៗ ៖ យ៉ាកុប ១:៥-៦; នីហ្វៃទី២ ២៨:៣០; ៣១:៣; អាលម៉ា ៥:៤៥–៤៧; គោលលទ្ធិ និងសេចក្តីសញ្ញា ១:២៤; ៨៨:៦៣