« ប្រឹក្សានឹងធនធានដែលអាចទុកចិត្តបាន » ប្រធានបទ និង សំណួរ ( ឆ្នាំ ២០២៣ )
ការស្វែងរកចម្លើយចំពោះសំណួររបស់បងប្អូន
ប្រឹក្សានឹងធនធានដែលអាចទុកចិត្តបាន
អែលឌើរ ឌៀថើរ អេហ្វ អុជដូហ្វ បានបង្រៀន « មិនដែលមានទេនៅក្នុងប្រវត្តិសាស្ត្រពិភពលោក ដែលយើងមានលទ្ធភាពទទួលបានព័ត៌មានដ៏ច្រើនកាន់តែងាយស្រួល—ព្រោះព័ត៌មានខ្លះពិត ខ្លះទៀតមិនពិត ហើយភាគច្រើននោះពិតខ្លះៗ » ។១ ក្នុងបរិយាកាសនៃភាពមិនប្រាកដប្រជានេះ សាសនាចក្រលើកទឹកចិត្តឲ្យសមាជិក « ស្វែងរក និងចែកចាយប្រភពព័ត៌មានដែលគួរឲ្យជឿទុកចិត្ត និងជាក់ច្បាស់តែប៉ុណ្ណោះ » ។២ យើងគួរចៀសវាងប្រភពដែលបានបង្កើតឡើងដោយពាក្យចចាមអារ៉ាម ឬដែលលើកកម្ពស់ការឈ្លោះប្រកែកឬកំហឹង ។
ការរៀនវាយតម្លៃគុណភាពនៃប្រភពព័ត៌មានរបស់យើង ដែលពាក់ព័ន្ធទាំងកិច្ចការខាងវិញ្ញាណ និងខាងបញ្ញា ។ ទាំងនេះជាគន្លឹះមួយចំនួនសម្រាប់ការវាយតម្លៃព័ត៌មាន ៖
-
វាយតម្លៃប្រភពនៃព័ត៌មានដែលអាចទុកចិត្តបាន ។ មិនមែនគ្រប់ប្រភពព័ត៌មានទាំងអស់មានតម្លៃស្មើគ្នាលើប្រធានបទទាំងអស់នោះទេ ។ ប្រភពព័ត៌មានល្អបំផុតនឹងមានចំណេះដឹងផ្ទាល់អំពីប្រធានបទជំនួសឲ្យការពឹងផ្អែកលើការស្តាប់ពាក្យចចាមអារ៉ាម ឬពាក្យបញ្ឆិតបញ្ឈៀង ។ ប្រភពព័ត៌មានទាំងនោះនឹងនិយាយអំពីគោលជំហរនៃចំណេះដឹង ឬជំនាញផ្ទាល់ ។ ប្រភពព័ត៌មានទាំងនោះនឹងសំដៅទៅប្រភពដែលមានកិត្តិសព្ទផ្សេងទៀត ដើម្បីបងប្អូនអាចពិនិត្យមើលការអះអាងរបស់វា ។ ប្រភពព័ត៌មានដែលអាចទុកចិត្តបាននឹងមិនតែងតែបញ្ជាក់អំពីអ្វីដែលបងប្អូនគិតរួចទៅហើយនោះទេ ។ ប្រភពព័ត៌មានទាំងនោះអាចប្រឆាំងនឹងទស្សនៈរបស់បងប្អូន ។ ប្រសិនបើបងប្អូនមានសំណួរអំពីការបង្រៀនរបស់សាសនាចក្រជាផ្លូវការ ដំបូងសូមមើលនូវអ្វីដែលថ្នាក់ដឹកនាំសាសនាចក្របច្ចុប្បន្នបាននិយាយ ហើយនិងមិនបាននិយាយ ។ ការណ៍នេះនឹងជួយបងប្អូនឲ្យវាយតម្លៃសេចក្តីថ្លែងការណ៍ផ្សេងទៀតពីមុននានា ។
-
ចូររៀនស្គាល់ភាពលំអៀង ។ ស្ទើរតែគ្រប់ប្រភពព័ត៌មានមានភាពលំអៀងមួយចំនួន ។ ការណ៍នេះមិនធ្វើឲ្យប្រភពព័ត៌មានទាំងនោះមិនគួរឲ្យជឿទុកចិត្តដោយស្វ័យប្រវត្តិនោះទេ ប៉ុន្តែវាសំខាន់ក្នុងការយកទស្សនៈរបស់អ្នកបង្កើតប្រភពព័ត៌មានមកពិចារណា ។ សូមត្រួតពិនិត្យមើលបំណង និងសាវតាររបស់ប្រភពព័ត៌មានរបស់បងប្អូន ។ សូមប្រុងប្រយ័ត្នចំពោះប្រភពព័ត៌មានដែលអះអាងថាមិនលំអៀង ឬដែលបង្ហាញពីទស្សនៈក្នុងវិធីដែលបង្កឲ្យមានការអុជអាលនានា ។
-
ចូរបញ្ជាក់នូវអ្វីដែលបងប្អូនរៀន ។ វាមានសារៈសំខាន់ណាស់ នៅពេលប្រភពព័ត៌មានដែលអាចទុកចិត្តបានជាច្រើនយល់ស្រប ឬនិយាយដោយភាពច្បាស់លាស់លើប្រធានបទមួយ ។ នេះជាការពិតយ៉ាងពិសេស នៅពេលសិក្សាប្រភពព័ត៌មានដែលពិភាក្សាអំពីប្រវត្តិសាស្រ្ត និងការបង្រៀនរបស់សាសនាចក្រ ។ ទោះបីជាវាមិនតែងតែអាចរកឃើញការយល់ស្របបែបនេះនៅក្នុងចំណោមប្រភពព័ត៌មានក៏ដោយ ក៏វាមានប្រយោជន៍ក្នុងការប្រៀបធៀបព័ត៌មានមកពីប្រភពផ្សេងៗទៀត ដើម្បីឲ្យបងប្អូនអាចវាយតម្លៃគុណភាពរបស់ប្រភពព័ត៌មាននោះបានកាន់តែប្រសើរឡើង ។
-
ការបែងចែកការពិតចេញពីការបកស្រាយ ។ ផ្នែកខ្លះនៃព័ត៌មានគឺជាការពិត ។ ប៉ុន្តែអ្វីដែលយើងជួបភាគច្រើននៅលើអ៊ីនធឺណិត និងនៅក្នុងការបោះពុម្ពផ្សាយផ្សេងទៀត មាននូវការបកស្រាយរបស់នរណាម្នាក់អំពីការពិត ។ ការបកស្រាយដ៏ល្អបំផុតព្យាយាមគិតគូរអំពីការពិតទាំងអស់ ។ ការបកស្រាយទាំងនោះចាត់ទុកព័ត៌មានលម្អិត ឬការពិតជាក់លាក់នៅក្នុងបរិបទទូលំទូលាយ និងឲ្យតម្លៃត្រឹមត្រូវដល់ការពិតទាំងនោះ ។ ពួកគេមិនច្រានចោលព័ត៌មានដែលមិនយល់ស្របនឹងទស្សនៈជាក់លាក់នោះទេ ។ សូមពិនិត្យមើលប្រភពព័ត៌មានទាំងឡាយដែលប្រើដើម្បីធ្វើការបកសា្រយជាក់លាក់មួយ ដើម្បីធានាថាវាគាំទ្រការអះអាងដែលត្រូវបានធ្វើ និងមិនត្រូវបានដកចេញពីបរិបទឡើយ ។
-
យល់ដឹងពីធនធានរបស់សាសនាចក្រ ។ ទាក់ទងទៅនឹងគោលលទ្ធិ និងគោលនយោបាយរបស់សាសនាចក្រ នោះប្រភពព័ត៌មានដែលពិសេសបំផុតនោះគឺ ព្រះគម្ពីរ ការបង្រៀនរបស់ព្យាការីដែលរស់នៅ និង ក្បួនខ្នាតទូទៅ ។ សាសនាចក្រក៏បានបោះពុម្ពធនធានព័ត៌មានបន្ថែមដើម្បីជួយបងប្អូននឲ្យយល់កាន់តែច្បាស់អំពីសំណួរទូទៅមួយចំនួន ដែលពួកបរិសុទ្ធថ្ងៃចុងក្រោយមានអំពីប្រវត្តិសាស្ត្រ និងវប្បធម៌របស់សាសនាចក្រ ។ បងប្អូនអាចរកឃើញចំណុចទាំងនេះជាចំណុចចាប់ផ្តើមដ៏មានប្រយោជន៍ នៅពេលដែលបងប្អូនពិចារណាពីសំណួររបស់បងប្អូន ។
-
ចូរស្វែងរកការណែនាំពីព្រះវិញ្ញាណបរិសុទ្ធ ។ ពេលខ្លះព័ត៌មានថ្មីអាចមានអារម្មណ៍វង្វេងវង្វាន់ ។ អារម្មណ៍នោះមិនមែនមានន័យថាព័ត៌មានគឺមិនពិតទេ ។ រួមជាមួយនឹងជំនាញដែលបានរៀបរាប់ខាងលើ សូមស្វែងរកឥទ្ធិពលនៃព្រះវិញ្ញាណបរិសុទ្ធ ។ ទ្រង់អាចជួយបងប្អូនឲ្យប្រែចិត្តបាន ។ ទ្រង់នឹង « បំភ្លឺគំនិតរបស់បងប្អូន »៣ និងជួយបងប្អូនតម្រង់ទស្សនៈវិស័យរបស់បងប្អូនឡើងវិញនៅក្នុងពន្លឺនៃការពិតថ្មី ។ សូមអធិស្ឋានរកជំនួយ ។ សូមរស់នៅតាមរបៀបមួយដែលព្រះវិញ្ញាណអាចមានបន្ទូលជាមួយបងប្អូនបាន ។ សូមបើកចំហចំពោះការបំផុសគំនិតខាងវិញ្ញាណ នៅពេលដែលបងប្អូនធ្វើការដើម្បីដោះស្រាយកង្វល់របស់បងប្អូន ។
ព្រះគម្ពីរសំខាន់ៗ ៖ ធីម៉ូថេ ទី២ ៣:១៤-១៦; យ៉ាកុប ៤:១៣; គោលលទ្ធិ និងសេចក្តីសញ្ញា ១៩:៣៨