« គំនិតដើម្បីកែលម្អការសិក្សាព្រះគម្ពីរផ្ទាល់ខ្លួនរបស់អ្នក » គំនិតសម្រាប់ការសិក្សាព្រះគម្ពីរ ( ឆ្នាំ ២០២១ )
« គំនិតដើម្បីកែលម្អការសិក្សាព្រះគម្ពីរផ្ទាល់ខ្លួនរបស់អ្នក » គំនិតសម្រាប់ការសិក្សាព្រះគម្ពីរ
គំនិតដើម្បីកែលម្អការសិក្សាព្រះគម្ពីរផ្ទាល់ខ្លួនរបស់អ្នក
នេះគឺជារបៀបសាមញ្ញមួយចំនួនដើម្បីពង្រីកការសិក្សាព្រះបន្ទូលរបស់ព្រះនៅក្នុងព្រះគម្ពីររបស់អ្នក ។
អធិស្ឋានសម្រាប់ការបំផុសគំនិត
ព្រះគម្ពីរទាំងឡាយ មាននូវព្រះបន្ទូលរបស់ព្រះ ។ ខណៈពេលអ្នកកំពុងសិក្សាព្រះគម្ពីរ សូមសួរព្រះវរបិតាសួគ៌របស់អ្នក ដើម្បីបានការណែនាំ និងទទួលព្រះវិញ្ញាណរបស់ទ្រង់ ដើម្បីជួយអ្នកឲ្យយល់វា ។
ស្វែងរកសេចក្ដីពិតអំពីព្រះយេស៊ូវគ្រីស្ទ
ព្រះគម្ពីរបង្រៀនយើងថា រឿងគ្រប់យ៉ាងថ្លែងទីបន្ទាល់អំពីព្រះគ្រីស្ទ ( សូមមើល នីហ្វៃទី២ ១១:៤; ម៉ូសេ ៦:៦៣ ) ដូច្នេះចូររកមើលទ្រង់នៅក្នុងព្រឹត្តការណ៍ រឿង និងការបង្រៀននានានៃព្រះគម្ពីរ ។ ចូរពិចារណាធ្វើការកត់ចំណាំ ឬគូសចំណាំខគម្ពីរដែលបង្រៀនអំពីព្រះអង្គសង្គ្រោះ និងរបៀបដើម្បីធ្វើតាមទ្រង់ ។
ស្វែងរកពាក្យ និងឃ្លាបំផុសគំនិត
អ្នកអាចរកឃើញថា មានពាក្យ ឬឃ្លាមួយចំនួននៅក្នុងបទគម្ពីរទាក់ទាញចំណាប់អារម្មណ៍របស់អ្នក ដែលខគម្ពីរនោះហាក់ដូចជាសរសេរយ៉ាងចំៗមកកាន់អ្នកដូច្នោះ ។ ខគម្ពីរនោះអាចធ្វើឲ្យមានអារម្មណ៍ទាក់ទងដោយផ្ទាល់ ហើយបំផុសគំនិត និងលើកទឹកចិត្តដល់អ្នក ។ សូមពិចារណាធ្វើការគូសចំណាំខគម្ពីរនោះនៅក្នុងព្រះគម្ពីររបស់អ្នក ឬសរសេរខគម្ពីរនោះនៅក្នុងកំណត់ហេតុសិក្សាមួយ ។
ស្វែងរកសេចក្ដីពិតនៃដំណឹងល្អ
ពេលខ្លះសេចក្ដីពិតនៃដំណឹងល្អ ( ជាញឹកញាប់ ត្រូវបានហៅថា គោលលទ្ធិ ឬគោលការណ៍ ) ត្រូវបានថ្លែងចំៗ ហើយពេលខ្លះសេចក្តីពិតនៃដំណឹងល្អទាំងនេះត្រូវបានបរិយាយតាមរយៈឧទាហរណ៍ ឬដំណើររឿងមួយ ។ ចូរសួរខ្លួនឯងថា « តើសេចក្ដីពិតនៃដំណឹងល្អអ្វីខ្លះត្រូវបានបង្រៀននៅក្នុងខគម្ពីរទាំងនេះ ? »
ស្ដាប់តាមព្រះវិញ្ញាណ
សូមយកចិត្តទុកដាក់ទៅលើគំនិត និងអារម្មណ៍របស់អ្នក ទោះបីវាមិនទាក់ទងនឹងអ្វីដែលអ្នកកំពុងអានក្ដី ។ ចំណាប់អារម្មណ៍ទាំងនោះអាចនឹងជារឿងសំខាន់ដែលព្រះវរបិតាសួគ៌របស់អ្នកចង់ឲ្យអ្នករៀន និងទទួលអារម្មណ៍ ។
ប្រដូចបទគម្ពីរមកជីវិតរបស់អ្នក
សូមពិចារណាអំពីរបៀបដែលដំណើររឿង និងការបង្រៀនទាំងឡាយដែលអ្នកកំពុងអាននេះអនុវត្តក្នុងជីវិតអ្នក ។ ឧទាហរណ៍ អ្នកអាចសួរខ្លួនឯងថា « តើខ្ញុំមានបទពិសោធន៍អ្វីខ្លះដែលស្រដៀងគ្នានឹងអ្វីដែលខ្ញុំកំពុងអាន ? » ឬ « តើខ្ញុំអាចធ្វើតាមគំរូរបស់បុគ្គលនៅក្នុងគម្ពីរនេះយ៉ាងដូចម្ដេច ? »
សួរសំណួរ
ការសួរសំណួរអំពីដំណឹងល្អអាចជួយអ្នកសម្រេចចិត្តពីអ្វីដែលត្រូវសិក្សា ។ កាលដែលអ្នកសិក្សាបទគម្ពីរ នោះសំណួរជាច្រើនក៏អាចកើតមានក្នុងគំនិតអ្នកផងដែរ ។ សំណួរទាំងនេះអាចទាក់ទងនឹងអ្វីដែលអ្នកកំពុងអាន ឬទាក់ទងនឹងជីវិតរបស់អ្នកជាទូទៅ ។ សូមពិចារណាអំពីសំណួរទាំងនេះ ហើយរកមើលចម្លើយ កាលដែលអ្នកបន្ដសិក្សាបទគម្ពីរ ។ បន្ទាប់ពីការសិក្សារបស់អ្នក សូមសួរព្រះថាទ្រង់មានព្រះទ័យចង់ឲ្យអ្នករៀនអ្វីបន្ថែមទៀត ហើយចាំមើលចម្លើយអំឡុងប៉ុន្មានម៉ោង និងថ្ងៃក្រោយមក ។
ប្រើជំនួយការសិក្សាព្រះគម្ពីរ
ដើម្បីទទួលបានការយល់ដឹងបន្ថែមអំពីខគម្ពីរដែលអ្នកអាន សូមប្រើលេខយោង Topical Guide, Bible Dictionary, សេចក្ដីណែនាំដល់បទគម្ពីរទាំងឡាយ ( នៅលើគេហទំព័រ scriptures.ChurchofJesusChrist.org ) និងជំនួយការសិក្សាដទៃទៀត ។
ពិចារណាអំពីបរិបទនៃបទគម្ពីរ
អ្នកអាចរកឃើញការយល់ដឹងដ៏មានអត្ថន័យអំពីបទគម្ពីរមួយ បើអ្នកពិចារណាអំពីបរិបទរបស់វា—ស្ថានភាព ឬទីតាំងរបស់បទគម្ពីរនេះ ។ ឧទាហរណ៍ ការស្គាល់ពីប្រវត្តិ និងជំនឿនៃមនុស្សដែលព្យាការីបាននិយាយទៅកាន់នោះ អាចជួយអ្នកឲ្យយល់ពីបំណងនៃសារលិខិតរបស់លោក ។
កត់ត្រាគំនិត និងអារម្មណ៍របស់អ្នកទុក
មានវិធីជាច្រើនដើម្បីកត់ត្រាចំណាប់អារម្មណ៍ដែលកើតមាននៅពេលអ្នកសិក្សា ។ ឧទាហរណ៍ អ្នកអាចគូសចំណាំពាក្យ ឬឃ្លាដ៏មានអត្ថន័យ ហើយកត់ត្រាគំនិតរបស់អ្នក ទុកជាកំណត់ចំណាំមួយនៅក្នុងព្រះគម្ពីររបស់អ្នក ។ អ្នកក៏អាចរក្សាសៀវភៅកំណត់ហេតុអំពីការយល់ដឹង អារម្មណ៍ និងចំណាប់អារម្មណ៍ដែលអ្នកទទួលផងដែរ ។ ឬអ្នកអាចកត់ត្រាសំណួរដែលអ្នកបានសួរនោះពីមុនការសិក្សារបស់អ្នក ហើយក្រោយមកកត់ត្រាចម្លើយដែលអ្នកត្រូវបានណែនាំ ។
សិក្សាប្រសាសន៍របស់ពួកព្យាការី និងពួកសាវកថ្ងៃចុងក្រោយ
សូមអានអ្វីដែលពួកព្យាការី និងពួកសាវកថ្ងៃចុងក្រោយបានបង្រៀនអំពីគោលការណ៍ ដែលអ្នករកឃើញនៅក្នុងបទគម្ពីរ ។ សារលិខិតរបស់ពួកលោកមាននៅក្នុង « សន្និសីទទូទៅ » « ទស្សនាវដ្ដី » និងការចងក្រងផ្សេងៗទៀតនៅក្នុង បណ្ណាល័យដំណឹងល្អ ។
អានដំណើររឿងនានា
សូមអានដំណើររឿងទាំងឡាយនៅក្នុងព្រះគម្ពីរ ដោយព្យាយាមយល់ពីបរិបទរបស់វា ( ពេលវេលា ទីកន្លែង អ្នកនិយាយ និងអ្នកស្ដាប់ ) ។ ដំណើររឿងព្រះគម្ពីរដែលបានបង្ហាញគឺជាធនធានដ៏អស្ចារ្យដើម្បីយល់ពីបរិបទ ជាពិសេសសម្រាប់កុមារ និងសមាជិកដែលមិនសូវស្គាល់ព្រះគម្ពីរច្បាស់ ។
ចែកចាយពីការយល់ដឹង
ការពិភាក្សាអំពីការយល់ដឹងមកពីការសិក្សាផ្ទាល់ខ្លួនរបស់អ្នក គឺជាវិធីដ៏ល្អមួយដើម្បីបង្រៀន និងជួយពង្រឹងដល់ការយល់ដឹងរបស់អ្នកអំពីអ្វីដែលអ្នកបានអាន ។
រស់នៅតាមអ្វីដែលអ្នកបានរៀន
ការសិក្សាព្រះគម្ពីរអាចបំផុសគំនិតយើង និងដឹកនាំយើងឲ្យផ្លាស់ប្តូររបៀបដែលយើងរស់នៅ ។ សូមស្ដាប់អ្វីដែលព្រះវិញ្ញាណបំផុសឲ្យអ្នកធ្វើ នៅពេលអ្នកអាន រួចហើយសូមប្តេជ្ញាចិត្តធ្វើតាមការបំផុសគំនិតទាំងនោះ ។