1 Ut taak’ulmanq, naq wi eb’ laj Gentil te’ab’inq chiru lix Karneer li Dios sa’ li kutan a’an naq tixk’utb’esi rib’ chiruheb’ rik’in aatin, jo’ ajwi’ rik’in wankilal, rik’in ajwi’ k’anjel, re risinkil lix tichk’ob’aaleb’—

2 Ut ink’a’ te’xkawob’resi li raameb’ chirix lix Karneer li Dios, te’k’ehe’q sa’ ajl sa’ xyanqeb’ li riyajil laa yuwa’; relik chi yaal, te’k’ehe’q sa’ ajl sa’ xyanq lix junkab’al laj Israel; ut te’wanq choq’ osob’tesinb’il tenamit sa’ xb’een li yeechi’inb’il ch’och’ chi junelik; ink’a’ chik te’k’ame’q chi preexil; ut lix junkab’al laj Israel ink’a’ chik te’sache’q xna’leb’.

3 Ut li nimla jul a’an, li b’ekb’il choq’ reheb’ xb’aan li nimla tz’eqb’eetal iglees a’an, li k’uub’anb’il xb’aan laj tza ut eb’ li ralal xk’ajol, re taaruuq chixjalb’ehinkil li raameb’ li winq toj taq’a sa’ xb’alb’a—relik chi yaal, li nimla jul a’an li b’ekb’il choq’ re xsachb’aleb’ li winq taanujaq rik’ineb’ li xe’b’ekok chaq re, re te’sachmanq chi jun waakaj, chan lix Karneer li Dios, a’ut moko xsachlijik ta li aamej, ka’ajwi’ naq taatz’eqe’q sa’ li xb’alb’a a’an li maak’a’ roso’jik.

4 Xb’aan naq k’e reetal, na’ux a’in jo’ chanru lix preexil laj tza, ut jo’kan ajwi’ jo’ chanru lix tiikal ru xna’leb’ li Dios, sa’ xb’eeneb’ chixjunil li te’k’anjelanq re li maa’usilal ut li tz’eqb’eetalil chiru.

5 Ut kik’ulman naq li anjel kinraatina laa’in, aj Nefi, ut kixye: Laa’at xawil naq wi eb’ laj Gentil te’xjal xk’a’uxl, usaq choq’ reheb’; ut nakanaw ajwi’ chirix lix sumwank li Qaawa’ choq’ re lix junkab’al laj Israel; ut aawab’ihom ajwi’ naq ani ink’a’ tixjal xk’a’uxl tento taa’oso’q.

6 Jo’kan ut, rahilal chiwanq sa’ xb’eeneb’ laj Gentil wi taa’uxq naq te’xkawob’resi li raameb’ chirix lix Karneer li Dios.

7 Xb’aan naq taachalq xkutankil, chan lix Karneer li Dios, naq laa’in tink’anjela jun nim ut sachb’a-ch’oolejil k’anjel sa’ xyanqeb’ li ralal xk’ajoleb’ li winq, jun li k’anjel li junelik taakanaaq, sa’ li junpak’al, malaj sa’ li junpak’al chik—re te’q’unb’esiiq xch’ool choq’ re li tuqtuukilal ut li yu’am chi junelik, malaj re te’q’axtesiiq chiru lix kawileb’ li raam ut lix mutz’aleb’ lix k’a’uxleb’ re te’k’ame’q taq’a sa’ li preexil, ut jo’kan ajwi’ sa’ li sache’k, re li yu’am a’in ut re li musiq’ej, jo’ chanru lix preexil laj tza, li kin’aatinak wi’.

8 Ut kik’ulman naq chirix naq li anjel kixye li aatin a’in, kixye we: Ma jultik aawe lix sumwank li Yuwa’b’ej rik’in lix junkab’al laj Israel? Laa’in kinye re, Hehe’.

9 Ut kik’ulman naq a’an kixye we: Chat-iloq, ut chak’e reetal li nimla tz’eqb’eetal iglees a’an, a’ lix na’ileb’ li tz’eqb’eetalil, ut a’ laj tza laj k’ojob’ahom re.

10 Ut a’an kixye we: K’e reetal, ka’ajwi’ wiib’ iglees wan; li jun a’an x’iglees lix Karneer li Dios, ut li jun chik, a’an x’iglees laj tza; jo’kan ut, ani moko wan ta sa’ lix iglees lix Karneer li Dios, wan sa’ li nimla iglees a’an, a’an lix na’ileb’ li tz’eqb’eetalil; ut a’an laj yumb’eet re chixjunil li ruchich’och’.

11 Ut kik’ulman naq kin’ilok ut kink’e reetal laj yumb’eet re chixjunil li ruchich’och’, ut k’ojk’o sa’ xb’een li k’iila ha’; ut kiwan x’awa’b’ejil sa’ xb’een chixjunil li ruchich’och’, sa’ chixjunileb’ li tenamit, junkab’al, aatinob’aal, ut teepal.

12 Ut kik’ulman naq kink’e reetal lix iglees lix Karneer li Dios, ut moko k’i ta rajlankileb’, sa’ xk’ab’a’ lix maa’usilal ut eb’ lix tz’eqb’eetalil laj yumb’eet li chunchu sa’ xb’een li k’iila ha’; a’b’anan, kink’e reetal naq lix iglees li Karneer, a’eb’ laj santil paab’anel re li Dios, wankeb’ ajwi’ chiru chixjunil lix b’een li ch’och’; ut ka’ch’in li neke’awa’b’ejin wi’ chiru lix b’een li ruchich’och’, sa’ xk’ab’a’ lix maa’usilal li nimla aj yumb’eet li kiwil.

13 Ut kik’ulman naq kink’e reetal naq lix nimla na’ileb’ li tz’eqb’eetalil kixch’utub’eb’ li ch’uut chi tenamit chiru lix b’een chixjunil li ruchich’och’, sa’ xyanqeb’ chixjunil lix tenamiteb’ laj Gentil, re xpleetinkil lix Karneer li Dios.

14 Ut kik’ulman naq laa’in, aj Nefi, kink’e reetal lix wankilal lix Karneer li Dios, naq kikub’e sa’ xb’eeneb’ laj santil paab’anel sa’ lix iglees li Karneer, ut sa’ xb’een lix tenamit li Qaawa’ re li sumwank, li jek’inb’ileb’ chaq chiru chixjunil lix b’een li ruchich’och’; ut eb’ a’an ke’wan chi kawresinb’il rik’in tiikilal, ut rik’in lix wankil li Dios sa’ nimla loq’alil.

15 Ut kik’ulman naq kink’e reetal naq lix josq’il li Dios kihoye’ sa’ xb’een li nimla tz’eqb’eetal iglees a’an, jo’kan naq ke’wan li pleet ut resil li pleet sa’ xyanqeb’ chixjunil li tenamit ut li junkab’al re li ruchich’och’.

16 Ut naq ke’ok chi wank li pleet ut resil li pleet sa’ xyanqeb’ chixjunil li tenamit li ke’wan xna’aj rik’in lix na’ileb’ li tz’eqb’eetalil, li anjel kinraatina, ut kixye: K’e reetal, lix josq’il li Dios wan sa’ xb’een lix na’ileb’ li ixq aj yumb’eet; ut k’e reetal, nakawil chixjunil li k’a’aq re ru a’in—

17 Ut naq taawulaq xkutankil naq lix josq’il li Dios taahoye’q sa’ xb’een lix na’ileb’ li ixq aj yumb’eet, a’an li nimla tz’eqb’eetal iglees re chixjunil li ruchich’och’, a’ laj tza laj k’ojob’ahom re, toja’ naq, sa’ li kutan a’an, taatiklaaq lix k’anjel li Yuwa’b’ej, sa’ xkawresinkil li b’e re xtz’aqob’resinkil ru lix sumwank, li kixk’uub’ rik’in lix tenamit xkomoneb’ lix junkab’al laj Israel.

18 Ut kik’ulman naq li anjel kinraatina, ut kixye: Chat-iloq!

19 Ut kin’ilok ut kink’e reetal jun li winq, ut tiqto sa’ jun li saqi b’aatal.

20 Ut li anjel kixye we: K’e reetal jun reheb’ li kab’laju chi apostol re li Karneer.

21 K’e reetal, a’an taaril ut tixtz’iib’a li rela’ li k’a’aq re ru a’in; relik chi yaal, ut jo’kan ajwi’ k’iila k’a’aq re ru li ak wanjenaq chaq.

22 Ut jo’kan ajwi’ taatz’iib’aq chirix li roso’jik li ruchich’och’.

23 Jo’kan ut, li k’a’aq re ru tixtz’iib’a tiikeb’ ru ut yaal; ut k’e reetal naq tz’iib’anb’ileb’ chiru li hu li xawil chi elk sa’ xtz’uumal re laj Judio; ut sa’ li kutan naq ke’el chaq sa’ xtz’uumal re laj Judio, malaj sa’ li kutan naq ki’el chaq li hu sa’ xtz’uumal re laj Judio, tuqtu chaq ut saq chaq ru li k’a’aq re ru tz’iib’anb’il, ut q’axal nim xloq’al ut ch’olch’o ru chiru lix k’a’uxleb’ chixjunil li winq.

24 Ut k’e reetal, li na’leb’ tixtz’iib’a li apostol a’in re li Karneer, a’an naab’al li na’leb’ xawil laa’at; ut k’e reetal, li rela’ toj taawil.

25 A’b’anan li k’a’aq re ru taawil chirix a’in ink’a’ taatz’iib’a; xb’aan naq li Qaawa’ Dios kixk’ojob’ li apostol re lix Karneer li Dios re tixtz’iib’a.

26 Ut jo’kan ajwi’ xkomoneb’ chik li wanjenaqeb’, reheb’ a’an kixk’utb’esi chixjunil li k’a’aq re ru, ut ke’xtz’iib’aheb’; ut k’eeb’il xtz’apb’aleb’ re te’k’utmanq sa’ xsaqileb’ ru, jo’ chanru li yaal li wan rik’in li Karneer, sa’ li kutan k’oxlanb’il xb’aan li Qaawa’, re lix junkab’al laj Israel.

27 Ut laa’in, aj Nefi, kiwab’i ut ninch’olob’ xyaalal, naq lix k’ab’a’ lix apostol li Karneer, a’an laj Jwan, jo’ chanru li raatin li anjel.

28 Ut k’ehomaq reetal, laa’in, aj Nefi, yeeb’il we naq ink’a’ tintz’iib’a li rela’ li k’a’aq re ru kiwil ut kiwab’i; jo’kan ut, tz’aqal we li k’a’aq re ru xintz’iib’a; ut xintz’iib’a yal jun ch’ina raqal li k’a’aq re ru kiwil.

29 Ut ninch’olob’ xyaalal naq kiwil li k’a’aq re ru kiril lin yuwa’, ut lix anjel li Dios kixk’e chinnaw.

30 Ut anajwan nink’e xraqik aatinak chirix li k’a’aq re ru kiwil naq k’amb’ilin chaq sa’ li Musiq’ej, ut wi moko tz’iib’anb’il ta chixjunil li k’a’aq re ru kiwil, li jo’ k’ihal xintz’iib’a tz’aqal yaal. Ut chi jo’kan wan. Amen.