1 Ut anajwan, ex was wiitz’in raarookex inb’aan, xinye eere li na’leb’ a’in tz’iib’anb’il, re teenaw chirix lix sumwank li Qaawa’ li ki’ok wi’ sa’ sumwank rik’in chixjunil lix junkab’al laj Israel—

2 Li kiraatinaheb’ wi’ laj Judio, rik’in xtz’uumaleb’ re lix santil profeet, chalen chaq sa’ xtiklajik, chiru li junjunq tasal tenamit, toj tixtaw xq’ehil naq te’k’ojob’aaq wi’chik sa’ lix tz’aqal iglees ut xkorral li Dios, naq te’ch’utub’aaq wi’chik sa’eb’ lix ch’och’il li reechanihomeb’, ut te’xaqab’aaq sa’ chixjunileb’ lix ch’och’ li yeechi’inb’il.

3 K’ehomaq reetal, ex was wiitz’in raarookex inb’aan, ninye eere li na’leb’ a’in re taasaho’q sa’ eech’ool, ut teetaqsi lee jolom chi junelik, sa’ xk’ab’a’eb’ li osob’tesink li tixk’ojob’ chaq li Qaawa’ Dios sa’ xb’eeneb’ lee ralal eek’ajol.

4 Xb’aan naq ninnaw naq maak’a’jo’ naq xexsik’ok, naab’al eere, re teenaw chirix li k’a’aq re ru chalel; jo’kan ut, ninnaw naq laa’ex nekenaw naq tento taalajq ut taakamq li qatib’el; a’b’anan sa’ li qaxaqalil taqil ru li Dios.

5 Relik chi yaal, ninnaw naq laa’ex nekenaw naq a’an sa’ li tz’ejwalej tixk’ut rib’ chiruheb’ li wankeb’ chaq Jerusalen, li koo’el wi’ chaq laa’o; xb’aan naq ki’ajman ru naq taawanq sa’ xyanqeb’ a’an; xb’aan naq na’aje’ chiru li nimla aj Yo’ob’tesinel naq a’an tixkanab’ rib’ chi k’ehe’k rub’el xwankileb’ li winq sa’ li tz’ejwalej, ut taakamq choq’ re chixjunileb’ li winq, re naq chixjunileb’ li winq te’k’ehe’q rub’el xwankil a’an.

6 Xb’aan naq jo’ chanru naq li kamk numenaq sa’ xb’eeneb’ chixjunil li winq, re taatz’aqloq ru li k’uub’anb’il na’leb’ aj uxtaan re li nimla aj Yo’ob’tesinel, tento taawanq jun li wankilal re waklesink chi yo’yo, ut li wakliik chi yo’yo tento taachalq sa’ xb’een li winq sa’ xk’ab’a’ li t’ane’k; ut kichal li t’ane’k sa’ xk’ab’a’ li q’etok aatin, ut rik’in naq t’anenaq li winq, ke’isiik chaq chiru li Qaawa’.

7 Jo’kan naq tento taawanq choq’ xtojb’al rix li maak li maak’a’ roso’jik—wi ta moko wan ta choq’ xtojb’al rix li maak li maak’a’ roso’jik, li k’a’ru naq’a ink’a’ raj taaruuq tixk’e chirix li ink’a’ naq’a. Jo’kan naq tento raj naq kikana li xb’een raqb’a-aatin kichal sa’ xb’eeneb’ li winq chi maak’a’aq raj roso’jik. Ut wi ta jo’kan, li tz’ejwalej a’in tento raj naq kiyokla chi q’aak ut chi poqso’k chaq toj sa’ li ch’och’ li ki’alan chaq re, re naq ink’a’ chik taawakliiq.

8 Aay, k’a’jo’ lix chaab’ilal xna’leb’ li Dios, li ruxtaan ut li rusilal! Xb’aan naq k’ehomaq reetal, wi ta ink’a’ chik taawakliiq li tz’ejwalej, li qamusiq’ tento raj taa’ok rub’el xwankil li anjel a’an li kit’ane’ chaq chiru li Junelik Dios, ut ki’ok choq’ aj tza, li maajo’q’e chik taawakliiq.

9 Ut li qamusiq’ ki’ok raj chanchan a’an, ut laa’o raj aj tza, anjelo raj chiru jun aj tza, ut tootz’ape’q raj chiru li qaDios, ut tookanaaq raj rik’in lix yuwa’il li tik’ti’, sa’ rahilal, jo’ chanru ajwi’ a’an; relik chi yaal, a’an ajwi’ li kib’alaq’ink re li xb’een qana’ qayuwa’, li naxb’aanu rib’ chanchan jun li anjel re saqen, ut nareek’asiheb’ xch’ool li ralal xk’ajoleb’ li winq re te’ok sa’ muqmuukil molam re kamsink ut sa’ li k’iila paay chi muqmuukil k’anjel re q’ojyin.

10 Aay, k’a’jo’ xchaab’ilal li qaDios, li nakawresink re jun li b’e re too’eeleliq chaq chiru lix chapleb’ li xuwajel josq’ aj xul a’in; relik chi yaal, li josq’ aj xul re li kamk ut li xb’alb’a, a’an lix kamik li tz’ejwalej ninye re, jo’ ajwi’ xkamik li musiq’ej.

11 Ut sa’ xk’ab’a’ lix b’ehil li kole’k re li qaDios, lix Santil Dios laj Israel, li kamk a’in, li kin’aatinak wi’, a’an re li yu’am a’in, tixq’axtesiheb’ lix kamenaq; ut li kamk a’in a’an li muqleb’aal.

12 Ut li kamk a’in li kin’aatinak wi’, a’an li kamk re li musiq’ej, tixq’axtesiheb’ lix kamenaq; ut li musiq’ejil kamk a’in, a’an li xb’alb’a; jo’kan naq li kamk ut li xb’alb’a tento te’xq’axtesiheb’ lix kamenaq, ut li xb’alb’a tento tixq’axtesiheb’ li musiq’ej wankeb’ chi preexil aran, ut li muqleb’aal tento tixq’axtesiheb’ li tz’ejwalej li wankeb’ chi preexil aran, ut te’k’ojob’aaq wi’chik chirib’il rib’ lix tz’ejwaleb’ rik’in lix musiq’eb’ li winq; ut a’an xb’aan lix wankilal li wakliik chi yo’yo re lix Santil Dios laj Israel.

13 Aay, k’a’jo’ xnimal lix k’uub’anb’il na’leb’ li qaDios! Xb’aan naq chi junpak’al chik, lix hilob’aal li Dios tento tixq’axtesiheb’ lix musiq’eb’ li tiikeb’ xch’ool, ut li muqleb’aal tixq’axtesi lix tz’ejwaleb’ li tiikeb’ xch’ool; ut li musiq’ej ut li tz’ejwalej neke’k’ojob’aak wi’chik sa’ junajil, ut chixjunileb’ li winq neke’ok chi ink’a’ chik neke’q’a, chi moko chik neke’kam, ut a’aneb’ yo’yookil aamej, tz’aqal re ru lix na’leb’eb’ chanchano laa’o sa’ li tz’ejwalej, ka’ajwi’ naq tz’aqalaq re ru li qana’leb’.

14 Jo’kan naq tz’aqalaq re ru li qana’leb’ chirix chixjunil li qamaak wan, ut li qatz’ajnil, ut li qat’ust’uukilal, ut li tiikeb’ xch’ool tz’aqalaqeb’ re ru xna’leb’eb’ chirix lix sahileb’ xch’ool, ut lix tiikilaleb’, ut tiqtooqeb’ rik’in xsaqaleb’ ru, relik chi yaal, rik’in xb’aatal li tiikilal.

15 Ut taak’ulmanq naq chirix naq akaq xe’nume’ chaq chixjunil li winq sa’ li xb’een kamk a’in toj sa’ li yu’amej, rik’in naq okenaqeb’ sa’ li ink’a’ chik nakam, tento te’k’utunq chiru lix raqleb’aal aatin lix Santil Dios laj Israel; toja’ ut naq taachalq li raqb’a-aatin, toja’ ut naq tento taaraqe’q aatin chirixeb’ jo’ chanru lix santil raqb’a-aatin li Dios.

16 Ut relik chi yaal, jo’ naq yo’yo li Qaawa’, xb’aan naq a’ li Qaawa’ Dios kiyehok re, ut a’an li raatin li wan chi junelik, li ink’a’ naru na’oso’, naq eb’ li tiikeb’ xch’ool toj tiikaqeb’ ajwi’ xch’ool; ut eb’ li tz’ajeb’ ru toj tz’ajaqeb’ ajwi’ ru; jo’kan naq eb’ li tz’ajeb’ ru, a’aneb’ laj tza ut eb’ lix anjel; ut te’xik sa’ li xam li junelik nakana, li kawresinb’il choq’ reheb’; ut li rahilal te’xk’ul chanchan jun palaw re xam ut chuhil pek, li nataqe’ xxamlel chi junelik q’e kutan, ut maak’a’ roso’jik.

17 Aay, k’a’jo’ lix nimal ru ut lix tiikal ru xna’leb’ li qaDios! Xb’aan naq a’an naxk’e xb’aanunkil chixjunileb’ li raatin, ut xikenaqeb’ chaq sa’ xtz’uumal re, ut tento taatz’aqloq ru lix chaq’rab’.

18 A’ut k’ehomaq reetal, eb’ li tiikeb’ xch’ool, laj santil paab’aneleb’ re lix Santil Dios laj Israel, eb’ li xe’paab’ank re lix Santil Dios laj Israel, eb’ li ke’kuyuk re xk’amb’aleb’ li krus re li ruchich’och’, ut xik’ ke’ril lix xutaanal, eb’ a’an te’reechani li rawa’b’ejihom li Dios, li kikawresiik choq’ reheb’ chalen chaq sa’ xk’ojlajik li ruchich’och’, ut te’numtaaq xsahileb’ xch’ool chi junelik.

19 Aay, k’a’jo’ xnimal ru li ruxtaan li qaDios, lix Santil Dios laj Israel! Xb’aan naq a’an naxkoleb’ chaq lix santil paab’anel, chiru li xik’ob’aal josq’ aj xul a’an, a’an laj tza, ut li kamk, ut li xb’alb’a, ut li palaw a’an re xam ut chuhil pek, a’an li rahilal li maak’a’ roso’jik.

20 Aay, k’a’jo’ xnimal lix santilal li qaDios! Xb’aan naq a’an naxnaw chixjunil li k’a’aq re ru, ut maak’a’ k’a’ru wan li ink’a’ ta naxnaw.

21 Ut a’an nachal sa’ li ruchich’och’ re tixkoleb’ chixjunil li winq wi te’ab’inq chiru lix yaab’ xkux; xb’aan naq k’ehomaq reetal, a’an naxk’ul lix rahileb’ chixjunileb’ li winq, relik chi yaal, lix rahileb’ chixjunil li ani yo’ob’tesinb’il li wan xyu’am, li winq jo’ ajwi’ li ixq ut li kok’al, li wankeb’ sa’ lix junkab’al laj Adan.

22 Ut a’an naxk’ul li rahilal a’in re naq taanume’q li wakliik chi yo’yo sa’ xb’eeneb’ chixjunil li winq, re naq chixjunileb’ te’xaqliiq chiru a’an sa’ li nimla kutan re li raqb’a-aatin.

23 Ut a’an naxtaqlaheb’ chixjunil li winq naq tento te’xjal xk’a’uxl, ut te’kub’eeq xha’ sa’ lix k’ab’a’, chi tz’aqal re ru lix paab’aaleb’ chirix lix Santil Dios laj Israel, malaj ut ink’a’ te’ruuq chi kole’k sa’ li rawa’b’ejihom li Dios.

24 Ut wi ink’a’ te’xjal xk’a’uxl ut te’xpaab’ lix k’ab’a’, ut ink’a’ te’kub’eeq xha’ sa’ lix k’ab’a’, ut te’kuyuq toj sa’ roso’jik, tento te’k’ehe’q sa’ tojb’a-maak; xb’aan naq li Qaawa’ Dios, lix Santil Dios laj Israel, kiyehok re.

25 Jo’kan ut, a’an kixk’e jun li chaq’rab’, ut b’ar maajun chaq’rab’ k’eeb’il, maak’a’ li tojb’a-maak; ut b’ar wi’ maak’a’ li tojb’a-maak, maajun maak nak’ehe’ sa’ xb’eeneb’; ut b’ar wi’ moko k’eeb’il ta li maak sa’ xb’eeneb’, li ruxtaan lix Santil Dios laj Israel wan chik xwankil sa’ xb’eeneb’ sa’ xk’ab’a’ lix tojb’al rix li maak; xb’aan naq kolb’ileb’ chaq xb’aan lix wankilal a’an.

26 Xb’aan naq lix tojb’al rix li maak naxk’e jo’ nimal elajinb’il xb’aan lix tiik ruhil na’leb’, sa’ xb’eeneb’ chixjunil li ani moko k’eeb’il ta li chaq’rab’ reheb’, re naq kolb’ilaqeb’ chaq chiru li xuwajel josq’ aj xul a’an, a’an li kamk ut li xb’alb’a, ut laj tza, ut li palaw re xam ut chuhil pek, a’an li rahilal li maak’a’ roso’jik; ut neke’k’ojob’aak wi’chik rik’in li Dios a’an li kixk’e reheb’ li te’musiq’aq wi’, a’an lix Santil Dios laj Israel.

27 A’b’anan rahilal sa’ xb’een li ani k’eeb’il li chaq’rab’ re, relik chi yaal, li xk’uluk re chixjunil lix taqlahom li Dios, jo’ chanchano laa’o, ut naxq’eteb’, ut naxsachle lix kutankil lix yalb’al rix; xb’aan naq xuwajel lix wanjik a’an.

28 Aay, li b’alaq’il k’uub’anb’il na’leb’ a’an re li maa’us! Aay, lix jo’maajo’ileb’, ut lix q’unaleb’ xmetz’ew, ut lix majelal xna’leb’eb’ li winq! Xb’aan naq neke’xk’oxla naq chaab’ileb’ xna’leb’ naq yal tzolb’ileb’, ut ink’a’ neke’ab’ink chiru li na’leb’ k’eeb’il xb’aan li Dios, xb’aan naq neke’xkanab’, ut neke’xk’oxla naq xjuneseb’ rib’ neke’xnaw, jo’kan naq yal jo’maajo’ lix chaab’ilaleb’ xna’leb’ ut maak’a’ na’ok wi’ reheb’. Ut eb’ a’an te’oso’q.

29 A’ut chaab’il ajwi’ naq tzolb’ileb’ wi te’ab’inq chiru li na’leb’ k’eeb’il xb’aan li Dios.

30 A’ut rahilal sa’ xb’eeneb’ li b’ihom, li b’ihomeb’ jo’ chanru li k’a’aq re ru re li ruchich’och’. Xb’aan naq rik’in naq b’ihomeb’ xik’ neke’rileb’ li neb’a’, ut neke’xrahob’tesiheb’ li tuulan, ut k’eek’ookeb’ xch’ool chirix lix b’ihomaleb’; jo’kan naq lix b’ihomaleb’ wan choq’ xdioseb’. Ut k’ehomaq reetal naq te’oso’q ajwi’ lix b’ihomal rochb’eeneb’.

31 Ut rahilal sa’ xb’eeneb’ li tz’ap xik li ink’a’ te’ab’inq; xb’aan naq eb’ a’an te’oso’q.

32 Rahilal sa’ xb’eeneb’ li mutz’ li ink’a’ te’iloq; xb’aan naq eb’ a’an te’oso’q ajwi’.

33 Rahilal sa’ xb’eeneb’ li moko xk’ulumeb’ ta reetalil li sumwank sa’ xch’ool, xb’aan naq sa’ roso’jik li kutan sak’b’ilaqeb’ rik’in xnawb’al chirix lix maa’usilaleb’.

34 Rahilal sa’ xb’een laj tik’ti’, xb’aan naq a’an taatz’eqe’q taq’a sa’ xb’alb’a.

35 Rahilal sa’ xb’een laj kamsinel li nakamsin chi wan sa’ xch’ool, xb’aan naq a’an taakamq.

36 Rahilal sa’ xb’eeneb’ li neke’b’aanunk re li yumb’eetak ko’b’eetak, xb’aan naq eb’ a’an te’tz’eqe’q taq’a sa’ xb’alb’a.

37 Relik chi yaal, rahilal sa’ xb’eeneb’ li neke’loq’onink reheb’ li pak’b’il dios, xb’aan naq laj tza reheb’ chixjunil laj tza nasaho’ sa’ xch’ool rik’ineb’ a’an.

38 Jo’kan ut, rahilal sa’ xb’eeneb’ chixjunil li neke’kam sa’ lix maak; xb’aan naq te’sutq’iiq rik’in li Dios, ut te’ril li rilob’aal, ut toj te’wanq sa’ lix maakeb’.

39 Aay, Ex was wiitz’in raarookex inb’aan, chijultiko’q eere lix xik’ob’aalil li q’etok aatin chirix li Santil Dios a’an, jo’ ajwi’ lix xik’ob’aalil li xk’eeb’al eerib’ chiru lix q’unb’esinkil eech’ool xb’aan li seeb’ aj b’alaq’ a’an. Chijultiko’q eere, li k’oxlank jo’ chanru li tz’ejwalej, a’an kamk, ut li k’oxlank jo’ chanru li musiq’ej, a’an yu’am chi junelik.

40 Ex was wiitz’in, chek’e eexik chirab’inkil li waatin. Chijultiko’q eere lix nimal ru lix Santil Dios laj Israel. Meeye naq xinye kawil aatin cherix; xb’aan naq wi nekeb’aanu, teehob’ li yaal; xb’aan naq xinye li raatin laj yiib’ahom eere. Ninnaw naq kaw li yaalil aatin choq’ re chixjunil li tz’ajnil; a’ut eb’ li tiikeb’ xch’ool ink’a’ neke’xxuwa, xb’aan naq eb’ a’an neke’xra li yaal, ut ink’a’ neke’eek’an.

41 Jo’kan ut, ex was wiitz’in raarookex inb’aan, chalqex rik’in li Qaawa’, li Santil Dios. Chijultiko’q eere naq tiikeb’ lix b’e. K’ehomaq reetal, ka’ch’in ru li b’e choq’ re li winq, a’b’an jun tiikal naxik chiru, ut li na’ilok re li okeb’aal, a’an lix Santil Dios laj Israel; ut maajun xmoos naxk’e chi wank aran; ut maajun chik b’e wan, ka’ajwi’ chiru li okeb’aal, xb’aan naq ink’a’ naru nab’alaq’iik a’an, xb’aan naq li Qaawa’ Dios, a’an xk’ab’a’.

42 Ut ani natoch’ok, chiru a’an taatehoq; ut eb’ li nim xna’leb’eb’, ut li tzolb’ileb’, ut eb’ li b’ihomeb’, li nimob’resinb’ileb’ rib’ sa’ xk’ab’a’ li xe’tzole’ wi’, ut sa’ xk’ab’a’ lix nimaleb’ xna’leb’, ut lix b’ihomaleb’—relik chi yaal, a’aneb’ a’an li xik’ ilb’ileb’ xb’aan; ut wi ink’a’ neke’xtz’eq chirixeb’ li na’leb’ a’in, ut neke’xk’oxla rib’ naq maak’a’eb’ xna’leb’ chiru li Dios, ut neke’xkub’si rib’ sa’ xchamal li tuulanil ch’oolej, a’an ink’a’ taatehoq chiruheb’.

43 Li k’a’aq re ru reheb’ li chaab’ileb’ xna’leb’ ut li seeb’eb’ chi na’leb’ank taamuqe’q b’an chiruheb’ chi junajwa—relik chi yaal, li sahil ch’oolejil a’an li kawresinb’il choq’ reheb’ laj santil paab’anel.

44 Aay, ex was wiitz’in raarookex inb’aan, chijultiko’q eere li waatin. K’ehomaq reetal, nawisi li waq’ ut ninchiq’chiq’i cheru; nintz’aama chiru li Dios re lin kolb’al naq tinril rik’in lix naq’ ru li na’ilok re chixjunil; jo’kan naq laa’ex teenaw sa’ roso’jik li kutan, naq taaraqmanq aatin chirix chixjunileb’ li winq xb’aan lix k’anjeleb’, naq lix Dios laj Israel kiril naq laa’in kinchiq’chiq’i chaq chiru li waam lee maa’usilal, ut naq ninxaqli chiru rik’in xlemtz’unkil wu, ut isinb’il chiwix lee kik’el.

45 Ex was wiitz’in raarookex inb’aan, sutq’isihomaq chaq eerib’ rik’in lee maak; chiq’omaq chaq cherix lix b’ak’leb’ ch’iich’ a’an li taab’ak’oq raj eere chi kaw; chalqex rik’in li Dios a’an li wan choq’ saqoonaq re lee kolb’al.

46 Kawresihomaq lee raam choq’ re li kutan a’an nim xloq’al naq taak’anjelamanq li k’a’ru tiik ru choq’ reheb’ li tiikeb’ xch’ool, a’an li kutan re raqb’a-aatin, re naq ink’a’ teeka’ch’inob’resi eerib’ rik’in rahil xiw, re naq ink’a’ taajultiko’q eere chi tz’aqal re ru xxuwajelil li maak wan sa’ eeb’een, ut tex’elajiiq chixyeeb’al: Sant, santeb’ laa raqb’a-aatin, at Qaawa’ Dios Nimajwal—a’b’an ninnaw naq wan inmaak, xinq’et laa chaq’rab’, ut we laa’in li q’etok aatin xinb’aanu; ut laj tza xinreechani, ut chapb’ilin xb’aan lix xuwajel rahilal.

47 A’ut k’ehomaq reetal, ex was wiitz’in, ma na’ajman ru naq tinwajsi eeru re teenaw lix xuwajel xyaalal li na’leb’ a’in? Ma tintawasi raj eeraam wi ta raj saq ru lee k’a’uxl? Ma texwaatina raj chi saqen ru jo’ chanru xsaqenkil ru li yaal wi ta maak’a’ li maak eerik’in?

48 K’ehomaq reetal, wi ta santex texwaatina raj chirix li santilal; a’b’anan jo’ moko santex ta, ut nikineeril jo’ aj tzolonel, aajel ru naq tento naq texintzol chirix li k’a’ru na’ux sa’ xk’ab’a’ li maak.

49 K’ehomaq reetal, li waam xik’ naril li maak, ut lin ch’ool nasaho’ rik’in li tiikilal; ut tinnima ru lix santil k’ab’a’ lin Dios.

50 Chalqex, ex was wiitz’in, li junjunq li taachaqiq re, chexchalq sa’ li ha’; ut li ani maak’a’ xtumin, chalqex, loq’onqex ut wa’inqex; relik chi yaal, chalqex, loq’omaq chaq li viin ut li leech chi maak’a’ tumin ut chi maak’a’ xtz’aq.

51 Jo’kan ut, meesach li tumin re xk’ulb’al li k’a’ru maak’a’ na’ok wi’, chi moko lee k’anjel re xk’ulb’al li k’a’ru ink’a’ naru chi sahob’resink ch’oolej. Chineerab’i chi yalb’il eeq’e, ut chijultiko’q eere li aatin kinye; ut chalqex rik’in lix Santil Dios laj Israel, ut chetzeka xsahil li k’a’ru ink’a’ na’oso’, chi moko naru napo’e’, ut chisaho’q lee raam rik’in naab’alil.

52 K’ehomaq reetal, ex was wiitz’in raarookex inb’aan, chijultiko’q eere li raatin lee Dios; chi kutan meekanab’ tijok chiru, ut chexb’aantioxinq chiru lix santil k’ab’a’ chi q’eq. Chisaho’q sa’ lee ch’ool.

53 Ut k’ehomaq reetal chanru xnimaleb’ lix sumwank li Qaawa’, ut chanru xnimal li naxkub’si rib’ chixb’aanunkil choq’ reheb’ li ralal xk’ajoleb’ li winq; ut sa’ xk’ab’a’ lix nimal ru, ut li rusilal ut li ruxtaan, a’an kixyeechi’i qe naq ink’a’ te’sache’q chi junajwa li qiyajil, jo’ chanru li tz’ejwalej; tixkoleb’ b’an rix, ut sa’eb’ li tasal tenamit li toj te’chalq te’ok choq’ jun ruq’ che’ tiik xch’ool re lix junkab’al laj Israel.

54 Ut anajwan, ex was wiitz’in, toj wan chik texwaatina wi’ raj; a’b’an toj wulaj tinch’olob’ cheru xkomon chik li waatin. Amen.