Tohi ʻa Paulá, Ngaahi

Naʻe fai ʻe Paula ʻa e tohi ki he kau Tēsaloniká mei Kolinitō lolotonga ʻene fononga fakafaifekau hono uá. ʻOku fakamatalaʻi ʻene ngaahi ngāue ʻi Tēsaloniká ʻi he Ngāue vahe 17. Naʻá ne fie foki ki he kakai Tēsaloniká, ka naʻe ʻikai te ne lava ʻo foki ki ai (1 Tēsal. 2:18). Ko ia naʻá ne fekauʻi atu ai ʻa Tīmote ke ne ueʻi hake ʻa e loto ʻo e kau uluí ke nau fiefia pea foki mai mo ha fakamatala ʻo kau ki he meʻa ʻoku hoko kiate kinautolú. Naʻe fai ʻa e ʻuluaki tohí tuʻunga ʻi heʻene fakafetaʻi koeʻuhi ko e foki mai ʻa Tīmoté. Naʻe fai ʻa e tohi hono uá ʻi he hili ha kiʻi taimi siʻi mei ai.

Naʻe fai ʻe Paula ʻa ʻene ongo tohi ki he kakai Kolinitoó lolotonga ʻene fononga fakafaifekau hono tolú, ko e tali ki ha ngaahi fehuʻi mo fakatonutonu ʻa e moveuveu ʻi he Kāingalotu ʻi Kolinitoó.

Mahalo naʻe fai ʻa e tohi ki he kakai Kalētiá ki ha ngaahi ʻiuniti lahi ʻo e Siasí ʻi Kalētia. Naʻe ʻi ai ha kāingalotu ʻe niʻihi ʻo e Siasí naʻa nau liʻaki ʻa e ongoongoleleí koeʻuhi ko e lao faka-Siú. Naʻe hanga ʻe Paula ʻo fakamatalaʻi ange ʻi he tohi ko ʻení ʻa e taumuʻa ʻo e fono ʻa Mōsesé pea mo hono mahuʻinga ʻo e lotu fakalaumālié.

Naʻe fai ʻe Paula ʻa e tohi ki he kakai Lomá mei Kolinitō, pea ko e taha ʻo hono ngaahi ʻuhingá ke ne teuteuʻi ʻa e Kāingalotu ʻi Lomá ki haʻane teu ʻaʻahi ange kiate kinautolu. Naʻe hanga ʻe he tohi ko ʻení ʻo toe fakapapauʻi ange ʻa e ngaahi tokāteline naʻe fakakikihiʻi ʻe ha niʻihi ʻo e kau Siu ko ia naʻa nau ului ki he tui faka-Kalisitiané.

Naʻe fai ʻe Paula ʻa e ngaahi tohi ko ʻení lolotonga ʻene ʻi he fale fakapōpulá ʻi heʻene ʻuluaki ʻalu ki Lomá.

Naʻe fai ʻe Paula ʻa e tohi ki he kakai Filipaí ke fakahā pē ʻa ʻene fakamālō mo hono ʻofa ki he Kāingalotu Filipaí pea ke fakafiefiaʻi kinautolu tuʻunga ʻi heʻenau mamahi ʻi heʻene nofo pōpula fuoloá.

Naʻe fai ʻe Paula ʻa e tohi ki he kakai Kolosé tupu mei ha lipooti naʻá ne maʻu ʻoku tō ʻa e Kāingalotu Kolosé ki ha fehalaaki lahi. Naʻa nau tui ʻoku tupu ʻa e haohaoá ʻi he tauhi pau ki he ngaahi ouau fakatuʻasinó pē kae ʻikai ʻi hono fakatupulekina ʻo e ʻulungāanga ʻoku faka-Kalaisí.

ʻOku mahuʻinga ʻaupito ʻa e tohi ki he kakai ʻEfesoó, he ʻoku kau ki ai ʻa e ngaahi akonaki ʻa Paula ʻo kau ki he Siasi ʻo Kalaisí.

Ko e tohi kia Filimoné ko ha tohi fakafoʻituitui pē ia ʻo kau kia ʻOnesimosi, ʻa ia ko ha pōpula ʻa ia naʻá ne kaihaʻa mei hono ʻeiki ko Filimoné, pea hola ia ki Loma. Naʻe fakafoki ʻe Paula ʻa ʻOnesimosi ki hono ʻeikí mo ha tohi ʻo kole kiate ia ke fakamolemoleʻi ʻa ʻOnesimosi.

Naʻe fai ʻe Paula ʻa e tohi ki he kakai Hepeluú ki he kāingalotu Siu ʻo e Siasí ke fakalotoʻi ʻa kinautolu kuo fakahoko ʻa e fono ʻa Mōsesé ʻia Kalaisi, pea kuo fetongi ia ʻe he fono ʻo e ongoongolelei ʻa Kalaisí.

Naʻe fai ʻe Paula ʻa e ngaahi tohi ko ʻení hili hono ʻuluaki tuku ange ia mei he fale fakapōpula ʻi Lomá.

Naʻe fononga ʻa Paula ki ʻEfesō, ʻa ia naʻá ne tuku ai ʻa Tīmote ke ne taʻofi ʻa e tupu ʻo e ngaahi fakakaukau halá, he naʻá ne ʻamanaki ke ne toki foki mai ki ai ʻamui. Mahalo naʻá ne fai ʻa ʻene ʻuluaki tohi kia Tīmoté mei Masitōnia, ke faleʻi mo fakalotolahiʻi ia ʻi hono fakahoko hono fatongiá.

Naʻe fai ʻe Paula ʻa e tohi kia Taitusí lolotonga ha taimi naʻe tuku ange ai ia mei he fale fakapōpulá. Mahalo naʻá ne ʻaʻahi ki Keliti, ʻa ia naʻe lolotonga ngāue ai ʻa Taitusí. Naʻe lau pē ʻa e tohí ki he moʻui māʻoniʻoní mo e fakatonutonu ʻoku fai ʻi he loto Siasí.

Naʻe fai ʻe Paula ʻa ʻene tohi hono ua kia Tīmoté lolotonga ʻene nofo pōpula hono uá, ki muʻa siʻi pē ʻi hono fakapoongi ʻo Paulá. ʻOku kau ʻi he tohi ko ʻení ʻa e ngaahi lea fakaʻosi ʻa Paulá pea ʻoku hā mei ai ʻa e fakaofo ʻo ʻene loto-toʻa mo e loto-falala naʻá ne maʻu ʻi heʻene fehangahangai mo e maté.