¶ 1 TOKAGA ki he mahina ko Abibi, bea fai ai ae laka‐atu kia Jihova ko ho Otua: koeuhi nae omi koe e Jihova ko ho Otua mei Ijibite i he bouli i he mahina ko Abibi.

2 Koia ke ke feilaulau aki ae laka‐atu kia Jihova ko ho Otua, mei he faga manu jii moe faga manu lalahi, i he botu koia e fili e Jihova ke ai ki ai hono huafa.

3 Oua naa ke kai mo ia ae ma kuo fakalevani: ke ke kai ia moe ma tae fakalevani i he aho e fitu, io ae ma oe fakamamahi; he naa ke ha‘u kitua mei he fonua ko Ijibite i he fakatootoo: koeuhi ke ke manatu ai ki he aho naa ke ha‘u ai mei he fonua ko Ijibite i he aho kotoabe o hoo moui ni.

4 Bea oua naa ilo iate koe ha ma kuo fakalevani i ho fonua kotoabe i he aho e fitu; bea koe kakano oku feilaulau aki i he efiafi oe uluaki aho, oua naa tuku hono toe i he bo koia ki he bogibogi.

5 Oku ikai gofua ke tamate‘i ae laka‐atu i ho gaahi lotoa kotoabe, aia oku foaki e Jihova ko ho Otua kiate koe:

6 Ka i he botu koia aia e fili e Jihova ko ho Otua ke ai ki ai hono huafa, koe botu koia ke ke feilaulau aki i ai ae laka‐atu i he efiafi, i he alu hifo ae laa, i he feituu naa ke ha‘u ai kitua mei Ijibite.

7 Bea te ke too o kai ia i he botu aia e fili e Jihova ko ho Otua: bea te ke foki i he bogibogi o alu ki ho gaahi fale fehikitaki.

8 Koe aho e ono ke ke kai ma tae fakalevani: bea ke fai i hono fitu oe aho ae fakataha maonioni kia Jihova ko ho Otua: oua naa ke fai ai ha gaue e taha.

¶ 9 Ke ke lau kiate koe ae uike e fitu: ke ke kamata hoo lau ae uike e fitu mei he aho oku ke fuofua ai ae helebiko  ke tuuji ae uite.

10 Bea ke tauhi ae katoaga oe gaahi uike kia Jihova ko ho Otua aki ae feilaulau oe mea loto lelei mei ho nima, aia ke ke atu o fakatatau ki he tabuaki‘i koe e Jihova ko ho Otua:

11 Bea te ke fiefia koe i he ao o Jihova ko ho Otua, akoe, mo ho foha, mo ho ofefine, mo hoo tamaioeiki, mo hoo kaunaga, moe Livai aia oku i hoo kolo, moe muli, moe tamai mate, moe witou, aia oku iate kimoutolu, i he botu aia e fili e Jihova ko ho Otua ke ai ki ai hono huafa.

12 Bea te ke manatu naa ke bobula koe i Ijibite: bea te ke tokaga mo fai ae gaahi tuutuuni koeni.

¶ 13 Ke ke tokaga ki he katoaga oe gaahi fale fehikitaki i he aho e fitu, i he hili hoo tanaki hoo uite mo hoo uaine.

14 Bea te ke fiefia i hoo katoaga, akoe, mo ho foha, mo ho ofefine, mo hoo tamaioeiki, mo hoo kaunaga, moe Livai, moe muli, moe tamai mate, moe fefine baea, aia oku i ho lotoa.

15 Ke ke tauhi ae katoaga maonioni i he aho e fitu kia Jihova ko ho Otua i he botu aia e fili e Jihova: koeuhi e tabuaki‘i koe e Jihova ko ho Otua i hoo tubu mea kotoabe, bea i he gaahi gaue kotoabe a ho nima, koia ke ke fiefia mooni ai.

¶ 16 E liuga tolu i he ta‘u ae fakaha a hoo kakai tagata kotoabe i he ao o Jihova ko ho Otua i he botu aia e fili eia; i ho katoaga oe ma tae fakalevani, bea i he katoaga oe gaahi uike, bea i he katoaga oe gaahi fale fehikitaki: bea oua naa mou ha‘u mola be akimoutolu i he ao o Jihova:

17 E foaki e he tagata kotoabe o fakatatau mo ene mafai, o tāu moe tabuaki a Jihova ko ho Otua aia kuo ne foaki kiate koe.

¶ 18 Ke ke fakanofo ae kau fakamāu moe kau matābule kiate koe i hoo gaahi kolo kotoabe, aia oku tuku kiate koe e Jihova ko ho Otua, i ho gaahi faahiga kotoabe: bea ke nau fakamāu ae kakai i he fakamāu agatonu.

19 Oua naa ke fakahala‘i ae fakamāu; oua naa ke filifilimanako ki he tagata, be ma‘u ha tukugoue: he oku fakakui e he mea foaki ae mata oe boto, mo ne fakahala‘i ae lea ae agatonu.

20 Koia oku matuaki agatonu ke ke muimui ki ai, koeuhi ke ke moui ai koe, bea ma‘u ae fonua aia oku foaki e Jihova ko ho Otua kiate koe.

¶ 21 E ikai te ke to ekoe ha gaahi akau ke ofi ki he feilaulauaga o Jihova ko ho Otua, aia te ke gaohi kiate koe.

22 Bea e ikai te ke fokotuu kiate koe ha mea fakatātā; aia oku fehia ki ai a Jihova ko ho Otua.