¶ 1 KABAU e ai ha fakakikihi i he kau tagata, bea nau omi ki he faka māu, ke fakamāu‘i akinautolu e he kau fakamāu: bea ke nau fakatonuhia ae maonioni, mo fakahalaia ae agahala.

2 Bea e behe, kabau oku totonu ke ta‘i ae agakovi, e fekau e he fakamāu ke fakatokoto ia ki lalo, bea ke ta‘i ia i hono ao o fakatatau ki he ene kovi, moe ta oku lau.

3 E gofua ke ai ke fagofulu ae ta, ka e ikai fakalahi ia: telia, i he ene fakalahi ia, o ta‘i aki ae ta lahi hake i he gaahi ta ni, e hoko ai ho tokoua koe kovi lahi i ho ao.

¶ 4 Oua naa ke nonoo ae gutu oe bulu i he ene malaki ae uite.

¶ 5 Kabau oku nofo fakataha ae kaiga, bea bekia ha nau toko taha, bea ikai ha fānau, oua naa fakamau ae unoho o ia kuo bekia mo ha taha mamao: kae alu kiate ia ae tokoua o hono unoho, o omi kiate ia ko hono unoho, bea fai ai ae gaue oe tokoua oe unoho kiate ia.

6 Bea e behe, koe uluaki tama oku fanau‘i e hoko ia ki he higoa o hono tokoua aia kuo bekia, koeuhi ke oua naa tamate‘i hono higoa mei Isileli.

7 Bea kabau oku ikai lelei ki he tagata ke omi kiate ia ae unoho o hono tokoua tuku ke alu ae unoho o hono tokoua ki he kau mātua, o lea behe, Oku taeloto ae tokoua o hoku unoho, ke fakatubu ae higoa ki hono tokoua i Isileli, oku ikai fie fai e ia ae gaue ae tokoua o hoku unoho.

8 Bea e toki fekau kiate ia e he kau mātua o ene kolo, o nau lea kiate ia: bea kabau oku mau be hono loto, o ne behe, Oku ikai lelei kiate au ke ma‘u ia;

9 E toki ha‘u kiate ia ae unoho o hono tokoua i he ao oe kau mātua, o ne vete hono tobuva‘e mei hono va‘e, bea aanu ki hono mata, bea ne lea o behe, E behe be hono fai ki he tagata aia oku ikai loto ke laga hake ae fale o hono tokoua.

10 Bea e ui hono higoa i Isileli, Koe fale o ia kuo vete hono tobuva‘e.

¶ 11 Kabau e kē ha ogo tagata o fefauhi o fai, bea ha‘u ae unoho oe toko taha ke fakamoui hono unoho mei he nima o ia oku ne ta‘i ia, bea mafao atu hono nima, ke buke ia i he botu fufu:

12 Te ke tutuu hono nima, oua naa ofa ho mata kiate ia.

¶ 13 Oua naa ke ai i hoo kato ae gaahi maka fakamamafa kehekehe, ae lahi moe jii.

14 Oua naa ke ma‘u i ho fale ae buha fua kehekehe, ae lahi moe jii.

15 Ka ke ma‘u ekoe ae maka haohaoa mo totonu, moe buha fua haohaoa mo totonu koia te ke ma‘u: koeuhi ke fakaloloa ai ho gaahi aho i he fonua aia oku foaki e Jihova ko ho Otua kiate koe.

16 He ko kinautolu kotoabe oku fai mea behe, mo ia kotoabe oku fai tae maonioni, koe mea kovi lahi ia kia Jihova ko ho Otua.

¶ 17 Manatu ki he mea nae fai e Amaleki kiate koe i he hala, hili hoo mou ha‘u mei Ijibite;

18 A ene fakafetaulaki kiate koe i he hala, o ne teia a ho mou mui fonoga, io akinautolu kotoabe nae muimui vaivai iate koe, i hoo vaivai mo hoo ogojia; bea nae ikai manavahe ia ki he Otua.

19 Koia e hoko o behe, oka tuku kiate koe e Jihova ko ho Otua, ae mālōlō mei ho gaahi fili kotoabe oku tuu takatakai, i he fonua aia oku foaki e Jihova ko ho Otua kiate koe ko ho tofia, te ke tamate‘i ae manatu ki Amaleki mei he lalo lagi; oua naa ke fakagalo‘i eni.